Саалтыр 113
113
1Израиль Египеттэн тахсыбытыгар,
Иаков норуота атын тыллаах норуоттан барбытыгар,
2 Иуда Айыы Тойон сибэтиэй норуота,
Израиль Кини бас билиитэ буолбута.
3Муора ону көрөн, киэр куоппута,
Иордан эмиэ төттөрү устубута.
4Хайалар барааннар курдук ыстаҥаласпыттара,
томтордор бараан оҕолорунуу ойуоккаласпыттара.
5Тоҕо эн, муора, маннык куоттуҥ?
Тоҕо эн, Иордан, төттөрү уһуннуҥ?
6Тоҕо, хайалар, барааннар курдук ыстаҥалаһаҕыт,
томтордор бараан оҕолорунуу ойуоккалаһаҕыт?
7-8Титирэстээ, сир, Айыы Тойон иннигэр,
туруук хайаны толору уулаах күөлгэ кубулутар,
тааһы уу төрдө оҥорор Иаков Таҥаратын иннигэр!
9Биһигини буолбатах, Айыы Тойон, биһигини буолбатах –
бигэ тапталыҥ уонна кырдьыгыҥ туһугар,
Бэйэҥ ааккын албан аатырт.
10Тоҕо туора омуктар биһигини:
«Таҥаралара ханнаный?» – диэхтээхтэрий?
11Биһиги Таҥарабыт халлааннарга баар;
Кини тугу баҕарбытын барытын оҥорор.
12Оттон кинилэр эмэгэттэрэ үрүҥ көмүс, кыһыл көмүс –
киһи илиитинэн оҥоһуга.
13Айахтаахтар да, саҥарбаттар,
харахтаахтар да, көрбөттөр;
14кулгаахтаахтар да, истибэттэр,
таныылаахтар да, сыты ылбаттар,
15илиилээхтэр да, тутан-хабан билбэттэр,
атахтаахтар эрээри, хаампаттар;
куолайдарыттан саҥа дорҕоонун таһаарбаттар.
16Кинилэри оҥорооччулар бэйэлэрэ эмиэ ситигирдиктэр;
кинилэргэ эрэнээччилэр эмиэ атына суохтар.
17Израиль! Айыы Тойоҥҥо эн эрэн;
Кини биһиэхэ көмөлөһөр, биһиэхэ куйах буолар.
18 Аарон дьиэтэ! Айыы Тойоҥҥо эн эрэн;
Кини биһиэхэ көмөлөһөр, биһиэхэ куйах буолар.
19 Айыы Тойонтон куттанааччылар!
Айыы Тойоҥҥо эһиги эрэниҥ;
Кини биһиэхэ көмөлөһөр, биһиэхэ куйах буолар.
20 Айыы Тойон биһигини умнубат,
Кини биһигини алгыаҕа:
алгыаҕа Израиль дьиэтин,
алгыаҕа Аарон дьиэтин;
21Кини Айыы Тойонтон куттанааччылары,
кыраны да, улууну да, – барыларын алгыаҕа.
22 Айыы Тойон ууһата турдун эһиги удьуоргутун,
бэйэҕит да, оҕолоргут да оҕолорун.
23Сири-халлааны айбыт Айыы Тойон
эһигини алгыахтын.
24Халлаан – Айыы Тойон халлаана,
оттон сири Кини киһиэхэ биэрбитэ.
25Өлбүттэр Айыы Тойону айхаллыахтара суоҕа,
ииҥҥэ түһээччилэр Кинини уруйдуохтара суоҕа –
26биһиги айхаллыахпыт Айыы Тойону
аны мантан инньэ үйэлэр тухары.
Аллилуия.
Currently Selected:
Саалтыр 113: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
