Аман өһө 21
21
1Ыраахтааҕы сүрэҕэ Айыы Тойон илиитигэр уу сүүрүгүн кэриэтэ:
Айыы Тойон кинини хайа баҕарар диэки хайыһыннарыаҕа.
2Санааҕар, көнө суолунан иһэҕин эрээри,
сүрэххин Айыы Тойон тургутан көрөр.
3 Айыы Тойон сиэрдээх быһыыны, көнө дьүүлү
хайа да сиэртибэтээҕэр сөбүлээн ылынар.
4Сиэрэ суох бэрдимсийии, бэйэни үрдүктүк сананыы –
нэгэй дьон кэмэлдьитэ; ити барыта аньыы.
5Киһи сыралаһан байар-тайар;
ким тиэтэйэр, ол дьадайар.
6Сымыйаны этэн байарга дьулуһар киһи
тыалы-кууһу эккирэтэр, өлөр суолун оҥостор.
7Куһаҕаны оҥорооччу буруйа-аньыыта бэйэтигэр түһүөҕэ –
көнө суолтан туораабыта кэнчиэлээх буолуоҕа.
8Түөкэй суола эрийэ-буруйа барар,
оттон ыраас дууһалаах көнө суолу тутуһар.
9Киҥнээх дьахтардыын биир дьиэҕэ олоруох кэриэтэ
хоспох муннугар соҕотоҕун олорбут ордук.
10Куһаҕан киһи куһаҕаҥҥа баҕарар,
онон доҕорун да харыстыы барыа суоҕа.
11Кэрээнэ суоҕу кэһэттэххинэ, кэнэннэр өйдөнүөхтэрэ;
муударайы үөрэттэххинэ, билиитэ-көрүүтэ эбии кэҥиэҕэ.
12Кырдьыктаах Таҥара хара санаалаахтар дьиэлэрин кэтээн көрөр,
онон кинилэри бүтэһиктээхтик самнарыаҕа.
13Дьадаҥы ытыырын истимээри, кулгааҕын саба туттар киһи
кэлин бэйэтэ ытыа да, кинини ким да истиэ суоҕа.
14Кистэлэҥ бэлэх кыыһырбыты сымнатар,
куду анньыллыбыт бэрик уордайбыты уҕарытар.
15Көнө дьүүл кыайдаҕына, кырдьыксыт үөрэр,
куһаҕан киһи дьиксинэр.
16Муударас суолуттан туорааччы
өлбүттэр ортолоругар олохсуйуоҕа.
17Көрү-нары сырсааччы дьадайыаҕа,
арыгыны батыһааччы, күндү аһылыгы аһааччы байыа суоҕа.
18Көнө туһугар көлдьүнү,
кырдьыксыт туһугар албынньыты толук биэриэхтэрэ.
19Куһаҕан майгылаах, киҥнээх дьахтары кытта бииргэ олоруохтааҕар
кумах куйаарга соҕотоҕун олорбут ордук.
20Муударай киһи дьиэтэ-уота барҕа баайдаах,
оттон акаары булбутун барытын ыһан-тоҕон кэбиһэр.
21Көнө сүрэхтээх, үтүө санаалаах киһи уһун олоҕу олоруоҕа,
көрдөөбүт кырдьыгын булуоҕа; кини үрдүк аата уһуоҕа.
22Муударай киһи бухатыырдар куораттарын бас бэриннэриэҕэ,
эрэммит кириэппэстэрин үрэйиэҕэ.
23Ким тылын кыатанар,
ол алдьархайтан харыстанар.
24Баламат быһыылаах бэрдимсик – оннугу кэрээниттэн тахсыбыт дииллэр –
харса-хабыра суох, туохтан да толлон-торуттан турбат.
25Үлэлиэн баҕарбат күөх көппө аска ымсыыра сытан
сутаан өлүөҕэ.
26Кини уһун күнү быһа иҥсэ кэбистэрэр,
оттон үтүө киһи дьонугар-сэргэтигэр кэччэйбэккэ бэрсэр.
27Сидьиҥнэр биэрэр сиэртибэлиин сидьиҥнэр,
оннооҕор өссө куһаҕан – кэтэх санаалаах бэриллэр сиэртибэ.
28Албын туоһу өлүөҕэ,
оттон болҕомтолоох туоһу түмүк тылы этиэҕэ.
29Куһаҕан киһи көрдөххө эрэ хорсун курдук,
оттон үтүө киһи көнө суолу бигэтик тутуһар.
30Хайдахтаах да улуу муударас, өркөн өй, өйдөөх сүбэ-ама
Айыы ТойонУ утарар күүһэ суох.
31Кыргыһыыга киирээри, аттарын бэлэмнииллэр,
ол эрээри кыайыыны Айыы Тойон бэлэхтиир.
Currently Selected:
Аман өһө 21: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
