Аман өһө 19
19
1Акаарытын аанньа буор сымыйаччы баайдааҕар
иҥэ-дьаҥа суох дьадаҥы быдан ордук.
2Киһи дууһата билиитэ-көрүүтэ суох иэдэйэр;
ким тиэтэйэр, ол бүдүрүйэр.
3Киһи бэйэтин акаарытыгар суолун сүтэрэн баран,
Айыы Тойоҥҥо абарар.
4Баай-тала атастары хаҥатар,
оттон дьадаҥы бэл доҕоруттан матар.
5Албын туоһу накаастабылтан куотуо суоҕа,
сымыйаны этээччи быыһаныа суоҕа.
6Биллиилээх дьоҥҥо үгүстэр бэрт буолаллар,
бойом илиилээххэ ким барыта доҕор.
7Дьадаҥыттан аймахтара кытта дьалты тутталлар,
эгэ доҕотторо тэйбэттэрэ кэлиэ дуо!
Эккирэтэ сылдьан кэпсэтэ сатыыр да, кинини ким да сэҥээрбэт#19:7 Былыргы еврей тылынан суруллубут тиэкис бу кэрчигин ис хоһооно чуолкайа суох..
8Ким бэйэтигэр үчүгэйи баҕарар, ол муудараска дьулуһар,
ким өйдөөн-төйдөөн сылдьар, ол үтүөнү булар.
9Албын туоһу накаастабылтан куотуо суоҕа,
сымыйаччы өлүөҕэ.
10Акаары баайдык-талымнык олороро – сүөргү суол,
оннооҕор өссө сүөргү – кулут тойотторго бас-көс буолара.
11Үтүө өйдөөх киһи киэҥ көҕүстээх;
атаҕастабылы бырастыы гыныы – дьоһуннаах быһыы.
12Ыраахтааҕы уордайара хахай хаһыырарыгар тэҥнээх,
оттон кини үтүө сыһыана окко түспүт сиик кэриэтэ.
13Акаары уол – аҕатын муҥа-таҥа;
тыллаах дьахтар – астыбат ардах.
14Дьиэ-уот, баай-дуол төрөппүттэртэн тиксэр,
оттон өйдөөх ойох – Айыы Тойон бэлэҕэ.
15Күөх көппө утуйарын таптыыр,
көрүнньүк үлэһит аччыктыыр.
16Кэс тылы тутуһааччы үйэтин моҥуоҕа,
оттон суолун-ииһин болҕойбот киһи өлүөҕэ.
17Дьадаҥыга бэрсиэҥ – Айыы Тойоҥҥо иэстиэҥ:
үтүөҕүн Кини толору төлүөҕэ.
18Эрэл баарын тухары уолгун уостуганныы сырыт,
сэрэн, аны оҕоҕун мүччү тутаайаҕын.
19Бардам киһи буруйга-сэмэҕэ тардылыннын,
быыһаан ылыаҥ – батааска биэриэҥ#19:19 Былыргы еврей тылынан суруллубут тиэкис бу кэрчигин ис хоһооно чуолкайа суох..
20Сүбэни-аманы иһит, сэмэни-суҥханы ылын,
оччоҕо кэлин бэйэҥ муударай буолуоҥ.
21Сүрэх баҕата баһаам да,
Айыы Тойон быһаарбыта эрэ туолуоҕа.
22Киһи биир бастыҥ өрүтэ – бэриниилээх буолуу#19:22 Киһи биир бастыҥ өрүтэ – бэриниилээх буолуу – Эбэтэр, Иҥсэ буолуу – сааттаах суол.;
сымыйаччы буолуох кэриэтин быста дьадайбыт ордук.
23Киһи Айыы Тойоҥҥо ытыктабылынан тыыннаах сылдьар,
онон утуйарыгар холкутук утуйар; киниэхэ туох да куһаҕан буолуо суоҕа.
24Сүрэҕэ суох, илиитин астаах иһиккэ уган баран,
айаҕар кыайан тиэрпэт.
25Кэрээнэ суоҕу кэһэттэххинэ, кэнэн дьон өйдөнүөҕэ;
өйдөөҕү сэмэлээтэххинэ, тута көннөрүнүөҕэ.
26Аҕатыгар илиитин көтөҕөр, ийэтин дьиэтиттэн холдьоҕор киһи
аата-суола алдьаныаҕа, сир-буор сирэйдэниэҕэ.
27Уолум, дьонуҥ үөрэтэрин дьалайбатаххына,
үтүө сүбэтэ-амата суох дэҥ үктээн биэриэҥ.
28Көлдьүн туоһу көнө дьүүлү холуннарар,
куһаҕан киһи буруйу оҥорон дуоһуйар.
29Итэҕэли күлээччи дьүүллэниэҕэ,
акаары эмиэ иэнэ аһыйыаҕа.
Currently Selected:
Аман өһө 19: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
