Аман өһө 14
14
1Муударай дьахтар дьиэ-уот тэринэр,
оттон акаары – дьиэтин бэйэтинэн үрэйэр.
2Ким Айыы ТойонУ ытыктыыр, ол көнө суолунан сылдьар,
оттон улахаҥҥа уурбат киһи буруйан барар.
3Акаары арбанабын диэн алдьанар,
оттон муударай киһи көрсүө тылынан быыһанар.
4Ким оҕуһа суох, ол бурдуга эмиэ суох,
оттон ким буулаҕа оҕустанар, ол баһаам барыстанар.
5Эрэллээх туоһу кырдьыгы этэр,
албын туоһу кураанаҕы эрдэр.
6Баламат киһи муудараһы көрдөөн да, булуо суоҕа,
оттон өйдөөх киһи үөрэҕи кэбэҕэстик ылынар.
7Акаарыттан тэйэ тутун –
киниттэн ыллыктаах тылы истиэҥ суоҕа.
8Өйдөөх киһи муударай – барар суолун билэр,
оттон акаары толкуйа суох – бэйэтин эрэ албыннанар.
9Акаарылар аньыыны оҥороллорун көргө холууллар,
оттон көнө дьон Таҥара алгыһын ылаллар#14:9 Былыргы еврей тылынан суруллубут тиэкис бу кэрчигин ис хоһооно чуолкайа суох..
10Сүрэҕиҥ тоҕо ытыырын эн бэйэҥ эрэ билэҕин,
үөрүүгүн эмиэ ким да толору үллэстэр кыаҕа суох.
11Куһаҕан киһи уораҕайа урусхал буолуоҕа,
үтүө киһи үүтээнэ чэчирии туруоҕа.
12Сорох суол, көрдөххө, көнө курдук эрээри,
тиһэҕэр өлүүгэ тиэрдэр.
13Ардыгар, күлэ да турдаххына, сүрэҕиҥ ытыыр,
үөрүүҥ эмиэ хомолтонон солбуллар.
14Түктэри кэмэлдьилээх көрдөөбүтүн булуоҕа,
үтүө киһи өҥөтө эмиэ толору төлөнүөҕэ.
15Өс киирбэх истибитин барытын итэҕэйэр,
оттон өйдөөх киһи хас хардыытын толкуйданар.
16Муударай киһи сэрэнэр – куһаҕантан тэйэн биэрэр,
оттон акаары баламат – туохтан да куттаммат.
17Уолҕамчы киһи ааргытык быһыыланар,
уодаһыннааҕы ким барыта абааһы көрөр.
18Ньүдьү-балай бэлиэтэ – ньүкэн быһыы,
өйдөөх киһи ситиһиитэ – бигэ билии.
19Хара дьайдаахтар көнө дьоҥҥо кэлэн бокулуоннуохтара,
куһаҕан дьон үтүө киһи олбуорун айаҕар кэлэн тоҥхойуохтара.
20Дьадаҥыны бэл аймаҕа#14:20 …аймаҕа – Эбэтэр, ыала. кытта абааһы көрөр,
оттон баай киһи доҕоро-атаһа өрүү элбэх.
21Атыттары сэниир киһи аньыыны оҥостор,
оттон дьадаҥыга көмөлөһөөччүгэ дьол тосхойор.
22Куһаҕаны торумнааччы мунан-тэнэн барыаҕа,
оттон үтүөнү оҥорооччу итэҕэли, ытыктабылы ылыаҕа.
23Киһи хаһан даҕаны сыралаһан байар;
кураанаҕы куолулааччы быстарар.
24Өйдөөхтөр ситиһиилэрэ – муударас,
оттон акаары акаарытынан сураҕырар#14:24 Былыргы еврей тылынан суруллубут тиэкис бу кэрчигин ис хоһооно чуолкайа суох..
25Эрэллээх туоһу дьон олоҕун өрүһүйэр,
оттон уодаһыннаах – сымыйаны кутар-симэр.
26 Айыы Тойоҥҥо ытыктабыл – бигэ көмүскэл,
бэйэҕэр да, ыччаккар да халыҥ харысхал.
27 Айыы Тойоҥҥо ытыктабыл – өлбөт мэҥэ уута –
өлүү ситимиттэн өрүһүйэр.
28Халыҥ норуоттаах ыраахтааҕы албан аатырар,
кыра норуоттаах ыраахтааҕы быстарар.
29Ким киэҥ көҕүстээх, ол дириҥ өйдөөх,
оттон ыгым акаарытын көрдөрөр.
30Киэҥ-холку киһи чэгиэн-чэбдик буолар,
оттон ордугумсах, күнүүһүт – доруобуйатын айгыратар.
31Дьадаҥылары атаҕастааччы кинилэри Айбыты атаҕастыыр,
кыһалҕалаахтарга кыһанааччы кинилэри Айбыты ытыктыыр.
32Куһаҕан киһи аньыытын-буруйун иһин киэр анньыллыаҕа,
оттон үтүө киһи өлөн да иһэн эрэллээх сытыаҕа.
33Дириҥ муударас өйдөөх сүрэххэ дьиэлэнэр,
акаарылар да ортолоругар бэйэтин биллэрэр.
34Үтүө быһыы норуоту үрдэтэр,
оттон аньыы-буруй түһэрэр.
35Ыраахтааҕы өйдөөх үлэһитигэр үтүөтүк сыһыаннаһыаҕа,
оттон кинини түһэн биэрээччигэ уордайыаҕа.
Currently Selected:
Аман өһө 14: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
