YouVersion Logo
Search Icon

APOSTOLMI 13

13
Barnaba ngo Saul Kishe Puwu
1Antiok akukuhou lo tungkupmi ngo kutsuchekemi akhae: Barnaba ngo Simon hipau pesu “Tsubuyi” ipi kuchekeu, Kurinia lono ighikeu Lukia, Manaen khuu ahng Herod sasu kumtsa lojiputhu keu eno Saul ishi ae. 2Panonguno Ampeu sheqhe mlla eno kumvu ake lono Aghungu Kimthe no panongu vilo pi, “Barnaba ngo Saul pamaye ino kupe puakeu kumla shipenike ghenguno pama kutashi qhivelo.” 3Panonguno kumvu akighini shi eno a-u chhope pama shou kukumgha betsuno puwuve.
Kupra Ghakhu lo
4Aghungu Kimthe no puwukeu toi Barnaba ngo Saul pamaye Seleukia lo iqive eno tilauno azughi dolo Kupra ghakhu ake kudau ashuka lono cheve. 5Kughou panonguno Salami tolu keno, pamaye Alhou tsa pesu Judami Sinagog lo asheshu. Pama kuphupenike Johan Mark pama gholo che. 6Kughou panonguno azughi dolo aghakhu akeu kumtsu vehosu Pafus tolu keno, panonguno kuduu shichekemi, Judami Bar-Jisu ipikemi kichile tungkupmi lakhi sasu kusholu. 7Tipau zughido yeghi ghakhu wu ahng ye Sergio Paulus, alokutsumi lakhi ke, eno Bar-Jisu no sasu kighithikile ghi aghi. Ahng no Alhou tsa ininishi kelauno Barnaba ngo Saul pama kupuwu. 8Ikemu kuduu shichekeu Elumo (Grik tsau no paje hike) pano panongu hachile; eno ahng no pululuniye akeulo pano satsughuve nike pukaputsa ala phue. 9Ikemu Saul, khuu Paul ipi kuve keno Aghungu Kimthe no ayi teqhiyi shipuzu, thebeyi Elumo ju puzu ishi pi, 10“No tughami nu! Akimki eno pishikiqhino chhitoi xapusu noye amikucho jeli kumtsu sasu aghumi shikicheu, noye kushiye Ampeu wu akumzu laghi shichighi pesu kichileu shivetsu niye pukaputsa acheni kya? Momu noye Ampeu wu amikucho laghi suchighi achekeu tavemo nani kesha? 11Itehino Ampeu u oshou be nani, eno noye anhethi icheve nani, ghuthu lakhiye noye tsukinhe kuvu ithumlave nani.” Paikhavi lono zumoikeuno khumyi pa nhethi kuzupholuve eno pa ulono sunhepe peni aye kutami kukawuve. 12Ti kiu shivekeno ithulu puzu ahng no puluve, kughengu Ampeu ghili pesu kutsukeulo paye shishe akichiqhive.
Pisida Ghakhu lo Antiok
13Paul ngo pa kusamiqoye Pafus lo ashuka lono chesu Pamfulia ghakhulo Perga lo ighi; ike Johan Mark ye pama pheveno Jerusalem lo idewove. 14Pamaye Perga qhiveno Pisidia ghakhulo Antiok lo ighi, eno Sabat tsala lono Sinagog lo iqae. 15Muse yezah lono eno Tungkupmi kuka lono phisuve kethiu, Sinagog lo ampemiqono pama kusutsaju ghi pi, “Athikuzuu nokujo, nokujono timiqo ghenguno hakuthokepu sutsa aghi aye panongu vilo pipenishi ani.” 16Ikelo, Paul no puthugho puzu pa-u peqhepe pithu:
“Athikuzumi Israilmiqo eno nongu Alhou sumsa chekemiqo inijulo. 17Israilmi hipaqo Lhou no nipu asuqo kishelu, eno panonguno Ijip yeghilo achekelo timiqo kughukope shishe ashiayeh kije shitsu, #Ipe 1.7; 12.51 18eno asayeqhalo ampe lhobidi kutolo panongu tucho-mujoe. #Akiki 14.34; Zaki 1.31 19-20Kanan yeghiqhalo ashiayeh tsuni pano puhavetsu eno pawu timiqo pelo tipaqo yeghi ampe 450 ghenguno panongu mheghi shilupeke.
“Tishi kethiu Samuel tungkupu ghuloki kutolo Alhou no kughakuthami pawu timiqo gholo qhitsue.#Zaki 7.1; Joshu 14.1 #Xaku 2.16; 1 Samu 3.20 21Ikelo panonguno akukau lakhi khu, eno Alhou no Saul pelo ampe lhobidi kutolo panongu kukau shipe. Paye Kish nu eno Benjamin laghake. #1 Samu 8.5,10-21; Leshe 89.20 22Alhou no pa ikhive kethiu, David xaqhe pesu panongu kukau shipe. Alhou no David ghili ishi ashepe shi, ‘Ino Jese nu David phuluvae, paye imlo kuchumi eno pano igho ipulou kumtsu shi nani.’ #1 Samu 13.14; 16.12; Leshe 89.20 23Alhou no piqhi puakeu toi David lagha lono Israilmi ghenguno xachilekuluu lakhi ipeghi pe, eno tiye Jisu ke. 24Jisu ighinike zulo, Israilmi kumtsu vilo xukithelu puzu baptiz shilupe nike Johan no asheshue. #Mk 1.4; Lk 3.3 25Kughou pa puwukeu kumlapu saje ashe toni chekelo Johan no timiqo vilo pi, ‘Nonguye nipesu khuu ipi cheni kya? Niye nonguno khe- akeu hu kumoe. Ikemu hi jualo, milakhi ithiuno ighi nani, eno niye pa pukhukuqho xaqhitsu nikeu ghi akuzupu kumoe.’ #Mt 3.11; Mk 1.7; Lk 3.16; Jn 1.20-27
26“Abraham polo kughukomi ithikuzumi Israilmi. Judakumomi eno nongu Alhou sumsachekeqo, xakulupu sutsa hipau ningu lau puwuvetsu anie. 27Kughengu Jerusalem lo kughunakuami eno panongu shou ayehkipemino paye khuukeno michimlave, eno Sabat atsutsu tungkupmi tsa phichekeu panonguno ithikuthumo kehu Jisu kilevekeu lono ti shikupuve. 28Jisu pithive kuzupu akiqi kumu panonguno phumla mu, pa pithive penike Pilat vilo panonguno pi. #Mt 27.22-23; Mk 15.13-14; Lk 23.21-23; Jn 19.15 29Kuchoyesulo pa ghili yepuakeu kumtsu panonguno shikupuve kethiu, panonguno kros lono pa ikhiqhi puzu pa khapewo akumoki lakhilo qhive. #Mt 27.57-61; Mk 15.42-47; Lk 23.50-56; Jn 19.38-42 30Ikemu Alhou no akithi lono pa xaputhuve. 31Atsala kutomo kutolo timi khunoqo Galil lono pa sasu Jerusalem kuto pa gholo iqho keno tipanoqo sasu kusho, eno itehiye panonguno timiqo lau pa shepe shikemiqoe. #Aposto 1.3 32-33Ninguno asutsa kiviu nongu lau peighi akeuno, Alhou no kiu shitsunipi apu-asuqo lau piqhipe puakeno, tipau panoqo tianuli lau shikuputsu ani, ti Jisu xaputhuvekeu lono, hiye Leshele akiniu lo ghi yehpe puakeu toi.
‘Noye inu,
Ishino ino opuh shiluvae.’ #Leshe 2.7 34Eno Alhou no akithi lono pa xuputhue, khilemu tsumavekeulo idewo kithe mae, eno tipau vehu pano ishi pi,
‘Akimthe eno mtsuqheikeu kukumgha David lau piqhi puakeu ino otsuni.’ #Isa 55.3 35Eno kuchouno kutau Leshele kihelo pano ishi pikeu toi,
‘Nono oKimthe Qeu pelo tsumave pemo nani.’ #Leshe 16.10 36Kughengu David ye pawu tiqhelilo Alhou pulou shiche eno thiva, eno pa pu-asu phivilo qhovae, tsu-makeu shivae. 37Ikemu Alhou no khiu akithi lono xuputhu keno paye tsu-mavekeu kumoe. 38Tighenguno athikuzumiqo, nonguno mtsuqhei hi ithilulo, timi hipau jelono axine pevetsukeu nongu lau asheshue. 39Muse yezah qholo khikhi nongu phepuwuve mlakeu thime kumtsu ani keno, pululukemiye kumtsu pa launo phepuwuve kulupu shilue. 40Tighenguno kutokupuilo, khilehi tungukupmino kiu pipuani keno ti nongu shou ikughi nosake:
41‘Julo, nongu timi piputha chekeqo! akumza alo eno thi alo!
kughengu, ino nongu tsalalo akumla lakhi shi ani,
timi khamino nongu vilo chixechilei lhenamu nonguno khilemu pulumo nikeu kumla lakhike.!’ ” #Haba 1.5
42Paul ngo Barnaba pamano khalau ipevekelo, timiqono pama vilo ighinikeu Sabat lo itaghi ighieno hipaqo vehu pitsu lopi inijue. 43Sinagog lo ahoho ixave kethiu, Judami ngo Judami chineyeh luvekemi kutomono Paul ngo Barnaba pama papewu. Pamano panongu putsa eno Alhou akukupulo xuchelo pi panongu hakite.
44Akiniu Sabat tsalalo taun lo akemi khami likhi thono kumtsu Ampeu launo ighikeu sutsa chilunike ighi. 45Ikemu kughou Judamiqono timi kumzapu akeu ithulu keno panonguye anhekushuno chhive. Panonguno Paul no pikeu tsa lae eno pa thaigha.
46Ikemu Paul ngo Barnaba pamano amlo kumtoshi pi, “Alhou tsa nongu vilo paghi pi mayesakepu shike. Ikemu nonguno hi milive ani, eno nongu likhi nonguye lhokta kuxu akuzupu kumovae, ikeke ninguye nongu qhiveno Judakumomi lau wuniae. 47Kughengu Ampeu no ahza ningu tsuvae:
‘Judakumomi ghenguno akulu lakhi shipeniye ino nongu qhike,
eno ayeghiqha kuchopu ghenguno xakulupu laghi shipeni yeke.’ ” #Isa 42.6; 49.6
48Kughou Judakumomino hi chilukeno, panonguye alokivi shive eno Ampeu tsa sheqhe; eno khijehino lhokta kuxupulo kishesuve akeno tipaqoye puluve. 49Tipaqha kumtsulo Ampeu tsa vekuphawove. 50Ikemu Judami no aphughilo sakiphemi ngo totimi aqo-aholo sapheghi Alhou mlla chekeqo xukuthoe. Panonguno Paul ngo Barnaba pama shou shikighime nikeu xukutho eno tipa qha lono pama hapupove. 51Ikemu apostolmi pamano hipaqo sasu kusholumae pikeu shi ghi pama pukhu lono ayeghi mukhu kukhu qhiveno Ikonia lo cheve. #Mt 10.14; Mk 6.11; Lk 9.5; 10.11 52Antiok lo pululuvekemiqoye alokivi eno Aghungu Kimthe lono ahuteqhi teleyi ae.

Currently Selected:

APOSTOLMI 13: SUMIBSI

Highlight

Share

Copy

None

Want to have your highlights saved across all your devices? Sign up or sign in