JOHN 1
1
Jesu Khrist Pathian hihna
1A chiilin Thu a um a, Thu chu Pathian kawmah a um hi, huleh Thu chu Pathian ahi. 2Humah chu a chiilin Pathian kawmah a um hi. 3Sil zousiah amah siam ahi a; silsiam himhim amah siamlouh bangmah a um sih hi. 4Amah ah hinna a um a, hu hinna chu mihingte vaahna ahi. 5Vaah chu mial ah ahung vaah a, mial in huchu a he sih hi.
Baptistu John natoh
6Pathian a kipan a sawl mi khat a um a, a min John ahi. 7Humah chu heetpihtu diingin a hung a, hu vaah thu heetpih diingin, mi zousiah in amah jiaha a gintaat theihna diingun. 8Amah chu hu Vaah ahi sih a, hizongleh hu Vaah heetpih diing a sawl ahi zaw hi. 9Huchu Vaah dihtah, mi chin khovel a hung photmah hih vaahtu ahi. 10Amah chu khovel ah a um a, khovel amah siam ahi; huleh khovel in amah a he sih hi. 11Amah a mite kawmah a hung a, amah a mite’n ana kipaahpih sih uh. 12Hizongleh amah kipaahpih photmahte chu a kawmvah Pathian tate hihtheihna diing silbawltheihna a pia hi, a min gingtate chu. 13Hute chu sisana piang ahi sih va, tahsa deihdana piang zong ahi sih va, huleh mihing deihdana piang zong ahi het sih uh; hizongleh Pathiana piang ahi zaw uhi. 14Huleh Thu chu sa ahung suaah a, i lahah a um hi, (Pa ta khat neih loupi bangin a loupi jia i mu uh) hehpihna leh thutah a dim. 15John in a thu a heetpih a, a kikou a, Ka nunga hung pai pa in ahung makhelhta hi, ka ma a um mawng ahihjiahin, chia a thu ka soi pa khu amah ahi, 16A taangchinna i tang chiat uh, hehpihna tunga hehpihna sawn toh, 17Ajiahchu daan thu chu Mosi manga piah ahi a; hizongleh hehpihna leh thutah chu Jesu Khrist jiahin ahung um hi. 18Kuama’n bangchihmahin Pathian a mu ngei sih; Tapa tang neihsun, Pa aangsunga umpa, amahin a tanchin a phuangta hi, chi in. 19Hichu Judate’n Jerusalem a kipan siampu leh Levimite a kawm a, Kua na hiai, chia dong diing a, a sawl lai va John thu theihsah ahi. 20Huleh amah chu panglou in a kiphuang a, Khrist chu ka hi sih chi'n a kiphuang hi. 21Huin amahun, Ahihleh kua na hiai? Elijah na maw? chi'n a dong va. Ama’n, Ka hi sih, a chi a. Hu zawlnei na moleh? a chi va. Ama’n, Hilou, chi'n a dawng a. 22Huin amahun a kawmah, Kua na hiai? ahung sawlte ka dawn theihna diingun hung hilh in nangle nang kua ka hi kichi na hiai? a chi va. 23Ama’n, zawlnei Isaiah soi banga, Lalpa lampi sial tangun, chia gamdaia kikoupa aw chu ka hi, a chi a. 24A misawlte uh chu Pharisaite laha mi ahi va. 25Huleh amah a dong va, a kawmah, Khrist lah hilou, Elijah lah hilou, huleh hu zawlnei lah hilou na hihleh bang diing a na baptis ahiai? a chi va. 26John in amahuh a dawng a, Ken chu tui in ka baptis a, hizongleh na heet louh uh khat na lahvah a ding hi; 27A keengtophah khau zong suut taah ka hih louh, ka nunga hung pai ahung makhelhpa, amah chu hupa ahi, a chi a. 28Hi silte chu Jordan ka la Bethabara, John in a baptis na muna kibawl ahi. 29A jingni’n John in Jesu a kawm lama hungin a mu a, En un Pathian Belaamnou, khovel sualna pomangpa chu, 30Hipa chu ahi, Mi khat ahung makhelhpa ka nungah ahung pai hi, ka ma a umsa mawng ahihjiahin, chia kana soi pa chu. 31Huleh ke'n amah kana he sih; hizongleh Israelte kawma a kisuhlat theihna diingin tuia baptis in ka hung ahi, a chi a. 32Huleh John in a thu a heetpih a, Hagau vakhu banga vaan a kipan a hung kumsuh a, a tunga tuangden ka mu hi. 33Ken amah kana he sih; hizongleh tuia baptis diing a hung sawlpa amahmahin ka kawmah, Kua tungah zong Hagau hung kumsuh a, a tunga tuangden na muh penpen, amah chu Hagau Siangthou a baptis diingpa chu ahi ahung chi a. 34Huchu ka mu a, huleh hipa chu Pathian Tapa ahi chih ka heetpih ahi, a chi a.
Jesu leh John nungjuite
35A jing kiitin John chu a ding a, a nungjuite nih toh. 36Huleh Jesu vaahlehleh lai a mu a, En un, Pathian Belaamnou, a chi a. 37Hu nungjui nihte’n a thusoi a ja va, Jesu a juita uhi. 38Huin Jesu a kihei a, ahung juih uh a muh in a kawmvah, Bang ahiai na hawl uh? a chi a. Amahun a kawmah, Rabbi, (huchu, Houtupa chihna ahi) khoiah ahiai na teen? a chi va. 39Ama’n a kawmvah, Hung unla, en un, a chi a. Huin amahuh chu a hung va, a teenna a en va, huleh a kawmah huni a um uh, daah sawmna vel ahih jiahin. 40John thusoi ja, Jesu juite geel laha khat chu Simon Peter sanggampa Andru ahi a. 41Ama’n a masapenin amah ngei sanggampa Simon a mudoh a, a kawmah, Messiah, Khrist kichipa chu ka muta uh, a chi a. 42Huleh amah chu Jesu kawmah ahung pui a. Jesu’n amah a en a, Nang chu Jona tapa Simon na hi a; Kipha ahung kichita diing hi, a chi a, huchu Suang chihna ahi. 43Huleh a jingni’n Jesu’n Galili gam ah chiah a tum a, Philip a mu a, a kawmah, Hung jui in, a chi a. 44Philip chu Andru leh Peter teenna khua Bethsaida a teeng ahi a. 45Philip in Nathanael a mu a, a kawmah, Mosi in daan lehkhabu a, a tungtaang ana gelh leh, zawlneite’n ana gelh uh Nazareth Jesu, Joseph tapa chu ka muta uh, a chi a. 46Huin Nathanael in a kawmah, Nazareth a kipanin sil hoih a piang thei eimah? a chi a. Philip in a kawmah, Hung en in, a chi a. 47Jesu in Nathanael a kawm zuana chiah a mu a, a kawmah, En un, giitlouhna nei lou, Israel mitah chu, a chi a. 48Nathanael in a kawmah, Bang na hung chi heet ahiai? a chi a. Jesu’n a dawng a, a kawmah, Philip in nang ahung kouh ma in, theipi kung nuaia na um laiin ka hung mu hi, a chi a. 49Nathanael in a dawng a, a kawmah, Rabbi, Pathian Tapa na hi; Israelte Kumpipa na hi, a chi a. 50Jesu’n a dawng a, a kawmah, Theipi kung nuaiah ka hung mu na kawm a ka chih jiaha gingta na hi maw? hi silte sanga loupizaw na hung mu diing hi, a chi a. 51Huleh Jesu’n a kawmah, Chihtahzetin, chihtahzetin ka hung hilh ahi, Tunung vaan kihong a, Pathian angelte mihing Tapa tunga kal leh kum na muta diing uhi, a chi hi.
Currently Selected:
JOHN 1: SIMTBSI
Highlight
Share
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.