KEKULI 27
27
Paul na Rom wi Kewa
1Ikhang na Itali wi wale südhekeya wi mathu na Paul pi atssüzü kepathu gweghe pi Rom süpahizi “Kadimiwa Süpahizi” miwi kedi kesü Julia kwen wi chia. 2Ikhang na Adramuttium wina ahunjjen kesü na Asia yyi atssükedone wi tsü wale keben pang wala ciwi duya nu wa. Macedonia nyi kesü Thessalonika wina keghowa Aristarka la ikhang gweghe wa. 3Dhitsüwa wi ikhang na wa Sidon cuya. Julia na Paul tizen, nu ma yala ma pvüshangthu hhainan wa thsü nu ma nsenthu keyishü muya thsüden. 4Ikhang na ciwi na wa, isala ameghü sho ntsa kesalina ikhang na Cipra yimangkehi keshenten wina wa. 5Ikhang na Silisia nu Pamfilia tssükedone tsü pvüdhi sen nu Lusia yyi Mura wi ghoya. 6Ciwi kediwa na ahunjjen kesü Alexandria wina Itali wi wa keten muya nu ma ikhang pila ciwi duya thsüa.
7Ikhang na ghanan keni kecheng tsü ashina wa nu agüccü ntsa wala Cnida nyuti tsü cuya. Ameghü na sho ntsa kesalina ikhang na alen ciwi wa meyala, tsalina Kreta yyi keshenten wina wala Salmone tsü pvüdhi wa. 8Ikhang na agüccü ntsa nu ayyi tetsaki wa keten wi apen kesü Ahunjjen Penkemehai wi tsü ghoya, tsüna Lasea nyuti kete wi.
9Ikhang ciwi matsü kesie ben wa kesalina khilitsü ahunjjen wi kewa kemessi bendha, kepaghenanye khili Ahhansha kesa Kho tsathangwa tsü la wadha. Tsalina Paul na ajüh ha pi mathu kiza, 10“Ipvüshangthu, khili nten na ikhang atssü wi kewa kemessi bendha le, ciwi atsanqaithu nu ahunjjen la yasa ben, nu anyi la kahangli dediaben kesa hi chüben.” 11Isala kediwa na Paul jüh kekhi miwi la ahunjjen wi kediwa nu ahunjjen pvüwa manyi jüh kina wa. 12Apen tsüna pathsü wi ahunjjen kemnanpen ghena nmehai, tsalina anyi kejiwa na atssükedone ciwi na saya mehaithu wa Foenix cuya nu pathsü ciwi benle kesa tsü nen wa. Foenix tsüna Kreta yyi acüla niduwa nu agha niduwa kepeghe wiwa ahunjjen kemnanpen kesü.”
Atssükedone wi Caghamo kesa
13Acülawa ameghü sho shagha nu anyithu na mathu meshen keben tsü saya nbendha le sa, tsalina mathu ahunjjen dajen tsü piekiya nu Kreta yyi katen tsü tetsaki sen nu wa. 14Isala “Agha nishu meghü” tsüna khang ntsa ayyi wina sho dugho. 15Tsüna gho ahunjjen mo kuliya nu ikhang na wa meyala kesalina ameghü na ikhang mo pie nu bvüa. 16Ikhang wala ayyi-mangkehi kizzakeu Kauda cukeya wi agüccü ntsa nu ahunjjen wi ahun tsü khushiya. 17Mathu na tsüthu zanshi pi ayyi wi chi nu ali pi ahunjjen bhen kevüliya. Mathu na Libia yyi wi ahachan miwi tsü wathu kemessi ghena ashina sa nu ameghü yala ahunjjen tsü mo pie nu wa thsü. 18Caghamo sa ntsa kesalina dhitsüwa wi ahunjjen wi atsanqaithu pahan khushi pi khala, 19nu pitsüwa wila mathu na ahunjjen wi atsanqai pahan khushia. 20Ghanan kejonla ikhang na aghani nu ghotsithu mangla nmula caghamo na ikhang mo pie wa kesalina asakhen witsü ikhang na hangya benle kesa n-nondila.
21Anyithu na ghanan kejonla ndsajjüla kesa wi Paul na shagha hati khi, “Ipvüshangthu nthu na ijüh kina nu Kreta wi ben wa lethu, pala hathu ha yasa nu dedi nkesa le! 22Isala khili nthu leben züyalo nthu kizaben! Ahunjjen ketan yasa keben khe nthu thola shü nbenle! 23Kepaghenanye khija iPvüwa nu hi ma kinyi ketenwa Anyiza nyilo kesü hi wi gho, 24nu khi, ‘Paul, nmessi lalo! No wala Rom Kadimiwa tuwi n-nganthu yishü, nu Anyiza na ma kemehai wina no gweghe wa ketenthu tsüdi kahangli hangsha cüben.’ 25Tsalina ipvüshangthu, leben züyalo! Kepaghenanye hi kekiza tsüti kuliben kesa hi Anyiza wi kenondi ben. 26Isala ikhang pvü wa ayyi-mangkehi pahan wi chiaben.”
27Tsüna caghamo na ikhang mo pie nu Mediterranean wi keten ghaja tagha mejü sadha. Aghaja non wi ahunjjen keculathu na ikhang ayyi tetsaki wa tendha le meshen. 28Tsalina mathu na pala kesü pi atssü kedhu kedegü nan tsüna meter jügha-u sabenla, nu keu wha nu kedegü nan meter changha-u sabenla. 29Tsalina ikhang hunjjen na alon miwi wa nashe kesa kemessi ghena ahunjjen dajen kemisü lisha pi du thsüa nu wan atsathang walo kheshülan sa. 30Tsaseng wi ahunjjen keculathu na bvüale kiden; mathu na ahun khushi pi atssü wi chiya nu wala atuwa ahunjjen dajen lisha pi du thsü keten ghe sa. 31Isala Paul na süpahizi kediwa nu süpahithu wi khi, “Keculathu na ahunjjen wi nbenla lethu, nthu hangya nben le!” 32Tsalina süpahithu na ali pi ahun hu ketheng tsü padhi pi atssü wi chia.
33Atsathang wa keten pang wi Paul na mathu tsüdila pala pahan dsayalo kiza: “Ikhang nansü ha ghanan tagha mejü hie wadha, nu tsüthu mangla npi dsajjü. 34Tsalina nthu züyale kesalina dsajjü yalo. Nthu lissen kesüla dedi nben le.” 35Paul na ha kekhi seng wi mathu tsüdi tuwi na amesa khu pi pakhhi nu Anyiza seng, nu dsa wa. 36Mathu tsüdila leben ccaya nu dsajjüya. 37Ciwi ikhang tsüdi saghula anyi meza keni nu achentagü nu tugho na ahunjjen wi tsü ben. 38Tsüdila dsajjü pi anonkwenkeya seng wi mathu na ahunjjen sate mbhi thsüle kesalina awhengsu tsü tsüdi pi atssü wi khala chia.
Ahunjjen Keyasa
39Atsathang keshagha seng wi keculathu na ayyi nmu, isala mathu aghüsa wi kenganpen kesü muya nu ahunjjen sen wa ciwi ngan thsüale sa. 40Tsalina mathu ahunjjen dajen tsü lisha pi atssü non wi du thsüa, tsü gweghe ali pi ahunjjen dajen bhen ketheng tsü la lisha chia. Tsaseng wi mathu atu wi athsü tsü zankichi nu ameghü yala mo pie wa aghüsa wi ngan thsüale sa. 41Isala ahunjjen na wala atssü non wi ahachan pvükha sa keben witsü shonten wa, ahunjjen atuwa shonten nu kuli meyala, nu asengwa na atssü kekhang na gho yasa.
42Süpahithu na atssüzüthu tsüdila pathi nu thola atssüghe sa sen nu nshhu thsüle kesa kiden. 43Isala süpahi kediwa na Paul hangshaya mvu kesalina ma mathu ya tsüti nsa thsüla. Ma anyi thothu na atssüghe saya mehai khe penca wa atssüghe sa sen nu shhulo, 44nu kepathu na ahunjjen kepakhhithu tsü ghansen nu mathu nie shhulo kesa ahza khu chia. Hati nu ikhang tsüdila aghüsa wi shhuya.
Currently Selected:
KEKULI 27: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
KEKULI 27
27
Paul na Rom wi Kewa
1Ikhang na Itali wi wale südhekeya wi mathu na Paul pi atssüzü kepathu gweghe pi Rom süpahizi “Kadimiwa Süpahizi” miwi kedi kesü Julia kwen wi chia. 2Ikhang na Adramuttium wina ahunjjen kesü na Asia yyi atssükedone wi tsü wale keben pang wala ciwi duya nu wa. Macedonia nyi kesü Thessalonika wina keghowa Aristarka la ikhang gweghe wa. 3Dhitsüwa wi ikhang na wa Sidon cuya. Julia na Paul tizen, nu ma yala ma pvüshangthu hhainan wa thsü nu ma nsenthu keyishü muya thsüden. 4Ikhang na ciwi na wa, isala ameghü sho ntsa kesalina ikhang na Cipra yimangkehi keshenten wina wa. 5Ikhang na Silisia nu Pamfilia tssükedone tsü pvüdhi sen nu Lusia yyi Mura wi ghoya. 6Ciwi kediwa na ahunjjen kesü Alexandria wina Itali wi wa keten muya nu ma ikhang pila ciwi duya thsüa.
7Ikhang na ghanan keni kecheng tsü ashina wa nu agüccü ntsa wala Cnida nyuti tsü cuya. Ameghü na sho ntsa kesalina ikhang na alen ciwi wa meyala, tsalina Kreta yyi keshenten wina wala Salmone tsü pvüdhi wa. 8Ikhang na agüccü ntsa nu ayyi tetsaki wa keten wi apen kesü Ahunjjen Penkemehai wi tsü ghoya, tsüna Lasea nyuti kete wi.
9Ikhang ciwi matsü kesie ben wa kesalina khilitsü ahunjjen wi kewa kemessi bendha, kepaghenanye khili Ahhansha kesa Kho tsathangwa tsü la wadha. Tsalina Paul na ajüh ha pi mathu kiza, 10“Ipvüshangthu, khili nten na ikhang atssü wi kewa kemessi bendha le, ciwi atsanqaithu nu ahunjjen la yasa ben, nu anyi la kahangli dediaben kesa hi chüben.” 11Isala kediwa na Paul jüh kekhi miwi la ahunjjen wi kediwa nu ahunjjen pvüwa manyi jüh kina wa. 12Apen tsüna pathsü wi ahunjjen kemnanpen ghena nmehai, tsalina anyi kejiwa na atssükedone ciwi na saya mehaithu wa Foenix cuya nu pathsü ciwi benle kesa tsü nen wa. Foenix tsüna Kreta yyi acüla niduwa nu agha niduwa kepeghe wiwa ahunjjen kemnanpen kesü.”
Atssükedone wi Caghamo kesa
13Acülawa ameghü sho shagha nu anyithu na mathu meshen keben tsü saya nbendha le sa, tsalina mathu ahunjjen dajen tsü piekiya nu Kreta yyi katen tsü tetsaki sen nu wa. 14Isala “Agha nishu meghü” tsüna khang ntsa ayyi wina sho dugho. 15Tsüna gho ahunjjen mo kuliya nu ikhang na wa meyala kesalina ameghü na ikhang mo pie nu bvüa. 16Ikhang wala ayyi-mangkehi kizzakeu Kauda cukeya wi agüccü ntsa nu ahunjjen wi ahun tsü khushiya. 17Mathu na tsüthu zanshi pi ayyi wi chi nu ali pi ahunjjen bhen kevüliya. Mathu na Libia yyi wi ahachan miwi tsü wathu kemessi ghena ashina sa nu ameghü yala ahunjjen tsü mo pie nu wa thsü. 18Caghamo sa ntsa kesalina dhitsüwa wi ahunjjen wi atsanqaithu pahan khushi pi khala, 19nu pitsüwa wila mathu na ahunjjen wi atsanqai pahan khushia. 20Ghanan kejonla ikhang na aghani nu ghotsithu mangla nmula caghamo na ikhang mo pie wa kesalina asakhen witsü ikhang na hangya benle kesa n-nondila.
21Anyithu na ghanan kejonla ndsajjüla kesa wi Paul na shagha hati khi, “Ipvüshangthu nthu na ijüh kina nu Kreta wi ben wa lethu, pala hathu ha yasa nu dedi nkesa le! 22Isala khili nthu leben züyalo nthu kizaben! Ahunjjen ketan yasa keben khe nthu thola shü nbenle! 23Kepaghenanye khija iPvüwa nu hi ma kinyi ketenwa Anyiza nyilo kesü hi wi gho, 24nu khi, ‘Paul, nmessi lalo! No wala Rom Kadimiwa tuwi n-nganthu yishü, nu Anyiza na ma kemehai wina no gweghe wa ketenthu tsüdi kahangli hangsha cüben.’ 25Tsalina ipvüshangthu, leben züyalo! Kepaghenanye hi kekiza tsüti kuliben kesa hi Anyiza wi kenondi ben. 26Isala ikhang pvü wa ayyi-mangkehi pahan wi chiaben.”
27Tsüna caghamo na ikhang mo pie nu Mediterranean wi keten ghaja tagha mejü sadha. Aghaja non wi ahunjjen keculathu na ikhang ayyi tetsaki wa tendha le meshen. 28Tsalina mathu na pala kesü pi atssü kedhu kedegü nan tsüna meter jügha-u sabenla, nu keu wha nu kedegü nan meter changha-u sabenla. 29Tsalina ikhang hunjjen na alon miwi wa nashe kesa kemessi ghena ahunjjen dajen kemisü lisha pi du thsüa nu wan atsathang walo kheshülan sa. 30Tsaseng wi ahunjjen keculathu na bvüale kiden; mathu na ahun khushi pi atssü wi chiya nu wala atuwa ahunjjen dajen lisha pi du thsü keten ghe sa. 31Isala Paul na süpahizi kediwa nu süpahithu wi khi, “Keculathu na ahunjjen wi nbenla lethu, nthu hangya nben le!” 32Tsalina süpahithu na ali pi ahun hu ketheng tsü padhi pi atssü wi chia.
33Atsathang wa keten pang wi Paul na mathu tsüdila pala pahan dsayalo kiza: “Ikhang nansü ha ghanan tagha mejü hie wadha, nu tsüthu mangla npi dsajjü. 34Tsalina nthu züyale kesalina dsajjü yalo. Nthu lissen kesüla dedi nben le.” 35Paul na ha kekhi seng wi mathu tsüdi tuwi na amesa khu pi pakhhi nu Anyiza seng, nu dsa wa. 36Mathu tsüdila leben ccaya nu dsajjüya. 37Ciwi ikhang tsüdi saghula anyi meza keni nu achentagü nu tugho na ahunjjen wi tsü ben. 38Tsüdila dsajjü pi anonkwenkeya seng wi mathu na ahunjjen sate mbhi thsüle kesalina awhengsu tsü tsüdi pi atssü wi khala chia.
Ahunjjen Keyasa
39Atsathang keshagha seng wi keculathu na ayyi nmu, isala mathu aghüsa wi kenganpen kesü muya nu ahunjjen sen wa ciwi ngan thsüale sa. 40Tsalina mathu ahunjjen dajen tsü lisha pi atssü non wi du thsüa, tsü gweghe ali pi ahunjjen dajen bhen ketheng tsü la lisha chia. Tsaseng wi mathu atu wi athsü tsü zankichi nu ameghü yala mo pie wa aghüsa wi ngan thsüale sa. 41Isala ahunjjen na wala atssü non wi ahachan pvükha sa keben witsü shonten wa, ahunjjen atuwa shonten nu kuli meyala, nu asengwa na atssü kekhang na gho yasa.
42Süpahithu na atssüzüthu tsüdila pathi nu thola atssüghe sa sen nu nshhu thsüle kesa kiden. 43Isala süpahi kediwa na Paul hangshaya mvu kesalina ma mathu ya tsüti nsa thsüla. Ma anyi thothu na atssüghe saya mehai khe penca wa atssüghe sa sen nu shhulo, 44nu kepathu na ahunjjen kepakhhithu tsü ghansen nu mathu nie shhulo kesa ahza khu chia. Hati nu ikhang tsüdila aghüsa wi shhuya.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.