TSIPWESWÜ 27

Zelophehad Nyugi Ju

1Josef nyu Manasseh, Manasseh nyu Machir, Machirnyu Gilead, Gilead nyu Hepher, Hepher nyu Zelophehad, Zelophehad nyugi ju le Mahlah, Noah, Hoglah, Milkah lo Tizrah. 2Anyugun le gü Mosa, püshükeda gü Eleazar, sharhi dan, lo süda apentha mhundyü nyu Npugü kehü Phika gü khenpvü ka so lo-o zoshü, 3“Agun pvü le a-nyu peche nme ndi tse tehen yhunkemvu nyu si laso. A-le Korah sikethen dan le Npugü ntsun kethyü dan nyu tsü hümvu; ai a-kemu genyu sikela gwenzin. 4Tsügenyu agun pvü le a-nyu peche ndi letseo Israel nyu dan nyu a-zan no chwiryümvu la ti ole? Agun pvü shvunye dan nyu agun jün khishülo. 5Mosa le anyu le kenya kebin gü pe Npugü mhundyü ka shü. 6Tsontsin Npugü le Mosa ka zoshü, 7“Zelophehad nyugi ju le zo kebin tsüle a-zü le; anyugun pvü shvunye dan nyu anyugun hon pe tsülo. Anyugun no a-hon gwenlo: 8Israel nyu ka temi nme le a-nyu peche ndio silalo a-nyu tenugi no akenya gwenti tse zoshü lo. 9Lo a-nyu tenugie ndi yatselo a-tsasikezen nyu le gwenti. 10A-le a-tsasikezen ndi yatselo a-pvü tsasikezen nyu le tsü gwenti. 11A-le a-tsasikezen ndi nmvue a-nyo-a-da ndi yatselo a-shvunye a-khokeni tsin gü le tsüpe a-hon thyülo lati. Ale, Npugü, ale nka johokeshü hontse Israel nyu le hi pe tejvü thyüo thenti.”

Joshua Kejüpe Mosa Sun Thyükelo

(Tej 31:1-8)

12Npugü le Mosa ka zoshü, “Abarim kazüthun gü ge kü gü ale kazü pe Israel nyu tsü kebin gü shwishülo. 13Nle tsü nri keshü siki ntsa Aaron hontse silati, 14hai mihvu nren Zin tehenyhunkemvu ka a johokeshü ntsun kela genyu. Hai le Meribah nyu süda apentha a ge kenyo kethyü ka, anyugun mhundyü nyu a kenshün kekvu shamvula.” (Meribah tsü le Zin tehenyhunkemvu Kadesh ka zü kenthün.) 15Mosa le kehi thyü shü. 16“Npugü Sunggigü, kerhün ronzin aphu khishü kehü gü, temi nme kejü pe no temi dan tsonri lotse ale hi hü nle 17lo terinyu anyugun ketsen lo-o ntemi dan no tanyü a-kekhwe kendi hontse mvu nrün genyu.”

18Npugü le Mosa ka, zoshü, “Nun nyugü Joshua, kapu gü le a-ge kebin gü zen lo-o nben pe a-pe ge shülo. 19Tson-o a-no püshükeda gü Eleazar lo süda apentha mhundyü nyu solo-o anyugun aphu mhundyü nyu a-le nsun thyüti tse zoshwi shülo. 20Lo Israel nyu süda apentha no a-jozen nrün genyu nkekvu peha pe a-tsüshü. 21Püshükeda gü Eleazar le Urim lo Thummim sen-o akendo shaloti lo a-le tsü then ti. Hihontseo Eleazar le tha aphu ka Joshua lo Israel nyu süda apentha tsontsin ti.” 22Mosa le Npugü le aka johokeshü hontse thyülo. A-le Joshua no Püshükeda gü Eleazar lo süda apentha mhundyü nyu solo. 23Tson-o Npugü le johokeshü hontse Mosa le a-ben pe Joshua pe ge shüo Joshua le a-sun kethyü gü le tse zoshwi shüla.

Currently Selected:

TSIPWESWÜ 27: REGSBSI

Highlight

Copy

Compare