JOHAN 1
1
Khrist Pathian Hihna
1A tung in Thu a om, Thu tuh Pathian kiang ah a om, Thu tuh Pathian ahi. 2Huai Thu a tung in Pathian kiang ah a om hi. 3Bangkim avek in amah siam ahi; thilsiam tengteng amah siamlouh bangmah a omkei hi. 4Amah ah hinna a om, huai hinna mihingte vakna ahi. 5Vak mial lak ah a hong vak a; mial in huai a zoukei hi.
6Pathian sawl mi khat a hongom, a min Johan ahi. 7Huai mi theisak ding in a hong, huai vak theisak ding in, amah ziak a mi tengteng in a gintak theihna ding un. 8Amah bel vak ahi kei a, vak thu theisak ding a hong ahizaw hi. 9Vak dik michih hihvak nak a om a, khovel ah a honglel ahi.
10Amah khovel ah a om, khovel amah siam ahi, himahleh khovel in amah a theikei hi.
Khrist Sa Hongsuahna
11Amah a mite kiang ah a hong a, amah a mite’n a na pom kei uhi. 12Himahleh amah kipahpih a pom, a min gingtate tengteng Pathian tate suahtheihna a pia hi. 13Huai mite bel sisan suan a hi kei ua, sa deihna a suan leng a hi kei ua, mihing deihna a suan leng ahi sam kei ua, Pathian suahsak ahizaw uhi. 14Huai Thu sa a hongsuak a, i lak uah a hongteng hi, hehpihna leh thutak a dim in; a thupina Pa Tapa tang neihsun thupina bangbang i muta uhi.
15Johan in amah theihpihna a pia a, “Ka nung a hong paipa’n honkheng, amah ka ma a omsa him ahihman in, chi a a thu ka genpa hiai ahi” a chi hi.
16Huan eite’n a tangchinna a kipan hehpihna tung a hehpih nawnsawnna i tang chiat uhi. 17Mosi zang a Dan piak ahi a, himahleh; hehpihna leh thutak Jesu Khrist ziak in a hongom hi. 18Kuamah in chiklai mah in Pathian a mu ngeikei; Tapa tang neihsun, Pa angsung a om in amah a phuangkheta hi.
Baptispa Johan Thupuak
(Matt. 3.1-12; Mk. 1.1-8; Lk. 3.1-18)
19Huan Judate’n, “Kua na hia?” chi a, dong ding a, Jerusalem khua a kipan a a kiang a siampute leh Levi chi a mite a sawllai un hiai te Johan thu na theihsak ahi uhi:
20Aman chiangtakin a gen a, “Khrist ka hi kei hi” chi in, a pulak hi.
21Amau a kiang ah, “Kua na hia leh? Elijah na hi hia?” a chi ua, a dong uhi. Huan aman, “Ka hi kei” a chi hi. “Huai zawlnei na hi hia?” a chi ua. Aman, “Hilou e” a chi a, a dawng hi.
22Amau a kiang ah ahihleh, “Kua na hia? Honsawlte ka dawn theihna ding un honhilh in; na tanchin himhim bang ahia na gen ding?” a chi uhi.
23Aman, zawlnei Isai gen bang in “Toupa lampi hihtang un” chi a, gamdai a kikoupa aw ka hi, a chi hi.
24A misawlte uh Pharisaite kiang a kipan kuate hiam ahi uhi. 25Amau a kiang ah, “Khrist bek, Elijah bek, zawlnei bek na hih kei ngal leh, bang a chia baptist nak na hia leh?” a chi ua, a dong nawn uhi.
26Johan in a kiang uah, “Ken tui in k’on baptist a, na lak uah mi khat na theihlouh uh ading ahi, 27Amah ahi ka nung a hongpai dingpa, ka ma a omsa pen, a khedap khau pheltak leng ka hi kei” chi in a dawng hi.
28Huai Jordan gal a Bethabara a Johan in a baptisna mun a thiltung ahi.
Pathian Belamnou
29Huan a zing in Johan in Jesu a kiang a hongpai a mu a, a gen a; “En un, Pathian Belamnou khovel khelhna lamangpa! 30Hiai ahi Amah, mi khat ka nung a hong paipa, ka ma a omsa him ahi, ka chih pa. 31Amah lah ka na thei ngal kei a; himahleh Israelte kiang a amah latsak a hihna ding in tui a baptist in ka hongpai ahi” a chi hi.
32Huan Johan in a thu a theisak a: “Kha vakhu bang in van a kipan a hongsuk ka mu a, a tung ah a tu nilouh, chi in a gen hi. 33Amah lah ka thei ngal kei a; himahleh ‘tui a baptist ding a hon sawlpa’n ka kiang ah, Kua tung ah leng Kha hongsuk a a tung a om na muh peuh, hiai tuh Kha Siangthou a baptispa ahi,’ a honchi hi. 34Huai ka muta a, hiai mipa Pathian Tapa ahi chih ka theisakta hi” a chi hi.
Jesu Nungzui Masate
35Huan a zing nawn in Johan ading a, a nungzui nihte toh; Jesu vial vakvak lai a en a: 36“En un, Pathian Belamnou” a chi hi.
37A nungzui nihte’n a thugen a za ua, Jesu a zuita uhi. 38Jesu a kihei a, a honzui uh a mu a, a kiang uah, “Bang na zong ua?” a chi hi. Amau “Rabbi, huai sinsakpa chihna ahi, Koi a teng na hia?” a chi uhi.
39Aman a kiang uah, “Hongle uchin na mu ding uh” a chi hi. Huchi in a hong ua a omna a mu ua; huai ni’n a kiang ah a tam ua, nitak anhuan hun phial ahi. 40Johan thugen za a Jesu zuite nih a khat zaw pen Andru, Simon Peter unaupa ahi. 41Aman a masapen in amah unau Simon a mu a, a kiang ah, “Messia ka muta uh” a chi a, huai bel Khrist chihna ahi. 42Huchi in Jesu’n amah a na en a, “Johan tapa Simon na hi, Kifa a honchi ding uh” a chi a, huai suang chihna hi.
Philip leh Nathanael Sapna
43Huan a zing in Jesu’n Galili gam a hoh a tuma, Philip a mu a, a kiang ah, “Honzui in” a chi hi. 44Philip bel Bethsaida khua mi ahi a, Andru leh Peter omna khopi mah ahi. 45Philip in Nathanael a mu a, a kiang ah, a tanchin Mosi in dan laibu a a gelh leh zawlneite’n a gelh uh, “Amah ka muta uhi, Nazaret Jesu, Joseph tapa” a chi hi.
46Nathanael in a kiang ah, “Nazaret khua ah thil hoih a pawt thei ahia?” a chi hi. Philip in a kiang ah, “Hongpai inla, en in” a chi hi.
47Jesu’n Nathanael a kiang a hong dek in a mu a a tanchin a na gen a, “En un, Israel mitak, zekhemna himhim neilou” a chi hi.
48Nathanael in a kiang ah, “Nang bangchidan a honthei na hia?” a chi hi.
Jesu’n a kiang ah, “Philip in nang honsap ma a, theipi bul a na omlai in, k’on mu hi,” chi in a dawng hi.
49Nathanael in a kiang ah, “Rabbi, Pathian Tapa na hi, Israelte kumpipa na hi” chi in a dawng hi.
50Jesu’n a kiang ah, “Theipi bul ah nang k’on mu hi, na kiang a ka chih ziak in na gingta ahi maw? Hiai te sang a thil thupizaw na mulai ding” chi in a dawng hi. 51Huan Jesu mah in a kiang ah, “Chihtaktak in, chihtaktak in k’on hilh ahi, van kihong a, Pathian angelte Mihing Tapa tung a kahtou leh kumsuk na mu ding uh” a chi hi.
Currently Selected:
JOHAN 1: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.