Johan 2
2
Kana märü üng aepawng te pawi
1Käni thungtä-a Kalile khö Kana märü-a aepawng pawi awng. Ho-a Isu üng änä-awi Maeri la awng by. 2Honi aepawng pawi-a Isu hai äkähui na tea ly hethang ka pa by. 3Cäpje thai tui byng ea Isu üng änä-awi ma “Äni ce lä Cäpje tui byng vi dy” näkha Isu tea thui pa.
4Isu ma “Änang ä, ätephüng-a kai tea hini phüng thui te mei. Kai kälu sa saite kätü lä tyng y rawng” näpa.
5Änä-awi ma mawsawng na tea “Isu ma thui te kätyng sa pa ö” näkha näpa dy.
6Honi mityng-a kälung hai sa saite bärawi thai tärutä awng. Kälung bärawi thaitä thung-a lä tuibung kuisy, ruithungtä aevai vi. Judae na üng reitae kätyng caiping hai hethang mäsung te vi. 7Isu ma mawsawng na tea “Hini bärawi thung-a tui kawipy-a mäkawi ö” näkha näpa. Tukha äni ce ma bärawi tärai kawi te khytä tui mäkawi py pa ö dy. 8Tupyng-a Isu ma “Hini bärawi thung üng tui büde kha pawi kung tea nähai pa” näpa. Tukha mawsawng na lä thui te kätyng sa pa ö dy. 9Pawi kung ma honi Cäpje tui-a aelawng te tui tea mäteng dy. Mawsawng na lä Cäpje tui mani üng dang te mei näte mäny ngaila pawi kung lä mäny y. Tukha pawi kung ma nawngpui käla kung tea kähyng pa dy. 10Äni ma “Khimi angxynlyng la Cäpje tui kähawiky ni angvüng tea angcü-a nei hai mang te vi. Khimi ce nei te mängae pyng-a kangkhüng-a ni Cäpje tui kähawi y ni nei hai te vi. Nang lä Cäpje tui kähawiky vaihi ni mätho lae dai vi lä” näpa.
11Isu lä angcü-a cangxei te kamarae lä Kalile khö Kana märü-a sa te vi. Äma üng phung-ang mätü pa dy. Äkähui na la Isu tea yng ö dy.
12Tupyng-a Isu lä änä-awi kangby, äkähui na hai mangtä Kapernawm märü-a ly ö dy. Ho-a äni ce käni rui käqae-a awng ö y.
Säthaw üng Ingkäcai tea mäcai ping pa
Mat 21:12-13; Mar 11:15-17; Luk 19:45-46
13Judae na üng Cäqengja te Pawi aenai ea Isu lä Jerusalem märü-a ly dy. 14Isu lä Säthaw üng Ingkäcai baesung thung-a raebawi, beram, bähö jaw te hai tangkae aeleng saite tawlae na kung teng-a aety kha awng te nung dy. 15Ruinawng hai ry nae sa kha beram hai raebawi na angxynlyng Säthaw üng Ingkäcai baesung thung üng mätho pa dy. Tangkae aeleng saite khung bung nui pa kha phawisae na la cawngpe xhixae pa vi dy. 16Isu ma bähö jaw saite na tea “Hini mätho ö king la. Kai Pä-ai üng Ingkäcai-a vyngjaw nae mityng sa ö hang” näkha näpa. 17Äkähui na lä Caekäcai ping thung-a tärü saite aedawng va ö dy. “Säthaw üng Ingkäcai tea bälung aevaw te lä kai üng bälung tea maikang te kätyng kae dy” näpa.
18Judae mätawngky na ma “Säthaw ma nang tea hini na sa he aenae py te kai ce mäny hethang kamarae mätü” näkha näpa.
19Isu ma “Hini Säthaw üng Ingkäcai bung aephei ö. Kai ma käni thungtä-a sa haile pa ai mang” näpa.
20Judae na ma “Hini Säthaw üng Ingkäcai sa te lä säning rui bäli tärutä qae te vi. Nang lä käni thungtä hai ma cyng raw haw vi ai mei” näkha düng pa.
21Isu ma Säthaw üng Ingkäcai phüng thui te la äma üng ätabung tea thui te vi. 22Säthaw lä Isu bung kädü thung üng mätha pyng ea äkähui na lä Isu lo sämai haile ö vi. Tukha äni ce lä Caekäcai ping hai Isu üng älo tea yng ö dy.
Khimi ce üng phüng Isu lä mäny pa
23Cäqengja te pawi kätü-a Isu lä Jerusalem märü-a awng. Äni ma sa te kamarae na khimipui na la nung te phüng-a, Isu tea yng ö vi dy. 24Tungaila Isu lä khimi ce üng bälung mäny king te phüng-a äni ce tea ae-y pa te y vi. 25Isu lä khimi ce üng phüng mäny king te phüng-a ämi lawngtä lä khimi phüng thui hethang aely ngai te y.
Currently Selected:
Johan 2: cekNT
Highlight
Share
Copy
Want to have your highlights saved across all your devices? Sign up or sign in
© 2017, Bible Society of Myanmar and Wycliffe Bible Translators, Inc