Петрдыҥ 1-кы самаразы 1

1Иисус Христостыҥ апостолы Петрдаҥ – Понтто, Галатияда, Каппадокияда, Асияда ла Вифинияда чачылып, кӧчкӱндер чилеп јаткан, Кудай талдап алган улуска. 2Тын ажыра улусты агару эдер деп, башкыда темдектеп койгоныла, Ада Кудай слерди талдап алган. Ол слерди Иисус Христоско сӧсуккур болзын, Оныҥ каныла аруталзын деп, Тынла агару эдерин темдектеген.

Слерге јакшылык ла амыр кожулзын.

Тирӱ ижемји

3Кудайга, Иисус Христос Кайраканыстыҥ Адазына, баш болзын! Бисте Ого тирӱ ижемји болзын деп, Ол Бойыныҥ улу быйаныла Иисус Христостыҥ тирилгени ажыра биске јаҥы јӱрӱм берген. 4Бисти мӧҥкӱлик, ару ла чалдыкпас энчи алзын деп, Ол јаҥы јӱрӱм берген. Бу энчи слерге теҥериде чеберлелет. 5Слерди дезе Кудай Бойыныҥ кӱчиле бӱдӱмјигер ажыра аргадаарга чеберлейт. Бу аргадаш калганчы ӧйдӧ ачыларга белен. 6Бого сӱӱнигер. Эмди јӱзӱн-јӱӱр ченелтелердеҥ улам эмеш кунугарга келижип турган болзо, чыдажыгар. 7Онызы слердиҥ Кудайга чындык бӱдӱп турганыгар быртып калар алтыннаҥ баалу болуп калзын деп керектӱ. Алтынныҥ да чыҥдыйы отло ченелет ине. Ол тушта слердиҥ бӱдӱп турганыгар, Иисус Христос ачылза, јараду, мак, кӱндӱ экелер. 8Оны кӧрбӧй туруп сӱӱп јадыгар. Оны эмдиге кӧрбӧй јадып, Ого бӱдӱп, сӧслӧ айдып болбос улу сӱӱнчиле сӱӱнип, 9бӱдӱп турганыгардыҥ амадузына – тыныгарды аргадаарына једип аладыгар. 10Бу аргадаш керегинде јарлыкчылар бедиренип шиҥжӱлеген, слерге темдектелген јакшылык керегинде озолондыра айткан, 11олордо јӱрген Христостыҥ Тыны кемге ле кандый ӧйгӧ кӧргӱскенин шиҥжӱлеген. Христос кыйналар, оныҥ кийнинде макталар деп, Тын озолондыра керелеген. 12Олордыҥ ижи бойлорына эмес, је слерге тузалу болгон деп, јарлыктарга ачылган. Эмди олордыҥ айтканын теҥеридеҥ ийилген Агару Тынла Сӱӱнчилӱ Јар јарлаган улус слерге јарлыктаган эдилер. Ангелдер де мыны билип аларга сӱрекей кӱӱнзеп јадылар.

Агару јӱрӱм

13Оныҥ учун, кур курчанган чылап, санаагарды курчап, ойгу болуп, Иисус Христос ачылганда, слерге берилип турган јакшылыкка бӱткӱлинче иженигер. 14Сӧсуккур балдардый болыгар, башкыда билбей јӱргенигердеҥ улам слерде болгон кычаларга бакпагар. 15Карын, слерди кычырып алган Кудай агару чылап, бойыгар да јӱрӱмеерде агару болыгар. 16Бичилген сӧс бар ине: «Агару болыгар, нениҥ учун дезе Мен агару».

17Кудай кажы ла кижини ылгабай, эткен керектериле јаргылайт. Анайдарда, Оны Адагар деп адап турган болзогор, Оноҥ айап, јерде удурум јӱрген ӧйигерди ӧткӱригер. 18Слерге адалардаҥ берилген сандырашту јӱрӱмнеҥ быртып калар мӧҥӱнле эмезе алтынла садылып алылбаганаарды, 19карын, јек јок ло ару кураан ошкош Христостыҥ баалу каныла садылып алылганыгарды билип јадыгар. 20Ол телекей јайалардаҥ озо талдалган, је слерге калганчы ӧйлӧрдӧ ачылган. 21Слер Ол ажыра Кудайга бӱттигер. Кудай Оны тиргизип, слерди Кудайга бӱдӱп, Ого ижензин деп, Ого мак берген.

22Слер карындаштарды ылгабай сӱӱрге, Тын ажыра чындыкка багып, тыныгарды арутадыгар. Бой-бойыгарды ару јӱрегеердеҥ јаантайын сӱӱгер. 23Слерге јаҥы јӱрӱм берген ӱрен ӱргӱлји болуп јат. Ол – Кудайдыҥ тирӱ ле элен-чакка артабас сӧзи, 24нениҥ учун дезе

кандый ла кижи ӧлӧҥдий,

кижиниҥ кандый ла магы ӧлӧҥдӧги чечектий.

Ӧлӧҥ кургаза, чечеги тӱжӱп калат,

25је Кайраканныҥ сӧзи ӱргӱлјиге јӱрет.

Бу – слерге јарлалган сӧс.

Currently Selected:

Петрдыҥ 1-кы самаразы 1: AltNTBC

Highlight

Copy