Yuda 1
1
Ku xeweta
1 Mina Yuda, nandza wa Yesu Kriste ni makwavo wa Yakobo, ndzi tsalela lava Xikwembu Tatana xi va vitaneke, lava hanyaka erirhandzwini ra xona, va ri karhi va hlayisiwa hi Yesu Kriste, ndzi ri:
2Musa, ni ku rhula, ni rirhandzu, a swi ve na n'wina swi mi talela.
Vadyondzisi va mavunwa
(II Pet. 2:1-17)
3Varhandziwa, a ndzi navela ngopfu ku mi tsalela timhaka ta ku ponisiwa loku nga ka hina hinkwerhu, kambe ndzi kumile leswaku swa ndzi fanela ku mi tsalela ndzi mi khongotela ku lwela vupfumeri lebyi Xikwembu xi byi nyikeke vahlawuriwa va xona, kan'we swi hela kwalaho. 4Hikuva vanhu van'wana va ngungumerile va nghena exikarhi ka hina; ku avanyisiwa ka vona ku lunghisiwile khale. I vanhu lava nga riki na mhaka ni vukhongeri; va gombonyokisa tintswalo ta Xikwembu xa hina, va endla swa manyala ha tona, naswona va landzula Yesu Kriste, yena N'wini wa hinkwaswo ni Hosi ya hina.
5 Hambileswi mi tivaka swinene timhaka leti, ndzi navela ku mi tsundzuxa leswaku Hosi yi ponisile Vaisraele, yi va humesa etikweni ra Egipta; kambe endzhaku ka sweswo, yi herisile lava va nga pfumelangiki. 6Naswona ku ni tintsumi leti ti nga hlayisangiki xiyimo xa tona, kambe ti sukile laha a ku ri kaya ka tona ka xiviri; hikokwalaho, Xikwembu xi bohile tintsumi ta kona hi tinketani, xi ti pfalela hilaha ku nga heriki exinyamini lexi chavisaka ku fikela siku lerikulu ra ku avanyisiwa. 7 Swa ha fana na Sodoma na Gomora, ni miti leyi a yi ri kusuhi na kona, leyi a yi hanya evuoswini tanihi tintsumi letiya ni ku tinyiketa eku naveleni ka swa manyala: Miti leyi sweswi yi endliwile xitsundzuxo hi ku biwa yi hisiwa hi ndzilo lowu nga heriki.
8Na vona vanhu lava, va hanyisa xisweswo: Va nyamisa miri wa vona hi milorho ya vona. A va na mhaka ni vuhosi bya Xikwembu, va sandza ni swivumbiwa leswo hlawuleka swa le tilweni. 9 Kasi Mikaele ntsumi leyikulu, loko a lwetana na Diyavulosi va phikisana hi ntsumbu wa Muxe, ú chavile ku avanyisa Diyavulosi ni ku humesa marito ya ku n'wi sandza, kambe ú te: “Hosi a yi ku tshinye!” 10Kambe vanhu lava va sandza xihi na xihi lexi va nga xi twisisiki, kutani swilo leswi va swi tivaka hi ntumbuluko hilaha swiharhi swa nhova swi endlaka hakona, hi swona leswi va tilovisaka ha swona. 11 Khombo eka vona! Hikuva va khomile ndlela ya Kayini; hi ku navela bindzu, va tinyiketa emintirhweni leyo homboloka ya Balaama, va tilovisa hi makanetele yo fana ni ya Kora. 12Vanhu lava i swivati eminkhubyeni ya n'wina ya ntwanano, loko va ri karhi va cina va nwa ngopfu va nga ri na tingana, va tiphina. I mapapa lawa ya nga hava mpfula, lama yisiwaka hala ni hala hi ku hunga ka mimoya; i mirhi ya vuxika yo pfumala mihandzu, yo fa kambirhi hi ku tsuvuriwa; 13i magandlati yo leva ya lwandle; mintirho ya vona ya tingana yi tlutlha ku fana ni xikhuvi; i tinyeleti ta vurhurha-rhurha leti hlayiseriweke munyama lowukulu ngopfu, hilaha ku nga heriki.
14 Yena Enoko, munhu wa rixaka ra vu-7 ku sukela eka Adamu, ú vurile vona volavo, siku a nga vhumbha a ku: “Vonani, Hosi yi fikile ni mavandla ya yona layo hlawuleka ya madzana-dzana, 15ku ta avanyisa hinkwavo; yi ta veka nandzu eka hinkwavo lava nga chaviki Xikwembu, hi mhaka ya mintirho ya vona hinkwayo leyi lwaka na xona, leyi va yi endleke hi ndlela yo pfumala xichavo eka xona. Hosi yi ta avanyisa ni swilo hinkwaswo leswo biha leswi vadyohi lava vo ka va nga chavi Xikwembu va swi vuleke ehenhla ka xona.” 16Lava i vanhu vo tshamela ku ngurangureka ni ku vilela, lava susumetiwaka hi ku navela ka vona loko biha, vanhu va manyunyu lava tikurisaka, lava xisaka van'wana hi ku va bumabumela, kasi va lava ku vuyeriwa.
Switsundzuxo ni swileriso
17Kambe n'wina varhandziwa, mi fanele ku tsundzuka leswi vuriweke khale hi vaapostola va Hosi ya hina Yesu Kriste; 18 va mi byerile va ku: “Eminkarhini leyo hetelela, ku ta humelela vasandzi lava susumetiwaka hi ku navela ka vona loko biha va nga chavi Xikwembu.” 19Hi vona vanhu lava va vangaka ku avana; i vanhu lava fambisiwaka hi swa misava, lava nga hava Moya. 20Kambe n'wina, varhandziwa, tiakeni eku pfumeleni ka n'wina loko hlawuleka ngopfu. Khongelani hi matimba hi Moya lowo Kwetsima. 21Tshamani erirhandzwini ra Xikwembu. Langutelani musa wa Hosi ya hina Yesu Kriste lowu yisaka evutomini lebyi nga heriki. 22Tsetselelani lava kanakanaka. 23Ponisani van'wana hi ku va vutla endzilweni; van'wana mi va tsetselela mi ri ni ku tivonela: Mi fanele ku venga hambi xi ri xiambalo xa vona ntsena, lexi nyamisiweke hi swa misava leyi.
Xikhongelo xo dzunisa Hosi
24Eka yena loyi a nga ni matimba ya ku mi hlayisa leswaku mi nga khuguriwi mi wa, eka yena la kwetsimaka, la kotaka ku mi yimisa emahlweni ka yena mi nga ri na xivati, mi tsakile, 25eka xona Xikwembu xi ri xin'we, muponisi wa hina ha Yesu Kriste Hosi ya hina, ku ni ku twala, ni vukulukumba, ni ku fuma, ni matimba, ku sukela eminkarhini hinkwayo leyi hundzeke, ni sweswi, ni hilaha ku nga heriki. Amen.
Currently Selected:
Yuda 1: TSO89
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1989. Used with permission. All rights reserved.