Sam keil 27
27
Hisien ten masmasien
Asuv houlu Deved mutisi
1Ahi Asuv, kei vi meneai minau ka mutut nau.
Sakini, narmetauntei meatin keil.
Kei kur koe nau en tounah koa vasut nau.
?Sakini, mametaunsa?
2Navong meatin tisa keil umai avit avouas nau ka asak visi mamat;
Ahi hesakin nau nilikat keil, ka keil ilohosai ka isavoi, keil imotmot varei en sise.
3Avaseini keke vangi meatin tavaeen keil imai ikarahit nau,
tinok hermaleileitei.
Munak koakeil alele tisa enau amea avit avahu vatal minau,
desien onak en Ahi hermottei.
4Tounah tai, navis Ahi veni;
keinges ek vati.
Ek vati mok nitos en Eim Votut onen
lises en moulien onak.
En out enek, metok hel en Ahi onak, en more nan lises,
ka nihisi ven kataunien onen.
5En avong takeih, inau nito ven Ahi.
Kei kur koe nau en Eim Votut onen
ka kur revi nau en out tetahos onen.
6Hesakini, nilohlin koakeil avit avahu vatal minau.
Nisan sanien keil min Ahi Asuv hetal min hisohisoen ten sien;
nisau mini ka nimasmasi.
7!Ahi Asuv, kitaengonau navong navisok!
!Em hemahis nau li, ka kisan aneite ten hisien keil onak!
8Tinok raengonuk navong kovit, “!Kimai venau!”
Sakini, en tinok, numai venuk ka navisuk.
9Konato suaitei ranau.
Konavuroh kattei inau, konalei seseintei inau, meatin toumien onom.
Ahi koa komutut inau, mulamu, kokataunau;
konalokoveintei nau li nanato sasok.
10Vahesa tata onak keilu mama onak lulokoveinau;
ka keik, Ahi Asuv, kilei kat revi nau.
11Ahi Asuv, kihiseinau en asa koa em vati moumoni;
ka kilamunau en sise koa meatin tisa keil areingeingeni avousil inau eni.
12Konamaentei inau min meatin tisa keil enek.
Keil aselus karen inau en luvosien, ka lises avit avouas inau.
13Ka asakras, veni nakilea keke nimoul
niles tahosien keil onen Ahi.
14!Kami miheling desien onami en Ahi Asuv!
!Mihehati kami hekeih, minandemkotei!
Anatin, miheling desien onami eni.
Currently Selected:
Sam keil 27: pma
Highlight
Share
Copy
Want to have your highlights saved across all your devices? Sign up or sign in
Copyright © 2011 Wycliffe Bible Translators, Inc.
