Matiu 26

Hetetamen keil onen Siu keil alekat sise keke avouas Iesu vamat vaha ien#Mak 14:1-2; Luk 22:1-2; Sion 11:45-53

1Navong Iesu selus min meatin keil onen|Meatin keil onen Iesu usil tounah ten Avong koa ilei revi usite vasi onen meatin keil evus, kei viteni min keil vit, 2“Suval mikilea eni tuai, avong helu sesuk keke umon Anien ten Mul Laui|Anien ten Mul Laui.#Eks 12:1-27 Ka en avong enek varei, isa lat nau, Natin Meatin, niha en hen vativieh keil onak keke iti kat nau en aiveave.”#Mat 20:18-19; 27:26; 15:15; Luk 24:7,20; Sion 19:16

3Ka en more teim osen Kaiafas koa vi asuv houlu onen pris keil, asuv keil onen pris keil ka elda keil alah ruai. 4Keil arun lekat sise koa ika suai ien keke akilea avahuli kat Iesu ka avouasi vamat. 5Ka aviteni avit, “Rehermumontei en avong ten ale, veni hetisa meatin keil anoumon rea.”

Iesu va en anien tai ka ahin tai rie lat houhouen onen mini#Mak 14:3-9; Sion 12:1-8

6Ka navong Iesu mul veah en out Betani, kei ro teim sen Saemon koa mulamu kur mesaien ten leprosi en hiliven. 7Navong Iesu mul kanian, ahin tai mai veni ka mul kur veite koa amumoni en more ahat koa avise en alabasta. Oel koa vite tahos imok mul ien koa mani teni keih ka kei mai ka mutahi en vatin Iesu.#Luk 7:36-38

8Ka navong meatin keil onen Iesu alesi, arun kutut usili avit, “?!Vensa kei mul purun oel mukok!? 9Tahos imok vahit kei vasalem en oel koanik en mari mani tai. Vasakini, mani teni kilea vakataun koakeil tounah one tovuol.”

10Iesu kilea en asa amul aselus usili ka viteni min keil vit, “?Mimul mivul kat ahin ekek vensa? Kei mumon more tounah minau. 11Veni koakeil tounah one tovuol ito hetal min kami lisenges, ka inau nirtotei hetal min kami lises. 12Navong kei mutah oel en avek, kei sak mesein nau ten avong tatetahinien onak varei. 13Anatin eli naviteni min kami, en out vasi netan koa ihitehiten more longlongien usil inau, ihiteni mun asa koa ahin ekek mumoni minau. Ka hesakini meatin sav keil indem silat kei.”

Sudas maeni keke vasa lat Iesu va en hen asuv keil onen pris keil#Mak 14:10-11; Luk 22:3-6

14Navong akanian evus, Sudas Eskariot, tai en teindan elu (12) onen Iesu, va ven asuv keil onen pris keil 15ka vis keil vit, “?Munak nisa lat Iesu heha en hemi, mihesan asa minau?” Sakini, keil avuli silva mani hanumau tai ka halualim (30) keke avasani mini.#Eks 21:32; Sak 11:12 16Sudas maeni, ka en avong enek va, kei mul lekat sise vaka ien keke vasa lat Iesu vaha en he.

Iesu kan Anien ten Mul Laui ral min meatin keil onen#Mak 14:12-21; Luk 22:7-13,21-23; Sion 13:21-30

17En avong tai ten avong oulu (7) ten Ale ten Veret Is Tovuol Ien, meatin keil onen Iesu umai veni ka avisi avit, “?Out kave em vati mevasak mesein Anien ten Mul Laui|Anien ten Mul Laui ien?”#Eks 12:14-20

18Iesu vit kesi vit, “Miheha en taon Serusalem ke va, ka mihehotin meatin tai en out enek. Mihehiteni mini mihehit, ‘Tiser viteni vit, “Avong onak mai vesesal. Ka nian Anien ten Mul Laui en teim osom hetal min onak keil.”’” 19Sakini meatin keil onen uva ka amumoni suval koa Iesu viteni min keil. Ekonek, asak mesein Anien ten Mul Laui.

20Navong meteiai munu, Iesu mai ka rondan en anien enek ral min teindan elu (12) onen. 21Ka navong amul akanian, Iesu vit leini min keil vit, “Anatin eli naviteni min kami, tai en kami hesa lat nau niha en hen vativieh keil onak.”

22Navong alonge mukok, onen keil alonge tisa houlu ka retai en keil avis Iesu avit, “?Asuv mukave, komundemi kovit inau?”

23Iesu vit kesi min keil vit, “Anatin, tai en kami koa romul rokanian ruai hesa lat nau.#26:23 Koanek sakin Sam 41:9 mai vi anatin. 24Ka anatin keke inau, Natin Meatin, nimat hesuval koa Tus Votut viteni.#Sam 22:7,8,16-18; Aes 53:9 !Ka hetisa mok min kei koa hesa lat inau! Meatin enek, hetahos imok vahit avarvasitei veni mahien koa Ahi hesani mini hemariso mok.”

25Evus, Sudas koa hesa lati visi vit “?Tiser mukave, komundemi kovit inau?”

Iesu vit kesi mini vit, “Suval keik koviteni.”

26Navong amul akanian, Iesu kur veret ka san masmasien min Ahi veni.#Mat 14:19; 15:36; Mak 6:41; 8:6; Luk 9:16; 1Kor 10:16 Evus vul vahasi ka navong mul riti min meatin keil onen viteni vit, “Mihekuri miheani. Koanik vi avek.”

27Evus, Iesu kur veiuaen, san masmasien min Ahi veni ka navong sani min keil viteni vit, “Kami vasi mihemuni. 28Uaen koanik vi rak vasakin hatkatien|hatkatien takeih hau onen Ahi vakeih ka vamai vahi anatin.#26:28 En Eks 24:6-8, Mosis sien lelat ran buluk en ahor ten sanien votut vasakin hatkatien takeih koa Ahi mumoni ral min me-Isrel keil vamai vahi anatin. En sakien enek, ran Iesu mumon hatkatien takeih hau mai vi anatin keke Ahi houtut moulien onen meatin keil ten out netan. Rak houe ven meatin houlu vakas motein meten Ahi keke hermundemtei mun usil tisaen keil one.#Ser 31:31; Sak 9:11; Hib 9:20 29Naviteni min kami, nirmuntei mun uaen koanik hetokol avong koa nimun risi hetal min kami en avong koa Tata onak hesakin hiasuvien onen heka vasi out.”

30Navong akanian ka amusau en souen tai evus, keil asital ka avina en Hou Nei Olip.#Sam 113–118; Luk 22:39

Iesu vit luvati keke meatin keil onen ilohosai rani#Mak 14:27-31; Luk 22:31-34; Sion 13:36-38

31Navong arokol Hou Nei Olip, Iesu selus min meatin keil onen vit, “En vongien ekek varei, kami vasi mihesokovein inau#Mat 26:56; Sion 16:32 hesuval koa Ahi viteni en Tus Votut koa vit,

‘Nuas meatin koa lei kat sipsip keil,

ka sipsip keil onen iloh rasil.’ Sak 13:7

32Ka navong nimoul eris ran matien, nilamu en kami niha en out Kaleli.”#Mat 28:7,16

33 Ka Pita mea selus vit, “!Avaseini munak meatin sav vasi keil isokoveinuk, inau nasakras masokoveinuk varei!”

34Ka Iesu vit risi mini vit, “Anatin eli naviteni minuk, en vongien enek varei, out hermulantei mau ka ato herkokorattei mau, ka keik, kihiteni hatte hetel keke korkileatei inau.”#Mat 26:69-75; Mak 14:66-72; Luk 22:56-62; Sion 18:25-27

35Ka Pita viteni keih tamun vit, “!Vuo, hermukteinek! !Avaseini munak nimat hetal minuk, inau nasakras mahiteni keke narkileatei keik!” Ka meatin sav keil onen aviteni vatte tas.#Sion 11:16

Iesu vis min Ahi en out Ketsemani ka ling moulien onen en hen#Mak 14:32-42; Luk 22:39-46

36Evus, Iesu va en out tai avise en Ketsemane ral min onen keil.#Sion 18:1 Navong arokol out enek, Iesu viteni min keil vit, “Mihetondan ekok ka mihetosin nau. Inau maha mau keiva ke mahis.” 37Kei kur Pita ka natin Sepeti keilu telmusili. Ka navong telva, rendemien onen Iesu muasi ka longe tisa houlu.#Mat 17:1; Mak 5:37; 14:33; Luk 8:51; 9:28 38Sakini viteni min keitel vit, “Tinok vil en demvoen, vit vahonet inau. Mitheto ekok, mithele hetal minau.”#Sam 42:5,11; 43:5; Sion 12:27; 4:9

39Evus, Iesu mual ran keitel havivis, retengeiril nan vita netan ka vis min Ahi vit, “Tata, munak sise sav mul, kikulat mahien enek ranau li. Ka kirmumontei hesuval koa inau ek vati. Kumonis hesuval koa keik em vati.”#Hib 5:7-8

40Evus, muris va ven keitel ka votini keke telmatil. Ka viteni min Pita vit, “?Mukave? ?Mitsakras mitvalele vatal minau vatokol haoa vatas? 41Mithelele ka mithehis keke mithermottei navong sakvisien hemai en kamitel. En tinomi, emi vati mivoumon asa koa mal, ka avemi memerau nges.”#Mat 6:13; Luk 11:4

42Hatte tamun, Iesu va ris ka vis vit, “Tata, munak sise sav tovuol ka nil nikur vasi mahien enek, kumoni hesuval koa keik em vati.”#Mat 6:10

43Navong muris, votini keke keitel telmatil eris veni telsakras telvahuli kat metalong. 44Sakini, lokovein keitel eris ka va ris vis hatte etel eni en vati hisien enek.#2Kor 12:8

45Ka navong Iesu muris va ven keitel, kei vit, “?Mitmatil ka mitmuseh veah? !Mitlesi! Ekek, avong mai#Sion 12:23; 13:1; 17:1 avasa lat inau, Natin Meatin, vaha en hen meatin tisa keil.#Mat 17:22; Mak 9:31; 10:33; Luk 9:44; 24:7 46!Telmea, tovaha! !Meatin koa vasa lat nau keie, mai tuai!”#Sion 14:31

Avuli kat Iesu#Mak 14:43-50; Luk 22:47-53; Sion 18:3-12

47Navong Iesu mul semau selus, Sudas, tai en teindan elu onen mai kistal. Ka mari vangi meatin keil amusili umai. Keil alah kat mari naef ka ai tavaeen keil. Umai musil rendemien onen asuv keil onen pris keil ka elda keil onen Siu keil. 48Sudas koa vat kati vasa lat Iesu mumon metai tai ral min keil vit, “Meatin koa nimusi, kei varei vi meatin koa emi vati. Mihemai mihehuli kati.” 49Sakini Sudas ka mal va ven Iesu, musi ka vit, “!Tiser, more!”

50Iesu vit kesi vit, “Tuak, kumon asas koa kumai veni.”

Evus, meatin keil umai ka avuli kat Iesu. 51Ka tai en meatin keil onen Iesu leh lat mari naef onen ka musah koteh ralingen slev onen asuv houlu onen pris keil.#Sion 18:26

52Iesu viteni keih mini vit, “Ling ris naef onom en vulin veni koakeil avuhu en naef tai, imat en naef.#Sen 9:6; Rev 13:10 53Munak ek hehati, nakilea mapeah Tata onak, ka hatte tas, hesila mari vangi angelo tavaeen keil heli teindan elu (12) avamai avating koe inau. 54?Ka munak numoni, Tus Votut hemai hehi anatin hemukave koa viteni keke tounah keil enek hekur out?”

55Evus, Iesu viles les mari vange meatin keil enek ka viteni min keil vit, “?Vensa milah kat naef ka ai tavaeen keil keke mivamai mivahuli kat nau? ?Mimundemi namulamun meatin keil keke mevavae vatal min kavmen orer? !Vuo! En avong vasi, narondan en teahu ten Eim Votut ka navisein meatin keil, ka en out enek mirvuli kattei nau.#Luk 19:47; 21:37; Sion 18:20 56Ka tounah vasi enek kur out vasakin asa koa provet keil amutisi en Tus Votut hemai hehi anatin.” Ka navong avuli kati, meatin vasi keil onen alokoveini ka amuloh rasil.#Sak 13:7; Mat 26:31; Sion 16:32

Hetetamen keil onen Siu keil akur Iesu va en kot#Mak 14:53-65; Luk 22:54-55,63-71; Sion 18:13-14,19-24

57Koakeil avuli kat Iesu akuri va en teim sen Kaiafas, koa vi asuv houlu onen pris keil. En out enek, tiser keil ten mengkatien ka elda keil onen Siu keil alah ruai tuai. 58Ka Pita mul lehni musil vange meatin koa mulamun Iesu va vio … rokol teahu ten teim sen asuv houlu onen pris keil. En out enek, kei va neim en teahu ka rondan ral min meatin taleikokoeien keil ten eim enek keke vales asa avoumoni en Iesu.

59Asuv keil onen pris keil ka hetetamen sav keil emun onen Siu keil amul alekat meatin koa voun kat Iesu en tisaen, vasakini akilea avouasi vamat. 60Avaseini meatin houlu aviten luvosien va kat Iesu, asakras avahotin etai tounah keke akilea avamae lat moulien onen keke avou vini.

Evus, meatin elu lumai lumulomal 61ka luviteni min koakeil ten Kaonsel enek luvit, “Komal melong meatin ekek viteni vit, ‘Inau nakilea mou rasilin Eim Votut onen Ahi, ka en avong etel enges, num risi.’”#Mat 27:40; Sion 2:19; Umen 6:14

62Sakini asuv houlu onen pris keil mulomal ka vis Iesu vit, “?Mukave? Kolong selusien keil koa aviteni va katuk. ?Tounah tovuol kovahiteni?” 63Ka Iesu mules ro raeng.#Aes 53:7; Mat 27:12,14; Luk 23:9; Sion 19:9

Sakini asuv houlu enek vis risi vit, “En meten Ahi koa moul, nameng katuk keke kihiten asa koa vi anatin. ?Anatin keke kovi Mesaea, Natin Ahi?”#Mat 16:16-17

64Iesu vit kesi vit, “Suval koa koviteni. Ka naviteni min kami, kosa heha, miheles …

‘Natin Meatin hetondan

en usite matu onen Ahi Asuv ten Keihoen

ka mihelesi hemita en mahmah keil ten out nesa!’” Sam 110:1; Dan 7:13

65Navong asuv houlu onen pris keil long selusien onen, tin tisa houlu, rali vas eisin onen ka viteni keih vit, “?Milonge? !Kei selus kekar en isen Ahi! ?Vensa romul rolekat selusien sav koa vaha kati? !Kami vasi milonge mukave kei selus kekar en isen Ahi!#Lev 24:16; Sion 19:7 66?Rendemien onami mukave?”

Keil avit kesi avit, “!Mal enges keke hemat imok!”

67Evus, keil amutiv kat nan ka amuti. Ka tei sav en keil akovasi#Aes 50:6; 53:5 68ka avit, “?!Munak kovi Mesaea anatin, hit luvati min komai, isei varei mutik!?”

Pita viteni hatte etel keke rokileatei Iesu#Mak 14:66-72; Luk 22:56-62; Sion 18:15-18,25-27

69 Navong Pita mul rondan veah en teahu ten eim omon asuv houlu onen pris keil, atouli toumien tai mai veni ka vit, “Keik emun koro ral min Iesu ten out Kaleli.”

70Ka Pita muun keih en meten meatin keil vit, “!Rovitei anatin! !Inau narkileatei tounah koa komul kovit usili!”

71Evus, Pita mea mual va en meteau ten teahu. Ekonek, atouli toumien sav tamun lesi ka viteni min meatin sav keil vit, “!Meatin koanik vi tai en keil koa amusil Iesu ten out Nasaret!”

72Ka hatte tamun, Pita viteni min keil vit, “!Navat kati anatin keke narkileatei varei meatin enek!”

73Rovitei tuetin, meatin keil koa amulomal en out enek umai ven Pita ka aviteni mini avit, “Keik varei kovi meatin tai onen veni selusien onom suval koan Kaleli.”

74Ka Pita sesendan kei sasen ral min selusien keih vit, “!Inau narkileatei varei meatin koa mimul mivit usili! !Ka Ahi hesan mahien minau munak selusien onak vi luvosien!”

Hatte tas, ato tai kokorat. 75Ka navong Pita longe, mundem ris asa koa Iesu viteni mini vit, “Out hermulantei mau ka ato herkokorattei mau, ka keik, kihiteni hatte hetel keke korkileatei nau.”#Mat 26:34; Mak 14:30; Luk 22:34; Sion 13:38 Sakini, kei lokovein teahu enek, tin mah houlu ka murang.

Currently Selected:

Matiu 26: pma

Highlight

Copy