Jɔɔnn 1
1
Wunba tee Yennu Mɔb labaar
1Sintansimm dinn ki sɔɔ ki siar daa din kaa na, ŋaan Yennu Mɔb, wunba tee Yisa Masia, ŋarin poŋ din bee, ki Yennu Mɔb maŋ din taa nan Yennu. Ŋɔɔe bia ji din jenna ki tee Yennu. 2Yennu Mɔb maŋe din be nan Yennu sinsinn, 3ki u nie ki Yennu din nan bont kur, ki siar din kaa ki Yennu nan ki li ki nyii u ni, 4ki u nie biak ki manfoor be, ki u jikit ki teen niib, ki li manfoor maŋe tee niib yentu, 5ki yentir tingbouŋ na niib bunbɔnn, ki bunbɔnn na ki fit bɔnn yentu maŋi.
6Jasɔɔ nna din be ki u sann yi Jɔɔnn wunba wuur niib Yennu nyunwuru na, ki Yennu din tumɔ 7a wun baar ki tan bet niib kur a Yisa Masiae tee niib yentu, ki bin teen Yisa maŋ yada. 8Ŋaan Jɔɔnn maŋ kaa din tee yentu maŋi. Ŋɔɔ kpan din baar a wun tan bet niib yentu maŋ poe. 9Yisae din tee barmɔnii yentu nba din baar tingbouŋ na ni, ki ji yentir niib kur ni. 10Wa din baar tingbouŋ na ni maŋ, ŋaan tingbouŋ na ŋaateeb lek taan ki bannɔ, ŋaan li din tee u nie setik ki Yennu din nan tingbouŋ na. 11Wa din baar tingbouŋ ni na, u din be u tiauŋ niib Israel teeb ni, ŋaan bi lek din ki gaarɔ. 12Ŋaan binba kur gaarɔ ki teenɔ yada ki jii bi mɔŋ ki turɔ, ŋamme ki u din chabib ki bi ji teen Yennu waas. 13Ba din teen Yennu waas na, ki Yennu ji turib u manfopaann. Li ki tee nisaarii kaa din turib li manfoor ba din marib yoonba na, ŋaan li din tee Yennue.
14Yoo nba ki Yennu Mɔb maŋ din baar ki tee nisaarik na, u din be nant tingbouŋ na ni, ki din gbee nan ninbatinu, nan barmɔnii wannu, ki timm nba din tuu be nanɔ na laat u yentsaakar, ki li yentsaakar na nyii u Baa Yennu boor, kimaan u tee u Biyenne.
15Yoo nba ki Jɔɔnn nba din wuur niib Yennu nyunwuru na tan lau na, ki u nyinn u siara ki yikin sanpaapowa a “Daanɔ nba ki n daan beeri ki yaa a u tan sa baar ki cheen na, u poŋ din tuu beewa, ki bi tan marin, ŋɔɔe na jik.”
16Tɔn, wa gbee nan ŋanu biaŋinba na, ki ti kur mun la u ŋanu maŋ, ki bia laat sommir ki pukii sommir paak. 17Moses din turit Yennu sennue, ŋaan Yisa Masia ŋarin din baar nan ninbatinu ki teent ki bia want barmɔnii wannu. 18Sɔɔ kaa ki mi la Yennu; u mɔŋ biyenn nba mantik kpiau ki bia yek nanɔ na, ŋɔɔe fiitɔ ki turit.
Jɔɔnn nba din wuur niib Yennu nyunwuru na po
(Matiu 3.1-12; Mak 1.1-8; Luk 3.1-18)
19Tɔn, ki Juu teeb yudamm nba din be Jerusalem na tun Yennu jiantu yudamm nan Liifai teeb Jɔɔnn maŋ boor, a bin boiɔ a “A tee ŋmee?” 20Ki Jɔɔnn mun din ki yêt jiinu, ŋaan jiin ki yet yent ki yaa a “Min kaa tee Yennu Niganntɔɔ Masia.” 21Ŋanne ki bi boiɔ a “Ki a tee ŋmee? A tee Elaijaee?” Ki u jiin ki yaa a ŋɔɔ kaa. Ki bi bia boiɔ “Ki a tee sɔkinii nba nee-ee?” Ki u jiin a ŋɔɔ kaa biaki. 22Ŋanne ki bi boiɔ “Ki a tee ŋmee? Wantit fa tee wunba ki ti ŋmat saa bet binba tumit na. A sa yet nlee ki jikit saa a mɔŋ po?” 23Ki Jɔɔnn yaa a
“Mine tee wunba be muuk ni na,
ki hoot yaa a:
Teent ti Yomdaanɔ baaru siir na.”
Jɔɔnn din jii Yennu sɔkinii Aisaya gbouŋ ni maame, ki pak wann wa tee wunba.
24Tɔn, niib maŋ din nyii Farisiinba boor ni. 25Ki bi bia boi Jɔɔnn ki yaa a “Li-i tee ki a ki tee Masia, ki bia ki tee Elaija, ki bia mun ki tee sɔkinii nba na, ki li teen nlee ki a wuur niib Yennu nyunwuru?” 26Ki Jɔɔnn yaa a “Min ŋarin wuur niib nyume, ŋaan sɔɔ be i sinsuuk nna ki i ki miu. 27Ŋɔɔe tee wunba yaa wun wei n paak, ŋaan ki n ki ŋan nan ki n lot u taasaaŋmii gbaa.”
28Tɔn, bi din boiɔ buboit na doo nba sann yi Betani, ki li din be Jɔɔdann mɔk-pootir. Leŋe ki Jɔɔnn din wuur niib Yennu nyunwuru.
Biaŋinba ki Jɔɔnn yaa a Yisa tee Yennu pebik
29La yent sanyiɔk, ki Jɔɔnn maŋ la Yisa ki u baat, ki u bet niib na a “Gotir man! Yennu marouŋ pebikii na. Ŋɔɔe sa nyinn tingbouŋ na ŋaateeb biit. 30Ŋɔɔe tee daanɔ nba ki n won beeri a ŋɔɔe tan sa wei n paak kii tuun Yennu toona, ŋaan bia cheen na. U poŋ din beewa ki bi tan marin. 31N tuu ki bann a ŋɔɔe na, ŋaan n daan baar ma n wur niib Yennu nyunwuru, ma n wann Israel teeb wa tee wunba.”
32-33Ki Jɔɔnn bia yet niib na a “Ma daan daa ki bann wa tee wunba maŋ, ki Yennu nba tumin a n tan wur niib u nyunwuru na, ŋɔɔe betin a ‘Daanɔ nba ki a tan la ki n Seyeeŋ siik ki tan tɔɔn u paak ki biar be nanɔ, fan bann nan ŋɔɔe tee wunba sa jii n Seyeeŋ ki wuur niib para.’ Ki n set la Yennu Seyeeŋ, ki u nyii Yendɔuŋ ni ki siik, ki naan nan ŋmann na, ki tan tɔɔn Yisa paak ki biar be nanɔ. 34N set la nna, ki bia beeri nan ŋɔɔe tee Yennu Bija.”
Yisa sinsinn poorpoweiteeb po
35La bia yent, ki Jɔɔnn see nan u poorpoweiteeb na bannlee, 36ki tan la ki Yisa gaar saa, ki u yet a “Gotir man, Yennu marouŋ pebik na!” 37Ki Jɔɔnn poorpoweiteeb bannlee na nba gbat ki Jɔɔnn yet nna maŋ, ki bi nyikɔ, ŋaan waa Yisa. 38Ki Yisa saa jiant got ki la ki bi waau, ki u boib a “I loon bee?” Ki bi jiin a “Wanntɔɔ, ti loon ki ti bann fa be siame.” 39Ki Yisa yetib a “Yii waa man ki saa la ma be siaminba.” Li din tee kut munna yooe jayenn, ki bi weiɔ ki saan ki saa la wa be siaminba, ki bi ji din biar ki be nanɔ daar maŋ ni.
40Bi bannlee maŋ nba din dɔŋ gbat Jɔɔnn nba yet linba na ki waa Yisa na, bi yenɔ din tee Andru, wunba din tee Simon Piita waarɔ. 41Wa din nyii Yisa boor ni na poorpoe, ki u saan yiama ki saa lon u yɔɔrɔ Simon boor, ki tan betɔ yaa a “Ti la Masia nawa,” (ki Masia paak tee Yennu Niganntɔɔ,) 42ŋaan baar nanɔ Yisa boor. Ki Yisa gotɔ sirrr, ki tan betɔ a “Fine tee Simon wunba tee Jɔɔnn bija, ŋaan a sann bia sii yi Siifas.” (Siifas nan Piita sana tee yomme, ki li paak tee tann.)
43Li sanyafannuko, ki Yisa loon wun saan Galilee. Ki u lon Filip boor ki betɔ a “I waan.” 44Filip din nyii Betsaidae. Leŋe tee doo nba ki Andru nan Piita mun din nyii na. 45Ki Filip mun saan ki saa lon Natanael boor ki betɔ a “Ti la wunba ki Moses din sɔb u po Yennu sennu gbouŋ ni, ki sɔkiniinba bia din sɔb u po, ki pak a u sa baar na. Ŋɔɔe tee Yisa wunba tee Josef bik, ki u nyii Nasaret.” 46Ki Natanael yetɔ a “Nasaretii? Bonŋann sa fit nyi Nasaretaa?” Ki Filip betɔ “A mɔŋ mɔŋ mun-n baar ki tan got.”
47Yisa nba la Natanael ki u baat u peŋ na, ki u pak u po ki yet a “Israel niŋanɔe na, kimaan u tee niburchimɔe.” 48Ki Natanael boiɔ “A teen nlee ki mimi?”
Ki Yisa yetɔ a “Filip nba daa bo ki baar ki yiina na, ŋaan sɔɔ ki n poŋ la-awa, ki a kar kinkaŋ nyakir.” 49Ki Natanael yetɔ a “Chanbaa, a tee Yennu Bijae, ki bia tee Israel teeb kpanbar.” 50Ki Yisa boiɔ, “Ma yeta a n la-a ki a kar kinkaŋ nyakir nie, ki a teenin yada-aa? ŋaan a sii laat toonjaana ki lin gar linba na paak. 51Barmɔniie ki n beeri na, i sa la sanpaapo loot, ki Yennu malakanba siik nisaarik Bik na paak, ki ŋmat do sanpaapo.”
Currently Selected:
Jɔɔnn 1: BIM
Highlight
Share
Copy
Want to have your highlights saved across all your devices? Sign up or sign in