Amǝ Mishan 27

Bulǝs kutio a waru aban ká a Roma

1Cau yi dumǝna ama sǝm nǝ̀ kutio a waru-mur sǝm nǝ̀ ká a Italiya. Pǝlǝa à pa Bulǝs andǝ aɓea aɓwana mǝnana à kùria ka a bu Juliyos, ɓe soje mǝgulo amur ɓe nggǝsanyi mala asoje Roma, à tunǝia ama, “Nggǝsanyi asoje mala Mǝtala Nzali.” 2Pǝlǝa sǝm kutio aɓa waru mǝnana puro a nggeala Adǝrametiyom, sǝ lo gya nǝ̀ ngga karkya arǝ aban-kpashia mala awaru akun nggeamur mala bu-nzali Asiya ka. Sǝm lo gya sǝm puro aɓa nggeamur. Aristakus, yì ɓwa mǝnana pur nǝ nggeala Tasalonika aɓa bu-nzali Masǝdoniya ka, nda ata sǝm.

3Ban fana ka, sǝm kya bwal nggeala Sidon. Juliyos yì soje mǝgulo ka, lǝmndǝì Bulǝs pê mǝɓoarne. Eari wi ɓǝ̀ kya sǝn agyajam male mǝnana à ndanǝ do akano ka, ɓǝa pe wi gir mǝnana kat ɗwanyi ka. 4Sǝm nying ban mǝno aban o aɓa nggeamur ɗǝm. Sǝ acemǝnana ɓua mala gung soa sǝm ngga, sǝm yì kwaki nǝ kunmur mala luran Sayipǝrus, ban mǝnana nda gbar sǝm arǝ ɓua mala gung mǝcande ka. 5Sǝm yi kasǝa aɓa nggeamur, sǝm mgbali kunmur mala abu-nzali mala amǝ Sǝlisiya andǝ Pamfiliya ata bu sǝm mǝli. Waru yi tusǝo a kunmur mala nggeala Mera, a bu-nzali Lisiya. 6Abanì sǝ ɓwamǝgule soje kum waru mǝnana pur a Alizandǝriya nǝ̀ ká Italiya ka, pǝlǝa tsǝk sǝm a ɓālǝi.

7Sǝm pakki anonggeo pas, waru kǝ ging kpǝm ɗang. Nǝ tanniki kǝrkǝr sǝ sǝm nggea bwal bu la mala amǝ Kǝnidus. Lang sǝm sǝni gung pà nǝ̀ eara sǝm ká kporong a dǝmbǝa raka, kara sǝm pǝlǝ múr-waru sǝm samsǝ aɓa mùr sǝm yì kuti Salmone, la a kun mur a luran Kǝreti. Sǝm yi pǝlǝa arǝ kun gwanyi, a bui mala yì luran mǝnana gbar sǝm arǝ ɓua mala gung ka. 8Sǝm ging nǝ waru arǝ gwanyi, nǝ tanni mǝgule sǝ sǝm yì bwal ban mǝnana à kǝ tunǝi ama, Ban Auwa-mùr, mǝnana nda tu nǝ ɓe la à tunǝki ama Lasi ka.

9Pwari kuti sǝm kǝrkǝr, sǝ ado ka gya amur mùr dumǝna gir ɓangciu, acemǝnana anggo ka Pwari Lamsan Twalban Cauɓikea#27:9 Pwari Lamsan Twalban Cauɓikea ka nda “ɓe Lamsan mala amǝ Yahudi mǝnana à kǝ pe mala zǝmbǝa aban Ɓakuli nǝ gilmur, ace twalban acauɓikea malea. À kǝ pe a masǝlǝata tongno-nong-inea zongŋo, zongŋo mala kun mbulo, mǝnana a ɓalǝi ka gung-mbulo kǝ ɓua kǝkǝr.” kutina. Ace mani ka, Bulǝs banggi aɓwana-mǝgule mala turo ɓa waru mǝnia yì cau-sǝnggia ka ama: 10“Wun aburana, ǝn nggǝ sǝni ka gya mǝnia sǝm nggǝ ká nǝi ka, tanni na kam. Lo mala gung-ɓá-nggeamur ka, nǝ̀ yiu nǝ kiɗìkì arǝ waru, bangula twalo nǝ̀ ueɓà sǝ earka nǝ̀ ngga ká-mǝɓane mala ɗwanyi yilǝmi sǝm.” 11Sǝ ɓwamǝgule soje ka, kǝ cau mǝnana mǝtala waru andǝ mǝkwak waru na ka, kǝ nda kpate ka, ɓinǝ cau mala Bulǝs.

12Abanì mǝno waru kpashi kam ngga, gung ɓa-nggeamur mǝcande kǝ ɓua kam tutu nǝ kunɗwal. Banì pànǝ ɓoaro à nǝ̀ duk kam nǝ kunɗwal ɗàng. Ace mani ka, bangula aɓwana kat mǝnana aɓa waru ka, à na ama, kǝpǝna ɓǝ̀ sǝm lidǝmbǝa nǝ o aɓa nggeamur. À tsǝkɓalǝia ama ɓǝ̀ nǝ̀ gandǝ pa ka, ɓǝa ɓariki ɓǝa kya bwal Fonis, ban mǝnana à nǝ̀ ngga usǝlǝo à nǝ̀ mal kunɗwal kam ngga. Fonis ka ban kpasha mala awaru na a luran Kǝreti, banì kǝ sǝn rǝarǝia andǝ ɓa nggeamur arǝ anjari ɓari; nǝ njartamur a bui mala njarnzali andǝ njarnza a bui mala takuli, sǝa ma gbarî ban mǝnana gung mǝcande kǝ yiu nǝi ka.

Gung mǝcande aɓa nggeamur

13Lang gung mǝ ɓukɓuki tita ɓua bǝti-bǝti nǝ njartamur ka, aburana man kǝ sǝni kǝla, à nǝ̀ gandǝ lidǝmbǝa aban o a waru. Pǝlǝa à eamsǝ tali mǝnana tamsǝ waru ka aɓa waru, à loasǝ shel aban o, à kǝ samsǝ tu nǝ kun gwanyi mala luran Kǝreti. 14Sǝa ma banì sau ɗang, nggea gung mǝcande kǝrkǝr mǝnana pur nǝ mur-nza mala luran, à tunǝki ama “Gung Njarnza-Njartakuli” ka, kara lo sulǝo amur sǝm. 15Gung ɓua kǝ mgbali mur waru nǝ̀ nyesǝi nǝ te. Sǝ acemǝnana sǝm gandǝ soa gung raka, kara sǝm ɗeki waru, kpata gung aban keale.

16Waru keal nǝ sǝm nǝ̀ ngga kuti muna luran mǝnana à tunǝki ama Kauda ka, pǝlǝa sǝm ɓariki sǝm kyang a rǝì a bui mǝnana gbar sǝm arǝ ɓua mala gung ngga. Abanì ka sǝm tanniki kǝrkǝr sǝ sǝm nun muna-waru sǝm amsǝi, sǝm yinǝi aban nggea-waru. 17Amǝ samsǝ waru eamsǝna muna-waru aɓa nggea-waru ka, pǝlǝa à marǝki nggea-waru nǝ anggur-waya sǝ à kurki ace mǝnana ɓǝ̀ kumo ɓǝ̀ bwali kam pepe. Ɓangciu pakkia wia ama, à ndo à nǝ̀ ngga gorǝ a tukio mala Sǝrtis#27:17 tukio mala Sǝrtis: Sǝrtis ka lullǝ ɓe ban na a mealmur mala nzali mala amǝ Libiya. Ban nì ka sala na sǝ tukio na aɓa nggeamur, awaru kǝ gbāli kam.. Nda à sulǝ shel mǝgule mala aɓi ace amsǝ mire mala waru, sǝ à ɗeki ɓǝ̀ keale ata gung.

18Lang gung mǝkǝrkǝr nì lidǝmbǝa nǝ loasǝki nggeamur aban walke arǝ waru, yi puro a ɓe banfa ka, kara amǝturo ɓa-waru tita amsǝ atwalo mǝnana a waru ka, à sukkia aɓa nggeamur. 19A tāruia nongŋo mala ɓua mǝkǝrkǝr nì mala gung ngga, à pwan aɓea agir samsǝ waru à sukkia a nggeamur. 20Twal anonggeo pas, ko sǝm sǝn pwari ko anlero ɗang, sǝ gung lidǝmbǝa nǝ ɓua wak, gandǝa sǝm twali ama pà sǝm nǝ̀ au ɗang. 21Twal anonggeo pas kǝɓwa ata sǝm a waru li girlina ɗang. Nda Bulǝs lo came a ɓadǝm sǝm, na ama:

Ɓǝ̀ wu ongŋǝna cau mǝnana ǝn bangga wun ngga, ɓǝ́ wu nying ma luran Kǝreti aban yiu ɗang. Lǝmndǝ ama ɓǝ́ sǝm auwuni mǝnia yì kiɗikea mala waru andǝ ɗwanyi agir ka. 22Sǝ ado ka, ǝn nggǝ zǝmbǝa wun, wu cam kàngkàng! Kǝ ɓwa pà aɓalǝ wun nǝ̀ ɗwanyi yilǝmi ɗang. Kǝ waru na à nǝ̀ ɗwanyi ka.

23Aɓa bu du mǝnia kuti ka, mǝturonjar mala Ɓakuli mem mǝnana ǝn nggǝ peri abani ka, yiu abanam, 24na ama, “Ɓǝ̀ ɓangciu ɓǝ̀ kǝa pakko ɗang, Bulǝs! Dumǝna pup a nǝ came a ɓadǝm Kaisar. Sǝ Ɓakuli, nǝ ɓwamuru male abano ka, amsǝna yilǝmi aɓwana mǝnana wu nda wunǝia a waru ka.” 25Ace mani ka, wu cam kàngkàng, wun aburana! Mim ngga, mǝ ndanǝ guli arǝ Ɓakuli ama, nǝ̀ pǎ anggo kǝla mǝnana à nam ngga. 26Kat andǝ mani ka, dumǝna pup waru nǝ̀ ngga wal arǝ kunmur mala ɓe luran nǝ̀ arkia.

27A lum-nong-inea du, anzǝm mǝnana gung tinata ɓua sǝ nda rǝ keal nǝ sǝm aɓa nggeamur Meditaraniya ka, nǝ ɓadu, amǝ samsǝ waru sǝni ka sǝm ndarǝ gbashi ban kun nza. 28Pǝlǝa à tur nggur mǝsauwe mǝnana à kurri wi gir mǝdǝmbǝre ka a mùr, à sǝn lime mala mùr ka kusǝu gbǝman nǝ lumi ɓari na. Banì sau ɗang à nyare à tur nggur ɗǝm, sǝ à sǝn lime male ka kusǝu lumi tongno-nong-ine na. 29Amǝ samsǝ waru ka ɓangciu bwalia acemǝnana à kǝ sǝni kǝla waru no nǝ̀ ngga tul amur atali kun-gwanyi a tamur sǝm nǝ̀ lingge. Nda à sulǝ atali tamsǝ waru, yia ine a mùr, nǝ tǝta waru, waru pǝlǝa came sǝ à zǝmbǝa ɓǝ̀ ban fa.

30Pǝlǝa amǝ samsǝ waru ɓariki ama à nǝ̀ ɓangŋa, à nǝ̀ nying waru, à nǝ̀ o. À sulǝ muna-waru a mùr, à pǎ kǝla à ndaban sulǝ aɓea atali tamsǝ nggea-waru a mùr. 31Pǝlǝa Bulǝs ne ɓwamǝgule soje andǝ asoje ama, “Ɓǝ̀ amǝ samsǝ waru nyare à do aɓa waru raka, wu pa wu nǝ̀ au ɗang.” 32Kara asoje kasǝki anggur mǝnana à bwal muna-waru ka, sǝ à nyi kpa aɓa nggeamur.

33Lang ban malanǝ fa ka, Bulǝs zǝmbǝia wia ama ɓǝa li girlina. Na ama, “Anongŋo lum-nong-ine adyan, wu ndaban kúndǝo aɓa ɓalǝkasǝkya, sǝ aɓalǝ anonggeo mǝno kat ka, wu li kǝgir ɗang. 34Ən nggǝ zǝmbǝa wun, ado, wu li girlina, ace kum rǝcandǝa mala yilǝmi wun. Kǝ ɓwa pà ata wun nǝ̀ ɗwanyi ko nyang ɓamuri mwashat ɗang.”

35Anzǝm mǝnana Bulǝs bangŋǝna cau anggo ka, pǝlǝa twal bǝredi, sǝ pak yàwá aban Ɓakuli a ɓadǝmbǝia kat, ɓwan bǝredi, sǝ tita she. 36Pǝlǝa yia kat ka à kum rǝcandǝa, ko yana aɓalǝia gbal ka, twal girlina li. 37Laki ma'sǝm kat aɓa waru ka nda, gbǝman ɓari nǝ lumi tongno-nong-ɓari nǝ mǝsǝì tongno-nong-mwashat (276). 38Lang ko yana ka linali karǝni ka, pǝlǝa à amsǝ dǝmbǝrya mala waru, à sukki abuku mǝsǝsa a nggeamur.

Waru arkya a nggeamur

39Lang ban fana ka, amǝturo ɓa-waru sǝn kunmur sǝ ko à surǝ banì ɗang. Sǝ a kunmur nì she ka à sǝn ban kpashi awaru kam a kun sala, nda à pak ɗenyicau ama, à nǝ̀ gandǝ ká, à nǝ̀ kwak waru arǝ nza abanì. 40Pǝlǝa à kasǝkia ansolo mala atali mǝnana à tamsǝna waru nǝia ka, à nyia, à ko a tamur. Ata rǝia andǝ mǝno ka, à panzǝki anggur mǝnana à kùrkina apelapele nǝia ka. Pǝlǝa à loasǝ shel mǝnana à dǝm waru ka, ace mǝnana ɓǝ̀ gung twal waru aban ká, a kun nza ka. 41Kara waru yi eauwe amur sala a tamur, cam kingging; múr waru gorǝo ɓinǝ puro, sǝ eaki-nkono mala nggeamur mǝnana gung mǝcande kǝ loasǝki ka, camarǝ walki tǝta waru, arki mesǝki mwashat-mwashat.

42Kane mala asoje ka nda mǝnana ama, à nǝ̀ wal-lú apursǝna kat mǝnana aɓa waru ka, ace mǝnana ɓǝ̀ kǝɓwa aɓalǝia ɓǝ̀ kǝa kpa a mùr, ɓǝ̀ oakio, ɓǝ̀ eau a nza, ɓǝ̀ ɓwaro a rǝia ka ɗang. 43Sǝ ɓwamǝgule soje ka, kǝ earce nǝ̀ amsǝ Bulǝs, ace mǝnana ɓǝa kǝa wal-lui raka, pǝlǝa tamsǝ asoje ama ɓǝa kǝa pa anggo ɗang. Nda sǝ tsǝa ama, ko yana mǝnana sǝlǝmur ka ɓǝ̀ ta ɓǝ̀ zurro a nggeamur, ɓǝ̀ oakio ɓǝ̀ eauwe a nza. 44Acili aɓwana ka, ɓǝa damnggia arǝ akpamgbang ko agbǝlang waru mǝnana à sànggì ka, ɓǝa o a rǝia aban ká a nza. Anggo sǝ ko yan ngga auwa, eauwe a nza.

Currently Selected:

Amǝ Mishan 27: mbu

Highlight

Copy

Compare