Amǝ Mishan 15
15
Dokpapi mala amǝkurcau a Urǝshalima
1Aɓea amǝkwaɗi pur a nzali Yahudi à yiu à Antiyok a bu-nzali Suriya. À tita kani amǝkwaɗi ama, “Ɓǝa kasǝa wun ɓata wun, kǝla mana Nggurcau mala Musa kànì raka, pa wu nǝ̀ kum amsǝban ɗang.”#15:1 Ɓalli gbal aɓa: Pǝris 12:3. 2Bulǝs andǝ Barnabas ka à earnǝ mǝnia yì kanigir ka ɗang, à makgir kǝrkǝr andǝ amǝno yì amǝ Yahudi ka. A masǝlǝate ka, à yì eare ama ɓǝa tasǝ Bulǝs, sǝ Barnabas, andǝ aɓea amǝkwaɗi ɓǝa kya Urǝshalima ɓǝa kya kum amǝ'mishan andǝ aɓwana-mǝgule amur ikǝlisiya, ɓǝa ok kunia amur mǝnia yì cau ka.
3Pǝlǝa ikǝlisiya, yì amǝkwaɗi tasǝia aban ká. À ara aɓalǝ abarìban Fonishiya andǝ Samariya à kǝ nea amǝkwaɗi cau mala pǝlǝa mala aɓwana mǝnana amǝ Yahudi na raka aban Ɓakuli. Bum amǝkwaɗi pwasǝo nǝ ok mǝnia yì cau ka. 4Lang à yina a Urǝshalima ka, amǝkwaɗi andǝ amǝ'mishan andǝ aɓwana-mǝgule amur amǝkwaɗi gingsǝia. Pǝlǝa yia ka à twal gir mǝnana kat Ɓakuli pak nǝia aɓa gya malea ka, à banggia wia.
5Sǝ aɓea amǝkwaɗi amǝ Yahudi mana à nda bui mala amǝ Farisi ka, à lo à came, à na ama, “Aɓwana mana amǝ Yahudi na raka, mana à pǝlǝ amǝkwaɗi ka, dumǝna púp à nǝ̀ kasǝia ɓatea, sǝ à nǝ̀ kpata Nggurcau mala Musa.”
6Pǝlǝa amǝ'mishan andǝ aɓwana-mǝgule amur amǝkwaɗi yi do ace sǝnggi ɓa mǝnia yì cau ka. 7Anzǝm naki acau pas ka, Bitǝrus lo came, sǝ nea wia ama:
Wun amǝ'eamrǝarǝu, wu sǝlǝna ama aɓea apwari mǝno a kuti ka, Ɓakuli twalam aɓalǝ wun mǝ hamnǝ Cau Amsǝban aban aɓwana mana amǝ Yahudi na raka. Ɓakuli tasǝam ace mǝnana yia gbal ka, ɓǝa o, ɓǝa paɓamuria aban Yesu.#15:7 Ɓalli gbal aɓa: Aturo 10:1-43. 8Ɓakuli mana surǝ ɓabum koyan ngga, yi lǝmndǝna ama, yì ka, angŋǝnia, acemǝnana pea wia Bangŋo Mǝfele kǝla mana pa sǝm ngga.#15:8 Ɓalli gbal aɓa: Aturo 2:4; 10:44. 9Ɓakuli lǝmndǝa sǝm earmuru sǝ ɓinǝ mǝsǝia ɗang, twalia wia aban acauɓikea malea, lak ɓabumia, acemǝnana à paɓamuria abani ka.
10Sǝ palang ado, sǝ wu kǝ earce ama wu nǝ̀ karǝki Ɓakuli, nǝ tsǝki aɓwana mǝnia amǝ Yahudi na raka sǝ à pǝlǝ amǝkwaɗi ka, twalo mǝdǝmbǝre mana nggearǝ aká sǝm, ko sǝm nǝ ɓamurǝ sǝm ngga, sǝm gandǝ twale raka? 11Mǝnia ka pà nǝ̀ pa anggo ɗang! Sǝm pa ɓamur sǝm sǝ Ɓakuli amsǝ sǝm nǝ ɓwamuru mala Mǝtalabangŋo Yesu, kǝla mana yia gbal ka à paɓamuria ka.
12Koyana ka duk ɗǝong, lang Barnabas andǝ Bulǝs kutia nacau mala agir-ndǝlǝki andǝ agir-gyambǝliban mana Ɓakuli pea nǝ buia aɓalǝ aɓwana mana amǝ Yahudi na raka.
13Lang à malǝna na cau ka, Jemis#15:13 Jemis: ka nda Mǝ'eam Mǝtalabangŋo Yesu. pǝlǝ cau ama:
Wu kwaki kir wun abanam, wun amǝ'eamrǝarǝu! 14Shiman Bitǝrus no bǝl ɓa lang sǝ Ɓakuli ɗenyi nǝ aɓwana mana amǝ Yahudi na raka ka, mana lǝmndǝia wia ɓwamuru, twal aɓwana aɓalǝia ɓǝa duk amale ka. 15Mǝnia yì paɓamuru mala aɓwana mana amǝ Yahudi na raka, nda kǝ ɓangna mǝnana amǝ'ɓangna mala Ɓakuli bangŋǝni ka. Kǝla mana à gilǝì aɓa Malǝmce ama:
16“Anzǝm man ngga
mǝ nǝ nyare
sǝ mǝ nǝ yia ɓak ɓala
mala Dauda mana kpa ka.
Kat andǝa mani ama arki ka,
mǝ nǝ ɓè ɗǝm,
mǝ nǝ nyesǝi a kusǝì
kǝla mana ɗiɗyal ka,
17ace mǝnana aɓwana arǝ
acilia nzali ka,
ɓǝa alta Mǝtalabangŋo,
yia aɓwana mana amǝ Yahudi
na raka,
mana ǝn tunǝia ɓǝa
duk amem ngga.
18Mǝnia ka Mǝtalabangŋo
nǝ̀ bangŋa,
yì ɓwa mana pusǝ amǝnia
yì agir a banfana ɗiɗyal ka.”#15:18 Ɓalli gbal aɓa: Amo 9:11,12.
19Jemis lidǝmbǝa nǝ cau, na ama:
A sǝne mem ngga, ɓǝ̀ sǝm ngga pea aɓwana mana amǝ Yahudi na raka, mana à kǝ pǝlǝ aban Ɓakuli ka, tanni ɗang. 20Gir mana kutibanì ka, sǝm nǝ̀ gilǝ cautera, sǝm nǝ̀ banggia wia ama ɓǝa kǝa li girlina mana à pea alú ata ankúl ka ɗang. Ɓǝa puri ɓa kìɗìkì mala nongginǝban. Ɓǝa kǝa li nyam girkusǝu mana à pūrǝ meali nǝ pūrǝo ka ɗang, sǝ ɓǝa kǝa li nkila ɗang.#15:20 Ɓalli gbal aɓa: Pur 34:15-17; Pǝris 17:10-16; 18:6-23.
21Ɓǝ̀ sǝm ɗenyi ama twal arǝ anza mana a pwaryan ngga, Nggurcau mala Musa ka, à hamǝna nǝi arǝ andakpapi mala amǝ Yahudi a koya nggeala ka, a koya Pwari Sabbat.
Cautera aban ká aban amǝkwaɗi mana amǝ Yahudi na raka
22Pǝlǝa amǝ'mishan, andǝ aɓwana-mǝgule amur amǝkwaɗi, andǝ cili ikǝlisiya mana a Urǝshalima ka, sǝni ka ɓoaro ɓǝa twal aɓwana aɓalǝia ɓǝa tasǝia à Antiyok, a tarǝia andǝ a Bulǝs andǝ Barnabas. À twal aɓwana ɓari ata aɓwana-mǝgule amur amǝkwaɗi mana amǝkwaɗi kǝ pea wia gulo ka; ɓwa kǝla Yahuda mana à tunǝki ama Barsabas ka, sǝ Silas. 23À tasǝia nǝ mǝnia yì cautera ka:
Cau mǝnia ka pur aban sǝm, amǝ'mishan andǝ aɓwana-mǝgule amur amǝkwaɗi, amǝ'eam wun. Sǝm nggǝ tasǝ makkun aban amǝ'eamrǝarǝu kat, mana amǝ Yahudi na raka, mana à ndanǝ do a Antiyok, andǝ acilia aban aɓalǝ abu-nzali Suriya, andǝ Sǝlisiya ka.
24Sǝm o ama aɓea aɓwana mana sǝm nǝ̀ turia raka, à pur aɓalǝ sǝm à yiu aban wun à yì zurǝi mur wun, à zunggǝli ɓabum wun nǝ acau mana à bang ngga. 25Ace mani ka sǝm yì kpapi, sǝ nǝ́ eare ma'sǝm kat sǝ sǝm twal aɓwana sǝm turia aban wun, a tarǝia andǝa Barnabas andǝ Bulǝs, yia mana sǝm earkiyi acea raka. 26Yia ka aɓwana na mǝnana à pa yilǝmia a cau mala turo mala Mǝtala sǝm Yesu Kǝrǝsti ka. 27Sǝm ndya sǝm nggǝ tasǝa wun Yahuda andǝ Silas, mana à nǝ̀ bangga wun nǝ kunia yì cau mala agir mǝnana kat sǝm cia aɓa gilǝe ka.
28Nǝ́ eare mala Bangŋo Mǝfele ka sǝm sǝni ka ndanǝ ɓoaro ɓǝ̀ sǝm ngga tsǝka wun twalo amur wun nǝ anzongcau pas mala amǝ Yahudi ama ɓǝ̀ wu kpatea ka ɗang. Kǝ amǝnia na wu nǝ̀ ɗenyinia ka: 29Wu kǝa li girlina mǝnana à pea alú ka ɗang; wu kǝa li nkila ɗang; wu kǝa li nyam girkusǝu mana à pūrǝ meali nǝ puro ka ɗang; wu kǝa kutia pakkiagir kìɗìkì mala nonggi nǝ rǝarǝu ɗang. Ɓǝ̀ wu yal ɓamur rǝ wun arǝ amǝnia ka, wu pangŋa mǝɓoarne.
Ɓǝ̀ rǝ wun pwalo.
30Aɓwana mana à tasǝia ka, à wario a Antiyok, à kya rambǝa amǝkwaɗi mana abanì ka kat, sǝ à pea wia cautera mana à turia nǝi ka. 31Lang à ɓalni ka, amǝkwaɗi lumsǝ nǝ banɓoarnado, nǝ cau ɓak ɓabum mana a turia wia ban nǝi ka. 32Pǝlǝa Yahuda andǝ Silas, yia mǝnana nǝ ɓamuria ka amǝ'ɓangna mala Ɓakuli na ka, à sau kam aban kwarkir amǝkwaɗi, à kǝ ɓak ɓabumia nǝ acau pas.
33Anzǝm mana à pakkina anonggeo zuku abania ka, amǝkwaɗi tsǝktea aban nyare a Urǝshalima, aban aɓwana mana à tasǝia ka, nǝ rǝpwala. 34-35Sǝ Bulǝs andǝ Barnabas ka à akrǝia a Antiyok, yia andǝ aɓea aɓwana pas à kania aɓwana gir sǝ à hamnǝ cau mala Mǝtalabangŋo.#15:34-35 Amalǝmce pas mana ɗiɗyal à gilǝia nǝ bu ka à panǝ mǝsǝì 34 ɗang, mǝnana bangŋa ama: “Silas ka ueo abania.”
Bulǝs gapi tarǝia andǝ Barnabas
36Nǝ nzǝmo ka, Bulǝs ne Barnabas ama, “Fa sǝm nǝ̀ nyare arǝ ala mǝnana sǝm hamnǝ Cau Amsǝban mala Mǝtalabangŋo kam ngga, sǝm ngga sǝn lidǝmbǝa mala amǝkwaɗi mana à kǝ loa paɓamuria adyan tu ka.” 37Barnabas ka earnǝ ce, sǝ earce ama à nǝ̀ o andǝa Yohana Markus. 38Sǝ Bulǝs ka, ɓinǝ ce kpekpe, ama ɓǝ̀ kǝa ká atea ɗang, acemǝnana Yohana Markus ka ɗekia, nyare a Pamfiliya, lidǝmbǝa nǝ turo atea ɗang.#15:38 Ɓalli gbal aɓa: Aturo 13:13.
39Kunia ɓua amur mǝnia yì cau kǝrkǝr, gandǝa à gau njar, à ginggia rǝia ɗàngɗáng. Barnabas twal Yohana Markus, a kutio a waru à o a luran Sayipǝrus. 40Sǝ Bulǝs twal Silas à o andǝi. Amǝkwaɗi cia aɓata ɓwamuru mala Mǝtalabangŋo nǝ hiwi. 41Pǝlǝa Bulǝs lidǝmbǝa nǝ gya a tarǝia andǝ Silas aɓalǝ abu-nzali Suriya andǝ Sǝlisiya, kǝ kwarkir amǝkwaɗi aban pea wia rǝcandǝa.
Currently Selected:
Amǝ Mishan 15: mbu
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016