Matayo 18
18
Nindi yo mukulu
(Mk 9.33-37; Lk 9.46-48)
1Oko mugulu oyo abiga mobahĩka uku Yesu bati, Nindi yo mukulu oko bosĩ omo Bwami bwʼelubula kwehĩ? 2Neryo Yesu mwabirikira omwana mulere mwamwĩmanĩa omo katĩkatĩ kabo, 3mwabũga ati, Kwenene ngabũga nenyũ, mwamatendibinduka nʼeribya ngʼabana balere, simwendisyingira omo Bwami bwʼelubula. 4Omukulu oko bosĩ omo Bwami bwʼelubula yo yũkayĩkehaya ngʼomwana oyũ. 5Kandi oyũkakokaya omwana ngʼoyũ omo lĩna lyage akanyĩkokaya.
Erirengwako lyʼebibi
(Mk 9.42-48; Lk 17.1-2)
6Nĩkwa oyukaleka omuguma gʼoko bana balere aba, abakanyĩkĩrĩraya, akanyĩlũako lyowene kumbe omundu oyo angasengerwako luso lunene oko bĩkya biwe, kandi ĩnĩasendĩbwa omwʼĩrĩba lyʼengetsi. 7Obũlĩge oko kihugo busana nʼemyatsi eyikaleka bandu ibatswa! Nĩkwa emyatsi eyĩ ikandisyakolwa, nĩkwa obũlĩge oko mundu oyukaleka bandu ibatswa batya!
8Ebyala byawe kutse ekisando kyawe byamaleka iwatswa, ũtwebyo Ugusebyo. Lyowene ndeke busana nawe eriingira omo ngebe iwabirirehema kutse ĩwabĩrĩsĩndogera, kwilaba eribya nʼebyala bibiri kutse ebisando bibiri nʼeriguswa omo muliro wa kera na kera. 9Kandi erĩso lyawe lyamaleka ukatswa, ukuleryo, uguseryo; lyowene ndeke busana nawe eriingira omo ngebe nʼerĩso liguma kwilaba eriguswa omo Kũlĩmũ yʼomuliro nʼameso abiri.
Omũsyo wʼembũlĩ yatala
(Lk 15.3-7)
10Mũlebaye isimwapona omuguma gʼoko bana balere aba. Kusangwa ngababwira nyiti, abamalaĩka babo, omo lubula bakalola oko bũsũ bwa Tata wage oyuli elubula ebiro byosĩ. [ 11Kusangwa Omugala wʼomundu mwasa erĩlamya abatere.]
12Mũkaganĩrayakĩ kwehĩ? Omundu amabya awite esyombũlĩ ĩgana, nʼenguma ya kusyo yamatala, akandĩsĩganĩa esyombũlĩ makũmĩ mwenda nʼomwenda oko bitwa, nʼeriyasonda-sonda embũlĩ eyiriatala. 13Neryo amabanayo, kwenene ngabũga nenyũ, akatsemerayo kwilaba amakũmĩ mwenda nʼomwenda esitetatala. 14Litya Tata wage oyuli elubula sĩanzĩre omuguma gʼoko bana balere aba akahera.
Omũlĩkyetu oyũkahalaya
15Kandi mũlĩkyenyũ amakukola nabi, ugende umukunge, uwe naye ĩnywebene. Amakowa, iwamabiswabana mũlĩkyenyũ. 16Amatendĩkowa, utwale mundu muguma kutse babiri haguma nawe, ngoko kĩsakĩre kiti, Obuli kĩnywa kitoke erihangana busana nʼerĩtũlago lyʼabalangĩrĩ babiri kutse basatu. 17Nĩkwa amagana erĩowabo, iwabwira ekanĩsa ebyosĩ. Kandi amagana erĩowa ekanĩsa, umuganze ngʼomundu wʼebindi bihanda kutse ngʼomũsolesya.
Endagane busana nʼerisaba
18Kwenene ngabũga nenyũ, ekĩndũkĩ mũkaganaya muna-kihugo, kyasyaganwa elubula; nʼekĩndũki ekyo mwasyalĩga muna-kihugo kyasyalĩgwa elubula.
19Kandi ngabũga nenyũ, ababiri bʼũkwʼĩnywe bamĩkĩrĩranĩa omo kihugo busana nʼekĩndũkĩ basyasabira, Tata wage oyuli elubula asyabakolerakyo. 20Kusangwa aho bandu babiri kutse basatu bahĩndene omo lĩna lyage, nyineho omo katĩkatĩ kabo.
Omũsyo wʼomundu oyũtasĩ eribuyira
21Neryo Petero mwasa uku Yesu akamũbũlya ati, Mukama, esyongendo singahi mũlĩkyetu amanyikola nabi, nage inamubuyira kwehĩ? Esyongendo sirinda kwehĩ? 22Yesu mwamubwira ati, Sinditakubwira nyiti ngendo sirinda, nĩkwa esyongendo makũmĩ alinda ngendo sirinda. 23Busana nʼomwatsi oyũ, Obwami bwʼelubula buli ngʼOmwami muguma oyo wabya anzĩre eribuga eriganza lyʼabagombe buwe. 24Neryo omugulu atsũka eriganzirabo, mobamuletera omugombe muguma oyo wabya nʼomwĩnda wuwe wʼesyongunza syʼesyofranka syʼamagetsi singanabi. 25Nĩkwa omugombe oyo mwabula ebindu byʼerimuliha. Neryo omukama wuwe mwahamula ambu agũlĩbawe ngʼomugombe haguma nʼomũkalĩ wuwe nʼabana buwe nʼebyosĩ abya awite, omwĩnda wuwe atũhawe. 26Neryo omugombe oyo mwawa oko marwĩ wuwe embere syʼOmukama wuwe ati, Undindirire, nasyakũtũha ebyosĩ. 27Neryo omukama wʼomugombe oyo mwamũkwĩra obũlĩge, mwamubohola, mwamubuyira omwĩnda oyo.
28Nĩkwa omugombe oyo mwahuluka mwahĩndana nʼogundi mugombe mũlĩkyabo oyo wabya nʼomwĩnda wuwe wʼesyofranka ĩgana. Neryo mugombe oyo mwatsimba mũlĩkyabo oyo yʼomo bĩkya, mwatsũka erĩmũnĩga ati, Ũnyĩtũhe omwĩnda wage! 29Nĩkwa omugombe mũlĩkyabo oyo mwawa ahisi, mwamulemba-lemba ati, Undindirire nasyakũtũha ebyosĩ. 30Nĩkwa mwagana, mwayamugusa omo nyũmba yʼomũlĩkĩ erĩhĩka aho asyatũhĩra omwĩnda. 31Neryo abagombe balĩkyabo babere balangira omwatsi oyo, mobabya nʼobũlĩge bunene mobayatũlĩrago mukama wabo ebyosĩ ebyabere. 32Neryo omukama wuwe mwamubirikira, mwamubwira ati, Uwe mugombe mubi! Nyiriakubuyira omwĩnda gosĩ oyo kusangwa wanyiremba-lemba. 33Nawe sĩwangaganyĩre omugombe mũlĩkyenyũ, ngoko nyiriakuganyira kwehĩ? 34Neryo omukama wuwe mwahitana, mwamuha oko bakagalaya erĩhĩka aho asyatũhĩra omwĩnda wuwe gosĩ. 35Neryo Yesu mwabũga ati, Tata wage oyuli omo lubula asyabakola atya mwamatindabuyira obuli mundu mũlĩkyabo omo mitima yenyũ.
Currently Selected:
Matayo 18: KB80
Highlight
Copy
Compare
Share
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.