Uwugubulilwe wa Yohane 5

Ikitabu cha Umwana ng'olo

1Ndawe ndakiwonige ikitabu mwiwoko lya kundyo lya uyo yeakong'ome mukigoda cha uwutwa; nacho chechandike mugati na mwivala na ukuvikwa indoni simufung'ati. 2Kangi ndamuwene umunyivaha munyaludali ilaalika atigine: “Ngali yenani yeahwana iso indoni na ukukidindula icho ikitabu?” 3Neke sawoniki umunu yeyeavesaga kuchanya, nambi mung'i, nambi pasi kuvafwe, yeahwanite ukukidindula icho ikitabu nave ukukilava mugati. 4Sweno, nene ndavefile hilo pakuva sawoniki umunu yeahwanite ukukidindula, nambi ukukilava mugati. 5Ndawe uyumwi va vala avavaha swe akunigila, “Ulavemba! Lavage! Inyalupala ya ulukolo lwa Yuda, umwisukulu va Daudi adwesise. Sambi ahwana ukuhesa indoni iso isimufung'ati na ukukidindula icho ikitabu.”

6Pala pagatinagati pa kigoda cha uwutwa fila ifigawa ifinyawumi ifitayi, na vala avavaha ndayiwene mwana ng'olo yimite wita ndumule. Eina membe simufung'ati na amiho gimufung'ati ijo je myuhe igimufung'ati ja Nguluvi jeje misindike kukwekuvesaga mung'i, 7ahele swe itegula ikitabu ukuhuma mwiwoko lya kundyo lya yula yealakong'ome mukigoda cha uwutwa. 8Avelige hela itegula icho ikitabu, fila ifigawa ifinyawumi ifitayi pamwinga na vala avavaha machumi gavili na vatayi vaagwe kinyalileme pa ng'olo. Yeyeavesaga alakolye ligombo na ifinyandilo ifiwuyapile isahabu fimemile uwufumba, kilagilo cha ulwifunyo lwa avanu avelu va Nguluvi. 9Sweno, ndawe vimbige ulwimbo ulu ulupya:

“Veve winogela ukutegula icho ikitabu

na ukuhesa indoni sacho.

Pakuva veve wimudumule, na ukukola idanda yako

yeumugulye Nguluvi avanu uluhuma mung'olo mbesili,

indongele, amalugu, na avanu va ing'i mbesili.

10Veve uvawuyipe vave wutwa wa uwutambisi

vamupigile Nguluvi vetu nawo savayisagila ing'i.”

11Ndawe ndalavige, swe ndipulika iliswi lya avanyivaha wolofu hilo imbalilo yesihwaniti yivalilwe, mbilima kwa mbilima. Vevakong'ome vagombite ikigoda cha uwutwa, fila ifigawa ifinyawumi ifitayi na vala avavaha; 12Vihugite ukulonga:

“Umwanang'olo umudumule

yeinogela ukwanukila uludali, uwunono,

uluhala, ululagi, indolo na ululumbo.”

13Ndapulike ifigawa mbefili kuchanya; mung'i, pasi kuvafwe, na mubahali fitigila, “Kulumwene yeakong'ome mukigoda cha uwutwa, na kulu mwanang'olo, kuvelage na ululumbo na ichoga na indolo na uwutwa mbepali na mbepali.” 14Na fila ifigawa ifitayi ifinyawumi fyatige, “Ena!” Na vala avavaha vaagwe kinyalileme, visunyalila.

Currently Selected:

Uwugubulilwe wa Yohane 5: HeNT2004

Highlight

Copy

Compare