Matayo 26
26
Ikigaho icha ukumuwulaga Yesu
(Maliko 14:1-2; Luka 22:1-2; Yohane 11:45-53)
1Neke baho Yesu avelige isinda ukulonga ing'ani mbesili ndawe avatigilige avanyigendo vakwe, 2“Mukulukagula ukutigila fisige filo fivili swe ukufika i pasaka na Umwana va Umunu atawulwa atumbikwe mu musalaba.” 3Ndawe avatambisi avavina na avavaha va avanu vakong'ine kukaye yu mutambisi umuvina ilitawa lyakwe Kayafa. 4Swe vivanga ukugaha ifigaho sambi vamwibate Yesu kwa kinyele vamuwulage. 5Neke pevatigile lulava pa ikimunyi ikikomi cha ipasaka, kulonga kuve naliyowo mu vanu.
Yesu ihululisiwa amafuta ku Betaniya
(Maliko 14:3-9; Yohane 12:1-8)
6Lino Yesu pee ku Betaniya kukaye ya Simoni umunya wukoma, 7umung'inetu uyumwi ahegelye kwa Yesu akolye isupa yeyeyina mafuta ga amagobole amolofu, ndawe amuhululisige Yesu amafuta mu mutwe pealisige 8Neke avanyigendo vakwe pevaluwene ulu swe vivipa vitigila, “Uko sikutogela hela uwunono? 9Ikiba amafuta iga gekegagusiwe amagobole molofu neke vapelwe avamikaa.” 10Yesu swe akulukagula neke avalongele, “Mbi ndawuli mukumufwahisa umung'inetu? Amije nene ikipigo ikinofu. 11Pakuva avamikaa mwinawo mbepali neke nene mba na nyenye filo fikefu hela. 12Pakuva pe akuhululisa amafuta mumuvili gwangu akungelanisa wunofu kufwa na ukutagwa kwangu. 13Nachene nguvalongela, baha padalikwagwa Ulukani Ulunofu mung'i mbeyili ikipigo iki chapigite umung'inetu uyu sakilongwa ukwimila ukwiwukwa kwakwe.”
Yuda akwidikila ukumupituka Yesu
(Maliko 14:10-11; Luka 22:3-6)
14Neke baho uyumwi va vanyigendo avanyichumi na vavili ilitawa lyakwe Yuda Isikalyote ahele ku vatambisi avavina. 15Ndawe avawusige ukutigila, “Mumela kiki pe ndivalonje kwe kwali?” Swe vitigila tukupela amagobole machumi gadatu; 16Uluhuma baho avanzile ukusaka ikilega ukumupituka Yesu.
Yesu ilya i Pasaka na vanyigendo vakwe
(Maliko 14:12-21; Luka 22:7-13, 21-23; Yohane 13:21-30)
17Ikimunyi icha kutala cha imikate je simihate uwuhahu avanyigendo va Yesu vaasile kulumwene vitigila, “Kwiyaga kwetukagelanise i Pasaka?” 18Ndawe Yesu atigilige, “Mubite kuboma kulu umunu uyumwi mukamulongele umunyakaye mukatigile; ‘Umwigisi itigila, ulusika lwangu yelufisile. Kwa veve tulila i Pasaka nene na vanyigendo vangu.’” 19Swe avanyigendo vala vipiga ndawe lwevevalongele, swe vigelanisa. 20Kwavelige kwivanga ukutinala neke Yesu ateng'emale na avanyigendo vakwe vanyichumi na vavili mukulya ikilyo. 21Neke baho pevalisige ndawe alongige ukutigila, “mufuuwagwe lwendilonga, mwanyenye uyumwi amituka.” 22Swe vihuguvala pakomi neke vavange ukumuwusa yumwi yumwi, “Mutwa ngali nene?” 23Neke Yesu atigile de, “Ye ililasa pamwi na nene mukinyandilo ye yuyo ye amituka. 24Neke Umwana va Umunu akwibitilaga ndawe andikilwe, ino inalyo umunu uyo ye akumupituka Umwana va Umunu.” 25Neke baho Yuda umunyakumupituka aatige, “Ngali nene Mwigisi!” Neke Yesu atigile, “Veve ulonzile.”
Ichakulya cha Umutwa
(Maliko 14:22-26; Luka 22:14-20; 1 Avakolindo 11:23-25)
26Vave wepevalya, Yesu inwe umukate, swe ifunyilila swe imegula, swe akuvapela avanyigendo vakwe itigila, “Mukotage mulye, ugu gwe muvili gwangu.” 27Neke pe inule ikinywelo swe ilumba swe akuvapela itigila, “Munywelage mbemuli mwa iki, 28Pakuva iyi ye danda yangu ya lufingano ye yikwitika wimila awolofu vadegepelwe inzanangifu. 29Neke nguvalongela, sisanywa uluhuma ino umuveleko gwa umusabibu mbaka ikimunyi kila chesanywa umuveleko umupya pamwi na nyenye ku wutwa wa Dada vangu.”
30Neke baho vavelige vakwimba ulwimbo sweno vihuma kwivala, swe vibita kukidunda icha imiseituni.
Yesu ipava ukubihilwa na Petulo
(Maliko 14:27-31; Luka 22:31-34; Yohane 13:36-38)
31Neke Yesu avalongele ukutigila, “Mbemuli nyenye mung'imbila ikilo cha neng'ino, pakuva lwandike:
‘Ndimutova umukwamila ing'olo,
neke ikipinga mbekili kitagalila.’
32Apo penzilibwike sandongola ku Galilaya.” 33Neke Petulo atigile, “Navakuleke mbevali nene singuleka nda.” 34Neke Yesu atigile, “Nachene ngukulongela, ikilo iki inzogolo wesiyilavika uva umbihye kadatu.” 35Ndawe Petulo atigilige, “Nakuve kufwilasa naveve singubihila nda.” Neke avanyigendo avayagwe nawo valonge ndahihyo.
Yesu akwifunya pa Getisemane
(Maliko 14:32-42; Luka 22:39-46)
36Ndawe Yesu abitige nawo apono apitambulwa pa Getisemane. Ndawe avalongelige avanyigendo vakwe, ukutigila, “Muteng'emale baha nene mbite kula ngifunye.” 37Ndawe abitige na Petulo na avana avavili va Sebedayo, ndawe avangige, ukuhung'una na ukuhuguvala. 38Swe akuvalongela itigila, “Inumbula yangu yihuguve pakomi ngwenda fwe, sweno mwikalage miho pamwi na nene.” 39Ndawe abitige kuwutalo ludodo igwa kinyalileme ivanga ukwifunya itigila, “Dada vangu, wone luke luhwane utyese uluteseko ulu, neke ulwene lulava ndawe lwendiwenda nene, pesi luvelage ndawe lwewiwenda veve.” 40Ave ipiluka ku vanyigendo vakwe avadatu swe akuvafika vagonelye ndawe amulongelige Petulo itigila, “Mulemilwe ukwikala miho pamwi na nene nambi kivalilo kimwi hela? 41Mwikalage miho mwifunyage mulingila mukugelwa. Inumbula yiwenda neke umuvili muhomefu.”
42Swe ibita kangi ulwakavili kukwifunya we itigila, “Dada vangu, wone silwihwana nda ukutyesa uluteseko kwa nene, apo lwewiwenda veve lugendelage mumo.” 43Swe ipiluka kangi, ye akuvafika avanyigendo vagonelye kangi, pakuva amiho gayo ge gatimbite na tulo.
44Swe akuvaleka ibita kukwifunya ulwa wudatu, weilonga ing'ani sisilaga. 45Ndawe Yesu apilukige ku vanyigendo vakwe itigila, “Pe musuupa na ukugonelela kangi? Mulavage! ikivalilo kifisile na Umwana va Umunu atawulwa mumawoko ga vanyanzanangifu. 46Muwuke tubitage. Mulavage umunyakumituka ahegelye.”
Yesu akwibatika
(Maliko 14:43-50; Luka 22:47-53; Yohane 18:3-12)
47Yesu we pealongana na avanyigendo vakwe ndawe Yuda aasige uyumwi va vanyigendo avanyichumi na vavili. Aasile pamwi na avanu wolofu avanyamamage na ifisonzo vevevatume na avatambisi avavina na avavaha va avanu. 48Neke umwene umunyakumupituka alavalonje ikilagilo ukutigila: “Yula ye ndimunonela ye mwene yemwibatage.” 49Ndawe abitige kulumwene Yesu ulusika lulo itigila, “Kamwene ve Mwigisi.” Ndawe amunonelige Yesu. 50Ndawe Yesu amulongelige, “Yuda munyawiyendi pige lwewusilige.” Ndawe amalugu gaasige gamwibate Yesu neke gamupinge.
51Neke baho uyumwi va avanyigendo va Yesu ndawe ategulige ilimage neke adumule ilipulikilo lya umukami va umutambisi umuvina. 52Swe Yesu akumulongela itigila, “Pilule ilimage muhala, pakuva mbevali avaviwulaga kwa limage savalafwa kwa limage. 53Ngali wiwona sinywaniti suke kwa Dada andetele yilino amalugu ga avanyivaha agalutye lichumi na gavili? 54Lino wukwila ndawuli Uwandike Uwelu ukutigila wugendela mumo?”
55Neke baho Yesu alilongelage ililugu lila, “Muusile na amamage na ifisonzo ndamukwibata muhiisi, ifilo mbefili ifi nge mutembeli ngigisige neke mulemwe ukundibata. 56Isi mbesili sikave sambi sikwile inzandike na avavisi; ndawe avanyigendo mbevali vamulekige swe vikimbila.”
Petulo akumubihila Yesu
(Maliko 14:53-65; Luka 22:54-55, 63-71; Yohane 18:13-14, 19-24)
57Swe avanu iwo vevamwibete Yesu ndawe vamusindikige kukaye ya umutambisi umuvina Kayafa, kuko kwe vevakong'ine avigisi va indagilo na avavaha. 58Nave Petulo amuninilige kwa pataali mbaka kuluhengo kwa umutambisi umuvina, ndawe ingilige mugati na ukuteng'emala pamwi na avakami alave kwelwisilila.
59Neke avatambisi avavina na gumukong'ano ugwa avavina mbevali swe vakumusakila Yesu uwolelesi wa uwudesi vamuwulage. 60Neke valemwe ukuwuwona uwolelesi nambi awolelesi avadesi vevevaasile. 61Neke pambele pevaase awolelesi vavili vitigila, “Uyu aatige: ‘Nywanite ukudenya ikaye ya Nguluvi na ukusenga kangi kwa filo fidatu.’” 62Ndawe umutambisi umuvina iimige na ukumuwusa Yesu, “Ndawuli siwipitula lukani? Avanu vakukolelela kiki veve?” 63Neke Yesu akatuke sili. Umutambisi umuvina ndawe amulongelige, “Ngukwilapya kwa Nguluvi umumi utulongele, veve ye veve Kilisito Umwana va Nguluvi!” 64Ndawe Yesu amutigilige, “Veve ulonzile! Neke nene nguvalongela, ukuhuma lino samumuwona Umwana va Umunu ateng'eme kuliwoko ilinyaludali lya kundyo akusa mumafufu gakuchanya.” 65Baho umutambisi umuvina swe idemula imyenda jakwe, itigila, “Lino ye amubede Nguluvi! Twisaka wolelesi kangi wa kiki? Ndawe de mwipuliche yinyenye pibedala Nguluvi. 66Mwiwona ndawuli?” Navavene swe vipitula vitigila, “Uyu inogela ukufwa!” 67Ndawe vamufunyilige amati muwusu, swe vakumutova ifunzi na avangi swe vakumutova ifipi. 68Avamwi vitigila, “Be, Kilisito tuganulile ye nani ye akutofile!”
Petulo akumubihila Yesu
(Maliko 14:66-72; Luka 22:56-62; Yohane 18:15-18, 25-27)
69Nave Petulo ealikwivala ateng'eme pidama. Ndawe amusilige umukami umuhinza neke atigile, “Na yuveve ukeulipamwi na Yesu va ku Galilaya.” 70Swe ibihila wima hela pavanu itigila, “singulukagula lwewilonga.” 71Swe ihega ibita kwipala, neke umuhinza uyungi amuwone swe akuvalongela avanu avebaho, “Uyu ake pamwi na Yesu Umunasaleti.” 72Swe kangi Petulo ibihila na ukwilapa, “Nene sindimuseli nda Umunu uyu.” 73Nalusika silwavi lusika nda vala avevimile vaasile neke vamutigile Petulo, “Nachene, veve nave wimuyawo, pakuva na gimilongele jako gihwana.” 74Pepene baho peavangige ukubihila, neke ifingulise na ukwilapa itigila, “Nene sindimuseli umunu uyu!” Ulusika lulo swe inzogolo yivika. 75Swe baho Petulo akwiwuka ulukani lula Yesu lwealalonzile ukutigila, “Inzogolo wesiyilavika uva umbihye kadatu.” Swe lukumuvava hilo neke ahume kwivala ivemba ulutalamu.
Currently Selected:
Matayo 26: HeNT2004
Highlight
Share
Copy
Want to have your highlights saved across all your devices? Sign up or sign in
Kihehe New Testament © Bible Society of Tanzania, 2004.