Gliocas Sholaimh 6
6
CAIB. VI.
1Eisdibh uime sin, O sibhse a rìghrean, agus tuigibh; foghlumaibh, sibhse a bhreitheamha chrìocha na talmhainn.
2Thugaibh cluas, sibhse a ta ʼriaghladh an t‑sluaigh, agus aʼ deanamh uaill ann an lìonmhorachd nan cinneach.
3Oir thugadh cumhachd dhuibh o ʼn Tighearna, agus uachdaranachd o ʼn Tì a ʼs Airde, a dhʼ fheuchas bhur n‑oibre, agus a rannsaicheas bhur comhairlean.
4Do bhrìgh, air duibh a bhi ʼn ʼur ministeiribh ʼna rìoghachd, cha tug sibh breitheanas gu ceart, ni mò a ghléidh sibh an lagh, agus a ghluais sibh a réir comhairle Dhé.
5Thig e oirbh gu h‑eagallach agus gu h‑obann, oir nithear geur‑pheanas orra‑san a ta ann an ionadaibh àrda.
6Oir bheir tròcair maitheanas do na daoinibh a ʼs suaraiche: ach bithidh daoine cumhachdach gu mòr air an claoidh.
7Oir cha bhi eagal air an Tighearna a ta os ceann nan uile roimh phearsa neach sam bith, ni mò a bhios geilt air roimh mhòrachd neach sam bith: oir rinn e am beag agus am mòr; agus tha cùram air maraon air son nan uile.
8Ach thig deuchainn ghoirt air na cumhachdaich.
9Ribh‑se uime sin, O rìghrean, tha mi aʼ labhairt, chum gu ʼm foghluim sibh gliocas, agus nach claoin sibh air falbh.
10Oir iadsan a ghléidheas naomhachd gu naomh measar naomh iad: agus iadsan a dhʼ fhoghluim aʼ leithid sin do nithibh gheibh iad a mach ciod a fhreagras iad.
11Uime sin suidhichibh bhur cridhe air mo bhriathraibh; iarraibh iad, agus teagaisgear sibh.
12Is glòrmhor gliocas, agus cha teich i chaoidh air falbh: seadh, tha i furasd faicinn leò‑san a ghràdhaicheas i, agus faotuinn leò‑san a dhʼ iarras i.
13Bacaidh i iadsan a dhʼ iarras i, ann a bhi ʼga deanamh fein an toiseach aithnichte dhoibh.
14Cha bhi mòr‑thrioblaid aige‑san a dhʼ iarras i gu moch: oir gheibh se i ʼna suidhe aig a dhorsaibh.
15ʼSe iomlanachd aʼ ghliocais a bhi smuaineachadh oirre: agus bithidh esan a nì faire air a son gu luath as eugais cùraim.
16Oir tha i ʼdol mu ʼn cuairt ag iarraidh aʼ leithid ʼsa ta airidh oirre, ʼga nochdadh fein gu càirdeil dhoibh‑san air na slighibh, agus aʼ tachairt orra anns gach smuain.
17Oir is e am fìor thoiseach aice iarrtas teagaisg; agus is gràdh cùram teagaisg:
18Agus is gràdh a bhi ʼgléidheadh nan lagh aice; agus is dearbh‑chinnt na neo‑thruaillidheachd a bhi ʼtoirt aire dʼ a laghannaibh;
19Agus tha neo‑thruaillidheachd ʼgar toirt am fagus do Dhia:
20Uime sin bheir miann na gliocais sinn chum rìoghachd.
21Ma tha bhur tlachd uime sin ann an rìgh‑chaithrichibh agus ann an slataibh‑rìoghail, O sibhse a rìghrean an t‑sluaigh, thugaibh urram do ghliocas, chum gu ʼn rìoghaich sibh gu bràth.
22A thaobh na gliocais, ciod i, agus cia as di, cuiridh mi an céill duibh, agus cha ʼn fholuich mi nithe dìomhra uaibh; ach rannsaichidh mi a mach i o thoiseach a breith, agus bheir mi an t‑eòlas aice gu solus, agus cha teid mi thairis air an fhìrinn.
23Ni mò a théid mi le farmad sgriosach; oir cha bhi co‑chomunn aig aʼ leithid sin do dhuine ri gliocas.
24Ach is e maith an t‑saoghail lìonmhorachd nan daoine glice; agus is e cumail suas an t‑sluaigh rìgh glice.
25Faighibh uime sin teagasg trìd mo bhriathra, agus nì e maith dhuibh.
Currently Selected:
Gliocas Sholaimh 6: MacGAP
Highlight
Copy
Compare
Share
Want to have your highlights saved across all your devices? Sign up or sign in
© Scottish Bible Society 2017
© Comann Bhìoball na h-Alba 2017