雅各書 5

警告有錢人

1你等有錢人啊，愛細膩噢！你等愛流目汁大聲噭，因為有大災難會臨到你等了！ 2你等个財產放到歿掉，你等个衫褲被蟲仔蛀掉。 3你等个金銀已經生鹵掉去；該兜鹵愛做告你等个證據，像火一樣燒滅你等个身體。在世界个末期，你等還在該位積存財產！ 4你等剝削在田項為你等割禾个工人，扣佢等个工錢。聽啊，該兜錢銀出怨聲囉；該兜收割个工人，佢等怨嘆个聲也入到主 — 萬軍个元帥个耳公囉！ 5你等在世間奢華宴樂，將自家畜到肥肥，等被人㓾个日仔 #5:5 「等被人㓾个日仔」原文直譯係「在屠宰个日仔」。「將自家…日仔」抑係譯做「還放縱自家个心意，判人死刑」。。 6你等將義人定罪，害死佢等；佢等也無抵抗你等。#5:6 「佢等也無抵抗你等」抑係譯做「上帝敢毋會阻擋你等嗎？」

忍耐㧯祈禱

7所以，兄弟姊妹啊，你等愛忍耐，等到主再來。看啊，耕田人恁有耐心等候田肚寶貴个出產，忍耐等候春霖秋雨。 8你等也愛像恁樣忍耐。你等个心愛堅定，因為主再來个日仔會到了。

9兄弟姊妹啊，毋好彼此埋怨，免得你等受審判；看啊，審判个主在門口了。 10兄弟姊妹啊，往時該兜奉主个名講話个先知，你等愛拿佢等个受苦㧯忍耐來做榜樣。 11愛知，在𠊎等看來，該兜忍耐到底个人係有福氣个。你等聽過約伯个忍耐，也知後來主樣般看顧佢。主係滿有慈悲㧯憐憫个。

12𠊎个兄弟姊妹啊，最重要个係毋好發誓！毋好指天、指地、抑係指麼介東西發誓。係，就講「係」；毋係，就講「毋係」。恁樣，你等就毋會陷落上帝个審判。

13你等中間有人受苦麼？佢應當愛祈禱。有人心情歡喜麼？佢應當愛歌頌上帝。 14你等中間有人發病麼？佢應當請教會个長老來為佢祈禱，奉主个名為佢抹油。 15有信心个祈禱會救到該病人；主會使病人好起來；若係佢犯了罪，主也會赦免佢。 16所以，你等愛互相認罪，彼此代禱，使你等得到醫治。義人个祈禱係大有功效个。 17以利亞㧯𠊎等有共樣个人性；佢迫切祈禱，求上帝莫落雨，正經就有三年半無落雨。 18佢再祈禱，天就落大雨，地正出產五榖。

19𠊎个兄弟姊妹啊，你等中間若有人行毋著路，離開真理，有人將佢帶轉來， 20你等愛知：麼人帶罪人回頭，離開毋著个路，會將罪人个靈魂對死搶救轉來，又使多多个罪得到赦免。

Currently Selected:

雅各書 5: THV12Hdb

Highlight

Copy

Compare

Want to have your highlights saved across all your devices? Sign up or sign in

Learn More About 客語聖經 – 現代臺灣客語譯本，新舊約全書客語聖經 – 漢字版