以西結書 35

上帝責罰以東

1上主㧯𠊎講話； 2佢講：「人子啊，你愛講預言責備以東#35:2 「以東」：希伯來文直譯係「西珥山」， 35:3,7,8 共樣。， 3對佢等講，𠊎 — 至高个上主恁樣講：

以東山啊，𠊎愛㧯你做對敵！

𠊎愛伸手攻打你，使你荒廢。

4𠊎愛使你个城市荒廢；

𠊎愛使你个土地荒涼；

恁樣，你就會知𠊎係上主。

5「你㧯以色列世世代代有冤仇。以色列因為自家个罪堵到災難、受最尾審判个時，你將佢交在敵人个刀劍之下。 6所以，𠊎 — 至高个上主指等𠊎永遠个生命發誓：你註定會滅亡，走毋掉。你犯㓾人个罪，血債一定愛用血賠償。 7𠊎愛使以東山徹底荒掉，㓾死所有路過該位个人。 8𠊎愛使以東山滿遍係屍體，使山岡、山壢、河壩，逐所在有戰死个人。 9𠊎愛使你永遠荒掉，你个城市毋會再有人住。恁樣，你就會知𠊎係上主。

10「事實上，𠊎 — 上主係猶大㧯以色列兩國个上帝，你樣敢講佢等係你个，愛佔領佢等个土地！ 11所以，𠊎 — 至高个上主指等𠊎永遠个生命發誓：你樣般怨恨、嫉妒、惱𠊎个子民，𠊎也愛照恁樣對付你。佢等愛知，𠊎恁樣責罰你係代佢等伸冤。 12該時你就會知，𠊎 — 上主識聽到你譭謗以色列講：『這兜山全部荒掉了，會被𠊎等食掉。』 13你開嘴講自大个話攻擊𠊎，𠊎全部聽到了。」

14至高个上主講：「全世界歡呼个時節，𠊎會使你變荒涼。 15你識因為以色列人个土地變荒涼來歡喜，所以𠊎愛照你所行个對待你。西珥山啊、以東全地啊，你等會變荒涼。該時，儕儕就會知𠊎係上主。」

Currently Selected:

以西結書 35: THV12Hdb

Highlight

Copy

Compare