申命記 6

最大个誡命

1「上主 — 你等个上帝命令𠊎將以下个誡命、法律㧯例規教你等，好俾你等在愛過去佔領个土地上遵行。 2你等㧯你等个子孫愛一生人敬畏上主 — 你等个上帝，順從佢通過𠊎吩咐你等所有个法律㧯誡命。恁樣，你等就會享受長壽。 3以色列人哪，你等愛注意聽，也愛確實遵行。恁樣，你等就會照上主 — 𠊎等祖先个上帝所應許个，事事順利，成做強盛个國家，在該流乳㧯蜜、盡肥个土地上享福。

4「以色列人哪，你等愛注意聽！上主係𠊎等个上帝；只有佢係上主 #6:4 「上主係…只有佢係上主」抑係譯做「上主 — 𠊎等个上帝係惟一个上主」抑係「上主 — 𠊎等个上帝係惟一个」。。 5你等愛用全部个心志、情感㧯力量敬愛上主 — 你等个上帝。 6今晡日𠊎吩咐你等个誡命，你等愛放在心肚， 7煞猛教你等个子女。無論在屋下抑係出外，歇睏抑係做工，愛常常談論這兜誡命。 8你等愛將這兜誡命做記號，䌈在手項，戴在額頭， 9寫在屋下个門框㧯大門。

警告人民毋好悖逆上帝

10「上主 — 你等个上帝會照佢對你等个祖先 — 亞伯拉罕、以撒、雅各所應許个，𢱋你等進入該土地。該所在又大又靚个城市毋係你等所起个， 11屋肚堆滿个好東西也毋係你等囥个。該位个井毋係你等挖个；葡萄園、橄欖園也毋係你等種个。上主𢱋你等入去、俾你等食飽个時， 12你等愛細膩，毋好毋記得佢。上主識對做奴才个埃及地將你等救出來。 13你等愛敬畏上主 — 你等个上帝，單淨敬拜佢，奉佢个名發誓。 14做毋得拜周圍各國一切个神明。 15若係你等拜別个神明，上主 — 你等个上帝會發譴將你等消滅，因為㧯你等同在个上主係專情个上帝 #6:15 「專情个上帝」抑係譯做「嫉妒个上帝」抑係「忌邪个上帝」。看 4:24 。。

16「你等做毋得像以前在瑪撒恁樣試探上主 — 你等个上帝。 17你等愛認真遵守上主 — 你等个上帝向你等頒佈个誡命、法律㧯例規。 18你等愛做上主看做著㧯好个事，就能事事順利，好俾你等入去佔領上主應許給你等祖先該盡靚个土地； 19你等也愛照上主个命令將所有个敵人逐走。

20「將來，你等个子孫會問你等：『上主 — 𠊎等个上帝做麼介命令𠊎等遵守這所有个誡命、法律㧯例規呢？』 21你等愛㧯佢等講：『𠊎等識在埃及做埃及王个奴才，總係上主用當大个能力解救𠊎等。 22𠊎等親目看到上主在埃及人當中，在埃及王㧯佢所有官員面前，行得人驚个神蹟奇事。 23佢救𠊎等離開埃及，𢱋𠊎等到這位，照佢對𠊎等祖先所應許个，將這垤土地賜給𠊎等。 24上主 — 𠊎等个上帝命令𠊎等遵守這所有个法律，敬畏佢；恁樣，佢就會常常保佑𠊎等，使𠊎等興旺，像今晡日共樣。 25若係𠊎等確實遵行上主 — 𠊎等个上帝所命令這一切个誡命，佢就會接納𠊎等 #6:25 「佢就會接納𠊎等」抑係譯做「這就係𠊎等个義」。。』」

Currently Selected:

申命記 6: THV12Hdb

Highlight

Copy

Compare