提摩太後書 4
4
1在上帝㧯愛審判所有生人㧯死人个基督耶穌面前，𠊎憑佢个顯現㧯佢个主權，迫切勸話你： 2愛傳福音，無論時機好壞總愛傳！愛用最大个耐心㧯各樣个教訓來責備，警戒，㧯勸勉。 3時節會到，該時人會拒絕健全个教訓，順自家个慾望，逐所在去拜師，來滿足佢等當癢个耳公。 4佢等會揞等耳公毋聽真理，反轉偏向無影無跡个傳說。 5總係你，無論情況樣般，你一定愛謹慎，也愛忍受苦難，做傳道人應當做个工作，來盡上帝僕人个職務。
6關係𠊎，𠊎犧牲自家 #4:6 「𠊎犧牲自家」：原文指「𠊎當做祭酒倒出來」。个時間到了；這下就係𠊎離開人間个時節。 7堪得打拚个比賽，𠊎已經拚過了；應當走个路程，𠊎已經走透了；應當守个信仰，𠊎也已經遵守了。 8這下，勝利个獎賞等等𠊎；照公義施行審判个主，在耶穌再來該日，愛將公義个冕旒賜給𠊎，毋單淨賜給𠊎，也愛賜給所有愛慕等候佢顯現个人。
吩咐私人个事情
9你愛遽遽來𠊎這位。 10因為底馬貪愛現世，就離開𠊎去帖撒羅尼迦了。革勒士去加拉太，提多去撻馬太； 11只有路加同𠊎共下。你愛去尋馬可，帶佢共下來，因為佢會㧯𠊎𢯭手。 12𠊎已經派推基古去以弗所。 13你來个時，愛將𠊎在特羅亞个時留在加布屋下該領大襖帶來；同時，愛將該兜書，特別係該幾本羊皮个書卷也共下帶來。
14打銅師傅亞歷山大多方面害𠊎；主會照佢所做个報應佢。 15你自家也愛提防佢，因為佢盡反對𠊎等所傳个道理。
16𠊎第一擺為自家辯護个時，無半儕來幫助，大家全部離開𠊎。願上帝莫責罰佢等！ 17唯有主在𠊎身邊支持𠊎，給𠊎力量將真道傳給所有个外邦人，傳到盡完全；恁樣，𠊎就對獅仔个嘴肚得到拯救。 18主一定會救𠊎脫離一切邪惡，接𠊎安安全全到佢个天國去。願榮光歸給佢，直到永永遠遠！阿愐。
最尾个請安
19請代𠊎對百基拉、亞居拉兩公婆，㧯阿尼色弗一家人請安。 20以拉都繼續住在哥林多了。特羅非摩發病，𠊎喊佢留在米利都。 21你愛盡量在入冬以前趕來。
友布羅、布田、利努、女信徒克勞狄雅，㧯其他所有个兄弟姊妹全部對你請安。
22願主常在你心內！願上帝賜恩典給你等！
Currently Selected:
提摩太後書 4: THV12Hdb
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
