帖撒羅尼迦前書 5
5
準備迎接主再來
1兄弟姊妹啊，關係這事發生个時間㧯日期，毋使人寫信仔㧯你等講； 2因為你等自家清楚知，主再來个日仔就像賊仔在暗晡時忽然來到一樣。 3大家講等「一切平安，無事！」个時，災難會忽然臨到佢等，像陣痛忽然臨到將愛𫱔个婦女一樣；佢等絕對走閃毋掉。 4總係，兄弟姊妹啊，因為你等毋係生活在烏暗中，該日毋會像賊仔一樣忽然臨到你等。 5你等全部係光明个人，係屬日時頭个。𠊎等毋係屬暗晡時，毋係生活在烏暗中个人。 6所以，𠊎等無應該像別人恁樣睡到死死；𠊎等愛警醒、謹慎。 7人睡目，係在暗晡時睡；酒徒也係在暗晡時醉酒。 8既然𠊎等係屬日時頭个，就應該謹慎。𠊎等愛用信心㧯愛心做護心鏡著等，用得救个盼望做頭盔戴等。 9上帝毋係揀選𠊎等來被佢責罰，係愛𠊎等通過𠊎等个主耶穌基督來得到拯救。 10基督為𠊎等死，係愛使𠊎等，無論係已經睡掉抑係還生等，攏總會在佢再來个時同佢共下生等。 11所以，你等愛互相鼓勵，彼此造就，像你等這下所做个一樣。
最後个指示㧯請安
12兄弟姊妹啊，𠊎等求你等，愛尊重該兜在你等中間辛苦工作个，就係主所揀選來指導勸勉你等个人。 13因為佢等个工作，你等應該盡所能用尊敬㧯愛心來款待佢等。你等自家也愛彼此和睦。
14兄弟姊妹啊，𠊎等勸你等，愛警告懶尸个人，鼓勵灰心个人，扶持軟弱个人，也愛用耐心對待每一個人。 15愛細膩，無論麼人都做毋得用壞報壞；愛常常彼此關心，為到別人个好處來想。
16愛常常喜樂， 17祈禱無停， 18凡事感謝；因為這係上帝為你這兜屬基督耶穌个人所定个旨意。
19毋好消滅聖靈个感動 #5:19 本節抑係譯做「毋好打烏聖靈个火」抑係「毋好阻擋聖靈个工作」。； 20毋好藐視先知个講論 #5:20 本節抑係譯做「毋好看輕傳道理个工作」。。 21逐樣事愛詳細察驗：美善个事愛持守， 22一切邪惡个事愛棄絕。
23願賜平安个上帝親自使你等完全聖潔！願你等个靈、魂、㧯身體得到保守，在𠊎等个主耶穌基督再來个時，完全無好嫌！ 24呼召你等个上帝係信實可靠个；佢一定會成就這個事。
25兄弟姊妹啊，請為𠊎等祈禱。
26你等愛聖潔相唚同眾兄弟姊妹請安。
27𠊎奉主个名吩咐你等，這封信仔愛宣讀給所有个兄弟姊妹聽。
28願𠊎等个主耶穌基督賜恩典給你等！
Currently Selected:
帖撒羅尼迦前書 5: THV12Hdb
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
