帖撒羅尼迦前書 4

俾上帝歡喜个生活

1最後，兄弟姊妹啊，你等已經對𠊎等學到愛樣般在生活上俾上帝歡喜；事實上，你等也一直係恁樣行。這下，𠊎等奉主耶穌个名勸你等，求你等，愛更加打拚。 2你等知，𠊎等通過主耶穌个權柄所教你等个係麼介。 3上帝个旨意係愛你等聖潔，遠離淫亂个事； 4每一個人愛知樣般用聖潔㧯尊貴个方式來保守自家个身體 #4:4 「保守自家个身體」抑係譯做「同自家个𡜵娘共下」。； 5毋好放縱情慾，像該兜毋識上帝个異教徒恁樣。 6在這種事上，毋好有對毋起抑係欺負兄弟姊妹个行為。𠊎等已經對你等講，也識警告你等：主定著會責罰該兜做這種事个人。 7上帝呼召𠊎等，毋係愛𠊎等生活在淫亂中，係愛𠊎等聖潔。 8所以，拒絕這種教訓个，毋係拒絕人，係拒絕賜聖靈給你等个上帝。

9關係惜兄弟姊妹，𠊎毋使寫信仔同你等討論；上帝已經教你等愛樣般彼此相惜， 10你等也係照這教訓對待全馬其頓个眾兄弟姊妹。總係，兄弟姊妹啊，𠊎等還係愛勸你等：更加打拚， 11立志安份守己，親手做事來維持自家个生活，像𠊎等頭擺吩咐你等恁樣， 12使你等得到該兜無信个人个尊敬，也毋使靠別人个供給。

主个再來

13兄弟姊妹啊，關係已經睡掉个人，𠊎等無愛你等毋知，免得你等憂愁，像該兜無盼望个人。 14𠊎等相信耶穌已經死又復活，所以𠊎等相信，該兜信耶穌个人死後，上帝也會將佢等同佢共下帶轉去 #4:14 「該兜信耶穌…帶轉去」抑係譯做「上帝也會通過耶穌將該兜已經死掉个人同佢共下帶轉去」。。

15𠊎等這下照主个教訓㧯你等講：𠊎這兜生等、存留到主再來个人，毋會比該兜已經睡个人先同主相會。 16該時，會有發命令个聲，天使長个聲，㧯上帝个號筒聲，然後，主本身會對天頂降下來。相信基督，已經死掉个該兜人會先復活； 17接等，𠊎這兜生等還存留个人攏總會同佢等共下受接到雲頂去，在空中同主相會。恁樣，𠊎等就永遠㧯主同在了。 18所以，你等愛用這兜話彼此安慰。

Currently Selected:

帖撒羅尼迦前書 4: THV12Hdb

Highlight

Copy

Compare

Want to have your highlights saved across all your devices? Sign up or sign in

Learn More About 客語聖經 – 現代臺灣客語譯本，新舊約全書客語聖經 – 漢字版