哥林多前書 9

使徒个權利㧯責任

1𠊎敢毋係自由个人？敢毋係使徒嗎？𠊎無見過𠊎等个主耶穌嗎？你等毋係𠊎為主做工所結个果子嗎？ 2就算別人毋看𠊎做使徒，你等總愛看𠊎做使徒！因為你等成做主个信徒，這個事實就係𠊎做使徒个證據。

3別人批評𠊎个時，𠊎就恁樣辯護講： 4敢講𠊎等無權利好靠福音食飯嗎？ 5敢講𠊎等做毋得像其他个使徒，像主个老弟，像彼得一樣，帶等信主个𡜵娘共下旅行嗎？ 6敢講唯有巴拿巴㧯𠊎就一定愛靠做事來維持生活嗎？ 7麼人做兵自備糧食啊？麼人種葡萄無食自家園肚出產个葡萄啊？麼人畜羊無食羊群个乳啊？

8𠊎所講个，敢只有照人个意見；法律敢毋係也恁樣講嗎？ 9摩西个法律講：「牛踏榖个時，毋好籠等牠个嘴。」上帝所關心个敢係牛？ 10佢敢毋係為到𠊎等來講嗎？這當然係為𠊎等寫个！因為耕種个㧯收割个出去做事，攏總希望分到佢等所應得个五榖。 11𠊎等識在你等當中委屬靈个種子。就算𠊎等將你等供給个物質算做收成，敢會忒過份嗎？ 12別人若有權利享受你等个東西，𠊎等敢毋係還較有這個權利嗎？

總係，𠊎等從來毋識用過這個權利，反轉凡事忍等，免得基督个福音受到阻礙。 13你等應該知，在聖殿底背服事个人就享受聖殿內所供給个食物；在祭壇獻祭个人也有祭物好分。 14共樣，主也恁樣吩咐：傳福音个人應該靠福音來維持生活。

15總係，𠊎吂識用過這兜權利；這下，𠊎寫這兜話也毋係愛爭取這種个權利。𠊎死乜毋甘願使𠊎所誇口个落空！ 16𠊎傳福音並無麼介好誇口，因為𠊎係奉命去傳个。𠊎毋傳福音就慘了！ 17𠊎若係甘心樂意傳福音，就會有報賞；總係，既然上帝將這任務交給𠊎，𠊎就認為這係一種責任。 18恁樣，𠊎个報賞係麼介呢？傳福音給人，俾人毋使用錢就得到福音，無用𠊎傳福音應得个權利，這就係𠊎个光榮。

19𠊎係自由个人，毋係麼人个奴隸；總係𠊎甘願做大眾个僕人，為到愛得到更多个人。 20同猶太人共下，𠊎就像猶太人恁樣生活，為到愛得到猶太人；同該兜在法律之下个人共下，雖然𠊎無受摩西法律个轄制，總係𠊎還係像在法律之下个人恁樣生活，為到愛得到法律之下个人。 21共樣，同法律之外个人共下，𠊎就像法律之外个人，無受猶太法律个約束，為到愛得到法律之外个人。總係，這毋係講𠊎毋服從上帝个法律；事實上，𠊎係受基督法律个約束。 22在信心軟弱个人當中，𠊎就做軟弱个人，為到愛得到軟弱个人。總講，在麼介樣个人中間，𠊎就做麼介樣个人；無論用麼介方法，𠊎總愛救兜人。

23𠊎做這一切个事，係為福音个緣故，目的係愛同別人共下分享福音个好處。 24你等敢毋知，在運動場走相逐个人盡多，總係得獎个只有一儕。所以，你等愛用決心來走，正會得獎賞。 25每一個參加比賽个，一定愛接受嚴格个訓練，這係為到愛得到會壞个冕旒定定；總係𠊎等所做个係為到愛得到毋會壞个冕旒。 26所以，像恁樣，𠊎一直向目標緊走；𠊎又像打拳个人，毋愛打空拳。 27𠊎嚴嚴操練自家个身體，係愛完全控制它，免得𠊎傳福音給別人後，自家反轉受淘汰了。

Currently Selected:

哥林多前書 9: THV12Hdb

Highlight

Copy

Want to have your highlights saved across all your devices? Sign up or sign in