哥林多前書 2

基督十字架个道理

1兄弟姊妹啊，𠊎頭擺去你等該位，並無用麼介靚个話抑係高深个學問來對你等傳揚上帝个奧妙 #2:1 「奧妙」有兜古卷係「見證」。。 2因為𠊎決意，同你等共下个時，除了耶穌基督㧯佢死在十字架頂个事情以外，麼介都毋提。 3還有，在你等該位个時，𠊎感覺盡軟弱，心內盡驚，大大著急。 4𠊎所講个道理，所傳个福音，攏總無用好聽有智慧个話，只有靠聖靈个大能來見證真理， 5使你等个信仰無根據人个智慧，係根據上帝个大能。

上帝个智慧

6其實，對該兜靈性成熟个人，𠊎等也講智慧。總係，毋係講這世間个智慧，也毋係這世間統治者个智慧；佢等个權勢漸漸會消滅掉去。 7𠊎等所講个智慧係上帝奧妙个智慧，本來對人係囥等个，就係在世界創造以前上帝已經預定愛使𠊎等得榮光个智慧。 8世間个統治者無一個知這智慧；若係知，佢等就毋會將榮光个主釘在十字架頂了。 9像聖經所講：

上帝為敬愛佢个人所預備个，

係人目珠吂識看過，

耳公吂識聽過，

人心吂識想過个！

10總係，上帝通過自家个靈將佢个奧妙啟示𠊎等。聖靈能看透所有个事，連上帝深深囥等个心意，佢也知。 11人个心思，只有自家底背个靈正知。共樣，上帝个事，也只有上帝个靈正清楚。 12𠊎等所領受个靈毋係這世間个靈，係上帝所派來个靈，好俾𠊎等知上帝所賜𠊎等个一切恩賜。

13所以，𠊎等講道毋係用人个智慧所教个話，係用聖靈所教个話，對屬聖靈个人 #2:13 「對屬聖靈个人」抑係譯做「用屬聖靈个話」。講論屬靈个真理。 14總係，該兜無上帝个靈个人無法度領受上帝个靈所給个恩賜。這種人無可能明白這兜事，佢等看做係戇檔个；因為這兜事个價值愛用屬靈个目珠正看得出。 15屬聖靈个人能判斷萬事个價值，總係無人能判斷佢。 16像聖經所講：

麼人知主个心呢？

麼人會教導佢呢？

總係，𠊎等屬聖靈个人有基督个心。

Currently Selected:

哥林多前書 2: THV12Hdb

Highlight

Copy