JOHN 12
12
Jesus dog Nginyo di Bethany
(Mat 26.6-13; Mrk 14.3-9)
1Nŭm andu diŭ so Gawai Paska, Jesus di ka Bethany, kupo adi yŭn Lazarus rŭŭ, sianŭ adi-I ko pakat so kabŭs. 2Diginŭ ngara pisadang Ayŭh. Martha tukang ngidang, ka Lazarus mbŭh ndi so ngara adi sua guru man ngga Jesus. 3 Mary mbit sitangah lita inyo wangi adi mbar rega-i adi dog ndai so ndi masam kayuh adi buuh ramak dagŭn-i, ka susen-i di kaja Jesus. Ayŭh ngutos kaja Jesus ngga ubok-i. Ka ramin mbŭh puno ngga dagŭn wangi anŭ. 4Ndi naan so murid Jesus, dŭn Judas Iscariot, adi re jua Ayŭh, nang, 5“Mani dŭh jua adŭ wangi anŭ ngga rega taruh ratus kiping duit pirak ka duit anŭ nŭŭh nggen di daya sirata?” 6Ayŭh nang sakanŭ, dŭh sabab-i sawŭ masi di daya sirata, pak sabab-i daya pinaku. Ayŭh daya adi tukang digŭng kandi duit ka mbŭh agi tambit so dieh.
7Pak Jesus nang, “Dŭhnyah mito ayŭh! Tandah ayŭh ndai simŭnŭ yŭn andu pinyikubur Ku. 8 Angān re siraru biyŭn daya sirata ngga angān, pak angān dŭh re siraru agi ngga Aku.”
Bipekat an Siŭ Lazarus
9Kan bara daya dingah Jesus agi di Bethany, ngara di kamanŭ; dŭh sabab Jesus adŭ pak sabab an tingga Lazarus, adi Jesus ko pakat so kabŭs. 10Jadi pingubak pingubak imam jiroh aran an siŭ Lazarus gŭh, 11amai sitagar ayŭh, daya Jahudi mbŭh bagŭ bu so ngara ka mbŭh sabah di Jesus.
Jesus Mŭrŭt ka Jerusalem
(Mat 21.1-11; Mrk 11.1-11; Luk 19.28-40)
12Andu anŭ ndi, bara daya adi mbŭh mandŭg ka Gawai Paska, dingah Jesus re mandŭg ka Jerusalem. 13 Ngara ndu daan daan kurma ka ruah di ngadā Jesus, buang nyirais nang, “Puji ka Tapa! Tapa nyiberkat Ayŭh adi mandŭg ngga adŭn Tuhan! Tapa nyiberkat Raja Israel!”
14Jesus dapŭd ndi kaldi ka nunggang-i, nimun adi dog nuris darŭm Surat-kudus, adi nang,
15 “Dŭhnyah taru, Kupo Zion!
Raja mu mbŭh mandŭg,
nunggang kaldi.”
16Di tika anŭ bara murid-I dŭh mirati kayuh anŭ; pak kan Jesus mbŭh dog pakat ka darŭm bragah, ngara ingat sopŭrŭg kayuh adi daya ndai di Ayŭh agi dog nuris di Surat-kudus.
17Bara adi agi ngga Jesus darŭm-I bagan Lazarus da makat ka ruah so kubur agi kidaan sopŭrŭg kayuh adi mbŭh jadi. 18Anŭ inŭh sabab bara daya bagŭ di dapŭd Ayŭh, sabab ngara dingah Ayŭh mbŭh ndai pingandai-nginga anŭ. 19Bara daya Pharisee nang dupan adŭp ngara, “Tingga nŭh, dŭh ata tungang ndai ani ani! Ndi ong ong mbŭh tunda Ayŭh!”
Kada Daya Bangsa Greek mandŭg di Jiroh Jesus
20Agi kada daya bangsa Greek di ka Jerusalem samah bara daya di simayang di tika gawai anŭ. 21Ngara tudu Philip (ayŭh adi so Bethsaida di Galilee) ka nang, “Tuan, kieh an bidapŭd ngga Jesus.”
22Philip di kidaan di Andrew, ka ngara duwŭh di kidaan di Jesus. 23Jesus nam ngara, “Jam adi ngga Anak Manusia kambat bragah bās mbŭh mandŭg madin. 24Aku kidaan di angān kayuh adi sawŭ: ndi sirah ruwang gandom babŭ ruwang gandom kambŭi-i dŭh rabu ka tana ka kabŭs. Pak kambŭi-i kabŭs, ayŭh buān bagŭ buwa. 25 Daya adi siŭt asŭng-i re kinanyap-i, ka daya adi kinanyap asŭng-i di ong ati re nyikŭn-i yŭn udip adi sawŭ adi tan adu adu. 26Asi asi adi an bituan di Aku dŭh siŭn dŭh an tunda Aku, isa daya-gaji Ku siraru agi ngga Aku di tadŭ yŭn Ku. Ka Sama Ku re kibās barang naan daya adi bituan di Aku.
Jesus Minyu Pasar Pinyikabŭs-I
27“Madin asŭng Ku mbŭh raru susah; Ani meh re Ku nang? Bisa kah Aku nang, ‘Sama, dŭhnyah bada tika jera-birasa ati dog Aku’? Pak sabab ati inŭh Aku mbŭh mandŭg ka darŭm ong, isa Aku kinyam jera-birasa ati. 28Sama, nyibragah meh adŭn Mai!”
Ka sirŭŭn minyu, nang so rangit, “Aku mbŭh nyibragah-i, ka re nyibragah-i dinge.” 29Bara adi mijog diginŭ agi dingah, ka agi kada nang anŭ dudū, adi bŭkŭn nang, “Malaikat minyu ngga Ayŭh!”
30Pak Jesus nang di ngara, “Sirŭŭn anŭ dŭh-i mandŭg yŭn Ku, pak yŭn ngan. 31Madin inŭh tipuh adi ngga ong ati dog bisara; madin pinguasa ong re dog taran. 32Kan Aku mbŭh dog katuh di tunduh ong, Aku re tambit sopŭrŭg daya yŭn adŭp Ku.” ( 33Darŭm-I minyu sakanŭ, Ayŭh sibandar-i kidaan munki Ayŭh re kabŭs.)
34 Bara daya nam, “Ukum-adat ami kidaan nang Kristus re udip adu adu. Simuki Kuu bisa nang Anak Manusia dŭh siŭn dŭh dog katuh? Asi Anak Manusia anŭ?”
35Jesus nam, “Dŭm nyitiro adŭ jawa agi ngga angān. Panu meh darŭm jawa san angān biyŭn-i, sibia-i angān sidatan karŭm, amai daya adi panu darŭm karŭm dŭh puan kamaki-i panu. 36Sabah di jawa anŭ, meh, sitadŭn angān biyŭn-i, isa angān bisa jadi bara anak jawa.”
Daya Judea Dŭh Sabah
Ripas Jesus ko nang sakanŭ, Ayŭh bu ka sukan adŭp-I so ngara. 37Sunggu Ayŭh ko ndai bagŭ masam pingandai-nginga di ruang ngara, ngara dŭh sabah di Ayŭh. 38 Kayuh mun anŭ isa pinganang nabi Isaiah bisa jadi bitŭtŭk:
“Tuhan, asi sabah agah adi kieh taban?
Di asi Tuhan mbŭh kiren kuasa-I?”
39Ka sawŭ ngara dŭh tungang sabah amai Isaiah agi gŭh nang,
40 “Tapa mbŭh kinarŭm batŭh ngara,
ka mbŭh bada atŭk ngara madŭd;
isa batŭh ngara dŭh kiris,
ka atŭk ngara dŭh mirati,
ka ngara dŭh tudu Aku,
mite Aku pibua ngara, Tuhan nang”
41Isaiah nang sakanŭ sabab ayŭh ko kiris bragah Jesus ka minyu pasar Ayŭh.
42Sunggu kayuh agi mun anŭ, bagŭ Pinguasa Jahudi sabah di Jesus; pak sabab ngara taru bara daya Pharisee ngara dŭh an nang ani ani di sapa tarun, amai dŭh an dog taran so ramin simayang-Jahudi. 43Ngara rindu dŭ dapŭd puji so manusia so dapŭd puji so Tapa.
Pinganang Jesus re Nyarah daya
44Jesus nang ngga sirŭŭn bana, “Daya adi sabah di Aku, dŭh-i sabah di Aku adŭ, pak di Ayŭh adi bada Aku mandŭg ani. 45Daya adi kiris Aku kiris gŭh Ayŭh adi bada Aku mandŭg. 46Aku inŭh jawa adi mbŭh mandŭg ka ong, isa daya adi sabah di Aku dŭh rŭŭ darŭm karŭm. 47Kambŭi daya dingah ajar Ku ka dŭh sita-i, Aku dŭh ngukum ngara. Aku mandŭg dŭh di ngukum ong, di nyiramat-i kidŭ-i. 48Daya adi tirawan Aku ka dŭh an kambat agah Ku mbŭh biyŭn anŭ adi re nyarah ayŭh. Pinganang adi Aku ko piruah re nyarah ayŭh di andu sikasŭn! 49Kayuh ati sawŭ, sabab Aku minyu dŭh so kuasa adŭp Ku, pak Sama adi pait Aku ko pesan di Aku kayuh adi dŭh siŭn dŭh Aku minyu ka nang. 50Ka Aku puan nang pinyipesan-I agi taban udip adi sawŭ adi tan adu adu. Anŭ adi Aku nang inŭh kayuh adi Tapa bada Aku nang.”
Currently Selected:
JOHN 12: TBVONT
Highlight
Share
Copy
Want to have your highlights saved across all your devices? Sign up or sign in
Hakcipta - Today's Biatah Version New Testament © The Bible Society of Malaysia, 2003.