1 TIMOTEO 4
4
Batii Matikanko Sɛlaa Kuafũnu Asaa Batuotɛ Kamaa.
1Yaa Ninwuna ladiki aabuɛ klekle alɛ, di ayi yɛntɛle kamɛ, batii bawo masĩ ofũ onu ɔlaa nwu, mantikanko kayɔnkyɔ anwuna ku anwuna kpile asaa otuo. 2Asaa otuo ya mmle makye balaatɛ ku bafũnuntɛ nfũ, ambiɛ ambuo kaayi. Batii ba mmle situ se nintɔkɔ ni otii ɔlaa ntookpi fɛ lɛbɔɔsaa filale bɛɛyɔ beefiɛ ma situ. 3Batii ba mmle mantuo alɛ diɛlɛ alɛ baayɔ ɔsanko. Mantuo kafɔɔ alɛ diɛlɛ alɛ baale alesaa awo. Kafɔɔ Yaa niɛbla alesaa nwu alɛ, batii ba niefũ nwaako ɔlaa nɔɔ nwu beenu ni batikanko nwɔ ni kale mampɛ sɛfa. 4Lɛsaa lele di Yaa lɛbla dilɛ, blaasĩ kuninwii, nioso dikpe nii manfũ amuu mampɛ Yaa sɛfa. 5Diekye Yaa ɔlaa ku ɔlaa ɔpɛ ɔta Yaa di sɛfa ɔpɛ kamɛ, nkleklesa alesaa nwu.
Nnya Otii Wɔ Ninle Ni Yesu Kristo Kpɛmblatɛ Biene.
6Nse feetuo babilee asaa ya mmle, ni fabakple Yesu Kristo kpɛmblatɛ biene, bɛɛnanfi ni di nwaako ofũ onu kamɛ. Ni fatikanko asaa otuo biene. 7Nioso tankyɔɔ sekofolaa ku akakatɛ ya ninanta otii latofo ni Yaa atoko. Yɔ Yaa ɔlaa fananfi suoto fata nkpa biene osiɛ. 8Suoto osie lɛnanfi lefĩ, kafɔɔ Ninwuna kamɛ suoto ɔnanfi lefũ kɔya dilenke amuu. Diekye ninwako letota biene di nkpa be mmle kamɛ ku nkpa be kafɔɔ ninkpe ni kaakpimaa kamɛ. 9Nwaako ɔlaa ninle nwɔ mmle dikpe ni batii bamuu lefũ beenu nii. 10Buokpee okyiini mumbla ɔkpɛ osie kanya. Diekye buɔyɔ osuku onyu loo buokpee di Yaa wɔ ninkpe ni nkpa kamɛ, nwɔ ninle ni batii bamuu dikitɛ, kyenkye mba niefũ nwɔ beenu nii.
11Asaa ya mmle dikpe ni feetuo ma bɛɛbla nɛ. 12Tanta otii kuonwii lanyu fɔ sinunkɔnkɔ ta fale ni okosopo oso. Nioso, nyu falɛ lɛkakatɛ lɛfɔ, nkpa disiɛbi lɛfɔ, lɛbɔmbɔ lɛfɔ, ofũ onu lɛfɔ ku nkpa klekle lɛfɔ osiɛ lele ɔtɛ onyu diɛta bafũbanutɛ. 13Nyu falɛ fɛɛtɔɔka Yaa ɔlaa fɛɛtɔɔta bafũbanutɛ se beesi. Faatɔɔka bamuu lɛma, faatootuo ma asaa diɛlaase di obe wɔ lɛwa ni. 14Tansĩ Ninwuna kamɛ lɛtasaa le ninsi fɔ ni kaamɛ ɔkpɛ ɔblako. Nle baayɔ baata fɔ ni di obe wɔ di Yaa ɔlaa babuɛtɛtɛ labuɛ nii, di banɔɔfo latika fɔ ni nnɛɛ di suoto. 15Ta disibu lɛfɔ ditika di nle mmle suoto, faatɔɔbla ni obe lele, mmle okle baatii bamuu manya, mantofo ni nkpa lɛfɔ biene osiɛ sitũ ɔkyɛ. 16Lolaa suoto ku asaa otuo lɛfɔ fanyu nwaa. Klee asaa otuo nwu osie kanya, diekye nse fɛɛbla nkpo, ni fabadiki suoto lɛfɔ ku batii ba nikonu fɔ ni ɔlaa nkpa.
Currently Selected:
1 TIMOTEO 4: snw
Highlight
Copy
Compare
Share
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
