FILIPAAI DIMA 4

1Lala maa zugu, m mabiisi, n wuri ya pampam, ka n sufu bu maai man bu nyari ya la zugu. Sufumaasim ka ya tiri ma, halli nti kyɛ ka m mari la karimbaani ya zugu gba, hoo n pun di naam ya zugu. Dinzugu, m mabiisi, lala maa n sumni ni ya zɛ yummu ya beesigu puuni n‑ti ti Dugma maa.

2Tɔ; ka nyin, Yuwɔdia, ka n susiri i ni, ni nyin, Sintikyi, gba; n susiri ya ni, ni, ya mari nangbanyinni ni taaba, ti Dugma maa zugu. 3Ka nyin gba, n zɔsuŋŋu, nyin ŋɔn daa bɛ n saani n‑tumni la, n susiri i gba, ni, i suŋŋi ba lala. Dama pɔ'aba ayi wa daa suŋŋi ma pam zaŋŋi n‑kyaŋŋi lahabasuŋŋu tuma, ban ni Klɛmɛnsi ni n tuntuntaaba ban kpalim la m‑paasi. Naawunni siri pun sɔbi ba yuya n‑niŋi nyɔvuri gbaŋŋu la ni. 4Ya kyɛ ka sufupeelli bɛ ya saani sahakam, ti Dugma zugu. Ii, m maali n‑yɛtti ya, ni, ya mari sufupeelli. 5Ya kyɛ ka sɔkam baŋŋi ya nirilim ŋɔn nyɛ seem. Ti Dugma pɔri ti saani na. 6Dinŋɔna yan di kyɛ ka seelli mugsi ya, amaa ya puusim Naawunni ya susigu zaa ni, ka kyɛ ka u baŋŋi yan boori seelikam zaa, ka laa m‑puusi u taari. 7Naawunni siri tisiri sugru ni sufudoaa ka di gaari ti nin toaai m‑baŋŋi seem zaa. U nin kyɛ ka lala sugru ni sufudoaa guri ya sufu yɛla, ni ya sufu ni teesa zaa, yan bɛ Kirisita Yisa saani zugu.

8Di naari, m mabiisi, ya kyɛ ka ya teesa zaa paali la ni bunseesi an nyɛ bunsuma, ni an sumni pɛ'abu - di nyɛ la: bunseesi an nyɛ yɛlimaŋni, ni bunveela, ni seesi an dɔli soori, m‑paasi niriba ŋɔn wuri bunseesi n‑tibgri a, ni seesi an mari gyirima. 9Ya zaŋŋma man wulisi ya seem maa n‑tumni lala, ka dɔli yan nya ka wum zaŋŋi n‑kyaŋŋi n tuma soori la. Ka Naawunni nin bɛ ya saani, ka ŋɔn mun nyɛ ŋɔn tisiri sufumaasim maa.

10Di daa niŋi ma nya'asim pam ti Dugma zugu, man ŋɔn daa nya ka ya laa n‑teaari n yɛla maa: halli ya daa pun teaai n yɛla, amaa ya daa kɔŋŋi soori. 11Di pa la n yɛtti, ni, n kɔŋŋi seela, dama n pun bamsi man nin niŋi seem n‑kyɛ ka man mari seesi la ti sakki ma. 12N na mi n‑kɔŋŋi seela, ka laa m‑mi m‑mari halli nti yakki. Ya'aseaa, bee, sahaseaa, m bamsi yɛm suŋŋa, ka n nin nyaŋŋi bundira diibu, bee, nangbantoo beebu; n nin nyaŋŋi m‑mari pam, bee, m‑mari beela; a zaa sakki ma. 13Yisa Kirisita ti ma yaa, ka di kyɛ ka n nyaŋŋi yɛla zaa n beesigu puuni. 14Amaa ya daa niŋi suŋŋa pam, yan daa suŋŋi ma n yɛlimugsa puuni la.

15Ya mi halli, ya Filipaai dima, man ŋɔn daa daŋŋi n‑yi Masidoonya tingbaŋŋu sa m‑moonni lahabasuŋŋu yɛla maa, yan daa suŋŋi ma seem lala saha maa. Ka ya mi, ni, lala piiligu saha maa Yisa nyaandɔliba la'aŋŋu seelli daa bu suŋŋi ma zaŋŋi n‑kyaŋŋi tisibu ni deaari yɛla, na'ala yarima kɔkɔa. 16Ya laa m‑mi yaasa, ni, ya daa ti ma suŋŋsim halli man ŋɔn daa bɛ Tɛsalɔnika tiŋŋa gba, ka di daa pa la yummu. 17Di pa la m boori la piini, amaa n nya ka piini tisibu paasiri ya la nyoori. 18Man mun daa pun deaaya, ka di gaari zaa. N nya man boori seelikam, dama Ɛpafrɔditusi daa mari ya piini maa zaa na n‑ti ma. Ka di niŋi Naawunni nya'asim, hoo turaali nyoobu nyunya'asiri, bee, hoo ban maanni maaligu n‑ti u ka u deaai ni sufumaasim. 19M Ba Naawunni mari la buna ni arizikki zaa, ka a bɛ la Kirisita Yisa gyirima ziiya, ka u nin zaŋŋi yan boori seelikam zaa n‑ti ya. 20Ŋɔn Naawunni ti Ba maa nin nya pɛ'abu, saha din ka tɔriga. Ammi.

21Ya puusima Naawunni niriba la n‑ti ma - ninvugseeba ban nyɛ Yisa Kirisita suulinsi. Ti mabiseeba ban bɛ kpa zaa puusiri ya na. 22Naawunni niriba zaa puusiri ya na, halli ban bɛ NaaTitaari yiri maa ni. 23Ti Dugma Yisa Kirisita Masiiya piinisuma nin bɛ ya sufu ni sahakam. Ammi.

Currently Selected:

FILIPAAI DIMA 4: maw

Highlight

Copy

Compare