TUUMUDIMA TUMA 9

1Di saha maa ka Sɔla daa boori la nimmoaa ŋɔn nin niŋi seem n‑ku Yisa nyaandɔliba. U daa kyaŋŋi Gyeeŋŋu Toondaana la saani 2nti susi gbanseesi ka ba sɔbi n‑ti la'aŋŋu duri an bɛ Damasikusi tiŋŋa niriba la, ni, u yi ti nya ninvugseeba ban dɔli Yisa soori bɛni, dɔppa ni pɔ'aba, ni, u mari la soori ni u gbaasi ba n‑lɔ m‑mari ba n‑labi Gyɛrusalɛm na. 3Tɔ: ka ŋɔn daa ti wa u Damasikusi maa ka daa ti pɔtti bɛni, ka neesim nyakki n‑yi saazugu na nti gyiligi u. 4U daa lu la tiŋŋa, ka wum ka kukɔri tɔ'asiri n‑tiri u, ni, “Sɔla, Sɔla, bɔ zugu ka i namsiri ma?” 5Ka Sɔla daa boosi n‑yɛli, “Ŋɔni nla, n dugma?”, ka u labsi n‑yɛli. “Mani Yisa: mani ka i namsiri maa.” 6Ni, “Doaam saazugu yooma n‑kyaŋŋi nti paai Damasikusi. Ba nin ti yɛli i nyin ya n‑niŋi seem.” 7Ninvugseeba ban daa dɔli Sɔla maa daa wum kukɔri maa, amaa ba daa bu nya sɔa; ka ba daa kɔŋŋi yɛligu di zugu. 8Sɔla mun daa doaai saazugu n‑lakki u nini, amaa u daa zoomiya ka ban daa dɔli u maa daa dari u n‑kyaŋŋi m‑paai Damasikusi. 9Sɔla daa zoomiya daba ata ka koom bee diibu daa bu gaari u noori ni.

10Tɔ; ka nyaandɔlisɔ n daa bɛ Damasikusi tiŋŋa, ka u yuuri boonni Ananayasi. U daa zaasi zaasimni, ni, ti Dugma tɔ'asi n‑yɛli u, ni, “Ananayasi!”, ka u daa sakki, “Naa! Mani nŋɔa, n Dugma!” 11Ka ti Dugma daa yɛli u, ni, “Kyɛm sɔseaa kan boonni ‘Sɔtuusiri’ la ni nti kpɛ Gyuudasi yiri m‑boori Taasusi dɔsɔ ŋɔn yuuri boonni Sɔla la ziiya. Pampaŋŋɔ u na puusiri ni. 12U pun nya zaasimni, ni, dɔsɔ ŋɔn yuuri boonni Ananayasi kpɛ u saani na nti siisi u, ni u nini maa ti neaai yaasa.” 13Ananayasi ŋɔn daa ti wum lala maa, u daa yɛliya, “Mma, n Dugma! Niriba pam pun ti ma doo wa lahabaari, ni, ŋɔn daa niŋi i niriba putoo Gyɛrusalɛm timpuuni, 14halli ni u deaai soori gyeeŋŋu kpamma maa saani, ni, u mari la soori ni u kyɛ na n‑gbaasi ninvugseeba ban gyeemni i la.” 15Ka ti Dugma daa labsi n‑yɛli u, “Ni dinŋɔ zaa, kur kyɛma! Dama doo maa nyɛ la n tuntunsɔ ŋɔn ya mari n yuuri nti ti ban pa Yɛhudiyadima, ni ba nadima, ni Yɛhudiyadima maa m‑paasi. 16N nin wulisi u ŋɔn nin di wahala seem n yuuri zugu.” 17Di saha ka Ananayasi daa yi n‑kyaŋŋi. U daa kpɛ yiri maa ni n‑zaŋŋi u nuusi m‑pa Sɔla zugu ka yɛli, “M mabii Sɔla, ti Dugma Yisa ŋɔn zaŋŋi u maŋŋa n‑wulisi n‑ti i soori maa zugu la, ŋɔna n tum ma i saani na, ni n kyɛ na nti neaai i nini la ka kyɛ ka Naawunni Vuusim Kasi bɛ i saani ni kpeeŋŋu.” 18Dinsaha maa ka bunseesi an daa ŋmanni hoo pɛ'ari n yi Sɔla nini ni n‑lu tiŋŋa, ka Sɔla daa laa n‑neaai. Di saha ka Ananayasi daa su Sɔla Naawunni koom. 19U daa di diibu ka u yaa daa labi u na.

Tɔ: Sɔla daa kpalim m‑bɛ Yisa nyaandɔliseeba ban daa bɛ Damasikusi timpuuni saani n‑yuui beela. 20U daa piili n‑yiisiri wa'azu tiŋŋa maa la'aŋŋu duri ni, ni, Yisa nyɛ la Naawunni biiya. 21Di daa gyɛri ban wumni maa zaa, ka ba daa tɔ'asiri taaba, ni, “Yɛlimaŋni, pa dɔsɔ ŋɔn daa kyɛ ka ba gbaasiri lala yuuri nyaandɔliba maa la nŋɔa? Ka u daa niŋi lala Gyɛrusalɛm timpuuni pɔi, ka naayi kyɛ kpa na ni u ti gbaasi ba n‑lɔ n‑taasi bɛni n‑niŋi gyeeŋŋu kpamma maa nuu ni. Pa ŋɔna nŋɔa?” 22Sɔla mun daa kpaŋŋi u maŋŋa ni nimmoaa n‑wulisiri, ni, yɛlimaŋni Yisa siri nyɛ la Masisɔ Naawunni ŋɔn tum na la. Dizugu Yɛhudiyadimseeba ban daa bɛ Damasikusi daa kɔŋŋi yɛlli, ni ba lusi u u yɛttɔ'a maa ni.

23Saha daa ti paai ka Yɛhudiyadima maa daa la'am taaba ni ba ti baŋŋi ban nin niŋi seem n‑ku Sɔla. 24Amaa lala lahabaari daa paai Sɔla na. Ba daa yɛli, ni, ba nin guri tiŋŋa maa za'anɔya wuntaŋŋa ni yuŋŋu saha zaa, ni ba gbaai u n‑ku u. 25Amaa dindahinseaa, yuŋŋu ŋɔn daa ti sɔbgi sahanseaa la, u nyaandɔliba daa du tiŋŋa maa goomni zugu ka zaŋŋi la kusɔkku n‑lɔ ka miisi n‑kyɛ ka u sigi ka puuni, ka dinŋɔna ba daa sigsi u tiŋŋa maa kpaŋŋa.

26Tɔ; ka dinŋɔna Sɔla daa labi n‑kyaŋŋi Gyɛrusalɛm. Ka ŋɔn daa ti paai bɛni, u daa boori ni u paasi la Yisa nyaandɔliba la saani; amaa dabeem daa mari ba. Ba daa bu basi yɛm, ni, u dɔli la Yisa ni yɛlimaŋni. 27Di saha ka Baanabasi daa zaŋŋi Sɔla n‑kyaŋŋi nti puusi Yisa tuumudima maa. U daa wulisi ba din daa niŋi Sɔla soori maa ni seem maa, ni, ti Dugma daa kyɛ ka Sɔla nya u ka daa tɔ'asi n‑ti u. Halli ni Sɔla ŋɔn daa bɛ Damasikusi timpuuni seem n‑tɔ'asiri paalu ni, ni sufukpeemni, zaŋŋi n‑kyaŋŋi Yisa yɛla ka u daa wulisi ba gba. 28Di nyaaŋŋa ka Sɔla daa paasi ba zugu ka ba gyinni Gyɛrusalɛm timpuuni, ka u daa wulisi niriba zaa ni sufukpeemni, Yisa yuuri zugu. 29Amaa ŋɔn ni Griika dima ŋɔn daa ti di azama halli nti ŋmɛ nangbankpeemni la, ba daa boori ni ba gbaai u n‑ku u. 30Ka u Yisa nyaandɔlitaaba ban daa ti baŋŋi lala maa, ba daa mari u n‑kyaŋŋi Sizarii tiŋŋa n‑zaali u soori, ni u kuli Taasusi tiŋŋa.

31Tɔ; di saha ka Yisa niriba daa laa n‑ka daaŋŋu Gyuudii tingbaŋŋu zaa ni, halli Samɛrii tingbaŋŋu ni Galilii gba ba daa bu nya yɛttɔ'aseaa. Ba daa nɔbri ni, n‑tumni ti Dugma ŋɔn boori seem, ka bɛ ni Naawunni Sii Kasi sufukpeemni zugu.

32Piita daa gyinni n‑kaari la tinsi halli nti paai Naawunni niriba ban bɛ Lidda tiŋŋa ni. 33U daa ti nya dɔsɔ ŋɔn yuuri boonni Iniyasi; gbariga n daa nyɛ u ka kur kpalim n‑dɔya, ka di paai yuuma anii. 34Piita daa yɛli u, “Iniyasi, Yisa Masiiya n tibi i, doaama n‑kpabi i bundoaa wa!” Tɔ, ka Iniyasi di va n‑doaai. 35Ka niriba ban daa bɛ Lidda tiŋŋa ni, ni Seaarɔn tingbaŋŋu dima maa zaa daa nya u n‑niŋi yɛdda n‑ŋmaligi n‑dɔli ti Dugma.

36Tɔ; ka pɔ'asɔ n daa bɛ Gyɔppa tiŋŋa, Yisa nyaandɔliba sunsukkuni, ka u yuuri boonni Tabita, bee Dookasi (di gbinni n nyɛ, ni, ‘Kparibuuwa’). U pupeelim ni u tunsuma daa ka tɔriga. 37Amaa saha daa ti kyɛ na ka u beeri halli nti kpi. Ba daa peaai u kɔbeoo, ka mari u n‑du n‑kpɛ gyirambisa duseaa n‑dooli. 38Tɔ, ka ba tiŋŋa Gyɔppa ni Lidda tiŋŋa daa bu wɔ'a, ka dizugu nyaandɔliba maa ŋɔn daa pun wum, ni, Piita bɛ Lidda, ba daa tum niriba ayi bɛni ni ba ti booli u nimbirimoaa na. Ni, ba susim u, ni, “Kur kpaŋŋma i maŋŋa n‑kyɛ yooma na!” 39Piita ŋɔn daa wum lala, u daa doaai n‑dɔli ba yooma. Ŋɔn daa ti paai na, ba daa mari u n‑du saazugu n‑kpɛ duu maa ni, ka pukɔya maa zaa daa gyiligi u na, n‑kumna; ka ba daa wulisiri u neenseesi Dookasi ŋɔn daa sɛ n‑ti ba, u nyɔvuri saha la. 40Piita daa kyɛ ka ba zaa yi duu maa ni. U daa gbaani tiŋŋa ka susi Naawunni pɔi, ka naayi ŋmaligi n‑kpa kum maa ka yɛli, “Tabita, doaam n‑zaani!” Ka u daa neaai u nini n‑gɔsi Piita ka doaai n‑zinni. 41Piita daa suŋŋi u ka u doaai n‑zaani saazugu, ka daa booli Yisa nyaandɔliba ni pukɔya maa ni ba kpeem na, nti wulisi ba, ni, pɔ'a maa nya nyɔvuri. 42Gyɔppa dima maa zaa daa wum lahabaari maa, ka ba pam daa niŋi ti Dugma yɛdda. 43Piita mun daa kpalim Gyɔppa ka di yuui beela. U daa gbeeri la Saimoon, gbanzaba sɔ, yiri ni.

Currently Selected:

TUUMUDIMA TUMA 9: maw

Highlight

Copy