Orɔm 6

Nə́ nyɛ̌ ǹdə nə́ cù nə́ du yə̀-bəlɔ̀lɔ́ wẽ́ ta, nə́ zɛ̃̀ nə́ tó Kristə dɛnnɛ nə́ bwìrhì

1Sə wɔ́ bə̀kɔ́n nə́ bʼâ wɔ̀? Nə́ bʼâ tə̀ rə̀myɛ́ yil nə́ jʼá nʼé wɛ̀rhɛ́ yə̀-bəlwàálɛ, sə Yi yò-ècɛ̀nà nɛ́ mʼe súlí dɛ̃´dɛ̃´? 2Ɔ̃́ʼɔ̃, nə́ wàr nə́ bʼâ wɛ̀rhɛ́ èta yé. Nə́myɛ̌ nyɛ̌ ǹdə nə́ cù nə́ kʼá shə́r yə̀-bəlɔ̀lɔ́ w wẽ́ ta. Bə̀kɔ́n yil nə́ gwẽ̌ bʼâ cə̀ə̀lè nə́ nʼé wɛ̀rhɛ́ wa? 3Á yě bə̀ nə́myɛ̌ byɛ̀bɛ́ gakó nə́ zwẽ nɛ̃̌-shɔ Yezu Kristə wẽ́ mó, nə́ mù dwã nɛ ǹdə́ mɔ ń cu mú wẽ́. 4Bə̀ tó nɛ̃̌-shɔ mɔ́ dɛnnɛ bə mù nə́ba dwã nɛ ǹdə́ Kristə, ń cu mú wẽ́, bə ce nə́ba ń lú-bɔ̀l mɔ́ wa. Sə Kristə bwìrhì ǹdə́ ń Da zùwə́ y nánfɔ̀lɔ̀ w jàn dɛ́, mùnì ga nə́myɛ bwìrhì, nə́ tùntwĩ̀ĩ̀ rí jǐrh nándùl.

5Zhə̀nà, nə́ gə́ mù dwã nɛ ǹdə́ mɔ nə́ cì ń cu mú dwí rí mú ce, nə́myɛ mʼâ bwìrhì ǹdə ń ta. 6Nə́ mə̂ sə nə́ lwar kɔn rə̀dù: bə̀ mù nə́ shãã ga tùntwĩ̀ĩ̀ rí Kristə ne, bə súlí bə pəpa də̀-jɔrhɔ́ yó, mùnì yə̀-bəlɔ̀lɔ́ w swã̀ y cì, sə nə́ bə̀kʼá kʼé yə̀ ò yómə́ yé. 7Nə́ yě bə̀ lò mɔ̀bɔ́ ǹ cùwə̀, ǹ kə́ ǹ də̀ yə̀-bəlɔ̀lɔ́ w yóm yé.

8Nə́ gə́ tó Kristə ne nə́ cì mú ce, nə́ zwẽ nyí bə̀ nə́ bʼâ tó mo nə́ nə nyǔ myɛ. 9Nə́ jʼâ yě bə̀ Kristə gə́ bwìrhì mú, ń kə́ ń tá ń la cú yé, cu kʼê bə ń yàlà zhe yé. 10Wɔ́ yə̀-bəlwàálɛ́ vǔr yil ń cù twər rə̀dù sá. Sə èlâsɛ̃´, ń bwìrhì ń ŋwɛ́nɛ́ Yi yil námpúm. 11Ámyɛ wɔ́ èta. Lwarna bʼâ nyɛ̌ ǹdə á cù á shə́r yə̀-bəlɔ̀lɔ́ w wẽ́ ta, á zɛ̃̀ á tó Yezu Kristə dɛnnɛ á bwìrhì á jǐrh Yi lyì.

12Rə̀myɛ́ ce, á bə̀kʼá kʼá yẽ̌ yə̀-bəlɔ̀lɔ́ cìní á yala nɛ́ yé, bʼâ la cú; sʼá bə̀kʼá shɛ̀nɛ́ á shilə námməlwâlsɛ́ yò yé. 13Á bə̀kʼá shɛ̀nɛ́ á zə á yala nɛ́ kə̀kàlsɛ́ á mʼá wɛ̀rhɛ́ lwɛlɛ yé. Á gaga mɔ́ mə̂ sʼá ce á cìn Yi jɔ̃̀ w ǹdə lyì byɛ̀bɛ́ bə̀ cu bə kʼa bwìrhì ta. Èlâsɛ̃´, zəna á yala nɛ́ á twĩ̀ cángá tumə. 14È kʼê də̀ nyə́ né nə̀ cǐ ába yé. Wɔ́ Yi sónó ò cǐ ába. Rə̀myɛ́ ce, yə̀-bəlɔ̀lɔ́ kʼô bə á yàlà zhe yé.

Yi zwẽ nə́ba yə̀-bəlɔ̀lɔ́ yómdé wẽ́, nə́ zɛ̃̀ nə́ rʼé twĩ̀ cángá tumə

15È kʼê də̀ nyə́ né nə̀ cǐ nə́ba yé. Wɔ́ Yi sónó w ò cǐ nə́ba. Nə́ nə bʼâ tə̀ rə̀myɛ́ yil nə́ zɛ̃̀ nə́ nʼé wɛ̀rhɛ́ lwɛlɛ? Ɔ̃́ʼɔ̃, nə́ wàr nə́ bʼâ wɛ̀rhɛ́ èta yé. 16Lwarna bə̀ lò gə zwẽ nyí ń ce ǹ cìn lò jɔ̃̀ w ǹ nə́ ǹ twĩ̀ ǹ pɛ mɔ, ǹ jǐrh rə̀-ná-cí yóm. Èta myɛ, á gə zwẽ nyí á tó yə̀-bəlɔ̀lɔ́ nɛ, wɔ́ cu jàà w ò zə ába ò la nɛ́; sə á gə nʼá tó Yi ni, á kʼá tʼá la dwə́ə́re zal yé. 17Cenə nə́ ce Yi nə̀báná! Á yʼâ wɔ́ yə̀-bəlɔ̀lɔ́ yómə́ shãã ga, sə èlâsɛ̃´, á shɛ̀nɛ́ á zwẽ kɔn dɛ́ dɛ̀bɛ́ bə̀ cèrhè ába mó ǹdʼá wun gakó. 18Yi zwẽ ába yə̀-bəlɔ̀lɔ́ yómdé wẽ́, á zɛ̃̀ á nʼá twĩ̀ cángá tumə. 19Á gə́ wàr á nʼá nyɛ̀ɛ̀ zɔ̀mà kùr nàná mɔ́ ce, à nʼâ zɔ̀m ǹdʼába ǹdə́ zɔ̀mà nyɛ̀bɛ́ numbyíní wɔ̌ è bʼa nyɛ̀ɛ̀ nə̀ kùrə̀. Shãã ga, á yʼâ shɛ̀nɛ́ á jǐrh yə̀-bəlɔ̀lɔ́ yómə́ námpúm á mʼá twĩ̀ pwarha tumə, á tùntwə̃̀ə̃̀ né gakó jǐrh yààyàà. Sə èlâsɛ̃´, zəna á cìn námpúm á yə̀ Yi yómə́ á twĩ̀ cángá tumə. Èta, á mʼâ yə̀ lyì byɛ̀bɛ́ bə̀ sú Yi yírhə́.

20Á gə́ yʼâ wɔ́ yə̀-bəlɔ̀lɔ́ yómə́ yi ní, cángá tùntwə̃̀ə̃̀ né yʼà də̀ á yé yé, 21sə wɔ́ bə̀kɔ́n tùntwə̃̀ə̃̀ né nə̀myɛ́ mɔ́ pɔ ába? Zà mɔ́, nə̀ cìzhìl zhe ába, bə̀ nə̀ yó-gurə́ y wɔ́ cu. 22Sə èlâsɛ̃´, Yi zwẽ ába yə̀-bəlɔ̀lɔ́ yómdé wẽ́, á zɛ̃̀ á nʼá twĩ̀ tùntwə̃̀ə̃̀ nyɛ̀bɛ́ nə̀ sú Yi yírhə́, sə nə̀ yó-gurə́ y wɔ́ nyǔ mə̀ tʼâ la zhɔ̌. 23Zhə̀nà, yə̀-bəlɔ̀lɔ́ kwândɛ́ wɔ́ cu, sə pɛnɛ́ y Yi nʼê pɛ nánfò mó, wɔ́ nyǔ mə̀ tʼâ la zhɔ̌, nə́ Cinu Yezu Kristə jàn yilə.

Currently Selected:

Orɔm 6: lee

Highlight

Copy

Compare