Orɔm 13

Zwẽnə cɔ w yé né cìnə́ bé nyə́ né

1Lò gakó mə̂ sə́ zwẽ cɔ w yé né cìnə́ bé nyə́ né, bə̀ lò wàr ń mà n jí pyɛ̀lɛ̀ ǹdə́ è də̀ Yi rə̀ pɔ mɔ yé. Pyɛ̀lɛ̀ dwí gakó wɔ́ Yi sõ rə̀ nʼê shí ní. 2Lò mɔ̀bɔ́ ń nə́ ń cẽ cɔ w yé né cìnə́ bé nyə́ né, wɔ́ Yi nyí ni ń nə́ ń cẽ né. Sə lò mɔ̀bɔ́ ǹ cẽ nyí ni, ǹ bʼâ nə còrhò-tum. 3Lò mɔ̀bɔ́ ǹ nə́ ǹ wɛ̀rhɛ́ cɛ̀nɛ̀, cɔ w yé né cìnə́ bé ywẽ bə mɔ́ zhe yé. Sə ǹ gə nə́ ǹ wɛ̀rhɛ́ lwɛlɛ, bə̀ ywẽ zhe mó. Ǹ gə tá ǹ yâl bə̀ bə̀ ywẽ zə mɔ́, sə́ twĩ̀ cɛ̀nɛ̀. Èta, bə̀ mʼa cèrhé mó. 4Zhə̀nà, wɔ́ Yi rə̀ cĩ́ bi ní bə̀ nʼê twĩ̀, mùnì bə sɛ̃ mɔ́ ǹmyɛ twĩ̀ cɛ̀nɛ̀. Ǹ gə zɛ̃̀ ǹ nə́ ǹ wɛ̀rhɛ́ lwɛlɛ, sə bə̀ ywẽ zə mɔ́. È də̀ nánfò yil bə̀ zhe ŋwɔ̀nɔ́ bə̀ nʼê pɛ còrhò-tum lyì bí ni yé. Bə̀ gə pɔ còrhò-tum lò nè, wɔ́ Yi tum bə̀ twĩ̀, mùnì ga bə tó rə̀myɛ́ dɛnnɛ bə byili mu bə̀ Yi lyim nʼê yì mù. 5Wɔ́ rə̀myɛ́ è ce, cɔ w yé né cìnə́ bé nyə́ né zõ nʼê nyɛ́ɛ́ nə́ba. È də̀ nə́ la mʼé lú Yi lyim dí yé né dúdú yil yé. Wɔ́ nə́ gə́ yě nə́ wun ní wẽ́ bə̀ wɔ́ èta nə́ mə̂ sə nə́ wɛ̀rhɛ́ nɛ́ mɔ́ myɛ yilə.

6Wɔ́ rə̀myɛ́ cìcì mú è ce á nʼá pɛ myə̂l-kwândɛ. Lyì bí byɛ̀bɛ́ bə̀ vùr bə cĩ́ ní bə̀ nʼê zwẽ myə̂l-kwândɛ́ mɔ́, wɔ́ Yi tum bə̀ nʼê twĩ̀. 7Lò mɔ̀bɔ́ gakó á mə̂ sʼá pɔ̃ kɔna, sʼá pɔ̃ dɛ. È gə wɔ́ myə̂l-kwândɛ́ ǹdə́ lɔrɔ́ w yilə, pana rɛ mɔ̀bɔ́ á mə̂ sʼá pɔ̃ rɛ mɔ́ nɛ. È gə wɔ́ byɛ̀bɛ́ á mə̂ sʼá zwẽ bə̀ nyə́ né mó yilə, zwẽnə bə̀ nyə́ né, sʼá nyɛ̀ bɛ.

Á gə só dwã, wɔ́ Yi nyə́ né gakó á nʼá zwẽ

8Á bə̀kʼá zə lò jim yé. Á gə la lò jim zal, sʼe yə̀ sónó w á mə̂ sʼá swéné dwã mɔ́, bə̀ lò mɔ̀bɔ́ ǹ só ǹ dwã bɛ́, wɔ́ Yi nyə́ né gakó ǹ nə́ ǹ zwẽ. 9Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: “Bə̀ká fwə̂l yé; bə̀ká gu lò yé; bə̀ká ŋwɔ̀ yé; bə̀ká yâl ǹ dõ kɔn ǹdə́ bwɛ̃̌-dǔr yé.” Nyə́ né nə̀myɛ́ ǹdə́ nyɛ̀bɛ́ nə̀ dàl mɔ́ kùr wɔ́: “Swéné ǹ dõ ǹdə ǹ cìcì ta.” 10Lò mɔ̀bɔ́ ǹ só ǹ dõ, ǹ tá ǹ wɛ̀rhɛ́ mɔ lwɛlɛ yé. Ǹ gə só ǹ dõ, wɔ́ Yi nyə́ né gakó ǹ nə́ ǹ zwẽ.

Zəna á cìn cɛ̀nɛ̀ á mʼá dɛ̃̀ Kristə twírí yə́

11Á yě yi rí tɛ̀bɛ́ nə́ ŋwɛ́nɛ́ rə̀ wẽ́ èlâsɛ̃´ mɔ́. Kɔn yú bʼâ zɛ̃̀ á jan dɛ́ wa, bə̀ yi rí tɛ̀bɛ́ Yi la lyì bí vwârh mɔ́ bwəlse du nə́ gə́ ju kùr nə́ zù Yezu Kristə yi ní mú. 12Cəcɛ̃ y nʼê lyɛ̃, cɛ y bwə́l lɔ́. Rə̀myɛ́ ce, bànà nə́ yẽ̌ cə-byín tumə né ne, sə nə́ pwà búlə́ wẽ̀ dé nə́ lyɛ̃̀ nə́ mʼé bú pwẽ̀ dé wẽ́. 13Bànà nə́ zə nə́ cìn náàcɛ̀nɛ́ ǹdə nə́ gə́ nʼé zal nə́ cìn nə̀nyɔ́nɔ́ nɛ nɛ́, sə nə́ bə̀kʼá yə̀ lyì byɛ̀bɛ́ bə̀ nʼê jí dɛ̃´dɛ̃´ kɔn lyɛ̃ cɛ nɛ yé. Nə́ bə̀kʼá nyɔ̀ sɛ̃´ dɛ̃´dɛ̃´ kɔn lyɛ̃ cɛ nɛ yé. Nə́ yẽ̌ fwə̂l ǹdə́ dədalsɛ námməlwâlsɛ dwí gakó ne, sə nə́ yẽ̌ búlə́ ǹdə́ bwɛ̃̌-dǔr ne. 14Zwínə Cinu Yezu Kristə ǹdə kàmə̀-zwǐ ta, sʼá bə̀kʼá yẽ̌ shilə námməlwâlsɛ́ yò zù ába yé.

Currently Selected:

Orɔm 13: lee

Highlight

Copy

Compare