Kɔn dɛ̀bɛ́ Zhã nɔ mɔ́ 18

Babyəlɔnɛ wǔr

1Rə̀myɛ́ kwã nɛ́, à nɔ màlɛ́ka dõ è shí dɛ̃̌ yi w è nʼê swé tɛ̃´ ǹdə́ jàn nánfɔ̀lɔ̀. È zùwə́ y pwẽ̀ dé yə̂r cɛ y gakó. 2E bya dɛ̃´dɛ̃´ e wɔ̀: “Babyəlɔnɛ nánfɔ̀lɔ̀ w wǔr, ò wǔr, ò wǔr o ló tɛ̃´! Ò jàà y jǐrh nə̀cílsi námməlwâlsɛ jàà. Nə̀cílsi námməlwâlsɛ dwí gakó nʼê twí sə̀ nɛ dwã gàà. Kúmdi námməywààlɛ̀ tɛ̀bɛ́ lò bə rə̀ tum zhe dwí gakó, [ǹdə́ gɔ-wẽ̀ námməywààlɛ̀ dwí gakó] nʼê twí rə̀ nɛ dwã gàà. 3Ò pɔ ò sɛ̃´ mɔ́, mə̀ wɔ́ ò tùntùm-bəywààlɛ́ nə̀ lyɛ̃ cɛ nɛ mɔ́, lũ w lyì bí ni bə nyɔ̀. Lũ w pyâ bɛ́ twĩ̀ ywâl tumə ǹdə́ wa, sə cɛ yó dɔ̌lna bɛ́ tó ò nə̀cɛ̀ndɛ́ nánzhəzhɔ̌ w dɛnnɛ bə jǐrh nə̀cɛ̀nà.”

4A kʼa nyɛ̀ɛ̀ cəl dõ rə̀ zhì dɛ̃̌ yi w rə wɔ̀: “À lyì, shə́rnə cɔ w kɔ̀bɔ́ wẽ́! Á twə́r bə̀kʼa yə̀ ò yə̀-bəlwàálɛ́ wẽ́ yé, mùnì á lú zwini rí tɛ̀bɛ́ rə̀ la w zal mɔ́ yé né. 5Ò yə̀-bəlwàálɛ́ púl lé zhì tɛ̃´ rə yí dɛ̃̌ yi wə, Yi zɛ̃̀ rə lyǐrh ò tùntùm-bəywààlɛ́ yò. 6Wɛ̀rhɛ́na w ǹdə ò gə́ wɛ̀rhɛ́ ò dwã bɛ́ nɛ́. Cârhna w lwɛlɛ rɛ́ tɛ̀bɛ́ ò wɛ̀rhɛ́ mɔ́ twər rə̀lyè. Kâ-zɔ̌m mɔ́ mɔ̀bɔ́ ò co sɛ̃´ mɔ́ mə̀ wẽ́ o pə ò dwã bɛ́ nɛ mɔ́, cenə sɛ̃´ mɔ̀bɔ́ mə̀ jàn dɛ́ du ò nyân mɔ́ twər rə̀lyè mó mə̀ wẽ́ á pə wa. 7Ò nʼô wə̀l ò cìn nì ò wẽ́: ‘À jě pyɛ̀lɛ̀ də̀gwã́ yó. À də̀ ejə̃̀-kɛ̃ yé, à tʼâ la cu wu-zhìlù nɔ gaga yé.’ Rə̀myɛ́ ce, cenə ò nɔ̀nɔ̀ w ǹdə́ ò wu-zhìlù w, mɛrhɛ ǹdə zùwə́ y ǹdə́ nə̀cɛ̀ndɛ́ ò jú mú ta. 8Dɛ̃ rə̀dù, zwini bʼa zə wa, sə zwini rí rə̀myɛ́ mɔ́ wɔ́ cu ǹdə́ wu-zhìlù ǹdə́ nɔrh; myǐn bʼa jí wə; bə̀ wɔ́ Cinu Yi jàn cə́bal mɔ́ ń kɔ́ ò bùrsí.”

9Lũ w pyâ bɛ́ bə̀ twĩ̀ tùntùm-bəywààlɛ́ ǹdə́ wa, bə jʼa jí ò nə̀cɛ̀ndɛ́ nánzhəzhɔ̌ w mɔ́ gə́ mʼa nə w ò zhe myǐn mə̀ nyɛ̀rh la dɛ̃̌, bə̀ mʼa kúrh wə. 10Zwini rí ywẽ bʼa zə bɛ, bə twə̀r bə zhì kwã nɛ́ kwã nɛ́ bə wɔ́wɛ́lɛ́ bə wɔ̀: “Nyǐ wɔ́ zwini, nyǐ wɔ́ zwini tã̀! Babyəlɔnɛ, ǹ wɔ́ cɔ nánfɔ̀lɔ̀ ǹ zhe jàn, e jà bə kə́ ǹ bùrsì lù òdù sásá!”

11Cɛ yó dɔ̌lna bɛ́ myɛ wun zhìlì bə̀ nʼê kúrhə́, lò gə́ kə́ ń tɛ̀nɛ́ ń la bə̀ wẽ̀ dé yǒ mó yilə. 12Wẽ̀ dé rə̀myɛ́ yʼà wɔ́: sánə́má, ǹdə́ sə̀byǐ, ǹdə́ nə́kuuli ná-ècɛ̀ndɛ̀, ǹdə́ dɔ̀msɛ̀, ǹdə́ kàmə̀-jɛ̃̀-shɛ̃̀rh ná-ècânsɛ, sə̀ jàlà wɔ́ nánlyəlyansɛ, sə̀ jàlà nyɛ̌ nã́məmɔ̌rsɛ, ǹdə́ dâr tɛ̀bɛ́ rə̀ tʼâ nɛ nàná yé, ǹdə́ wẽ̀ kùrə̀ nánzhəzhɔ̌ bə̀ zə nàntú yə́lə́ bə mʼe wɛ̀rhɛ́, ǹdə́ dâr ná-ècɛ̀ndɛ̀, ǹdə́ kã̀mɔ, ǹdə́ lù, ǹdə́ nə́kuuli tɛ̀bɛ́ rə̀ nʼê jə́jɛ̀mɛ́, 13ǹdə́ myííri ǹdə́ ãsã́, ǹdə́ wẽ̀ dwã rə̀ lwẽ́ nã́nyə̀nyɛ̀lɛ́, ǹdə́ sɛ̃´ ǹdə́ nwə̃̌, ǹdə́ mún ǹdə́ jíjí byâ, ǹdə́ nɛ̃ ǹdə́ pyììsì, ǹdə́ shəshərh ǹdə́ eshã-zhírsi, e súlí numbyínsi. 14Dɔ̌lna bɛ́ zɛ̃̀ bə̀ nʼê zɔ̀m ǹdə́ cɔ w bə̀ zhe: “Wẽ̀ dé tɛ̀bɛ́ ǹ yà ǹ nə́ ǹ yâl mɔ́ gakó jé ǹ yé né. Wẽ̀ dé tɛ̀bɛ́ rə̀ yʼà zhe kùr rə jʼà càn mɔ́ gakó jé ǹ yé né. Bə̀ kʼê tʼâ la òdù ga nɔ gaga yé.”

15Dɔ̌lna bɛ́ byɛ̀bɛ́ bə̀ dɔ̌l bə jǐrh nə̀cɛ̀nà cɔ w òmyɛ́ wẽ́ mó bʼa vò bə zhì pyépyé bə yẽ̌ wə. Ò zwini rí ywẽ bʼa zə bɛ, bə kúrh ǹdə́ wu-zhìlù, 16bə wɔ̀: “Nyǐ wɔ́ zwini, nyǐ wɔ́ zwini cə-fɔ̀lɔ̀ w kɔ̀bɔ́ yil tã̀! Ò yʼà zù kàmə̀-zù-elyansɛ, ǹdə́ kàmə̀-jɛ̃̀-shɛ̃̀rh ná-ècânsɛ. O ce sánə́má cìbyǔr. Ò yʼà zhe nə́kulə ná-ècɛ̀ndɛ̀ kùrə̀ nánzhəzhɔ̌ ǹdə́ dɔ̀msɛ̀. 17Nə̀cɛ̀ndɛ́ rə̀myɛ́ gakó zɛ̃̀ rə jʼa cɔ̀ lù òdù sásá!”

Byɛ̀bɛ́ bə̀ yʼà cǐ bǔ-bwələ né nánfwààlɛ́ nyɛ̀bɛ́ nə̀ nʼê dùr nə̀-fɔ̀lɔ̀ w wẽ́ mó, ǹdə́ lyì bí byɛ̀bɛ́ bǔ-bwələ né nə̀myɛ́ nʼê pwà mɔ́, ǹdə́ byɛ̀bɛ́ bə̀ nʼê twĩ̀ nə̀ wẽ́ mó, e súlí byɛ̀bɛ́ gakó bə̀ nʼê twĩ̀ nə̀-fɔ̀lɔ̀ w wẽ́ bə̀ mʼê pyà bə̀ nyí kùjú mú gakó zhì kwã nɛ́ kwã nɛ́. 18Bə̀ gə́ nɔ cɔ w ò nʼô jí myǐn ò nyɛ̀rh la dɛ̃̌, bə̀ búbwéé bə wɔ̀: “Cɔ gwẽ̌ yə̀ nɛ́ yàl ò yú cə-fɔ̀lɔ̀ w kɔ̀bɔ́ gaga yé!”

19Bə zɛ̃̀ bə pwà shó bə ló bə̀ yó wə, bə̀ nʼê kúrh ǹdə́ bə̀ nʼê búbwéé bə̀ zhe: “Nyǐ wɔ́ zwini, nyǐ wɔ́ zwini, cə-fɔ̀lɔ̀ w kɔ̀bɔ́ yil tã̀! Wɔ́ òmyɛ́ dɛnnɛ byɛ̀bɛ́ bə̀ cǐ bǔ-bwələ né nyɛ̀bɛ́ nə̀ nʼê dùr nə̀-fɔ̀lɔ̀ w wẽ́ mó tó né bə jǐrh nə̀cɛ̀nà. Ò nə̀cɛ̀ndɛ́ rə̀myɛ́ gakó jʼa zɛ̃̀ rə cɔ̀ lù òdù sásá!”

20Ámyɛ̌ dɛ̃̌ yi cìnə́ bé, ǹdʼámyɛ̌ Yi lyì bí, ǹdə́ rə̀ tùntúmə́ bé ǹdə́ rə̀ nyì-zwennə bé, fǔnə ǹdə́ wu-nyɔ̃̀, bə̀ Yi kɔ́ cɔ w òmyɛ́ bùrsì lwɛlɛ tɛ̀bɛ́ ò wɛ̀rhɛ́ ába mɔ́ yilə.

21Rə̀myɛ́ yi ní, màlɛ́ka kɛ̀bɛ́ è jɛ̀ kwè nə́kulu nánfɔ̀lɔ̀ ǹdə nə̀mú-byǐ nánfɔ̀lɔ̀ ta, e ji nə̀-fɔ̀lɔ̀ w wẽ́ e wɔ̀: “Wɔ́ èta bə bʼa ji Babyəlɔnɛ y, ò wɔ́ cə-fɔ̀lɔ̀ mɔ́ tɛ̃´ nɛ́. Lò lò kə́ ń tá ń la w nɔ ń yírh yó gaga yé. 22Lò kə́ ń tá ń la dàkɔ̌n-dúrnə, ǹdə́ núnnə, ǹdə́ wúrh wúlnə, ǹdə́ pɔ́lsɛ wúlnə dweme nyɔ̀ɔ̀ ǹ sõ gaga yé. Bə̀ kʼê tʼâ la lò mə̀dù ga nɔ ǹdə́ ń nə́ ń twĩ̀ tum dwí tə̀ltə̀l gaga yé. Bə̀ kʼê tʼâ la nə̀mú cəl nyɔ̀ɔ̀ ǹ sõ gaga yé. 23Pàntɛ́mɛ́ pwẽ̀ kʼê tʼâ la nɛ́ yál ǹ sõ gaga yé. Lò kə́ ń tá ń la nyɔ̀ɔ̀ bə̀ bal ǹdə́ kɛ̃ jú dwã ǹ sõ yé. Ǹ dɔ̌lna bɛ́ yʼà wɔ́ lyì-fwààlɛ̀ du lyì bí dwã bɛ́ cɛ yó mó gakó, ń jà ń zə ǹ càl-tumə né ń mə́ yǔr lyì bí gakó. Wɔ́ rə̀myɛ́ è ce rə̀myɛ́ gakó la wɔ̀rhɔ́. 24Kɔn súlí myɛ, wɔ́ ǹmyɛ́ sõ Yi nyì-zwennə bé ǹdə́ Yi lyì bí byɛ̀bɛ́ bə̀ gu cɛ yó mó gakó jal mɔ́ ló né.”

Currently Selected:

Kɔn dɛ̀bɛ́ Zhã nɔ mɔ́ 18: lee

Highlight

Copy

Compare