Ebərəbá 3

Yezu du Muyiisi

1Rə̀myɛ́ ce, da-byâ Kristə-lyì, ámyɛ̌ byɛ̀bɛ́ Yi byẽ̀ mó, nyǐnə Yezu. Wɔ́ ńmyɛ̌ ń wɔ́ vwĩ̀-zwə́lnə náncɛ y Yi twĩ̀, nə́ zɛ̃̀ nə́ tó ńmyɛ̌ dɛnnɛ nə́ zhí Yi ni. 2Wɔ́ Yi rə̀ cír mo tum dí rə̀myɛ́ yilə. Ń wɛ̀rhɛ́ ǹdə rə̀ gə́ nʼê yâl nɛ́, ǹdə Muyiisi ta. Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: “Muyiisi yàl Yi tùntùnnə̀ nántwə̂. Ń wɛ̀rhɛ́ ǹdə rə̀ gə́ nʼê yâl nɛ́ rə̀ kɛ̀lɛ́ y gakó wẽ́.” 3Lò gə lù jì, bə̀ mə̂ sə bə cèrhé mɔ̀bɔ́ ń lù y mú du yə. Èta myɛ, Yezu mə̂ ǹdə́ còrhó du Muyiisi. 4Jì gakó wɔ́ lò ń nə́ ń lwì yə̀, sə mɔ̀bɔ́ ń wɛ̀rhɛ́ kɔn gakó mó, wɔ́ Yi. 5Shãã ga, Muyiisi yàl Yi tùntùnnə̀ nántwə̂. Ń wɛ̀rhɛ́ ǹdə rə̀ gə́ nʼê yâl nɛ́ rə̀ kɛ̀lɛ́ y gakó wẽ́. N yə̀ kɔn dɛ́ dɛ̀bɛ́ rə̀ yʼà mʼa byili lyì bí ni mú zhə̀n-cínnə. 6Sə Kristə wɔ́ Yi Byǐ. Rə̀ ce ń cǐ rə̀ kɛ̀lɛ́ yá. Sə wɔ́ nə́myɛ̌ nə́ wɔ́ rə̀ kɛ̀lɛ́ yá, ǹdə́ nə́ gə nʼé zwẽ nyí ǹdə́ nə́ wun gakó bə̀ Yi nyì-bwelé y tʼâ la kwârh.

Shìrhə́ jàà y wɔ́ byɛ̀bɛ́ bə̀ zwẽ nyí mú yilə

7Rə̀myɛ́ ce, cilinə kɔn dɛ́ dɛ̀bɛ́ Eshirhə náàcɛ̀nɛ́ byili mú. È wòwə̀:

“Ámyɛ̌ gə nyɛ̀ɛ̀ Yi cəl lé zà,

8sʼá bə̀kʼá shĩ á zhã̌,

ǹdə á nàmbala bɛ́ gə́ wɛ̀rhɛ́ nɛ́ gɔ-elũ èpòlò w wẽ́ mó ta yé.

Bə̀ cẽ Yi nyə̀ná nɛ́ bə zhẽ̀ rè,

bə mʼe pyà rə̀ nyí.”

9Yi wòwə̀: “Á nàmbala bɛ́ zhẽ̀ nè gàà,

mùnì ga bə̀ yírhə́ nə kɔn dɛ̀bɛ́ à la wɔ̀rhɔ́ mɔ́.

Sə bə̀ yírhə́ nɔ rɛ byinə shə́-èna.

10Wɔ́ rə̀myɛ́ è ce, à lyim zɛ̃̀ ǹdə́ bɛ a wɔ̀:

‘Bə̀ bùlə̀ né ŋwɛ́nɛ́ jó sɔ́má yó dɛ̃ gakó.

Bə̀ tʼâ yâl bə lwar sɔ́msɛ́ shɛ̌ yil à byili bi yé.’

11À bwəl ǹdə́ lyim a pə bɛ a wɔ̀:

â nyǐ bə̀ tʼâ la shìrhə́ jàà y à tɛnɛ bə̀ yil mó w yú yé.”

12Da-byâ, dɛ̃̌na á cìnə̀, lò mə̀dù ga bə̀ká n yə̀ á wẽ́ bùlə̀ námməlwâlsɛ ce n yẽ̌ Yi rí nã́nyì y ni n cẽ rə zhú yé. 13Yi zɔ̀mɛ̀ rɛ́ sɛ́bɛ́ rɛ́ gə́ wò bə̀: “Á gə nyɛ̀ɛ̀ Yi cəl lé zà” mɔ́, zəna zɔ̀mɛ̀ rɛ́ rə̀myɛ́ á cící dwã, mùnì ga yə̀-bəlɔ̀lɔ́ wɔ̀rhɔ́ shilə bə̀kʼa jə́jɛ̀rɛ́ á mə̀dù ga, ń gə nyɛ̀ɛ̀ Yi cəl lé, sə n shĩ ń zhã̌ yé. 14Nə́ gə jʼá zɔ nə́ gə́ ju kùr nə́ zù Kristə né mó kẽkẽ, sə́ nyǐ nə́ wɔ́ ń tó-dwã.

15Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:

“Ámyɛ̌ gə nyɛ̀ɛ̀ Yi cəl lé zà,

sʼá bə̀kʼá shĩ á zhã̌,

ǹdə á nàmbala bɛ́ gə́ wɛ̀rhɛ́ nɛ́ gɔ-elũ èpòlò w wẽ́ mó ta yé.”

16Wɔ́ byɛ̌ lyì bə̀ nyɛ̀ɛ̀ Yi cəl lé bə zɛ̃̀ bə zhẽ̀ dè mó? Bə̀myɛ́ gakó Muyiisi mə n du Ezhibti ní mú. 17Yi lyim dí gə́ zɛ̃̀ byinə né shə́-èna y wẽ́ mó, wɔ́ ǹdə́ byɛ̌ lyì? Wɔ́ byɛ̀bɛ́ bə̀ wɛ̀rhɛ́ yə̀-bəlwàálɛ gɔ-elũ èpòlò w wẽ́ bə cì mú. 18Wɔ́ byɛ̌ nɛ Yi bwəl rə pa bə̀ bə̀ tʼâ la shìrhə́ jàà y rə̀ tɛnɛ bə̀ yil mó w yú mú? Wɔ́ byɛ̀bɛ́ bə̀ yə̀ nyí zwẽ mó.

19Sə nə́ pwírí bə̀ gə́ yə̀ pyɛ́nɛ́ bə zhí Yi ni mú ce, bə̀ yə̀ ŋwɛ̀nɛ́ bə yí shìrhə́ jàà y Yi yʼà tɛnɛ bə̀ yil mó w yé.

Currently Selected:

Ebərəbá 3: lee

Highlight

Copy

Compare