2 Timote 3

Kɔn gə́ la nɛ́ yál dwã nɛ́ nánkwaá nɛ́ wẽ́

1Lwar bə̀ zwini bʼa yə̀ nɛ́ dwã nɛ́ nánkwaá nɛ́ wẽ́. 2Lyì bí bʼa jǐrh sə̀cííri cìnə́, bə swéné sə̀byǐ, bə jǐrh cìn-byilu ǹdə́ cìn-dɛ̃̌-zhõ̌ cìnə́, bə zɛ̃̀ bə̀ nʼê tùrh Yi; bə̀ mʼa cẽ bə̀ dabá ǹdə́ bə̀ nábá nyí ni; bə̀ mʼa yə̀ yə̀l-cɛ̀nɛ̀ cìnə́; bə̀ tʼâ la kɔn dɛ̀bɛ́ rə̀ wɔ́ Yi nyân nyám yé; 3bə̀ mʼa yə̀ yó-kùùlì cìnə́; bə̀ tʼâ la nɔ̀nɔ̀-dǔr zal yé; bə̀ mʼa yə̀ cə-lwərse; bə̀ tʼâ la ŋwɔ̀nɔ́ bə zə bə̀ cìn yé; bə̀ mʼa yə̀ wu-myǐn cìnə́; bə̀ tʼâ la cɛ̀nɛ̀ sónó yé; 4bə̀ mʼa yə̀ myìnù cìnə́, yə̀l cìn-dãɔ̃ cìnə́; cìn-byilu mʼa pyi bə̀ surhə né; bə swéné lũ w wu-nyɔ̃̀ w du Yi. 5Bə̀ mʼa wɛ̀rhɛ́ ǹdə bə̀ zhí Yi ni ta, e jà bə̀ tʼâ zwẽ nyí bə̀ Yi zhe jàn yé. Bə̀ká tó lyì bí bə̀myɛ́ mɔ́ kùr yé.

6Lyì jàlà ŋwɛ́nɛ́ bə̀ wẽ́ bə̀ nʼê shèè bə̀ zhə̀l kâlsɛ wẽ́ bə̀ swèlè kana byɛ̀bɛ́ bə̀ yə̀l nə̀ kùrə̀, yə̀-bəlwàálɛ nʼê nwɛ̀nɛ̀ bɛ̀ mɔ́. Bə̀ gə́ yə̀ Yi ni zhí ǹdə́ bə̀ wun gakó mó ce, bə̀ nʼê shɛ̀nɛ́ shilə dwí gakó. 7Twéé gakó, kana bɛ́ bə̀myɛ́ nʼê pyà sə bə lwar zhə̀n dɛ́ gə́ wɔ́ nɛ́, sə bə̀ wàr bə̀ nʼê lwar rə̀ gə́ wɔ́ nɛ́ gaga yé. 8Wɔ́ èta Zhanɛɛsɛ ǹdə́ Zhambərɛɛsɛ wɛ̀rhɛ́ nɛ́ shãã ga. Bə̀ yʼà tʼâ zwẽ Muyiisi nyí rí yé. Lyì bí byɛ̀bɛ́ èta mɔ́ myɛ wɔ́ èta bə̀ nʼê wɛ̀rhɛ́ nɛ́. Bə̀ bə shɛ̀ zhə̀n dɛ́ yò yé. Bə̀ surhə né nyɛ̌ námbəjə́ə́le; bə̀ Yi-ni-zhú mú bə kùr zhe yé. 9Bə̀ tʼâ la yé né yú ǹdə Zhanɛɛsɛ ǹdə́ Zhambərɛɛsɛ gə́ yə̀ yé né yí ní. Lyì bí gakó bʼa lwar bə̀ kùrə̀.

Zə kɔn dɛ́ dɛ̀bɛ́ bə̀ byili mú mú kẽkẽ

10Sə ǹmyɛ́ yě à gə́ nʼâ wɛ̀rhɛ́ nɛ́ gakó; ǹ cili à kàrmɔ́; ǹ nɔ à tùntwĩ̀ĩ̀ rí gə́ yàl nɛ́; ǹ yě à pùbùlə̀ né ǹdə́ à gə́ zhí Yi ni ní; ǹ yě bʼà nʼâ zhìlì a yala nɛ; ǹ yě bʼà só lyì bí, a jʼà nʼâ pyɛ́nɛ́ à cìnə̀. 11Ǹ yě bə̀ gə́ nwɛ̀nɛ̀ nɛ̀ nɛ́; ń jà ǹ yě zwini tɛ̀bɛ́ gakó à nɔ Ancɔɔsɛ nɛ́, ǹdə́ Yəkɔnəyɔm nɛ́, ǹdə́ Lyisitiri ní mú. Zhə̀nà, à nwɛ̀nɛ̀ dɛ̃´dɛ̃´, sə Cinu zwẽ ne rə̀myɛ́ gakó wẽ́. 12È gə wɔ́ zhə̀n yilə, lyì byɛ̀bɛ́ gakó bə̀ nʼê yâl bə tó Yezu Kristə ne ǹdə́ bə̀ wun gakó, bə̀ mʼa nə nɔ̀nɔ̀, 13sə lyì-bəlwâlsɛ́ ǹdə́ myìnù cìnə́ bé lwɛlɛ rɛ́ wɔ̀rhɔ́ mɔ́ bʼa jʼâ nʼê súlí. Bə̀ bʼa myìnì bə̀ dwã bɛ́, sə lyì bʼa myìnì bə̀myɛ.

14Zə kɔn dɛ́ dɛ̀bɛ́ bə̀ cèrhè mó ń jʼâ zwẽ rə̀ nyí mú kẽkẽ. Ǹ yě byɛ̀bɛ́ bə̀ cèrhè mó re mó gə́ wɔ́ nɛ́. 15Wɔ́ ǹ bə̀swɛ́nɛ́ ga ǹ ju kùr ń lwar Yi zɔ̀mɛ̀ rɛ́ sɛ́bɛ́ rɛ́. Wɔ́ rə̀myɛ́ rə̀ wɔ̌ rə̀ mʼa pɔ̃́ surhə nyɛ̀bɛ́ nə̀ bʼa ce ń nə vwârh ǹ gə́ zhí Yezu Kristə ne mó yilə. 16Yi zɔ̀mɛ̀ rɛ́ sɛ́bɛ́ rɛ́ gakó wɔ́ Yi rə̀ pul byɛ̀bɛ́ bə̀ kɛ̃ dɛ mɔ́ surhə bə mʼe kɛ̃ dɛ, mùnì rə zə kùrə̀, rə sɛ̃ mɔ́ ń cèrhè zhə̀n dɛ́ lyì bí ni; dóó gə tú ò ŋwɛ́nɛ́, sə́ byili ò cí mú ni, sə́ zwə́r mo, sə́ cèrhè lyì bí bə yə̀ wu-cángá cìnə́, 17mùnì Yi lò mó yə̀ lò mɔ̀bɔ́ ń byìl cɛ̀nɛ̀, ń wɔ̌ yò-ècɔ̀nɔ̀ dwí gakó ń mà n wɛ̀rhɛ́.

Currently Selected:

2 Timote 3: lee

Highlight

Copy

Compare