1 Kɔrɛ̃tɛ 5

Bə̀ yʼà byili Pwəə ne bə̀ Kɔrɛ̃tɛ Kristə-lyì jàlà nʼê wɛ̀rhɛ́ fwə̂l tumə

1Bə̀ nʼê zɔ̀m jààsɛ́ gakó wẽ́, bʼâ jàlà nʼá wɛ̀rhɛ́ fwə̂l tumə. E jà lyì bí byɛ̀bɛ́ bə̀ də̀ Kristə-lyì myɛ cìcì tʼâ wɛ̀rhɛ́ fwə̂l tumə né nə̀myɛ́ mɔ́ dwí rí yé. Mə̀ wɔ́ pɔrha tum. Bə̀ wò bʼâ mə̀dù ŋwɛ́nɛ́ ǹdə́ ń da kɛ̃. 2Á jʼâ nʼá zhẽ̌ á cìn dɛ̃̌! Á wun yʼà mə̂ sə nə zhìlì dɛ̃´dɛ̃´. Á mə̂ sʼá vùr lò mó mɔ̀bɔ́ ń nə́ ń twĩ̀ tumə né nə̀myɛ́ èta mɔ́ á wẽ́. 3Àmyɛ́ cìcì mú tɛ̀nɛ́ á sõ yé. Sə Eshirhə náàcɛ̀nɛ́ jàn yilə, à ŋwɛ́nɛ́ á cəcəl wə, ce à pú a kə́ lò mó mɔ̀bɔ́ ń nə́ ń wɛ̀rhɛ́ èta mɔ́ bùrsì ǹdə wɔ́ á sõ à ŋwɛ́nɛ́ ta. 4-5Á gə jòm dwã yó Cinu yil lé yilə, àmyɛ́ tó à ŋwɛ́nɛ́ á cəcəl w Eshirhə náàcɛ̀nɛ́ jàn yilə. Vǔrnə lò mó mɔ̀bɔ́ ń nə́ ń wɛ̀rhɛ́ èta mɔ́ á wẽ́ á pə Shətana nɛ, nə́ Cinu Yezu jàn yilə. Èta, ń yala nɛ́ bʼa cɔ̀, sə ń ywə́lə́ y bʼa nə vwârh Cinu twírí y yùwə̀.

6Á dó dɛ̃´dɛ̃´ á gə́ nʼá zhẽ̌ á cìn dɛ̃̌ mɔ́ yilə. Á yə̀l bə̀ sã̀-nə̀byẽ̌ námpɔ́lɛ́ wɔ̌ è ce mún nánzhəzhɔ̌ zɛ̃̀ nà? 7Yə̀-bəlɔ̀lɔ́ wɔ́ ǹdə sã̀-nə̀byẽ̌ nándwə́l ta. Rə̀myɛ́ ce, vǔrnə re á wẽ́, mùnì á jǐrh wárhgáá. Èta, á bʼâ jǐrh ǹdə mún nándùl sã̀-nə̀byẽ̌ yə̀ mə̀ wẽ́ ce ta. Á gaga mɔ́ jʼâ wɔ́ mún nándùl dwə́l. Lwarna bə̀ bə̀ zwə́l Kristə ǹdə nə́ Pakɛ pyì-bwɛ̀lɛ́ ta. 8Rə̀myɛ́ ce, nə́ bʼâ jí Pakɛ y címsí èlâsɛ̃´ ǹdə́ búrú kɔ̀bɔ́ sã̀-nə̀byẽ̌ yə̀ ò wẽ́ ce, ǹdə́ wu kɔ̀bɔ́ ò wɔ́ pwɛ̃´pwɛ̃´ ò zhe zhə̀nà, sə è də̀ ǹdə́ búrú kɔ̀bɔ́ bə̀ wɛ̀rhɛ́ ǹdə́ sã̀-nə̀byẽ̌ nándwə́l mó yé. Búrú w òmyɛ́ wɔ́ tùntùm-bəlwàálɛ ǹdə́ lwɛlɛ dwí gakó kɔna.#5.6-8 Gwɛ̃ bə̀ gə́ byili zɔ̀mà nɛ́ jàlà kùr mə̀gã̌ mɔ́. Bə̀ byili címsi gakó gə́ nʼê jí ní gàà mɔ́.

9À yʼà kɛ̃ sɛ́bɛ́ dõ a pə ába a mʼa byili bʼâ bə̀kʼá jí ǹdə́ lyì byɛ̀bɛ́ bə̀ nʼê wɛ̀rhɛ́ fwə̂l tumə yé. 10È də̀ lũ w lyì bí byɛ̀bɛ́ bə̀ nʼê wɛ̀rhɛ́ fwə̂l tumə mó, ǹdə́ byɛ̀bɛ́ bə̀ nʼê ŋwɔ̀l mɔ́, ǹdə́ byɛ̀bɛ́ bə̀ wɔ́ bəcàncàlà mɔ́, ǹdə́ byɛ̀bɛ́ bə̀ nʼê zwə́l vwə̃̀ wẽ̀ tɛ̀bɛ́ rə̀ də̀ Yi yó mó yò à yʼà nʼâ zɔ̀m yé. È gə yʼà wɔ́ èta, kɔn yʼà wɔ́ nyɔ́ɔ́ sʼá du lũ w wẽ́. 11Sə è də̀ èta yé. Wɔ́ yál à nʼâ yâl a byili ába bə̀ lò mɔ̀bɔ́ ń nə́ ń wə̀l bə̀ ńmyɛ̌ wɔ́ Kristə-lò, n jà n zɛ̃̀ ń nə́ ń wɛ̀rhɛ́ fwə̂l tumə, ń nə́ ń ŋwɔ̀là, ń nə́ ń zwə́l vwə̃̀ wẽ̀ tɛ̀bɛ́ rə̀ də̀ Yi yó, ń nə́ ń tùrh ń dwã bɛ́, ń nə́ ń nywɛ̀ sɛ̃´ dɛ̃´dɛ̃´ kɔn lyɛ̃ cɛ nɛ, ń só wɛ́rɛ́; sʼá bə̀kʼá jí ǹdə́ rə̀-ná-cí yé.

12-13È də̀ àmyɛ́ à bʼa kə́ byɛ̀bɛ́ bə̀ də̀ Kristə-lyì mú bùrsì yé. Wɔ́ Yi cìcì rə̀ bʼa kə́ bə̀ bùrsì. Sə ámyɛ̌ mə̂ sʼá kə́ byɛ̀bɛ́ bə̀ ŋwɛ́nɛ́ á gùlú w wẽ́ mó bùrsì. Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: “Vǔrnə lyì-bəlwɛ̀lɛ́ y èmyɛ́ mɔ́ á wẽ́ á ce kwã nɛ́.”

Currently Selected:

1 Kɔrɛ̃tɛ 5: lee

Highlight

Copy

Compare