1 Kɔrɛ̃tɛ 16
16
Wársɛ́ shɛ̀bɛ́ bə̀ mə̂ sə bə ce dwã yó bə pə Zhərəzalɛm Kristə-lyì bí ni mú
1È gə wɔ́ wársɛ́ shɛ̀bɛ́ bə̀ mə̂ sə bə ce dwã yó bə pə Zhərəzalɛm Kristə-lyì bí ni mú yilə, à pɔ nyí Galəshi tənà y Kristə-lyì gùúlí ni. Ámyɛ mə̂ sʼá tó nyí rí rə̀myɛ́ nɛ. 2Jə̀máásɛ gakó, lò gakó mə̂ sə́ vùr wársɛ kɔn myɛrhɛ dwã ǹdə ǹmyɛ gə́ nɔ nɛ́ ń cĩ́ kwã nɛ́, sʼá bə̀kʼá yẽ̌ à gə túwə́, á zɛ̃̀ á ji kùr á la lɔ yé. 3Sə à gə túwə́, à bʼa kɛ̃ sɛ́bɛ́ a pə lyì bí byɛ̀bɛ́ á la cír mó ne bə súlí á pansɛ́ nɛ, bə vò e pə Zhərəzalɛm Kristə-lyì bí ni. 4Sə kɔn gə mə̂ bʼàmyɛ cìcì zhəl, sə́ nyǐ nə́ bʼâ tó dwã nə́ vò.
Pwəə nə́ ń byili bə̀ ń bùlə̀ zhe Kɔrɛ̃tɛ zhəl ne
5À la Masɛdwanɛ tənà y wẽ́ tó. Rə̀myɛ́ ce, à mʼa tó gàà a lyɛ̃ a bə̀ á sõ. 6À mʼa wɛ̀rhɛ́ dwã màngɛlɛ́ á sõ, sə dɛ̀ga à gaga mɔ́ bʼa mɛ̃ á sõ kɔn bʼe yí wàr rɛ́ lyɔ̃. Rə̀myɛ́ yi ní, á wɔ̌ á bʼâ sɛ̃ nɛ a súlí à sɔ́má yá. 7À tʼâ yâl à gə tú à nɔ ába sʼa zhì dɛ̃̌ a lyɛ̃ yé. Cinu gə pɔ sɔ́má, à nʼâ bùl bʼà mʼa dɛnɛ á sõ námpɔ́lɛ́.
8Sə à gwẽ̌ bʼa mɛ̃ Efɛɛzɛ nɛ́ kɔn mʼe yí Pantəkɔtɛ címsí, 9bə̀, ǹdə́ zwə̀ bé já ga, Yi pul sɔ́má rə pɛ̃ à la tum nánfɔ̀lɔ̀ tũ̌ nyə̀má.
10Timote gə tú á sõ, sʼá nyǐ ń yò náàcɛ̀nɛ́, mùnì á pɔ̃ wu-jɔ̀, bə̀ ńmyɛ nə́ ń twĩ̀ Cinu tum dí ǹdə àmyɛ ta. 11Lò lò bə̀ká n fulsi mu yé. Sɛ̃na mɔ n ká n yí à sõ ǹdə́ yə̀-zùlə́, bʼà nʼâ dɛ̃̀ ńmyɛ̌ ǹdə́ nə́ da-byâ bɛ́ bə̀ tó mo mó.
12È gə wɔ́ nə́ da-byǐ Apɔlɔɔsɛ yilə, à cící mu a kʼa bwérhé, mùnì ga n tó nə́ da-byâ bɛ́ dwã bɛ́ nɛ n bə̀ á sõ, sə ń cẽ lyɛ́lyɛ́ bə̀ ń tá ń bàn èlâsɛ̃´ yé. Ń gə tú ń nɔ bɔ̀l, ń mà n bà.
Pwəə nə́ ń ce Kɔrɛ̃tɛ Kristə-lyì bí, n cící bi n mə n gu ń sɛ́bɛ́ rɛ́ yó
13Zəna á yírhə́. Zhínə Yi ni kẽkẽ. Zəna wu-jɔ̀. Zəna á cìn kẽkẽ. 14Wɛ̀rhɛ́na kɔn gakó ǹdə́ sónó.
15Da-byâ, à gwẽ̌ zhe kɔn rə̀dù à la ába byilu. Á yě bə̀ wɔ́ Esətəfanaasɛ ǹdə́ ń kɛ̀lɛ́ y lyì bí bə̀ wɔ́ Akəyi Kristə-lyì nã́yə́ə́; sə bə̀ nʼê sɛ̃ Kristə-lyì bí dwã bɛ́ nɛ ǹdə́ bə̀ wun gakó. 16Kɔn dɛ̀bɛ́ lyì bí bə̀myɛ́ dwí rí ǹdə́ lyì byɛ̀bɛ́ gakó bə̀ nʼê tó be bə̀ twĩ̀ mú gə nʼê byili ába, sʼá zwẽ bə̀ nyí ni.
17À wu nyɛ̀ Esətəfanaasɛ ǹdə́ Forətunətuusi ǹdə́ Akəyikuusi gə́ tú à sõ mó yilə. Bə̀ sɛ̃ nɛ ǹdə ámyɛ̌ gə́ yʼâ mə̂ sʼá sɛ̃ nɛ nɛ́. 18Zhə̀nà, bə̀ zɔ à wu ni, bə zə ámyɛ wun ni. Á mə̂ sʼá nyɛ̀ lyì bí byɛ̀bɛ́ bə̀ wɔ́ èta mɔ́ dwí rí.
19Azhi tənà y Kristə-lyì gùúlí nʼê ce ába. Akəlaasɛ ǹdə́ Pərishii, ǹdə́ Kristə-lyì bí bə̀ nʼê gùlí dwã bə̀ sõ mó gakó myɛ nʼê ce ába Cinu yil lé yilə. 20Kristə-lyì bí byɛ̀bɛ́ bə̀ ŋwɛ́nɛ́ nyɔ̀nɔ̀ mɔ́ gakó nʼê ce ába.
Cenə dwã, á kwə̀ə̀lè dwã náàcɛ̀nɛ́ ǹdə da-byâ ta.
21Wɔ́ àmyɛ́ Pwəə à nʼâ ce ába ǹdə́ zɔ̀mà nɛ́ nyɛ̀bɛ́. Wɔ́ àmyɛ́ cìcì jɛ̃̀ è kɛ̃ nɛ.
22Lò mɔ̀bɔ́ ǹ bə Cinu só, sə Yi zhìlì ǹ yò!
“Marana ta!” (Rə̀ kùr wɔ́: Cinu, bà!)
23Cinu Yezu mà n cĩ́ bwəl á yó!
24À só á gakó Yezu Kristə yilə.
Currently Selected:
1 Kɔrɛ̃tɛ 16: lee
Highlight
Copy
Compare
Share
Want to have your highlights saved across all your devices? Sign up or sign in
© 2001, Wycliffe Bible Translators, Inc. All rights reserved.
