Tã Âꞌdâ 19

Tã õjílã Ôvârí kâ rî ꞌbá yî drí lôngó ngõzó gólâ rî lûyı̣́zó,

tãlâ gólâ fẽ lâŋõ trá õjílã Bãbĩlónã kâ rî drí rî

1-2ꞌDĩî vósĩ rî, má drí õjílã ârízó dũû ꞌbũû ꞌálâ lôngó ngõꞌá ĩyî kĩ nĩ rî,

“Ôvârí, mã lûyı̣̂ nî. Nî rĩꞌá ãmâ pã ꞌbá trá rî ĩꞌdî.

Nî kpá cé ĩꞌdî mbârâkã lı̣́pı̣̂ ꞌî, gõꞌdá nî kpá cé ĩꞌdî õjílã drí ı̣̂njı̣̃lı̣́ rî,

tãlâ kậyı̣̂ vósĩ cé ní rî íyíkâ zãâ rĩꞌá tã pạ̃tı̣́ı̣̃ ró rî âtálé ĩꞌdî.

Ní fẽ lâŋõ gólâ îcá ꞌbá té gá rî trá âꞌdô-âꞌdô áníkâ rî vó ró.

Ní fẽ lâŋõ trá õjílã jạ̃rı̣́bạ̃ ạ́ngı̣́ ꞌdĩ kâ rî ꞌdĩ drí,

Bãbĩlónã gólâ õjílã ãngó drı̣̃ ꞌá rî ꞌbá yî îzã ꞌbá ãnyĩ tãsĩ rî, âꞌdô ró bê gólĩyî drí rĩzó ôvârí ãbãrãdãgõ ı̣̂njı̣̃lı̣́ rî.

Ĩtí rî, Ôvârí, ní fẽ lâŋõ îcá ꞌbá îcâ gólâ bê rî trá drílâ,

tãlâ gólâ ûfû ngá ꞌẽ ꞌbá áníkâ rî trá.”

3Gõꞌdá nĩngá sĩ, õjílã ꞌdî ꞌbá yî drí kpá lôngó âꞌbézó óꞌdí kĩ,

“ꞌDõvó mã lûyı̣̂ nî Ôvârí Kúmú ãmákâ, tãlâ ní îzã jạ̃rı̣́bạ̃ ạ́ngı̣́ Bãbĩlónã ꞌdĩ trá lâŋõ gólâ tã lâ drí îcálé vı̣̃lı̣́ õjílã drı̣̃ı̣̂ sĩ kô rî sĩ.”

4Gõꞌdá ꞌdĩî vósĩ rî, sı̣́sı̣́-lésĩ ró nyâꞌdî-trá-drı̣̃-lâ-ngâ-sû rî ꞌbá yî, gõꞌdá ngá lédrẽ-lédrẽ gólĩyî sû rî ꞌbá yí bê drí ĩyî ꞌãꞌî tı̣̃zó vũdrı̣́ Ôvârí ândrá rĩꞌá kı̣́tı̣̃ íyíkâ kũmũ kâ rî drı̣̃ı̣̂. Gõꞌdá gólĩyî drí tã âtázó kpãkã ãlô kĩ, “Ãwô-ꞌdĩ, ꞌdõvó mã lûyı̣̂ nî Ôvârí.”

5Nĩngá sĩ, õjílã ãzâ kı̣́tı̣̃ kũmũ kâ Ôvârí kâ ngá lésĩ rî drí ngãzó tã âtálé kĩ,

“Ãnî ndrĩ gólĩyî ngá ꞌẽ ꞌbá ró Ôvârí kâ ró rî ꞌbá yî, gólĩyî gólâ rî ı̣̂njı̣̃ ꞌbá ró rî ꞌbá yî,

ꞌdõvó nĩ lûyı̣̂ Ôvârí, ãnî ndrĩ ãkí ãkó, nĩ lûyı̣̂ Ôvârí ãmákâ.”

6Gõꞌdá nĩngá sĩ, má drí õjílã õꞌbí ạ̃yı̣́ ârízó rũũ rũũ rũũ ókĩzõ lı̣̃mvû rĩ ꞌbá lâsólé õlé drı̣̃ı̣̂ sĩ rî kâtí, gõꞌdá kpá mõgbárá drí rĩrĩ lôndrólé ûfũ-ûfũ bê rî kâtí. Gólĩyî âtâ tã trá kĩ,

“Mã lûyı̣̂ Ôvârí. Gólâ rĩꞌá Kúmú ꞌî ãngó drı̣̃lı̣́ ndrĩ.

Gólâ rĩꞌá Ôvârí ãmákâ. Gólâ ĩꞌdî rĩꞌá gólâ mbârâkã ndrĩ lı̣́pı̣̂ ró.

7ꞌDõvó ĩtí rî, mã âꞌdô kpãkã ãlô ãyĩkõ ró,

gõꞌdá mã ı̣̂njı̣̃ ró gólâ kpá,

tãlâ kậyı̣̂ ãndrõ nô rĩꞌá kậyı̣̂ gólâ Kạ́bı̣̃lı̣́kı̣̃ Ôvârí kâ drí ꞌẽzó õkó óꞌdí íyíkâ âtrõlé rî ĩꞌdî.

Õkó óꞌdí#19.7 Õkó óꞌdí tã ífí lâ kĩ, õjílã Ôvârí kâ, gõꞌdá Kạ́bı̣̃lı̣́kı̣̃ ꞌdî íyíkâ Yésũ ĩꞌdî. rî ꞌdĩ êdê íyî nyãányâ trá njãâ gólâ rî trõzó ágó ró.

8Ĩtí rî, Ôvârí fẽ ítá gólâ óꞌdí ró mvẽêmvê lậgû-lậgû ró kpírí-kpírí rî trá õkó rî ꞌdĩ drí sõlé.”

(Ítá óꞌdí rî ꞌdĩ âꞌdâ tã ꞌẽꞌẽ tãndí gólĩyî õjílã Ôvârí kâ drí ꞌẽꞌá ꞌẽlâ rî ĩꞌdî.)

9Gõꞌdá nĩngá sĩ, gólâ drí tã âtázó má drí tã ãzâ îgĩlí. Tã rî ꞌdĩ ĩꞌdî rĩꞌá nõtí. “Âꞌdô ꞌbãꞌá tãndí ró âꞌdózó õjílã gólĩyî Ôvârí drí tã îcárãzó trá gólĩyî drí ânĩzó ậfû lãgĩ Kạ́bı̣̃lı̣́kı̣̃ kâ ꞌdĩ ꞌá rî ꞌbá yî lãfálé.” Gõꞌdá gólâ âtâ kpá má drí kĩ nĩ rî, úlı̣́ rî ꞌdĩ ꞌbá yî âꞌdô trá úlı̣́ pạ̃tı̣́ı̣̃ ꞌî Ôvârí ngá lésĩ.

10Nĩngá sĩ, má drí ꞌãꞌî tı̣̃zó mãlãyíkã rî ꞌdĩ ândrá, ãꞌdô ró bê tíkó gólâ rî ı̣̂njı̣̃zó rî, gõꞌdá gólâ kĩ má drí rî, “Ní ꞌê tã ĩtí lâ ꞌdĩ ró ꞌdĩ kô. Mâ rĩꞌá cé ngá ꞌẽ ꞌbá Ôvârí kâ ĩꞌdî, kpá õzõ ãnî drí âꞌdórẽ ãnî ậdrúpı̣̃ krístõ ꞌbá ró gólĩyî ndrĩ tã lẽ ꞌbá trá tã gólâ Yésũ drí âꞌdálé trá gólĩyî drí rî ꞌá rî ꞌbá yí bê rî tí. Rĩꞌá Ôvârí ĩꞌdî gólâ ní drí îcálé ı̣̂njı̣̃lâ. Ãmâ ndrĩ ꞌdó rĩꞌá lãjóꞌbá Ôvârí kâ ĩꞌdî kpãkã ãlô tã ậngũ ꞌbá yí bê, tãlâ gólĩyî lẽ tã trá tã Ôvârí kâ ꞌá bũúũ õdrã gólĩyíkâ tú, õzõ Yésũ drí ꞌẽlé rî tí.”

Tã Yésũ drí õjílã ãngó ꞌá gólĩyî rĩ ꞌbá tã Ôvârí kâ gãlé ꞌdó

rî ꞌbá yî ûfúzó rî

11Gõꞌdá ꞌdĩî vósĩ rî, má drí ngá ndrẽzó bũúũ ꞌbũû ꞌálâ, gõꞌdá má drí Yésũ rî ndrẽzó rãꞌá õsánĩ mvẽêmvê drı̣̃ı̣̂. Gólâ rî rú rĩꞌá “‘Õjílã ífífí”’ gõꞌdá kpá “‘Pạ̃tı̣́ı̣̃”’. Gólâ rî tã ndrĩ kĩlí mbı̣̂ gõꞌdá kpá lâŋõ mbı̣̂ rî fẽlé ĩꞌdî. 12Gólâ rî lı̣̃fı̣́ rĩꞌá õzõ lạ̃sı̣́ kâtí. Gõꞌdá gólâ kpá rĩꞌá ạ́pạ̃ kúmú ạ́ngı̣́ ạ́ngı̣́ kâ yí bê dũû yí drı̣̃ı̣̂. Gólâ cú rĩꞌá rú ãzâ bê gólâ îgĩlí trá gólâ rú rî. Tã ífí rú ꞌdĩ kâ fí õjílã ãzãkã drı̣̃ı̣̂ kô gbõ cé gólâ rî nyãányâ ĩꞌdî élê. 13Gõꞌdá gólâ sõ ítá gólâ âꞌdó ꞌbá ꞌdó ãrí ró rî ĩꞌdî. Úzı̣̂ kpá gólâ rî rú, “‘Úlı̣́ Ôvârí kâ”’. 14Ạ̃jú ꞌbũ ꞌbá gólĩyî ndrĩ ꞌbũû ꞌálâ rî ꞌbá yî ꞌdê ĩyî trá ꞌdó gólâ vósĩ. Gõꞌdá ạ̃jú ꞌbũ ꞌbá yî sõ ĩyî ítá lậgú ꞌbá lậgû ngbángbá rî ꞌbá yî ĩꞌdî. Gólĩyî ndrĩ kpá ꞌdó õsánĩ mvẽêmvê drı̣̃ı̣̂ sĩ. 15Lı̣́gú mbẽlẽsõ cĩ ãkĩ drí âfõzó gólâ rî sı̣́-ꞌbálé ꞌásĩ tíbê gólâ drí ꞌẽzó tã trõlé ĩꞌdî sĩ lâ õjílã õrĩ gólĩyî ndrĩ ãngó drı̣̃ kâ rĩ ꞌbá ĩyî Ôvârí rî ârílí kô rî ꞌbá yî drı̣́gạ́ sĩ. Gólâ âꞌdô rĩꞌá gólĩyî drı̣̃ı̣̂ pı̣̃drı̣́gú lậnjı̣̃-lậnjı̣̃ kũmũ kâ ậdı̣̂ ꞌásĩ rî sĩ. Gólâ âꞌdô kpá ạ̃wạ̃lạ̃kạ̃ Ôvârí kâ rî âꞌdáꞌá gólĩyî drí tã õnjí õjílã kâ tãsĩ. Ôvârí gólâ mbârâkã ndrĩ lı̣́pı̣̂ ró rî âꞌdô õjílã ꞌbãꞌá lâŋõ ûsúlı̣́ õzõ fê lõꞌwâ ı̣̂pı̣̃lı̣́ mõrá ꞌá zãlé õdrá ró rî kâtí. 16Ítá gólâkâ rú gólâ rî pạ́rạ́ꞌbú drı̣̃ ꞌá rî, Ôvârí îgĩ tã trá nõtí,

KÚMÚ, KÚMÚ NDRĨ DRỊ̃LỊ́ GÓLÂ KŨMŨ LÂ DRÍ ÂꞌDÓLÉ

ngá cé tị̂tị̂ drị̃ị̂ sĩ ãkí ãkó rî.

17-18Gõꞌdá nĩngá sĩ, má drí kpá mãlãyíkã ãzâ ndrẽzó rĩꞌá âdréꞌá mbı̣̂ ı̣̃tú bê. Gólâ drí trẽzó lõgónõ yî ậzı̣́lı̣́ ndrĩ ãríwá gólĩyî kpá rĩ ꞌbá lôngálé ꞌbũû ágálé lõgónõ kâtí rî ꞌbá yí bê. Nĩngá sĩ rî, gólâ drí tã âtázó ãríwá ꞌdĩ ꞌbá yî drí kĩ, “ꞌDõvó nĩ ânĩ rû êꞌbélé ãvõ gólĩyî Ôvârí drí ꞌẽꞌá ûfúlâ rî ꞌbá yî lônyálé. Nĩ ânĩ kúmú yî ãꞌwá gõꞌdá ạ̃jú ꞌbũ ꞌbá yí bê gõꞌdá kpá gólĩyî sı̣́sı̣́-lésĩ rî ꞌbá yí bê ãꞌwá lâ yî lônyálé gõꞌdá kpá õsánĩ yî õjílã lômbã ꞌbá drı̣̃ lâ rî yí bê gõꞌdá kpá õjílã lârâkô ndrĩ rî ꞌbá yî ãꞌwá lâ yî lônyálé vólé.”

19Gõꞌdá nĩngá sĩ, má drí kõrõnyã ândrê kãâkâ ꞌdĩ ndrẽzó kúmú ạ́ngı̣́ ạ́ngı̣́ gólĩyî õrĩ ndrĩ ãngó drı̣̃ ꞌá rî ꞌbá yí kâ bê gõꞌdá ạ̃jú ꞌbũ ꞌbá gólĩyíkâ rî ꞌbá yí bê. Éêꞌbê gólĩyî trá kpãkã võ ãlô ꞌá ạ̃jú ꞌbũlı̣́ õjílã gólâ rĩ ꞌbá õsánĩ mvẽêmvê drı̣̃ı̣̂ rî bê gõꞌdá kpá ạ̃jú ꞌbũ ꞌbá gólâkâ rî ꞌbá yí bê. 20Gõꞌdá ódrí kõrõnyã ũrı̣̃-gâ-dẽ ró rî ꞌdĩ rũzó tã ậngũ ꞌbá gólâkâ rĩ ꞌbá õjílã lãmbé kõrõnyã ꞌdĩ kâ bê rî âdólé tã lârâkô ꞌẽꞌẽ sĩ, rĩꞌá kõrõnyã ꞌdî líndrí lâ ı̣̂njı̣̃lı̣́ rî bê. Úvũ kõrõnyã ꞌdî tã ậngũ ꞌbá gólâkâ rĩ ꞌbá õnjõ âdólé ꞌdî bê kpạ̃rạ̃tı̣́ lédrẽ-lédrẽ ró lı̣̃mvû ândrê gólâ rĩ ꞌbá kõlé lạ̃sı̣́ bạ̃rútı̣̃ kâ sĩ rî ꞌá. 21Lé ĩtí rî, úûfû ạ̃jú ꞌbũ ꞌbá ạ̃mbúkũ gólĩyíkâ rî ꞌbá yî lı̣́gú mbẽlẽsõ cĩ ãkĩ gólâ âfõ ꞌbá õjílã gólâ rĩ ꞌbá õsánĩ drı̣̃ı̣̂ rî sı̣́-ꞌbálé lâ ꞌásĩ rî sĩ. Gõꞌdá ĩtí rî, ãríwá ꞌdĩ ꞌbá yî drí ậsı̣́zó gólĩyî ãꞌwá lônyálé té bũúũ ꞌâ lâ ĩyî drí âcázó dũûdû.

Currently Selected:

Tã Âꞌdâ 19: avu

Highlight

Copy

Compare