Apokaliipsis ALBʼAL INUQUL U YOL TIʼ U Uʼ
ALBʼAL INUQUL U YOL TIʼ U Uʼ
APOKALIIPSIS
Uvaʼs toq qootzaqitaʼ jaʼl tzʼibʼan u uʼ Apokaliipsis
Aʼetz u uʼe uvaʼ Apokaliipsis ibʼij, uvaʼ itzʼibʼa apoostol Xhun. Tan antxh u uʼ Apokaliipsis nik alon uvaʼ Xhun tzʼibʼan. Ech uvaʼe nik tal tu Apokaliipsis 1.1-4, 9 tuchʼ tu 22.8. Tul atetz vaʼt xaol nik alon uvaʼ Xhun tzʼibʼan u uʼ Apokaliipsis. Aʼe Ireneeo. Tan nikich itxhus tibʼ Ireneeo kʼatz Xhun. Echetz itzʼibʼat Ireneeo tanul u yole tiʼ Xhun. Tul tal Ireneeo uvaʼ, aʼ itzʼibʼavat Xhun u tuʼ tu txʼavaʼ Paatmos.
Tul nikat tal u uʼ uvaʼ, aʼ atich Xhun tu txʼavaʼ Paatmos uvaʼ at tuul okaʼp u maar, uvaʼs ikʼutxht quBʼaal Jesuus te Xhun jankʼal inqʼa kam uvaʼ at tu uʼ Apokaliipsis. Tan ibʼekʼ Domisiaano, u mam iqʼesal tu mam tenam Rooma, ibʼen Xhun tzitzi s-pereexhoil tu txʼavaʼ Paatmos, tiʼ uvaʼ tan, nikich ipaxsa Xhun inqʼa bʼaʼnla txhaq yol tiʼ Jesuus tuulbʼal Aasia Menoor. Ech uvaʼe nik tal tu Apokaliipsis 1.9. Tul kamal oʼvaʼl yaʼbʼ atin Xhun tzitzi.
Uvaʼs toq qootzaqitaʼ kam s-tuul tzʼibʼal u uʼ Apokaliipsis
Tul tal Ireneeo uvaʼ, aʼ itzʼibʼavat Xhun u tuʼ tu txʼavaʼ Paatmos t-vimotxtebʼal inqʼa yaʼbʼ uvaʼs ibʼant Domisiaano iqʼesalil tu mam tenam Rooma tu yaʼbʼ kajlaval toʼkʼal (94) m.t.J., atz maq tu yaʼbʼ oʼ laval toʼkʼal (95) m.t.J.
Uvaʼs toq qootzaqitaʼ kame u taqʼil vitxhusun Xhun tuul u tuʼ Apokaliipsis
Aʼetz u taqʼil viyol Xhun uvaʼ itzʼibʼa bʼen te inqʼa niman tetz Jesuus, tiʼ kame inqʼa yol uvaʼ tal quBʼaal Jesuus te Xhun tiʼ tatin junun tanul inqʼa niman tetz Jesuus tu Aasia Menoor; kam inqʼa bʼaʼn, atz kame inqʼa yeʼbʼaʼn uvaʼ atich s-xoʼl til u quBʼaal Jesuus.
Atz nikat tal Xhun tiʼ inqʼa mamala kam uvaʼ ikʼutxh quBʼaal Jesuus s-te, tiʼ kam uvaʼ laʼ utxh xoʼl inqʼa xaol vatz u txʼavaʼ t-inqʼa qʼij inqʼa yaʼn tuleʼ. Aʼe inqʼa kam uvaʼ tziʼtzotxhxh itzʼibʼal ibʼen s-vatz.
Uvaʼs toq qootzaqitaʼ kam ulbʼemal ijatxp ixoʼl inqʼa yol tu uʼ Apokaliipsis
U uʼ Apokaliipsis, uvaʼ itzʼibʼa ka Xhun, tan kaʼvaʼl nimla txhaq tanul elnaʼq inqʼa yol uvaʼ nik tal s-tuul. Aʼe u Apokaliipsis 2.1 tetxhal topoon tu 3.22, tuchʼ 4.1 tetxhal topoon tu 22.5.
Apokaliipsis 1.1-20
a. Apokaliipsis 1.4-8
Tixeʼtebʼal u uʼ Apokaliipsis taqʼ Xhun bʼaʼnil ikʼuul juq tanul inqʼa niman tetz Jesuus. Tan toqnaʼqich itzʼibʼa Xhun jolol yol te txhaq junun. Ech uvaʼe nik tal tu Apokaliipsis 1.4-8.
Yaʼne tal Xhun inqʼa yol tiʼ kame uvaʼ ikʼutxht tibʼ quBʼaal Jesuus s-te tiʼ talt mamala yol s-te. Atz taqʼ Xhun itial inqʼa niman tetz Jesuus tiʼ u tulebʼal quBʼaal Jesuus inpaqte.
aa. Apokaliipsis 1.9-11
Tul nikat tal Xhun paqte, tiʼ kam uvaʼ tal quBʼaal Jesuus s-te, tul laʼ itzʼibʼa bʼen inqʼa yol te juqvaʼl inqʼa tenam tuulbʼal Aasia. Ayaʼletz juqvaʼl inqʼa tenam inqʼaa uvaʼ tal quBʼaal Jesuus yol s-tiʼ: Aʼe u tenam Eefeso; atz u tenam Esmiirna; tuchʼ u tenam Peergamo, viqʼesal tuulbʼal Aasia Menoor; atz u tenam Tiatiira; atz u tenam Saardis; atz u tenam Filadeelfia; atz u tenam Laodiseea.
aʼ. Apokaliipsis 1.12-20
Yaʼne tal Xhun inuqul inqʼa yol tiʼ u tabʼit Xhun viqul quBʼaal Jesuus, atz tuchʼ kam uvaʼ til Xhun te quBʼaal Jesuus.
I. Apokaliipsis 2.1—3.22
U bʼaxa nimla tanul yol itzʼibʼa Xhun, tiʼ uvaʼ tal bʼen inqʼa yol te txhaq tanul inqʼa niman tetz Jesuus, inqʼa nikich motx imol tibʼ tuulbʼal Aasia. Aʼetz tal Xhun tiʼ kam inqʼa bʼaʼn nikich motx ibʼan inqʼa niman tetz Jesuus, atz kame inqʼa yeʼbʼaʼn nikich motx ibʼaneʼ.
II. Apokaliipsis 4.1—22.5
Vikaʼv nimla tanul yol tal quBʼaal Jesuus te Xhun uvaʼ laʼ itzʼibʼa bʼen Xhun jankʼal uvaʼ laʼich ikʼutxh quBʼaal Tiuxh s-te, tiʼ jankʼal inqʼa yol uvaʼ laʼ utxh t-vimotxebʼal qʼij saq. Tuulbʼal vikaʼv nimla tanul yol, tan kajvaʼt tanul yol at s-tuul. Aʼe inqʼa tziʼtzotxhxh itzʼibʼal bʼen s-vatz.
A. Apokaliipsis 4.1—5.14
Aʼ u bʼaxa tanul yol nik tal tiʼ u nimla tatin quBʼaal Tiuxh tiʼ ibʼant viqʼesalil tu amlikaʼ.
AA. Apokaliipsis 6.1—18.24
Aʼ u kaʼv tanul yol nik tal tiʼ inqʼa mamala itzaʼlal uvaʼ laʼ tal quBʼaal Tiuxh tutxh vatz txʼavaʼ, uvaʼ laʼ palk inqʼa niman tetz Jesuus, atz inqʼa tij imam Israeel taʼn inqʼa iqʼesal, inqʼa jit niman tetz Jesuus. Tul oʼvaʼlen nik elk inqʼa yol uvaʼ nik tal tuulbʼal vikaʼv nimla tanul inpaqte. Toqetz qal bʼiitxhaoq tiʼ junun.
1. Apokaliipsis 6.1—8.1
Tul nikat taleʼ kame laʼ ibʼan quBʼaal Tiuxh tiʼ taqʼax ichʼexel tiʼ inqʼa iqʼesal inqʼa jit niman tetz Jesuus, inqʼa nik kʼaxbʼisan inqʼa niman tetz Jesuus, atz inqʼa nik kʼaxbʼisan inqʼa tij imam Israeel. Tzitzi nik talvat tiʼ juqvaʼl inqʼa lakʼubʼal tetz u uʼ uvaʼ taʼnxh quBʼaal Jesuus atich tiqleʼm, tul oleʼv tiʼ telaʼ, quBʼaal Jesuus uvaʼ echich tilix, eche vaʼq chelem karneʼl.
2. Apokaliipsis 8.2—11.19
Tul nikat tal tel jolt inqʼa kam uvaʼ laʼ utxh tu amlikaʼ, atz vatz txʼavaʼ. Tzitzi nik talvat tiʼ juqvaʼl inqʼa trompeeta uvaʼ junun laʼ toqʼsal tiʼ tul txhaq junun kam.
3. Apokaliipsis 12.1—13.18
Tul nikat tal tiʼ juqvaʼl inqʼa ataq tiqleʼm. Tzitzi nik talvat tiʼ inqʼa kaebʼal aanima uvaʼ til Xhun, aʼe inqʼaa: Til Xhun val u ixoq uvaʼ kaebʼalich aanima tilixeʼ; til val u mamaʼ txoo uvaʼ eche oʼan, tul xoʼvebʼalich tilixeʼ; atz til val u neʼ xaak uvaʼ tala val u ixoq; til val u mam txhʼaʼo uvaʼ ibʼan u txoo, u oʼan t-amlikaʼ, tuchʼ Meʼk, u qʼesal aanxel; val u mam txhʼaʼo uvaʼ ibʼan u txoo, u oʼan vatz txʼavaʼ tuchʼ inqʼa xaol, inqʼa niman tetz Jesuus; til vaʼt u mamaʼ txoo uvaʼ jaʼul jaqʼ u maar; til vaʼt u mamaʼ txoo uvaʼ jaʼul tuul u txʼavaʼ.
4. Apokaliipsis 14.1—16.21
Tul nikat tal tiʼ kam laʼ ul ibʼan quBʼaal Jesuus tiʼ u tul vatz txʼavaʼ tiʼ toksal tel iqʼesalil vatz txʼavaʼ. Tzitzi nik talvat tiʼ juqvaʼl inqʼa koopa tetz kʼaxbʼichil vatz txʼavaʼ.
5. Apokaliipsis 17.1—18.24
Tul nikat tal tiʼ inqʼa kʼaxkʼo uvaʼ laʼ taqʼ quBʼaal Tiuxh tiibʼa jankʼal inqʼa xaol vatz txʼavaʼ, inqʼa aʼ kuxh nik ibʼan inqʼa yaabʼla txhaq txumbʼal vatz quBʼaal Tiuxh. Aʼe, uvaʼ ‹Vaviloonia,› xeʼt Xhun s-tiʼ. Tzitzaetz nik tzoqpik talax tanul inqʼa yol.
Aʼ. Apokaliipsis 19.1-21
Vitoxv tanul yol, aʼ nik tal tiʼ vichiibʼ inqʼa niman tetz Jesuus tu amlikaʼ tiʼ visotzsal el inqʼa palsan yol. Atz nikat tal tiʼ u toksal iqʼij quBʼaal Tiuxh taʼn inqʼa niman tetz. Tul nikat tal tiʼ u tulebʼal quBʼaal Jesuus vatz txʼavaʼ uvaʼ, aʼ atich jaʼ tiʼ val u saqiʼ chej. Tul atel kuxh nik tal s-tiʼ, tiʼ u taqʼt quBʼaal Jesuus kʼaxkʼo tiibʼa inqʼa palsan yol.
Bʼ. Apokaliipsis 20.1—22.5
Vikajv tanul yol, aʼ nik tal tiʼ kam laʼ ibʼan u quBʼaal Jesuus tiʼ tul tikaʼpaq vatz txʼavaʼ. Atz nik tal tiʼ tok tel iqʼesalil vatz txʼavaʼ. Oʼtanlenetz nik el ka. Tul toqetz qal bʼiitxhaqul u yol te junun tanul.
1. Apokaliipsis 20.1-3
Aʼ u bʼaxa tanul yol, tan aʼ nik tal tiʼ uvaʼs itxeyp Satanaas; tul laʼ aqʼax bʼen tu jul tuulbʼal vaʼl mil yaʼbʼ.
2. Apokaliipsis 20.4-6
Aʼ vikaʼv tanul yol, tan aʼ nik tal tiʼ u taqʼt kuʼ quBʼaal Tiuxh yol tinuqul. Tul laʼ itzʼeʼv inqʼa niman tetz Jesuus, inqʼa motx yatzʼax el tiʼ inimal quBʼaal Jesuus. Tul vaʼl mil yaʼbʼ laʼ ibʼan kʼatz u Kriisto.
3. Apokaliipsis 20.7-10
Aʼ vitoxv tanul yol, tan aʼ nik tal tiʼ uvaʼs maʼt ipal vet paʼl vaʼl mil yaʼbʼ, tul laʼ ikuy vet quBʼaal Tiuxh ijaʼul Satanaas paqte tuul u jul. Tul laʼ xeʼt vet Satanaas tiʼ ibʼokʼtziil kaqaayil inqʼa xaol vatz txʼavaʼ tiʼ ibʼanax txhʼaʼo tuchʼ quBʼaal Jesuus, atz tuchʼ inqʼa niman tetz. Tul mam sol laʼ imol vet Satanaas tiʼ tokebʼel u tatibʼal quBʼaal Jesuus tuchʼ inqʼa niman tetz. Pet yeʼletz laʼ oleʼvi, tan nal kuxh laʼ taqʼ kuʼl quBʼaal Tiuxh xamal s-tiibʼa tiʼ itzʼeʼsalaq el.
4. Apokaliipsis 20.11-15
Aʼ vikajv tanul yol, tan aʼ nik tal tiʼ taqʼt kuʼ quBʼaal Tiuxh yol tinuqul tikaʼpaq tiʼ jankʼal inqʼa kamnaʼq, kʼuxh ootzaqimal Tiuxh taʼn, atz kʼuxh yeʼ ootzaqimal Tiuxh taʼn. Tan vaʼl kuxh laʼ motx titzʼeʼv vet laʼ ibʼan quBʼaal Tiuxh. Tul laʼ aqʼax kuʼ yol tinuqul s-tiʼ taʼn quBʼaal Tiuxh. Pet aʼ laʼ bʼenk quBʼaal Tiuxh tiʼ kam inqʼa tzʼibʼamal ka tu uʼ tiʼ inqʼa ibʼanoʼm. Jatvaʼletz inqʼa bʼanolaq yeʼbʼaʼn, tan yek laʼ motx palsal kuʼ tu xamal. Tul yek laʼ yaʼ vet u kamchil paqte. Tan yeʼl vet kamchil laʼ atin xoʼl inqʼa xaol.
5. Apokaliipsis 21.1-27
Aʼ vitoʼv tanul yol, tan aʼ nik tal tiʼ vijalpeʼl u amlikaʼ tuchʼ u vatz txʼavaʼ, atz tuchʼ u teleʼl u maar. Atz at vaʼt uvaʼ ikʼutxh quBʼaal Tiuxh te Xhun, uvaʼ til ikuʼl val u mam tenam, uvaʼ sibʼal atibʼal atich s-tuul; aʼe u akʼ Jerusaleen, atz atich u tatibʼal quBʼaal Tiuxh s-tuul. Tul kuʼl u tatibʼal quBʼaal Tiuxh tiʼ ibʼanax iqʼesalil s-xoʼl. Tul til Xhun kam ibʼanax u tenam Jerusaleen; atz kame vijosqʼilal tilix vijubʼalil tuchʼ inqʼa ibʼitzʼil. Tan mamala bʼaʼnla txhaq litzʼaqkin sivan atich ok s-tiʼ, tul xolelich tilixeʼ.
Apokaliipsis 20.1—22.5
Tzitzaetz nik yaʼk oʼvaʼl tanul inqʼa yol uvaʼ at tuulbʼal vitoʼv nimla tanul yol.
Apokaliipsis 22.6-21
Tiyaʼtebʼaletz vet inqʼa yol uvaʼ tal Xhun, tiʼ uvaʼ laʼ inima u sikʼlen tetz u uʼ Apokaliipsis inqʼa yol, inqʼa at s-tuul; tul laʼ chiibʼ tiʼ kam uvaʼ nik tal quBʼaal Jesuus s-te.
Currently Selected:
Apokaliipsis ALBʼAL INUQUL U YOL TIʼ U Uʼ: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.