Evreeos 3

Aʼ u yole tiʼ quBʼaal Jesuus uvaʼ palnaʼq tatin viʼ Moisees

1Echetz nik valte sete, ex inmol s-niman tetz Jesuus, ex inqʼa chʼexel ex taʼn quBʼaal Tiuxh, atz ex inqʼa saʼel tzaan ex taʼn quBʼaal Tiuxh tu amlikaʼ, tul aʼxh laʼ etoksavat vetitzʼabʼal tiʼ u quBʼaal Jesuus uvaʼ txhaqax tzaan taʼn quBʼaal Tiuxh. Tan aʼ vete viqʼesal oksan quyol vatz quBʼaal Tiuxh. Atz aʼe viqʼesal inqʼa bʼaʼnla txhaq yol uvaʼ nik qunima, inqʼa bʼaʼnla txhaq yol tiʼ Jesuus. 2Tul kʼuqlebʼalxh kʼuul quBʼaal Jesuus vatz quBʼaal Tiuxh uvaʼ txhaqon tzaan tiʼ ibʼanax kam uvaʼ isaʼ quBʼaal Tiuxh s-tiʼ, eche uvaʼ kʼuqlebʼalich kʼuul Moisees ibʼan vatz quBʼaal Tiuxh tiʼ telaʼp jankʼal inqʼa kam uvaʼ tal quBʼaal Tiuxh ibʼanax te Moisees tu bʼuʼq tostiuxh.#Nuumeros 12.7

3Echetze u quBʼaal Jesuus, tan palnaʼq tiqleʼm viʼ Moisees, eche vaʼq bʼitol otzotz, tan aʼ palnaʼq tiqleʼm viʼ u otzotz. 4Jatvaʼletzxh inqʼa otzotz, tan xaol nik bʼiton. Pet quBʼaal Tiuxh nik viinqixsan jankʼal inqʼa kam s-kaqaayil.

5Echetz kʼuqlebʼxh kʼuul Moisees s-aqʼonvil ibʼana tiʼ ibʼanax jankʼal inqʼa aqʼon uvaʼ nikich ibʼanax tuulbʼal u bʼuʼq tostiuxh. Tan aʼ Moisees nikich kʼutxhun kam inqʼa yaʼn laʼich tal quBʼaal Tiuxh xamtel.

6Pet koq quBʼaal JesuKriisto, tan kʼuqlebʼxh kʼuul ibʼan tiʼ ibʼant iqʼesalil tiʼ ibʼanax inqʼa aqʼon tuulbʼal u tostiuxh. Tan Kʼaola veteʼ, pet jit yiq koqxh aqʼonvil. Aʼetz oʼe, uvaʼ ech qatin, eche u tostiuxh tuulbʼal u kaʼv yol. Pet aʼ isaʼ uvaʼ txhabʼamoq ikʼuqeʼv qukʼuul s-tiʼ. Tul laʼ qutxʼebʼ u tulebʼal uvaʼ nik quchiibʼ s-tiʼ.

Aʼ u yole tiʼ ixeet tibʼ inqʼa niman tetz Jesuus tiʼ yeʼ itanbʼat inimal u quBʼaal Jesuus

7Echetz val u yol tal viTiuxhil Tiuxh s-eche:

—Oqetz il viyol quBʼaal Tiuxh nik etabʼi s-txheel:

8«Ape yeʼetz kuxh etijbʼixsa

vetaanima bʼa tiʼ yeʼ inimaleʼ,

eche uvaʼ motx ipalsat

inqʼa kʼuy emam yol sinvatz s-naʼya

tu tzaqa txʼavaʼ uvaʼs motx itxhokt tul inkʼaʼnal,

atz uvaʼs itxhokt inyaoneʼ.

9Tzitzi motx itxhokvat inqʼa kʼuy emam

tul inkʼaʼnal.

Atz tzitzi motx tilvat inqʼa emol

s-tijaq imam Israeel,

oq laʼich yaon in.

Tul kʼuxh tzitzi motx tilvat inqʼa inmam bʼaʼnil

uvaʼ nikich inbʼan tuulbʼal kaʼviinqil yaʼbʼ.

10Echetz tiʼ inqʼa palsa yolil inqʼae,

tul ul inkʼaʼnal tiʼ inqʼa xaol inqʼae.

Tul ech val s-tiʼ s-eche:

–Tul bʼenamen kuxh motx ijetxhonaq el sinkʼatza

tuchʼ inqʼa titzʼabʼal.

Tul yeʼ nik motx isaʼ tok bʼen tiʼ vinbʼaʼnla bʼey,

–xeʼt in s-tiʼ.

11Echetz intxakbʼat vet val vinyole tuchʼ kʼaʼnal:

–Yeʼl inpaqul laʼ motx vaqʼ vet ilan, –xeʼt in,»

xeʼt Tiuxh, —chich viTiuxhil Tiuxh.#Saalmo 95.7-11

12Echetz xeevaqxh etibʼ, ex inmol s-niman tetz Jesuus, tiʼ uvaʼ yeʼxhabʼil invaʼq ex laʼ atxhvan u paʼv, atz laʼ palsan viyol quBʼaal Tiuxh. Tan oq, ech uvaʼe laʼ ebʼane, tul exetze nik ejetxheʼl etibʼ kʼatz u itzʼlichla quBʼaal Tiuxh, uvaʼ yeʼxhkam tzaʼl ibʼanax s-vatz.

13Pet aʼ isaʼ jun qʼij laʼ taqʼt tibʼ etial sevatzaq, tul yeʼ laʼ etijbʼixsa etaanima, atz yeʼ laʼ teesa ex u paʼv t-bʼey. Tul taʼntiuxh te Tiuxh uvaʼ ant kuxh nik tal quBʼaal Tiuxhe: —s-txheel, —tiʼ tul inqʼa xaol s-vatz.

14Tul laʼetz etzan oʼ kʼatz u quBʼaal JesuKriisto, poro aʼ isaʼ txhabʼamal ikʼuqeʼv qukʼuul tiʼ inimal kam uvaʼ qunima tzaan s-bʼaxaxhtuʼ tetxhal topoon viyaʼebʼal qʼij saq.

15Tan jankʼal eche u yol uvaʼ yaʼnxh qallaʼ uvaʼ ech nik tal s-eche:

—Oqetz il viyol quBʼaal Tiuxh nik etabʼi s-txheel:

«Ape yeʼetz kuxh etijbʼixsa vetaanima bʼa,

tiʼ yeʼ inimaleʼ,

eche uvaʼ motx ipalsat

inqʼa kʼuy emam yol sinvatz s-naʼya,»

xeʼt quBʼaal Tiuxh, —chich u yol.#Saalmo 95.7-8

16Bʼane yeʼetz koq abʼimal etaʼn jaʼle inqʼa xaol inqʼa maʼtich tabʼit viyol quBʼaal Tiuxh, tul ivatziaqxh ipalsat viyol quBʼaal Tiuxh. Aʼetz inqʼa xaole, inqʼa ex teesa tzaan Moisees tuulbʼal Ejiipto.

17Atz bʼane yeʼatetz koq etootzaql jaʼl inqʼa xaol, inqʼa ul ikʼaʼnal quBʼaal Tiuxh s-tiibʼa tuulbʼal kaʼviinqil yaʼbʼ. Tan aʼe inqʼa motx bʼanon u paʼv, atz inqʼa motx kam ka tu tzaqa txʼavaʼ.

18Atz yeʼatetz koq etootzaqle jaʼl inqʼa xaol uvaʼ itxakbʼa quBʼaal Tiuxh val viyol s-tiʼ tuchʼ kʼaʼnal, tiʼ uvaʼ yeʼl inpaqul laʼ motx paloʼk t-ilanchil uvaʼ laʼich taqʼ quBʼaal Tiuxh s-te. Atz aʼ inqʼa xaole, inqʼa motx palsan viyol quBʼaal Tiuxh. 19Echetz nik ibʼene s-qe uvaʼ yeʼl vet inqʼa xaol inqʼae bʼenoʼk tu txʼavaʼ, tan yeʼl quBʼaal Tiuxh nimal taʼn.#Nuumeros 14.1-13

Currently Selected:

Evreeos 3: ixlC

Highlight

Copy

Compare