Evreeos 10

Aʼ u yole tiʼ u kaʼv yol ijeqbʼa ka quBʼaal Tiuxh tuchʼ quBʼaal Jesuus, viqʼesal oksan quyol vatz Tiuxh

1Echetz yeʼl inqʼa tij imam Israeel oleʼv tiʼ inimal u bʼaxa iyol quBʼaal Tiuxh, tiʼ uvaʼ tira laʼich sotzeʼl vipaʼv, tul jitoq nikich toleʼv tiʼ ijetxhtaq ok tibʼ kʼatz quBʼaal Tiuxh tiʼ inatxhkʼuulaleʼ. Echetz s-tiʼile yeʼlich iyakʼil u bʼaxa iyol quBʼaal Tiuxh, tiʼ uvaʼ tira laʼich sotzsal el vipaʼv inqʼa xaol vatz quBʼaal Tiuxh taʼn. Tan echich kuxh tilix, eche icheonal inqʼa bʼaʼnil, inqʼa yaʼn laʼich uli. Pet jit aʼich koqxh vet inqʼa nikich tutxheʼ, tan jun yaʼbʼ nikich itzʼeʼsal ok oya vatz quBʼaal Tiuxh tiʼ ijaqax kuya tiʼ inqʼa paʼv. 2Pet echetze uvaʼ oleʼv koq inqʼa bʼaxa iyol quBʼaal Tiuxh, tiʼ uvaʼ tira laʼich sotzeʼl inqʼa paʼv, tul yaʼetz veteʼe vitzʼeʼsal ok inqʼa oya vatz quBʼaal Tiuxh. Atz oqetz nikich isotzeʼl vipaʼv inqʼa xaol tuchʼ inqʼa nikich inima tiʼ inatxhkʼuulal Tiuxh, tul yeʼletz vet inqʼa paʼve laʼich atin tu titzʼabʼal. 3Pet aʼe tan, aʼ vitzʼeʼsal ok inqʼa oya jun yaʼbʼ nik ulsan vet s-kʼuul inqʼa xaol uvaʼ ant kuxh iqatzimal inqʼa paʼv taʼn. 4Tan yeʼ nikich toleʼv vikaqal inqʼa yakʼa vaʼk, atz vikaqal inqʼa yakʼa tzentun tiʼ isotzsal el vipaʼv inqʼa xaol.

5Echetz s-tiʼile ech tal u quBʼaal JesuKriisto te quBʼaal Tiuxh s-eche, uvaʼs tul tzitza vatz txʼavaʼ:

—«Yeʼ qat asaʼa uvaʼ

laʼ tzʼeʼsal ok inqʼa txoo savatz,

atz laʼ oksal ok inqʼa oya see.

Echetz aʼ vet vintxhiʼoʼl

nik vaqʼ s-tiʼ;

vintxhiʼoʼl uvaʼ axh bʼanon.

6Echetze inqʼa oya uvaʼ nikich

itzʼeʼsal ok savatz,

atz kʼuxh inqʼa oya

tetz txhojbʼal paʼv,

tan yeʼ qat ibʼan see,»

xeʼt in te vinBʼaal Tiuxh.

7Echetz valte u yol s-eche:

«InBʼaal, il in ila; uy in savatz

tiʼ inimal jankʼal uvaʼ

nik asaʼ s-viʼ.

Tan ech uvaʼe tzʼibʼamal ka s-viʼ

tuul u uʼ,»

xeʼt in te vinBʼaal Tiuxh,

—chich u yol.#Saalmo 40.6-8

8Toq qal inuqul inqʼa yol inqʼae. Tul bʼaxa ech tal u quBʼaal JesuKriisto s-eche:

—Yeʼ qat asaʼa uvaʼ

laʼ tzʼeʼsal ok inqʼa txoo savatz,

atz jitoq laʼ oksal ok

inqʼa oya see;

atz jitoq inqʼa oya

laʼ tzʼeʼsal ok savatz,

atz jitoq inqʼa oya

tetz txhojbʼal paʼv.

Tul yeʼ qat ibʼan see,

—xeʼte.

Aloq jankʼalxh uvaʼ nikich toksal

vatz quBʼaal Tiuxh,

tan aʼ uvaʼe, bʼekʼelich ka.

9Yaʼne ech tal u Kriisto inpaqt s-eche:

—InBʼaal, il in ila;

uy in savatz tiʼ inimal

kam uvaʼ nik asaʼ s-viʼ,

—xeʼt u Kriisto

te quBʼaal Tiuxh.

Aʼetz nik iyaʼsa vet quBʼaal Tiuxh u bʼaxa iyol uvaʼ jeqbʼamich taʼn, tul aʼ nik toksa vet iqʼij vaʼt viyol uvaʼ ijeqbʼa vet tikaʼpaq. 10Echetz, tiʼ uvaʼ qat ijeqbʼa vet quBʼaal Tiuxh vaʼt viyol, tul yeʼletz vet qupaʼv tzi vatz quBʼaal Tiuxh. Tan aʼ vikʼaxbʼisal vitxhiʼoʼl quBʼaal JesuKriisto qat txhoon inqʼa qupaʼv, eche invaʼq oya vatz quBʼaal Tiuxh. Tul paqul kuxh taqʼ tibʼ quBʼaal JesuKriisto kʼaxbʼoq, tul taʼne.

11Pet inqʼa oksan yol vatz Tiuxh, tan jun kuxh qʼij ibʼant u aqʼon tiʼ itzʼeʼsal ok inqʼa oya. Tul jatpaqul kuxh nik ibʼaneʼ. Tul ant kuxh txoo nik itzʼeʼsa bʼenamen kʼuxh yeʼ nik toleʼv tiʼ isotzeʼl inqʼa ipaʼv.#Eeksodo 29.38 12Pet koq u quBʼaal JesuKriisto, tan vaʼl kuxh oya tetz txhojbʼal paʼv toksa vatz quBʼaal Tiuxh, tul taʼne. Maʼtichetz inimat vet inqʼae vatz quBʼaal Tiuxh, tul yekich vet kʼuqeʼvoq tisebʼal u quBʼaal Tiuxh tiʼ ibʼant iqʼesalil s-kʼatza.

13Tul iletz vet quBʼaal JesuKriisto txʼebʼoʼmy al tiʼ topoon u qʼij uvaʼ, aʼ vet laʼ bʼekʼon tiibʼa inqʼa nik itxhiʼan s-tiʼ, ech laʼ ikaj vet jaqʼ ibʼekʼoʼm, eche ikaj tzeqʼbʼal oq.#Saalmo 110.1 14Tul tuchʼ kuxh vaʼl oya qat toksa vatz quBʼaal Tiuxh, tul tira sotz vet el vipaʼv inqʼa nik ijetxhoʼk tibʼ kʼatz quBʼaal Tiuxh.

15Tul antxh viTiuxhil Tiuxh nik aqʼon qootzaqi. Tan bʼaxa ech nik tal u yol s-eche:

16—Tuulbʼaletz inqʼa qʼij,

inqʼa yaʼn tuleʼ,

tul toq injeqbʼa ka vaʼt vinyol

tuchʼ inqʼa tij imam Israeel.

In nik alon u yol.

Tan laʼ vaqʼ tootzaqi

inqʼa tij imam Israeel

inqʼa inbʼekʼbʼal.

Atz laʼat vaqʼ

itxey taanima vinyolbʼal,

tul laʼ kaj vinyolbʼal

tu taanima,

atz eche tzʼibʼamal

laʼ ikaj s-tuul,

—chich u yol.#Jeremiias 31.31-34

17Tul ech vaʼt u yol tzʼibʼamal ka uvaʼ ech nik tal viTiuxhil Tiuxh s-eche:

—Yeʼl inpaqt laʼ vulsa

inqʼa ipaʼv sinkʼuul,

atz kʼuxh inqʼa kantxhaq uvaʼ

nik ibʼaneʼ,

—chich u yol.#Jeremiias 31.34

18Tiʼetz uvaʼ kuyel vet jankʼal inqʼa qupaʼv taʼn quBʼaal Tiuxh, tul kam teletz koq vet itxaʼk oya laʼ qutzʼeʼsa ok vatz quBʼaal Tiuxh tiʼ inqʼa paʼv.

Aʼ u yole tiʼ itxakbʼat tibʼ inqʼa niman tetz Jesuus, atz tiʼ ikʼuqeʼv ikʼuul tiʼ quBʼaal Tiuxh

19Pet aʼetz qubʼan veteʼ, inmol s-niman tetz Jesuus, uvaʼ qujetxh vet ok qibʼ kʼatz quBʼaal Tiuxh. Tan at vet qokebʼal uvaʼ junt laʼ qoksa vet qibʼ vatz quBʼaal Tiuxh, eche nikich ibʼan inqʼa iqʼesal oksan yol vatz Tiuxh tiʼ ibʼenoʼk tu Tatibʼal quBʼaal Tiuxh. Tan qat ey vet vikaqal u quBʼaal JesuKriisto s-qiʼ. 20Tan aʼ vikʼaxbʼ vitxhiʼoʼl quBʼaal JesuKriisto, atz vikamebʼal qat jaqon vaʼt bʼey tiʼ qupaloʼk vatz quBʼaal Tiuxh. Tan yekich tzilm u chelkin bʼuʼq, u qʼanbʼal tetz u Tatibʼal quBʼaal Tiuxh uvaʼs ikam quBʼaal JesuKriisto. Pet ile itzʼlel vet s-txheel. 21Tiʼetz uvaʼ at vet vaʼl iqʼesal oksan yol vatz Tiuxh tiʼ toksal quyol vatz quBʼaal Tiuxh, tul ilol qetz oʼ inqʼa qitzʼin qatzik vet qibʼ vatz quBʼaal Tiuxh. 22Echetz qujetxhvaq ok qibʼ setuchʼ kʼatz quBʼaal Tiuxh. Poro laʼxh tzaj s-qukʼuul u qujetxhtoʼk qibʼ. Tan tiʼ u qukʼuqbʼat qukʼuul tiʼ quBʼaal Tiuxh, tul nik qootzaqivat uvaʼ nuqxhtuʼ at qokebʼal tiʼ qok vatz quBʼaal Tiuxh. Tul qootzaqle uvaʼ txʼael vet u qaanima uvaʼ tuul okaʼp u qutxhiʼoʼl, atz eesamal vet el inqʼa kantxhaq inqʼa yaʼt tul t-qitzʼabʼal, eche nik itxʼajt inqʼa oksan yol vatz Tiuxh vitxhiʼoʼl s-tiʼeʼl tuchʼ txilkin aʼ.#Leviitiko 8.30

23Tul nuq txakloq oʼ tiʼ itxʼebʼex inqʼa txʼaqaʼm uvaʼ alel taʼn s-laʼ qukʼula, atz jankʼal uvaʼ nik qal te inqʼa xaol tiʼ viyolbʼal quBʼaal Tiuxh. Pet yeʼ qubʼan kaʼl qukʼuul. Tan tetxhal laʼ inima quBʼaal Tiuxh inqʼa yol s-kaqaayil, jankʼal inqʼa yol uvaʼ alel ka taʼn quBʼaal Tiuxh.

24Tul aʼ qitzʼa quyaʼlut qibʼ, tiʼ uvaʼ atxh qaanima s-quvatzaq laʼ ibʼana. Tul quyaʼluvaq qibʼ tiʼ ibʼanax inqʼa bʼaʼnla txhaq bʼanoʼm.

25Atz yeʼ yaʼ oʼ tiʼ qukʼult qibʼ tiʼ inatxhkʼuulal quBʼaal Tiuxh. Atz yeʼ qubʼan, eche uvaʼ qat ichiansat jolt inqʼa xaol s-te, tul yeʼ nik motx ibʼen vet tu kʼulbʼal ibʼ. Pet aʼl quyaʼlut qibʼ s-quvatzaqil tiʼ qukʼult qibʼ tiʼ inatxhkʼuulal Tiuxh. Tul aʼl tel qubʼant yaʼl, tan ile nik ibʼen vet s-qe uvaʼ naqbʼixiy vet u qʼij tiʼ tulebʼal quBʼaal JesuKriisto.

Aʼ u yole tiʼ jaʼl uvaʼ laʼxh ivatzi iqʼaʼv tu paʼv, tul aʼ vet u kʼaxkʼo laʼ ul s-tiibʼa

26Oqetz laʼxh quvatzi quqʼaʼv vet tiʼ ibʼanax u paʼv uvaʼ maʼt qootzaqit vet vinuqul viyolbʼal quBʼaal Tiuxh, tul yeʼxhkam vet invaʼtoʼq laʼ utxh tok vatz quBʼaal Tiuxh s-jaqbʼal kuybʼal tiʼ inqʼa qupaʼv. 27Pet aʼ kuxh vet laʼ qutxʼebʼ tul val u xoʼvebʼalla qʼij uvaʼs laʼ taqʼax vet kuʼ yol tinuqul s-qiibʼa; atz itxʼebʼex val u mamaʼ vatz xamal uvaʼ laʼ ul sotzsan el inqʼa xaol, inqʼa nik itxhiʼan tiʼ quBʼaal Tiuxh.#Isaiias 26.11

28Tan oq jaʼl u xaol uvaʼ yeʼ nikich niman inqʼa bʼekʼbʼal uvaʼ itzʼibʼa ka Moisees, tul yek nikich iyatzʼax el, oq laʼich txhej kaʼvaʼl, atzoq oxvaʼl alol inuqul u yol tiʼ vipaʼv u xaol.#Deuteronoomio 17.6; 19.15

29¡Itzʼavaqetza!, jankʼaletz vet palnaʼq u mam kʼaxkʼo laʼ palk u xaol uvaʼ nik eesan iqʼij inqʼa mam ibʼaʼnil viKʼaol quBʼaal Tiuxh, inqʼa ech nik ibʼan tiʼ teesal iqʼij viKʼaol quBʼaal Tiuxh, eche iyurit ka vaʼq xaol invaʼq kam jaqʼ toq. Tul ¡yeʼlatetz kol mam kʼaxkʼo laʼ palk u xaol uvaʼ nik eesan iqʼij vitxʼajp taʼn vikaqal quBʼaal JesuKriisto, uvaʼ jeqbʼan u kaʼv iyol quBʼaal Tiuxh! Tan aʼ vikaqal quBʼaal JesuKriisto jetxhonaq ok kʼatz quBʼaal Tiuxh.#Eeksodo 24.8 Atz ¡yeʼlatetz kol mam kʼaxkʼo laʼ palk u xaol uvaʼ nik eesan iqʼij viTiuxhil Tiuxh uvaʼ qat ul aqʼon u bʼaʼnil tetz kuybʼal s-qe!

30Aloq qootzaqle uvaʼ antxh quBʼaal Tiuxh alon ka val u yol uvaʼ ech nik tal s-eche:

—In laʼ aqʼon ichʼexel

u kantxhaq.

Atz itxhoj nal u yeʼbʼaʼn

t-inqʼabʼ,

—chich quBʼaal Tiuxh.#Deuteronoomio 32.35

Tul vaʼt yol tzʼibʼamal ka

uvaʼ ech nik tal s-eche:

—QuBʼaal Tiuxh

laʼ aqʼon kuʼ yol tinuqul

tiibʼa vitenam,

—chich u yol.#Deuteronoomio 32.36; Saalmo 135.14

31¡Echetz mam xoʼvebʼal laʼ ikʼaxbʼisat u itzʼlichla quBʼaal Tiuxh jaʼl uvaʼ laʼ yan s-vatz!

32Poro ulsavaq inqʼa qʼij sekʼuul inqʼa palnaʼq ka uvaʼs yaʼnaqich kuxh etootzaqit vinuqul tiʼ u quBʼaal Tiuxh. Tul tira bʼaʼn uvaʼ ebʼana. Tan ekotxʼ evatz tuulbʼal uvaʼs epal t-inqʼa mam itzaʼlal, eche invaʼq mam txhʼaʼo qat ebʼana. Atz etxakbʼa etibʼ s-vatz. 33Tan at uvaʼ echxh ivatz mamala xaol qat yoqʼox ex, atz qat pal ex t-mam kʼaxbʼichil. Tul kamxh uvaʼ qat palk ex, tul echat kuxh qat palk jolt inqʼa qumole. Tul qat ebʼan vaʼl eyol s-tuchʼ, tul yeʼl ex qat xoʼv ex. 34Tul motxat etxum ivatz inqʼa aqʼax jaʼ t-tzeʼ tiʼ inimal quBʼaal JesuKriisto. Tul motx eesal el ex t-inqʼa kamaq etetz. Tul motx ekotxʼ evatz, tul aʼl echiibʼ s-tiʼ. Tan etootzaqle uvaʼ, aʼ inqʼa mam bʼaʼnil tu amlikaʼ palnaʼq viʼ inqʼa kamaq etetz, inqʼa mam bʼaʼnil uvaʼ toq taqʼ quBʼaal Tiuxh sete, tul yeʼl paqul laʼ sotzi.

35Echetz yeʼ etzʼeq u kʼuqlebʼal ekʼuul tiʼ u quBʼaal Tiuxh. Tan tiʼ u kʼuqlebʼal ekʼuul, tul toq ekʼul vaʼl nimla txʼaqaʼm taʼn quBʼaal Tiuxh. 36Poro aʼetz isaʼ uvaʼ sebʼtoq kuxh ex tiʼ inimal quBʼaal Tiuxh, tul aʼ kuxh laʼ ebʼan kam uvaʼ nik isaʼ quBʼaal Tiuxh laʼ ebʼana. Echetz toq ekʼulte u mam bʼaʼnil uvaʼ altziimal taʼn quBʼaal Tiuxh uvaʼ laʼ taqʼa. 37Tan bʼiit kuxh vet toq etxʼebʼeʼ, tul:

—Tetxhalxh toq uloq uvaʼ

alel veteʼ s-laʼ uli.

Tan yeʼ laʼ ibʼal vet tibʼ

tiʼ u tuleʼ.

38Poro jaʼl u xaol uvaʼ

qat bʼen s-bʼaʼn

taʼn quBʼaal Tiuxh,

tul aʼetz uvaʼe,

tuchʼ u kʼuqlebʼal ikʼuul

tiʼ quBʼaal Tiuxh,

tul at qʼij isaq

yeʼl iyaʼebʼal imotxebʼal.

Pet oqetz laʼ qʼaʼv

tiʼ ibʼanax inqʼa yeʼbʼaʼn,

tul yeʼletz in laʼ chiibʼ in s-tiʼ,

—chich u yol.#Avakuuk 2.3-4

39Pet koq oʼ, tan jit ech oʼ, eche inqʼa nik iqʼaʼv tiʼ ibʼanax u yeʼbʼaʼn, inqʼa aʼ kʼaqel vet u tzʼeqxichil taʼn. Pet ech oʼ, eche inqʼa aʼxh kʼuqlel ikʼuul tiʼ quBʼaal Tiuxh, inqʼa nik kolon qʼij isaq uvaʼ yeʼl iyaʼebʼal imotxebʼal, tul yeʼ laʼ motx bʼen tu kʼaxkʼo.

Currently Selected:

Evreeos 10: ixlC

Highlight

Copy

Compare