Efeesios 4

Uvaʼs talt Paʼp uvaʼ vaʼl kuxh vet iyol inqʼa niman tetz Jesuus laʼ ibʼan s-vatzaq taʼn viTiuxhil Tiuxh

1Iletz in at jaʼ in t-tzeʼ tiʼ ipaxsal inqʼa bʼaʼnla txhaq yol tiʼ quBʼaal Jesuus. Pet nik inbʼan yaʼl sete uvaʼ aʼxh ebʼan kame uvaʼ ikʼulel laʼ ebʼana, tiʼ uvaʼ, ex vet niman tetz Jesuus. Tan aʼ qat isaʼvat tzaan ex quBʼaal Tiuxh tiʼ etxʼolt tiqʼol viyolbʼal quBʼaal Tiuxh s-bʼaʼn. 2Tul yeʼ laʼ etaqʼ bʼen etibʼ s-nim. Pet tzʼuʼkinla xaol ex laʼ ebʼana. Tul laʼ etiqʼo kuʼl etibʼ tuchʼ vetxumbʼal; atz laʼ ekotxʼ evatz kʼatz vemol, tiʼ uvaʼ at etaanima setiʼ sevatzaqil. 3Tul bʼanvaqxh yaʼl tiʼ ibʼanax eela eyol, tiʼ uvaʼ vaʼl kuxh vet etxeyex taʼn viTiuxhil Tiuxh. Tan aʼ nik isaʼ viTiuxhil Tiuxh uvaʼ laʼ atin bʼaʼnil sexoʼl sevatzaq. Tan vaʼl kuxh viTiuxhil Tiuxh at sekʼatza. 4Tan vaʼl kuxh vet ex sevatzaq, ex inqʼa niman tetz Jesuus, eche tatin u qutxhiʼoʼl. Tan kʼuxh nimlen tatineʼ, poro vaʼl kuxhtuʼ. Atz vaʼl kuxh viTiuxhil Tiuxh uvaʼ at sekʼatza. Tul vaʼlxh etxʼebʼt tul u quBʼaal JesuKriisto, jankʼal ex inqʼa niman tetz. Tan aʼ uvaʼe, qat isaʼ tzaan ex u quBʼaal Tiuxh s-tiʼ. 5Atz vaʼl kuxh u quBʼaal s-qiibʼa. Atz vaʼl kuxh viyolbʼal quBʼaal Jesuus uvaʼ qat quqeja. Atz vaʼl kuxh qitzʼabʼal uvaʼ s-qaqʼax kuʼ xeʼ aʼ tiʼ qukʼutxhtaʼ uvaʼ, oʼ vet niman tetz. 6Atz vaʼl kuxh u quTiuxh, aʼe u quBʼaal s-qukaqaayil. Tul aʼe viqʼesal s-qiibʼa s-qukaqaayil. Atz antxhte u lotxhol qetz s-qukaqaayil. Atz aʼe, uvaʼ at s-qukʼatza s-qukaqaayil.

7Tul jununil oʼ qat taqʼ quBʼaal JesuKriisto qutxumbʼal taʼn viTiuxhil Tiuxh, jabʼiste uvaʼ qat isaʼ taqʼax s-qe; tul ayaʼlxh ikʼuul qat taqʼ s-qe.

8Tan ech nik tal val u yol tzʼibʼamal ka t-viyolbʼal quBʼaal Tiuxh tiʼ u Kriisto s-eche:

—Bʼen vet jaʼ tu amlikaʼ.

Tul ant inqʼa pereexho

tiqʼo jaʼ s-tiʼ,

inqʼa aʼxh pereexhoiche,

eche itxhʼuyeʼv bʼen

inqʼa pereexho tiʼ iqul

vaʼq mam iqʼesal

qat ibʼana.

Tul motx taqʼ vet tiqleʼm

inqʼa xaol,

—chich u yol.#Saalmo 68.18{*}#4.8 Aʼ nik tiqʼovat tzaan Paʼp u yol tu Saalmo 68.17-18 uvaʼ itzʼibʼa Daviid uvaʼ atich ok s-mam iqʼesal tu tenam Jerusaleen. Tan aʼ nikich titzʼa Daviid ibʼitix vaʼl tostiuxh tatibʼal quBʼaal Tiuxh tu Jerusaleen. Tan tira txumlebʼalich kuxh tatin u Tiuxhla kaaxha uvaʼ atich tuul u bʼuʼq tostiuxh uvaʼs nikich ibʼant Daviid iqʼesalil. Tul nikichetz tabʼi Daviid te quBʼaal Tiuxh uvaʼ laʼich ibʼit vaʼq tostiuxh tal uvaʼ laʼich atink u tiuxhla kaaxha. Tul nikichetz tul t-titzʼabʼal Daviid kam laʼich ibʼan tel bʼen u quBʼaal Tiuxh tuul u bʼuʼq tostiuxh tu txʼavaʼ Sinaii, tul laʼ aqʼbʼ tu atibʼal uvaʼ yaʼn laʼich ibʼita. Tan mam yol laʼich tel bʼen u quBʼaal Tiuxh nikich tal Daviid, eche uvaʼ nikich ibʼan vaʼq mam iqʼesal tiʼ viqʼaʼv t-vitxʼavaʼ uvaʼs maʼt toleʼv tiʼ ibʼanax vaʼq mam txhʼaʼo. Tan mamalaaq kareʼt iqʼomalaq vet taʼn tuchʼ inqʼa imol uvaʼs nik iqʼaʼv vet t-vitenam. Tul echetz laʼ ibʼane u tel tzaan u quBʼaal Tiuxh uvaʼ laʼ tel tzaan tu txʼavaʼ Sinaii, tetxhal topoon tu tenam Jerusaleen xoʼl inqʼa niman tetz, aʼe inqʼa tij imam Israeel. Tul aʼ nikich tal Daviid uvaʼ atxhvabʼalichxh laʼ taqʼbʼ quBʼaal Tiuxh tu tatibʼal u mam iqʼesal, tul laʼ xhonatxh tu tatibʼal u mam iqʼesal tiʼ ibʼanax iqʼesalil xoʼl inqʼa itenam. Tan ech uvaʼe nik tal tu uʼ Saalmo 68.17. Tul nikat tal Daviid uvaʼ, aʼ laʼ aqʼbʼik quBʼaal Tiuxh tu tatibʼal u mam iqʼesal tu tenam Jerusaleen uvaʼ niim atil jaʼ. Tul txhʼuyel mamala lotxhol tetz tuchʼaq itenam s-txala, eche itxhʼuyeʼv joloq pereexho tiʼ vaʼq mam iqʼesal uvaʼ maʼt toleʼv tiʼ ibʼanax vaʼq txhʼaʼo, eche uvaʼ nik tal t-Saalmo 68.18a. Tul iqʼomal mamala oya taʼn inqʼa itenam quBʼaal Tiuxh tiʼ taqʼax s-te, eche inqʼa isol vaʼq mam iqʼesal uvaʼ iqʼomal joloq txʼijbʼal qʼij taʼn tiʼ bʼen taqʼt te u mam iqʼesal. Aʼe inqʼa oya uvaʼ nik ibʼanbʼe inqʼa niman tetz quBʼaal Tiuxh tiʼ toksal iqʼij. Tul echetz laʼ tatin u quBʼaal Tiuxhe xoʼl vitenam tu tenam Jerusaleen; tul tira laʼ kajka xoʼl. Tan ech uvaʼ nikich titzʼa Daviide, eche uvaʼ nik tal tu uʼ Saalmo 68.18b. Tul aʼetz uvaʼe, tiqʼo tzaan Paʼp tiʼ ibʼant eela u tel bʼen quBʼaal Jesuus vatz txʼavaʼ tuchʼ u taqʼbʼ tu amlikaʼ. Aʼ nik ibʼan eela tuchʼ uvaʼ s-tel bʼen quBʼaal Tiuxh tu txʼavaʼ Sinaii, tetxhal taqʼbʼ tu tenam Jerusaleen, eche uvaʼ nik tal t-Saalmo 68.17. Tul nik ibʼan Paʼp eela u tiqʼot bʼen quBʼaal Jesuus taanxelal jolol niman tetz tu amlikaʼ, inqʼa atich vet bʼen tu tatibʼal kamnaʼq; aʼe, uvaʼ ‹Seeol,› chich eʼli, tal uvaʼ nik ikʼaq inqʼa yeʼ ootzaqin tetz quBʼaal Tiuxh. Tul pereexho xeʼt eʼl inqʼa tiqʼo bʼen quBʼaal Jesuus s-tiʼ. Tan pereexhoich inqʼa atich tu tatibʼal kamnaʼq taʼn Satanaas nik tal Paʼp. Tan tabʼi inqʼa pereexhoich taʼn Satanaas, u bʼaʼnla yol uvaʼ tal quBʼaal Jesuus tul motx inima. Tul tiʼetz vinimataʼ, tul echetz ichitpeʼle tiqʼabʼ Satanaas tuulbʼal tatibʼal inqʼa kamnaʼq. Tul txhʼuyeʼv vet bʼen tiʼ quBʼaal Jesuus uvaʼs ibʼen tu amlikaʼ, tan nimanich vet tetz, eche uvaʼ nik tal tu Saalmo 49.1 tuchʼ 86.13. Niketz ibʼan Paʼp eela inqʼa niman tetz Jesuus inqʼae, tuchʼ jolol pereexho, inqʼa txhʼuyel tiʼ vaʼq mam iqʼesal uvaʼ nik taqʼbʼ t-vitenam. Tul niketz ibʼan Paʼp eela inqʼa pereexho txhʼuyel tiʼ quBʼaal Jesuus tuchʼ inqʼa pereexho uvaʼ txhʼuyel tiʼ vaʼq mam iqʼesal. Tul nik tiqʼo tzaan Paʼp inqʼa txʼijbʼal qʼij t-viyol uvaʼ nik tal Daviid tu uʼ Saalmo. Tan nik tal Daviid t-Saalmo uvaʼ iqʼomal inqʼa txʼijbʼal qʼij taʼn inqʼa txhʼuyel tiʼ quBʼaal Tiuxh. Tul laʼ taqʼ inqʼa txhʼuyel s-tiʼ inqʼa txʼijbʼal qʼij te quBʼaal Tiuxh. Pet Paʼp, tan jit aʼ nik talvat Paʼp tiʼ u quBʼaal Tiuxh, pet aʼ nik talvat tiʼ u quBʼaal Jesuus. Tul yeʼxhkam nik tal Paʼp taqʼax inqʼa txʼijbʼal qʼij te u quBʼaal Jesuus, pet aʼ u quBʼaal Jesuus nik aqʼon inqʼa txʼijbʼal qʼij te inqʼa niman tetz. Aloq yeʼxhkam taqʼ u quBʼaal Jesuus te inqʼa txhʼuyeʼv s-tiʼ, inqʼa tzum topoon s-tuchʼ tu amlikaʼ, pet te inqʼa niman tetz vatz txʼavaʼ. Aʼetz inqʼa txʼijbʼal qʼij tal Paʼp tiʼ inqʼa txumbʼal uvaʼ nik taqʼ viTiuxhil Tiuxh; aʼ inqʼae: apoostol, qʼexsan tetz viyolbʼal, paxsan tetz inqʼa bʼaʼnla txhaq yol tiʼ Jesuus, tuchʼ inqʼa iqʼon iviʼ xoʼl inqʼa niman tetz, eche uvaʼ nik tal t-Efeesios 4.11.

9¿Kametz nik elkaʼp u yol uvaʼ?: —Bʼen jaʼ tu amlikaʼ, —chiche. Aʼetz nik tal tiʼ u quBʼaal JesuKriisto. Tan bʼaxa kuʼl vatz u txʼavaʼ uvaʼ, aʼ vete vitzʼijoʼnal kuʼl. 10Aʼetz u quBʼaal JesuKriistoe uvaʼ kuʼl vatz u txʼavaʼ. Tul antxhte uvaʼ pal jaʼ tiibʼa kaqaayil inqʼa amlikaʼ tiʼ ikʼutxhuxeʼ uvaʼ, aʼ vet iqʼesal tiibʼa s-kaqaayil. 11Tul antxh quBʼaal JesuKriisto aqʼon vet tiqleʼm inqʼa niman tetz. Tan at inqʼa toksa quBʼaal JesuKriisto siapoostol. At inqʼa toksa quBʼaal JesuKriisto s-qʼexsan tetz viyolbʼal. At inqʼa toksa quBʼaal JesuKriisto s-paxsan tetz inqʼa bʼaʼnla txhaq yol s-tiʼ. At inqʼa toksa quBʼaal JesuKriisto s-iqʼon iviʼ xoʼl inqʼa niman tetz. At inqʼa toksa quBʼaal JesuKriisto s-txhusul tetz inqʼa niman tetz. 12Tan aʼ titzʼabʼal quBʼaal Tiuxh uvaʼ laʼ motx ichʼijsa txha vet inqʼa niman tetz Jesuus uvaʼs laʼ taqʼax jatvatzul taqʼon quBʼaal Tiuxh s-te, eche u qutxhiʼoʼl uvaʼ nimlen elnaʼqle. Tan jabʼiste kuxh aqʼon nik ibʼan junun, echetz laʼ itxhusuxe vitenam quBʼaal Tiuxh tiʼ ibʼanax inqʼa bʼaʼnla txhaq bʼanoʼm. 13Tan aʼ isaʼ uvaʼ vaʼlxh quyol tiʼ inimal inqʼa bʼaʼnla txhaq yol tiʼ Jesuus. Atz vaʼlxh quyol tiʼ qootzaqit viKʼaol quBʼaal Tiuxh; atz tetxhal quchʼij tuchʼ u qutxumbʼal kʼatz quBʼaal Tiuxh, atz tuchʼ u qutxhabʼat tiqʼol viyolbʼal quBʼaal Tiuxh s-bʼaʼn, tetxhal qopoon tiʼ qubʼant eela tuchʼ vitxumbʼal u quBʼaal JesuKriisto.

14Echetz yeʼ qaqʼ qibʼ eesaloq t-bʼey taʼn inqʼa xaol, inqʼa txhabʼamal kuxh subʼuʼm taʼn, atz kam kuxh invaʼtoʼq txhusbʼal laʼ itxhuli. Pet jit ech oʼ qubʼan, eche invaʼq neʼ uvaʼ tal kuxh laʼ bʼenk u titzʼabʼal. Atz jit ech oʼ qubʼan, eche invaʼq vaarko uvaʼ tal kuxh laʼ iqʼolik taʼn kaqiqʼ jabʼal. 15Pet aʼxh qal vinuqul s-quvatzaq. Tul aʼxh laʼ qukʼutxh uvaʼ atxh qaanima s-qiʼ s-quvatzaq tiʼ talax vinuqul. Echetz laʼ quchʼije tiʼ tiqʼol viyolbʼal quBʼaal Tiuxh s-kaqaayil, eche uvaʼ ibʼan u quBʼaal JesuKriisto, u quqʼesal, uvaʼ ech tatin, eche u quviʼ tiibʼa u qutxhiʼoʼl. 16Tan aʼ u quBʼaal JesuKriisto nik lotxhon inqʼa niman tetz tiʼ ichʼij s-kʼatza, atz tiʼ itxhabʼal tiqʼol viyolbʼal quBʼaal Tiuxh s-bʼaʼn, tiʼ uvaʼ atxh taanima inqʼa niman tetz Jesuus s-vatzaq. Atz vaʼl kuxh vet oʼ s-quvatzaq, tan tira txeyel vet qibʼ s-quvatzaqil. Tan nik qulotxh qibʼ s-quvatzaq tiʼ quchʼij tuchʼ u qatin kʼatz quBʼaal Tiuxh. Tan atxh qaqʼon jununil oʼ taʼn quBʼaal. Tul vaʼlxh nik quchʼij tiʼ qukʼutxhtaʼ uvaʼ at qaanima s-qiʼ s-quvatzaqil. Tan ech qatin s-quvatzaq, eche tatin txhaq vatzul u qutxhiʼoʼl. Tan bʼeeno txeyel tibʼ u qutxhiʼoʼl tuchʼ inqʼa kʼulbʼalaq tibʼ qubʼaqil s-vatzaq. Tan vaʼl kuxh nik motx ikʼult iyakʼil kʼatz vinimal; tul vaʼlxh nik motx ichʼijeʼ. Tul at taqʼon junun tiʼ jankʼal uvaʼ nik ibʼan u qutxhiʼoʼl.

Uvaʼs talt Paʼp uvaʼ laʼ taqʼ tibʼ inqʼa xaol jalpoq taʼn quBʼaal Jesuus

17Niketz intiila bʼekʼu sete tuchʼ u tiqleʼm quBʼaal JesuKriisto uvaʼ aqʼel s-ve taʼn, uvaʼ yeʼ laʼ ebʼan vet, eche uvaʼ nik ibʼan jolt inqʼa xaol, inqʼa yeʼ ootzaqin tetz quBʼaal Tiuxh. Tan aʼaq kuxh inqʼa yaabʼla txhaq txumbʼal nik bʼekʼon tiʼ ibʼanax inqʼa kam uvaʼ yeʼxhkam laʼ taqʼ vatz quBʼaal Tiuxh. 18Tan at bʼen inqʼa titzʼabʼal tu tokto. Tan tira nik ibʼan inqʼa iyaabʼla txumbʼal uvaʼ chianaʼq kuxh ibʼanax s-te. Tiʼ kuxh u palsa yolil nik motx ibʼaneʼ, tul yeʼl tootzaqibʼal tiʼ u quBʼaal Tiuxh. Echetz yeʼl tokebʼal tiʼ ikʼulux u qʼij saq uvaʼ nik isaʼ quBʼaal Tiuxh taqʼax s-te. 19Tan tira yeʼlaq vet ichʼixaʼv. Tul yeʼxhkam nik motx imaqax vet taʼn u titzʼabʼal tiʼ inqʼa yeʼbʼaʼn nik motx ibʼaneʼ. Xaʼtetze tira kʼayimalaq vet tibʼ tiʼ ibʼanax u yeʼbʼaʼn uvaʼ nik tatxhva vitxhiʼoʼl. Tul ayaʼlaq kuxh vet ikʼuul nik motx ibʼan inqʼa yeʼbʼaʼn uvaʼ txoqebʼal kʼuul.

20Pet ex, tan jit ech uvaʼe qat txhusux ex, s-tiʼ uvaʼs qat etootzaqit inqʼa bʼaʼnla txhaq yol tiʼ Jesuus, aʼe u Kriisto. 21Tul nuqlaxh yol uvaʼ tekʼxh qat etabʼi vet inqʼa bʼaʼnla txhaq yol tiʼ Jesuus. Atz qat txhusuxiy vet ex s-tiʼ, tiʼ kam laʼ etule tiqʼol inqʼa bʼaʼnla txhaq yol tiʼ Jesuus uvaʼ inuqulxhtuʼ. 22Echetze inqʼa txumbʼal uvaʼ jit ikʼulel nikich motx ebʼan s-jatxhaq tzaan, tul jalpuvaqetz veteʼ. Ech eteesat el, eche laʼ ikʼonil el invaʼq kam uvaʼ yeʼl vet itxaʼk. Tan aʼ u kantxhaqla txumbʼale uvaʼ chianaʼqich kuxh ibʼanax sete s-jatxhaq tzaan. Tan ayaʼl inqʼa tatxhaʼv vetxhiʼoʼle uvaʼ nik eesan ex t-bʼey.

23Pet aqʼvaq etibʼ, tul laʼ jalp vetitzʼabʼal taʼn quBʼaal Tiuxh. Tul laʼ ekʼul vaʼt akʼ txumbʼal laʼ taqʼ sete.#Romaanos 12.2 24Tul aʼ ekʼutxh vet inqʼa bʼaʼnla txumbʼal uvaʼ taqʼ quBʼaal Tiuxh sete uvaʼs etok s-niman tetz Jesuus. Tan aʼ u akʼ txumbʼale uvaʼ iviinqixsa sekʼatza, uvaʼ ech, eche vitxumbʼal quBʼaal Tiuxh. Aʼetz laʼ ebʼan u jik, atz laʼ ejetxhoʼk etibʼ kʼatz quBʼaal Tiuxh, eche uvaʼ nik tal inqʼa bʼaʼnla txhaq yol tiʼ Jesuus, uvaʼ inuqulxhtuʼ.

25Echetz tira etaqʼ vet ka u tzʼeqo tzij. Pet jununil ex, tul tinuqulxh laʼ eyolon te emol. Tan vaʼl kuxh vet ex sevatzaq, eche tatin u qutxhiʼoʼl. 26—Oqetz laʼ ul ekʼaʼnal, poro laʼ emaq etibʼ tiʼ epaʼvin taʼn, —chich viyolbʼal quBʼaal Tiuxh uvaʼ tzʼibʼamal ka.#Saalmo 4.4 Pet jit tetxhal kuxh ikuʼ qʼij sete tuchʼ kʼaʼnal. 27Atz echetz yeʼ laʼ etaqʼt tokebʼal Satanaase sekʼatza tiʼ ekuʼ t-paʼv.#Jeenesis 4.6-7 28Atz jaʼl ex, uvaʼ nik etelqʼeʼ, tul yeʼ vet elqʼ ex. Pet aqʼonvoq ex. Poro aqʼonxh ebʼan tuchʼ eqʼabʼ. Echetz laʼ itxhej lotxhbʼal tetz xaole sexeʼ uvaʼ yeʼl tetz.

29Poro yeʼl invaʼq txʼiila yol laʼ etala. Pet aʼ laʼ etal bʼaʼnla txhaq yol uvaʼ lotxhoʼm laʼ ibʼan tiʼ ichʼij inqʼa xaol kʼatz quBʼaal Tiuxh. Tul bʼaʼn laʼ elkaʼp te inqʼa xaol inqʼa nik abʼin. 30Tul yeʼ laʼ etxumunsa viTiuxhil Tiuxh tuchʼ vepaʼvineʼ. Tan ex vet tetz quBʼaal Tiuxh, tan chʼexel vet ex taʼn. Tan aʼ atil viTiuxhil Tiuxh sekʼatza setetxhlal, eche tok invaʼq seeyo qat toksat tetaanxelal. Tul tetxhal topoon u qʼij uvaʼs laʼ ul ichitix vet jankʼal inqʼa kam s-kaqaayil taʼn quBʼaal Tiuxh. 31Echetz tira yeʼ laʼ ebʼan vet jankʼalxh inqʼa yeʼbʼaʼn inqʼaa: kʼayunchil, ulchil viʼ, kʼaʼnal, txʼetxʼuʼm tiʼ yaj, yoqʼoʼm, atz jankʼalxh inqʼa yeʼbʼaʼn. 32Pet aʼ ebʼan uvaʼ ayaʼlxh bʼaʼn sete. Atz laʼ toybʼa tibʼ evatz sevatzaq. Tul laʼ ikuy tibʼ epaʼv sevatzaq, eche uvaʼ qat ikuyt quBʼaal Tiuxh epaʼv taʼn vibʼaʼnil u quBʼaal JesuKriisto.

Currently Selected:

Efeesios 4: ixlC

Highlight

Copy

Compare