3 Xhun ALBʼAL INUQUL U YOL TIʼ U Uʼ
ALBʼAL INUQUL U YOL TIʼ U Uʼ
3 XHUN
Uvaʼs toq qootzaqitaʼ jaʼl tzʼibʼan u uʼ 3 Xhun
Jankʼaletzxh inqʼa aj txumbʼal nik motx ikʼul tibʼ iyol, tiʼ uvaʼ antxh u apoostol Xhun tzʼibʼan u uʼ 3 Xhun. Tan eela kuxh vinukʼil vitzʼibʼal inqʼa yol tu 3 Xhun tuchʼ vinukʼil inqʼa yol tu 2 Xhun, atz tu 1 Xhun.
Uvaʼs toq qootzaqitaʼ kam s-tuul tzʼibʼal u uʼ 3 Xhun
Jankʼaletzxh inqʼa iqʼon iviʼ xoʼl inqʼa niman tetz Jesuus nik motx ikʼul tibʼ iyol uvaʼ, aʼ tzʼibʼalik u uʼ 3 Xhun tu tenam Eefeso tu yaʼbʼ laval toʼkʼal (90) m.t.J. Tan nik tal Xhun tuul u tuʼ tiʼ Gaayo, val u iqʼonich iviʼ xoʼl inqʼa niman tetz Jesuus tu tenam Deerve, atz tu tenam Koloosas tuulbʼal Aasia. Ech uvaʼe nik tal t-Vibʼanoʼm inqʼa Apoostol 20.4.
Uvaʼs toq qootzaqitaʼ kame u taqʼil vitxhusun Xhun tuul u tuʼ 3 Xhun
Aʼetz u taqʼil viyol Xhun uvaʼ itzʼibʼa bʼen te Gaayo, u niman tetz Jesuus; aʼe, uvaʼ laʼ ilotxh Gaayo jatvaʼl inqʼa paxsan tetz inqʼa bʼaʼnla txhaq yol tiʼ Jesuus. Tul laʼ taqʼ ivatbʼal, atz laʼ taqʼ tetxhbʼubʼal inpaqte. Tul laʼ taqʼ tetz tiʼ ibʼey tiʼ tal uvaʼ laʼ bʼen ipaxsavat inqʼa bʼaʼnla txhaq yol tiʼ Jesuus. Tul talat Xhun paqte te Gaayo uvaʼ, echatxh laʼich ibʼan Gaayo, eche vitxumbʼal Demeetrio. Pet jit aʼ laʼich ibʼan, eche vitxumbʼal Diootrefes.
Uvaʼs toq qootzaqitaʼ kam ulbʼemal ijatxp ixoʼl inqʼa yol tu uʼ 3 Xhun
U uʼ 3 Xhun, tan kaʼvaʼlen tanul elnaʼq inqʼa yol uvaʼ nik tal s-tuul.
3 Xhun 1-4
Aʼetz ixeʼtebʼe Xhun talax tiʼ jaʼl nik tzʼibʼan u uʼ, tul jaʼl nik kʼulun. Yaʼne taqʼ vet bʼen bʼaʼnil ikʼuul Gaayo.
1. 3 Xhun 5-8
U bʼaxa tanul yol, tan aʼ tal Xhun, tiʼ uvaʼ laʼich ibʼan Gaayo bʼaʼnil, tul laʼich ilotxh Gaayo inqʼa paxsan tetz viyolbʼal quBʼaal Tiuxh. Atz laʼich bʼen iqʼexsa ka Gaayo tal uvaʼ laʼich motx ikʼaq tiʼ talax viyolbʼal quBʼaal Tiuxh.
2. 3 Xhun 9-12
Vikaʼv tanul yol, tan aʼ tal Xhun, tiʼ uvaʼ jit ech laʼich ibʼan Gaayo, eche uvaʼ nikich ibʼan Diootrefes. Tan yeʼ nikich ibʼan bʼaʼnil te inqʼa paxsan tetz viyolbʼal quBʼaal Tiuxh. Pet aʼ nikich tal Xhun uvaʼ ech laʼich ibʼan Gaayo, eche nikich ibʼan Demeetrio, tan nikich ilotxh inqʼa paxsan tetz viyolbʼal quBʼaal Tiuxh.
3 Xhun 13-15
Tiyaʼtebʼaletz veteʼ, tul nik tal Xhun te inqʼa niman tetz Jesuus, uvaʼ yeʼ isaʼ Xhun uvaʼ laʼ telich itzʼibʼa inqʼa yol tuul uʼ. Pet aʼ nikich isaʼ Xhun uvaʼ tira laʼich aqʼbʼ xoʼl inqʼa niman tetz Jesuus. Tul nik tal Xhun paqte uvaʼ taqʼ bʼen inqʼa niman tetz Jesuus, inqʼa nikich ikʼul tibʼ tuchʼ Xhun, bʼaʼnil ikʼuul Gaayo. Tul nik tal Xhun uvaʼ laʼ taqʼ Gaayo bʼaʼnil ikʼuul inqʼa imol s-niman tetz Jesuus.
Currently Selected:
3 Xhun ALBʼAL INUQUL U YOL TIʼ U Uʼ: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.