2 Koriintios 9

1Poro jit laʼ nal koq intzʼibʼa vet bʼen mamala yol sete tiʼ u lotxhbʼal uvaʼ laʼ etaqʼ tiʼ ilotxhox inqʼa niman tetz Jesuus, 2tan vootzaqle uvaʼ ayaʼlxh ekʼuul tiʼ elotxhoneʼ. Tul nik inchiibʼeʼ uvaʼs nik valt velotxhon xoʼl inqʼa niman tetz Jesuus tzitza tuulbʼal Masedoonia. Tan aʼ nik val s-xoʼl uvaʼ kʼuxh vaʼx vet tzaan yaʼbʼ etxʼebʼon tiʼ taqʼax lotxhbʼal, ex inqʼa een ex tuulbʼal Akaaya. Echetz, tiʼ uvaʼ nik tabʼi vet inqʼa qumol s-niman tetz Jesuus tzitza tu Masedoonia velotxhoneʼ, tul mamala vet niman tetz Jesuus nik iyaʼlu tibʼ tiʼ ilotxhoneʼ. 3Niketz intxhaq bʼen inqʼa qumol s-niman tetz Jesuus sexoʼl. Tul bʼen tileʼ oq oleʼvy ex tiʼ imolox u lotxhbʼal. Echetz laʼ tilte uvaʼ jit tzʼeqo tzij nik qubʼaneʼ uvaʼs nik quchiibʼ tiʼ talax inqʼa yol setiʼ. Tul alelxh vet sete vaʼn uvaʼ bʼanoq kuxh etutxh tiʼ u lotxhoʼm. 4Tan avoqe toq bʼenoq in tuchʼ kaʼoxvoʼq qumol s-niman tetz Jesuus, inqʼa at tzitza tuulbʼal Masedoonia, tul bʼen tileʼ kam uvaʼ nik qal s-te setiʼ. Tan tira kʼuqlel qukʼuul uvaʼ nik ebʼaneʼ kam inqʼa nik qal sete. Pet oqetz yeʼ nik ebʼaneʼ, tul chʼixvebʼaletz kuxh vet oʼe, atz chʼixvebʼalat kuxh vet exe inpaqte. 5Echetz bʼaʼn sinvatz uvaʼ qat injaq bʼaʼnil te oxvaʼl inqʼa qumol s-niman tetz Jesuus tiʼ ibʼaxabʼ bʼen sexoʼl. Tul bʼen ilotxh ex tiʼ imolox inqʼa lotxhbʼal, inqʼa alel vet etaʼn. Tul bʼanoq kuxh vet tutxh inqʼa lotxhbʼal etaʼn, inqʼa ayaʼlxh ekʼuul tiʼ etaqʼtaʼ. Pet jit yaʼlumal ex tiʼ taqʼaxeʼ.

Uvaʼs talt Paʼp te inqʼa niman tetz Jesuus uvaʼ laʼ ibʼan yaʼl tiʼ taqʼt inqʼa lotxhbʼal

6Toqetz val kaʼl u yol sete uvaʼ ech nik tal s-eche:

—Jaʼl uvaʼ yeʼxh jankʼal laʼ tava,

tul yeʼxhatetz jankʼal laʼ imola.

Pet jaʼl uvaʼ niimxh laʼ tava,

tul niimatetzxh laʼ imola,

—chich u yol.#Proveervios 11.24-25

7Echetz jununil ex, aʼ laʼ etaqʼ jankʼal uvaʼ laʼ tzaj tetaanima. Poro jit kaʼl ekʼuul laʼ etaqʼa. Atz jit yaʼl koqxh ex tiʼ etaqʼtaʼ. Tan nik ichiibʼ quBʼaal Tiuxh tiʼ jaʼl u xaol uvaʼ ayaʼlxh ikʼuul laʼ taqʼa. 8Tan sibʼ tiqleʼm u quBʼaal Tiuxh tiʼ toksal mam bʼaʼnil tetaanima tiʼ ilotxhox vemol. Tan quBʼaal Tiuxh laʼ bʼanon uvaʼ at kuxh kaqaayil sexeʼ laʼ ibʼana jankʼal uvaʼ laʼ saʼon sete. Tul exetz laʼ bʼanon veteʼ jatvatzul bʼaʼnla bʼanoʼm laʼ ebʼan tiʼ ilotxhox vemol. 9Tan at itxʼaqaʼm u xaol uvaʼ ayaʼlxh ikʼuul nik ilotxh vimol. Tan ech nik tal val u yol uvaʼ tzʼibʼamal ka t-viyolbʼal quBʼaal Tiuxh s-eche:

—QuBʼaal Tiuxh nik aqʼon lotxhbʼal

xoʼl inqʼa xaol.

Tul nik taqʼ tetz inqʼa meebʼaʼ.

Tul yeʼl iyaʼebʼal imotxebʼal laʼ tatin u xaol

uvaʼ, aʼ u jik nik ibʼan te vimol,

—chich u yol.#Saalmo 112.9

10Tan aʼ u quBʼaal Tiuxh nik aqʼon inqʼa iiya te inqʼa txhikol tetz. Atz aʼ nik aqʼon u etxhbʼubʼal te inqʼa nik etxhbʼun. Echatetz laʼ taqʼt quBʼaal Tiuxh etetze. Tul aʼl laʼ taqʼt tel quBʼaal Tiuxh u bʼaʼnil tetaanima tiʼ kam u jik nik ebʼan te inqʼa nik isaʼon kam s-te, eche laʼ ichʼij tatin u muʼbʼal etxhiko, tul sibʼ vet ivatz laʼ bʼen taqʼeʼ. 11Echetz jankʼal inqʼa bʼaʼnil laʼ ekʼul tiqʼabʼ u quBʼaal Tiuxh, tul laʼ utxhi laʼ etaqʼ mamala lotxhbʼal te inqʼa xaol tiʼ kam nik isaʼon s-te. Echetz tiʼ u mam lotxhbʼal uvaʼ toq etaqʼ te inqʼa qumol s-niman tetz Jesuus, uvaʼs laʼ bʼen qaqʼt ka s-te, tul mamala taʼntiuxh toq ikʼul quBʼaal Tiuxh s-tiʼ.

12Tul bʼenoq sete tiʼ, eche inqʼa lotxhbʼal uvaʼ nik etaqʼ te inqʼa qumol s-niman tetz Jesuus, tan toq motx txakunoq s-te tiʼ kam uvaʼ nik motx isaʼon s-te. Jitetz kuxh taʼne, pet toqat txakunoq tiʼ taqʼt inqʼa niman tetz Jesuus taʼntiuxh te quBʼaal Tiuxh s-tiʼ. 13Tan tiʼ velotxhoneʼ, laʼ oksalik iqʼij quBʼaal Tiuxh. Atz laʼat oksal iqʼij quBʼaal Tiuxh paqte tiʼ vekʼutxhtaʼ uvaʼ nik enima inqʼa bʼaʼnla txhaq yol tiʼ u quBʼaal JesuKriisto. Atz laʼat oksal iqʼij quBʼaal Tiuxh paqte, tiʼ uvaʼ ayaʼlxh ekʼuul nik etaqʼ inqʼa lotxhbʼal te inqʼa qumol s-niman tetz Jesuus, atz s-te s-kaqaayil. 14Tul laʼat inatxh inqʼa qumol s-niman tetz Jesuus quBʼaal Tiuxh setiʼ, inqʼa nik ichiibʼ setiʼ, tiʼ u mam bʼaʼnil uvaʼ nik taqʼ quBʼaal Tiuxh tetaanima. 15Echetz jankʼalxh oʼ, aqʼon taʼntiuxh te quBʼaal Tiuxh tiʼ vimam bʼaʼnil uvaʼ qat ibʼan s-qe tiʼ taqʼt tzaan u quBʼaal JesuKriisto s-quxoʼl, uvaʼ yeʼl quyol laʼ txhej s-tiʼ, tiʼ qaqʼt taʼntiuxh s-te.

Currently Selected:

2 Koriintios 9: ixlC

Highlight

Copy

Compare