2 Koriintios 7

1Echetz tiʼ inqʼa iyol quBʼaal Tiuxh uvaʼ alel ka s-qe setuchʼ, ex inqʼa nik inchiibʼ setiʼ, tul qutanbʼa ibʼanax jankʼal inqʼa paʼv. Echetz bʼaʼn vet u qaanxelal laʼ ibʼan vatz quBʼaal Tiuxh, eche invaʼq oksaʼm uvaʼ oqxh vet isaqale. Tul yeʼ laʼ paʼvin vet oʼ tiʼ ibʼanax inqʼa kantxhaqla tatxhaʼv u qutxhiʼoʼl, eche invaʼq oksaʼm uvaʼ yeʼl vet tzʼil s-tiʼ. Tul qubʼanvaq yaʼl, tiʼ uvaʼ tira laʼ qʼanbʼ oʼ kʼatz quBʼaal Tiuxh, tiʼ qujetxhtoʼk qibʼ s-kʼatza. Tul quxoʼva qupaʼvin vatz quBʼaal Tiuxh.#Efeesios 4.12

Uvaʼs talt Paʼp vichiibʼ tiʼ u titzʼat tibʼ inqʼa niman tetz Jesuus t-inqʼa paʼv tiʼ vinimat inqʼa yol uvaʼ tal Paʼp

2Kʼulvaqetz oʼ tuchʼxh etaanima, tan yeʼxhabʼil invaʼq ex nik qukʼaxbʼisa ex, atz yeʼxhabʼil invaʼq ex nik quyansa vetxumbʼal, atz yeʼxhabʼil invaʼq ex nik qutxhok txumbʼal setiʼ, tiʼ qujaqt kam sete. 3Tan kamal at xaol uvaʼ, ech nik tale s-qiʼ. Pet toq val sete uvaʼ jit eqʼij nik veesa tuchʼ inqʼa yol uvaʼ nik valeʼ. Tan yaʼnxh vall sete uvaʼ tira at ex t-qaanima, kʼuxhetz tzum laʼ qatin vatz u txʼavaʼ setuchʼ, atz kʼuxhetz tzum laʼ qukameʼ. 4Tul tira nik ikʼuqeʼv inkʼuul setiʼ. Tul tira nik inchiibʼ setiʼ. Atz tira nik etaqʼ intial. Tul tira at chiibʼichil t-vaanima etaʼn, kʼuxh nik qupal t-kalabʼaq itzaʼlal.

Uvaʼs ichiibʼ Paʼp tiʼ vijikbʼat tibʼ inqʼa niman tetz Jesuus tiʼ itzʼibʼat bʼen Paʼp u uʼ s-te

5Toqetz intzoqpisa tel talax vinyol tiʼ kame uvaʼ palk oʼ uvaʼs qutzaj t-Trooas, tul aqʼbʼ oʼ tuulbʼal Masedoonia. Tul yeʼxxh ilanoq inbʼeeq oʼ s-tuulele. Tan bʼeeno kuxh qat motx qupal titzaʼlal. Tan nikich motx itxhiʼkʼuula oʼ jolol xaol. Tul taʼn koqe, pet tʼolonyich kuxh vet qaanima t-xoʼval tiʼ inqʼa itzaʼlal uvaʼ nikich palk oʼ. Atz eyich kuxh qaanima setiʼ inpaqte.{*}#7.5 Tuulbʼal u versiikulo uvaʼa, antxh nik pal tiqʼo Paʼp iviʼ yol tiʼ itxhokox Tiito tu tenam Trooas uvaʼ nik tal tu 2 Koriintios 2.13. Tul antxh uvaʼe nik tal t-Vibʼanoʼm inqʼa Apoostol 20.1. Tuulbʼal inqʼa yol inqʼaa, tan at uvaʼ nik tal Paʼp ‹oʼ,› tul at nik tal Paʼp ‹in.› Tan at txhaqpaqul uvaʼ imolich tibʼ Paʼp tuchʼ Siilas, atz maq tuchʼ Tiito, atz maq tuchʼ Luk. Tul at uvaʼ ijunalichetz kuxh vet Paʼp. Tul mamala itzaʼlal nikich palk Paʼp, tan nikich toleʼv Paʼp tiʼ ibʼokʼtziil inqʼa xaol tiʼ taqʼt ka inatxhkʼuulal inqʼa bʼitichla tiuxh, atz nikichat ibʼoktzii Paʼp jolt inqʼa xaol, inqʼa nikich niman u tuqʼeʼybʼal inqʼa tij imam Israeel. Echetz mamala txhiʼanchil nikich ibʼan vet inqʼa iqʼesal tiʼ Paʼp. Tan aʼ nik tulsa Paʼp s-kʼuul kame u vavu ibʼ ibʼan inqʼa xaol tu tenam Eefeso uvaʼ nik tal Luk t-Vibʼanoʼm inqʼa Apoostol 19.23-41. Tul aʼ nik tulsa Paʼp s-kʼuul kame u txumbʼal uvaʼ nikich itxhok inqʼa tij imam Israeel tiʼ iyatzʼax el Paʼp uvaʼ nik tal t-Vibʼanoʼm inqʼa Apoostol 20.1-3. 6Pet aʼetz vet quBʼaal Tiuxh kʼuqbʼan qukʼuul uvaʼs tul Tiito s-quxoʼl. Tan nik ikʼuqbʼa quBʼaal Tiuxh ikʼuul inqʼa xaol, inqʼa nik motx tiqʼo kuʼl tibʼ vatz quBʼaal Tiuxh. 7Ajtetz vil vet Tiito, tul yekichxh taqʼ vet qutial. Poro jitetz kuxh taʼne. Pet chiibʼ oʼ tiʼ tabʼileʼ uvaʼ etaqʼ itial Tiito. Tul chiibʼat in tiʼ vootzaqitaʼ uvaʼ sibʼxh etaanima s-viʼ. Tul vabʼiat setiʼ uvaʼ txumun ex tiʼ vetxumunsat in tiʼ valt inuqul vepaʼv sete. Atz vabʼiat setiʼ uvaʼ ayaʼlxh ekʼuul s-viʼ. Echetz ajt vabʼi vet inqʼa yol uvaʼ tal Tiito s-ve, tul aʼl telxh inchiibʼ veteʼ.

8Poro kʼuxh intxumunsa ex tuchʼ inqʼa yol uvaʼ vaqʼ bʼen tu uʼ sete, poro yeʼxhkam nik itxhoʼn vet s-ve s-txheel. Pet aloq txhoʼn s-ve uvaʼs vaqʼt bʼen u uʼ sete s-bʼaxa, tan vootzaqle uvaʼ laʼich itxumunsa ex. Aloq alax vet s-ve uvaʼ yeʼxh jatvaʼl qʼij txumun ex taʼn. 9Pet niketz inchiibʼ tiʼ intzʼibʼat bʼen u uʼ sete. Poro jit aʼ nik chiibʼik in tiʼ vintxumunsat ex tuchʼ inqʼa yol. Pet aʼ nik chiibʼik in, tiʼ uvaʼ txumun ex tiʼ inqʼa yeʼbʼaʼn uvaʼ nik ebʼaneʼ, tul motx etitzʼa vet etibʼ t-inqʼa epaʼv. Tul nik ibʼen s-ve uvaʼ quBʼaal Tiuxh saʼon tul txumun ex. Tul enatxha uvaʼ jit aʼl inkʼaxbʼisat ex, pet aʼl bʼaʼn ibʼen sete. 10Tan eche u txumuʼm uvaʼ ibʼan inqʼa xaol tiʼ inqʼa yeʼbʼaʼn uvaʼ nikich ibʼaneʼ, tan quBʼaal Tiuxhe saʼon. Tan aʼl titzʼat tibʼ inqʼa xaol t-inqʼa ipaʼv taʼn. Echetz laʼ motx ichitpe tiʼ yeʼ ibʼen tu kʼaxkʼo tiʼ inqʼa ipaʼv. Tul yeʼxhabʼiletz laʼ txhoʼn vet s-te tiʼ vitxumun tiʼ titzʼat tibʼ tiʼ inqʼa ipaʼv. Pet u txumuʼm uvaʼ nik ibʼan inqʼa xaol, inqʼa yeʼ ootzaqin tetz Tiuxh, inqʼa yeʼ nik titzʼa tibʼ s-tiʼ, tan aʼetz u txumuʼme uvaʼ, aʼ u kamchil kʼaqel vet taʼn uvaʼ yeʼl iyaʼebʼal imotxebʼal.

11Pet bʼenoq sete kam qat taqʼ u txumuʼm uvaʼ quBʼaal Tiuxh qat saʼon. Tan aʼ qat ex taqʼ sete uvaʼ ayaʼlxh ekʼuul qat ejalpu vet vetxumbʼal t-inqʼa paʼv uvaʼ nikich ibʼanax sexoʼl. Atz aʼ qat ex taqʼ sete uvaʼ ayaʼlxh ekʼuul tiʼ ibʼanax u bʼaʼn vatz quBʼaal Tiuxh. Atz lakp vet eviʼ tiʼ u paʼv uvaʼ utxh sexoʼl. Atz nik exoʼv te u kʼaxbʼichil uvaʼ laʼ taqʼ quBʼaal Tiuxh. Atz aʼ ex taqʼ vet sete uvaʼ atxh vet etaanima s-viʼ. Tul aʼ tzʼeʼyich vet ex tiʼ inimal inqʼa yol tiʼ iyaʼsal u paʼv uvaʼ nikich tutxh sexoʼl. Atz tiʼ jankʼalxh uvaʼ qat ebʼana, tan qat ekʼutxha uvaʼ qat ejikbʼixsa vetxumbʼal, tul yeʼl vet inqʼa paʼv qat ebʼana uvaʼ nikich ibʼanax sexoʼl, eche itxaqʼp invaʼq bʼuʼq uvaʼ tzʼilxhtuʼ.

12Tul kʼuxhetz intzʼibʼa bʼen inqʼa yol tu uʼ sete s-bʼaxa, poro jit tiʼ u xaol, u bʼanol tetz u yeʼbʼaʼn, vaqʼvat bʼen, atz jit tiʼ u xaol uvaʼ bʼanax u yeʼbʼaʼn s-te. Pet vaqʼ bʼen inqʼa yol tu uʼ, tiʼ uvaʼ laʼ bʼen sete uvaʼ at etaanima tiʼ u qiqleʼm vatz quBʼaal Tiuxh. 13Tiʼetz uvaʼ qat ebʼan kam uvaʼ val sete, tul qat etaqʼ intial s-tuchʼ.

Poro jitetz kuxh taʼne, pet nik inchiibʼ tiʼ u chiibʼichil uvaʼ iqʼomich vet taʼn Tiito, uvaʼ ul tal vet Tiito s-quxoʼl. Tan ayaʼlxh ex nikich kʼuqbʼan ikʼuul Tiito tuchʼ u bʼaʼnla txumbʼal uvaʼ nikich ebʼaneʼ.

14Tuulbʼaletz uvaʼ yeʼnaqich bʼenoq Tiito sexoʼl, tul val te Tiito uvaʼ tira nikich inchiibʼ setiʼ, tiʼ vebʼaʼnla txumbʼal. Antxhtuʼ. Ajt vabʼi vet inqʼa yol setiʼ, tul val veteʼ uvaʼ yeʼl bʼak in nik inchʼixvisaleʼ. Tan jankʼalxh inqʼa yol uvaʼ intzʼibʼa bʼen sete, tan inuqulxhtuʼ. Tul echat kuxh voksat eqʼije vatz Tiito, tan inuqulxh uvaʼ nik ebʼaneʼ. 15Tul aʼletz tira at tel taanima Tiito setiʼ uvaʼs nik tulsat Tiito s-kʼuul kame venimat inqʼa yol uvaʼ qal bʼen sete, jankʼalxh ex inqʼa niman tetz Jesuus tu tenam Koriinto. Atz tira aʼlat atel taanima Tiito setiʼ, tiʼ vekʼult Tiito tuchʼ bʼaʼnil. Tan ajt aqʼbʼ Tiito sexoʼl, tul atich tatin Tiito sevatz. 16Echatetz kuxh ine, tan nikat inchiibʼ setiʼ. Tan nik inkʼuqbʼa inkʼuul uvaʼ toq ebʼan jankʼal u bʼaʼn vatz quBʼaal Tiuxh.

Currently Selected:

2 Koriintios 7: ixlC

Highlight

Copy

Compare