Hèbérù ŋa 8
8
Ńnɔ́-ìmɔ̀lɛ̀-ìkã́ã̀nyì#ɛ́, Yèésù ní wà gbè fú wa ńɖi-Ɔ̀ɖáyé#ɛ́
1Iŋɛ́ yèé kpã́dzú lárè ńnɔ́-afɔ̀ yèé àa wà fɔ̀#ɛ́ ní dzɛ́ ní àa nɛ́ ìrɔ́-ɔ̀gã́-atsɛbɔ-Ɔ̀ɖáyé ŋa† yèé bɛ́. Ó dzokó si nɔ́ɔ̀rɔ̃ náàwóòtã́-àntã̀-oyè-Ɔ̀ɖáyé, ɛnɛ yèé iŋɛ́-kã̀ kpókpó nɔ́ɔ̀rɔ̃ òŋu ńǹtalɛ̀ kò tó#ɛ́. 2Ó wà tsitsɛ́-ɔ̀gã́-atsɛbɔ-Ɔ̀ɖáyé ŋa nɔ́gbà-Ɔ̀ɖáyé. Ɔgbà-ilé-Ɔ̀ɖáyé†#ɛ́, ilé-Ɔ̀ɖáyé-òtítɔ́ yèé wà nɔ́ɔ̀rɔ̃#ɛ́ ni. Ilé#ɛ́, kò tsi ɔ̀nyà ní mɔ́wɔ́-ara‐ɛ̀ tseé#ɛ́, Ɔlɔ́dzɔ́ ni. 3Ɔ̀gã́-atsɛbɔ-Ɔ̀ɖáyé ŋa ɔ̀kã̀lɔ́ɔ̀kã̀ kpó, à náa tsã̀ã́ ní kó wà tsɛbɔ òŋu ɔ̀yà ŋa fú Ɔ̀ɖáyé ni. Iŋɛ́ yèé tse tsí ó wà ní ɔ̀gã́-atsɛbɔ-Ɔ̀ɖáyé tiwa gbo kó mú iŋɛ́-kã̀, tsí ń tsɛbɔ fú Ɔ̀ɖáyé#ɛ́ ńnɛ̀ɛ́. 4Ó má wà ńǹtalɛ̀ bí, kàá tì nyáa dzɛ́ atsɛbɔ-Ɔ̀ɖáyé† gìɖì. Iŋɛ́ yèé tse#ɛ́, atsɛbɔ-Ɔ̀ɖáyé ŋa ti wà ńǹtalɛ̀ bí ná, tsí à wà tsɛbɔ fú Ɔ̀ɖáyé kíbí ó wà nɛ́kpa-Mɔ̀ɔ́sè† gbà#á. 5Tsí bí ò rí ńlé yèé à náa sɛ̃ Ɔ̀ɖáyé#ɛ́ gé, ni ò wà rí ilé-Ɔ̀ɖáyé yèé wà nɔ́ɔ̀rɔ̃ gbo#ɛ́ ńnɛ̀ɛ́. È tédzú afɔ̀ yèé Ɔ̀ɖáyé fɔ̀ fú Mɔ̀ɔ́sè#ɛ́. Mɔ̀ɔ́sè bàkó tse ilé-Ɔ̀ɖáyé, tsí Ɔ̀ɖáyé wà fɔ̀ fúu ní: “Ó wà ní kó tse iŋɛ́ ŋa#á kpó, tsí kó wà kíbí yèé òŋu kɛ́, tsí ń ɖíre fúu#ɛ́ bɛ́ tútútú ńǹwèrè yèé ó wà ńǹtá-òkè si#ɛ́.”#8:5 Ìwé-Fúfùɖá 25:40 (Exode 25:40) 6Ó ɖi báàyí#ɛ́, itsɛ́-atsɛbɔ-Ɔ̀ɖáyé yèé Ɔ̀ɖáyé ń bɔwɔ́-Yèésù#ɛ́, itsɛ́#ɛ́ kpàtà lé ńǹtá-itsɛ́-atsɛbɔ-Ɔ̀ɖáyé-àtíbɔ̀ ŋa. Bɛ́ɛ̀ ké ní ìmɔ̀lɛ̀-ìkã́ã̀nyì† yèé Yèésù ɖá si náàŋírĩ-Ɔ̀ɖáyé òŋu ɔ̀nyà méèdzì#ɛ́, ó sã̀ láre ìmɔ̀lɛ̀-àtsɛ̃̀tsɛ̃̀†#ɛ́ sã́ŋú sã́ŋú#ɛ́. Ó sã̀ lárè, iŋɛ́ yèé tse#ɛ́, àlé yèé ŋa Ɔ̀ɖáyé ta ńǹwèrè yèé ó tseé#ɛ́, à sã̀ láre ti ìmɔ̀lɛ̀-àtsɛ̃̀tsɛ̃̀ ŋa.
7Ó má dzɛ́ ní ìmɔ̀lɛ̀-àtsɛ̃̀tsɛ̃̀#ɛ́ nyáa tsitsɛ́ yèé wo odzú‐ɛ̀#ɛ́ dzálɛ̀ kpó, kàá bèrè ní Ɔ̀ɖáyé kó tse òmírɛ̃̀ ró. 8Nóòtítɔ́#ɛ́, ìmɔ̀lɛ̀-àtsɛ̃̀tsɛ̃̀#ɛ́ kò tsitsɛ́ yèé wo odzú‐ɛ̀#ɛ́ dzálɛ̀ kpó, tsí Ɔ̀ɖáyé wà fɔ̀ɔ́ ńnɔ́-Ìwé‐ɛ̀. Ó wà bá tɛ̀ɛ̀ ŋa fɔ̀, tsí wà fɔ̀ ní:
“Èmi, Ɔlɔ́dzɔ́, ǹ wà wí fú ŋɛ́ ní àsòkò-kã̀ bàa,
tsí màa tse ìmɔ̀lɛ̀ titɔ̃-kã̀ bá ɛnɛ-ìlú-Ìsàràyɛ́lì† ŋa
òŋu ɛnɛ-ìlú-Yúɖà† ŋa.
9Kàkó wà kíbí ìmɔ̀lɛ̀ yèé ǹ tse
bá gbágbóǹgbàgbò-ŋà ŋa wáa lɔ#ɛ́.
Ǹ tse ìmɔ̀lɛ̀ nyɛ̀ŋɛ̀ bá ŋa ńǹwèrè yèé ǹ fa ɔ̀kpá-ɔwɔ́-ŋa,
tsí gbɛ̃́ ŋa fùɖá ńlɛ̀-Èdzíkpítì†#ɛ́ ni.
Ó ɖi, iŋɛ́ yèé ìmɔ̀lɛ̀#ɛ́ wà fɔ̀#ɛ́, à kò tseé lɔ,
tsí èmi gbo, ǹ sɛ̃̀ náànyì-ŋa.
10Ó ɖi èmi, Ɔlɔ́dzɔ́, ǹ wà wíìnyɛ̀ fú ŋɛ́,
tsí ǹ wà mú ìrɔ́-ìmɔ̀lɛ̀ yèé ǹ bàkó wáa tse
bá ɔma-Ìsàràyɛ́lì ŋa nɔ́ɔla#á,
tsí wà ń ŋà ŋɛ́.
Màa mú iŋɛ́ yèé ŋa ǹ fɔ̀ fú ŋa ní ká tse#ɛ́, tsí ń si néwo-ŋa,
tsí nákó wà kíbí à kɔ ŋá si ńǹsérè-ŋa bɛ́.
Màa dzɛ́ Ɔ̀ɖáyé-ŋa,
tsí à nákó dzɛ́ tèmi ŋa.
11Kàkó bèrè ní ɔ̀kã̀-ŋà ŋa kó tsɛ̀kɔ́ fú ìnàbí‐ɛ̀,
tsí fɔ̀ fúu ní ó wà ní kó ma Ɔlɔ́dzɔ́ ró.
Ó ɖi àŋa kpó, à nákó mà mí,
ti ńmaɖé lɔ nónùgbó,
àŋa kpó nákó mà mí.
12Màa rí ànyínɔ́ fú ŋa ti nára-íbàɖí yèé à tse ŋa#á,
tsí ǹ kàkó mú àbi yèé à dzɛ ŋa#á, tsí ń tsitsɛ́ tse.”#8:12 Ìwé-Yèrèmíyà 31:31-34 (Jérémie 31:31-34)
13Ńbɛ̀ɛ́, kíbí Ɔ̀ɖáyé wà fɔ afɔ̀-ìmɔ̀lɛ̀-ìkã́ã̀nyì-kã̀#á, ó wà fɔ̀ ní ìmɔ̀lɛ̀-àtsɛ̃̀tsɛ̃̀#ɛ́ kò wà nɔ́ɔ̀nà-iŋɛ́-kã̀ ró. Tsí àwa kpó, àa mà ní bí iŋɛ́-kã̀ wáa ɖi gbígbó, tsí kò wà nɔ́ɔ̀nà-iŋɛ́-kã̀ ró#ɛ́, ɔdzɔ́-ikú‐ɛ̀ kò tì dzɛ̃̀ si ró.
Currently Selected:
Hèbérù ŋa 8: ngl
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
