Itsɛ́ 7

Sètèfánì wà nya òkpì-afɔ̀ fú onùgbó-àkpɛ̀dzɔ́-ɔma-Ìyúɖà ŋa

1Ńbɛ̀ɛ́, ɔ̀gã́-atsɛbɔ-Ɔ̀ɖáyé ŋa† tsí arũ, tsí wà bere Sètèfánì ní: Afɔ̀ yèé à wà fɔ̀ nára‐ɛ̀ ŋa#á fee, òtítɔ́ nàmí òɖòbò ni?

2Tsí Sètèfánì gbo dzɔ́ŋù fú ŋa ní: Boba-mi ŋa, ìnàbí-mi ŋa, ɛ̀ŋɛ kpó è rɛ̃tígbè, tsí e gbɔ́. Dzɔ̀ɔ́ dzɔ̀ɔ́#ɛ́, gbágbóǹgbàgbò-àŋa Àbàràhámì† wà ńlɛ̀-Mɛ̀sòkpòtámì si tã́ná kó wáa gbé ńǹlú-Hárã̀. Ńǹwèrè nyɛ̀ŋɛ̀#ɛ́, Ɔ̀ɖáyé Olí-iyì mú ara‐ɛ̀ ŋàá, 3tsí wí fúu ní: “Kó tsí ńǹlú#ɛ́ náàŋírĩ tɛ̀ɛ̀ ŋa, tsí kó lɔ ńǹlú-òmírɛ̃̀-kã̀ yèé òŋu nákó ɖíre fúu#ɛ́.”#7:3 Ìwé-Ìkpìnkpìlɛ̀-ayé 12:1 (Genèse 12:1) 4Ńbɛ̀ɛ́, Àbàràhámì ǹɖe ńlɛ̀-ɛnɛ-Kàlíɖì ŋa, tsí wáa lɔ káà gbé ńǹlú-Hárã̀. Kíbí boba‐ɛ̀ kú#ɛ́, Ɔ̀ɖáyé wí fúu ní kó ǹɖe bɛ̀ ró, tsí kó wáa gbé ńǹlú ńbí àŋa wà si nɔ́mbɛ́ báàyí#ɛ́. 5Ɔ̀ɖáyé kò fúu ńǹɖì-kã̀ kpókpó ní kó dzɛ́ tɛ̀ɛ̀. Kò tì fúu ńǹɖì-kã̀ gìɖì, tsí kó tsédzú tó àtɛ́sɛ̀ bɛ́. Ó ɖi, ó tàlé fúu ní ìlú#ɛ́ kpó nákó wáa ɖi tɛ̀ɛ̀, tsí ɔmalɔ́ma‐ɛ̀ ŋa nákó wáa gba ìlú#ɛ́ gbé, tsí nákó ɖi tàŋa bí ó kú tã́. Ńǹwèrè nyɛ̀ŋɛ̀#ɛ́, Àbàràhámì kò bíma-kã̀ kpókpó gìɖì si, tã́ná Ɔ̀ɖáyé sì wí fúu bɛ́ɛ̀.#7:5 È káà kã Ìwé-Ìkpìnkpìlɛ̀-ayé 12:7, 17:8 (Genèse 12:7, 17:8). 6Tsí ó tɔ́ wí fúu ró ní: “Nɔ́dzɔ́-kã̀, ɔmalɔ́ma‐ɛ̀ ŋa nákó lɔ káà gbé ńǹlú-àledzò-kã̀. À nákó gbé bɛ̀ títí wáa ɖi arú, tsí ɔlá-ŋa nákó tsoró bá ŋa títí fú ɔɖɔ̃́ irɛ̃́wó (400).#7:6 Ìwé-Fúfùɖá 3:12 (Exode 3:12) 7Ó ɖi, òŋu nákó kpɛdzɔ́ bá ɔ̀nyà-ìlú yèé ŋa nákó mú ŋa tse arú bɛ́ɛ̀#ɛ́. Tsí náànyìwà#á, à nákó wáa ǹɖe ńǹlú#ɛ́, tsí wáa sɛ̃ òŋu ńbí àŋa wà si yí.”#7:7 Ìwé-Ìkpìnkpìlɛ̀-ayé 15:13-14 (Genèse 15:13-14)

8Ńbɛ̀ɛ́, Ɔ̀ɖáyé tse ìmɔ̀lɛ̀ bá Àbàràhámì. Tsí ìsèdzè-ìmɔ̀lɛ̀#ɛ́ ní dzɛ́ okó ɖíɖá†#á. Ńnɛ̀ ní Àbàràhámì ǹɖe, tsí bí Ìsákà†, tsí ɖákó fúu nɔ́dzɔ́-ɛ̀kɛ́ɛdzɔ‐ɛ̀#ɛ́. Bɛ́ɛ̀ ké ní Ìsákà gbo ǹɖe, tsí ɖákó fú Yàkúbù†#ɛ́, tsí Yàkúbù gbo ǹɖe, tsí ɖá fú gbágbóǹgbàgbò-àŋa máàméèdzì ŋa#á ńnɛ̀ɛ́.

9Náànyì-bɛ́ɛ̀ ró#ɛ́, gbágbóǹgbàgbò-àŋa ŋa dzowú-ɔmànà-ŋa Yòsɛ́fù†, tsí à tàá, tsí à ràá lɔ ńlɛ̀-Èdzíkpítì†. Ó ɖi, Ɔ̀ɖáyé wà náànyì‐ɛ̀ tó bɛ́ɛ̀, 10tsí nyàá ǹɖe ńnɔ́-òfò‐ɛ̀ ŋa kpó, tsí fúu ńfɛ̀ɛ́nɔ́ gbo títí iŋɛ́‐ɛ̀ dzɔdzú-Fárɔ̃̀†, ólú-Èdzíkpítì. Tsí Fárɔ̃̀ múu dzɛ ɔ̀gã́-ilɛ̀-Èdzíkpítì#ɛ́ kpó, tsí múu dzɛ aríìtá-kpàtá‐ɛ̀ gbo kpó.

11Ńbɛ̀ɛ́, ebi wáa kpé dzídzà ńlɛ̀-Èdzíkpítì#ɛ́ òŋu ńlɛ̀-Kànàŋá gbo kpó, tsí ɔ̀nyà ŋa kpó wà ńǹréré lákṹ-kã̀ si. Gbágbóǹgbàgbò-àŋa ŋa kò ma iŋɛ́ yèé ká dzɛ#ɛ́ gìɖì ró. 12Tsí Yàkúbù gbɔ́ ní ìdzɛ wà néÈdzíkpítì si, tsí ó rã́ gbágbóǹgbàgbò-àŋa ŋa lɔ bɛ̀, tsí ká káà ra dzídzɛ wá. À lɔ bɛ̀ àrìkã̀, 13tsí kíbí à sɛ̃̀ lɔ nóláànkéèdzì‐ɛ̀#ɛ́, Yòsɛ́fù mú ara‐ɛ̀ ɖíre fú ìnàbí‐ɛ̀ ŋa. Ńbɛ̀ ní Fárɔ̃̀ ma ɔ̀nyà-ìlú yèé Yòsɛ́fù gbo dzɛ́#ɛ́.

14Ńbɛ̀ɛ́, Yòsɛ́fù rã́kɔ̀ wáa lɔ ní ká káà gbɛ̃́ boba-òŋu Yàkúbù wá òŋu ɔ̀nyà-kpáfɛ‐ɛ̀ ŋa kpó. Àŋa kpó, à wà dzɛ́ ɔ̀nyà mɛ́ɛrú ɖí nɔ́gɔ́ɔrɛ̃ (75). 15Tsí Yàkúbù ǹɖe, tsí lɔ káà gbé néÈdzíkpítì òŋu tɛ̀ɛ̀ ŋa kpó. Ńbɛ̀ ní ó kú#ɛ́. Ńbɛ̀ ké ní gbágbóǹgbàgbò-àŋa ŋa gbo kú#ɛ́. 16Tsí à wáa kɛ́ òkú-ŋà ŋa wáa rì ńǹlú-Sìkɛ́mì nérì-Àbàràhámì. Àbàràhámì ra érì#ɛ́ nɔ́wɔ́-ɔma-Hàmɔ́rì ŋa ni.

17Kíbí ìwèrè wáa tó, tsí Ɔ̀ɖáyé kó sã àlé yèé ó ta si fú Àbàràhámì wáa lɔ#ɛ́, ɔma-Ìsàràyɛ́lì† ŋa ti ɖi kpíkpɔ̀ máa néÈdzíkpítì. 18Tsí ólú-òmírɛ̃̀-kã̀ wáa kpé oyè dzídzɛ si ńǹtá-ìlú#ɛ́. Òŋu kò ma afɔ̀-kã̀ kpókpó ti nára-Yòsɛ́fù.#7:18 È káà kã Ìwé-Fúfùɖá 1:18 (Exode 1:18). 19Ólú#ɛ́ rú tàŋa ŋa, tsí tsoró bá ŋa. Oró#ɛ́ ní dzɛ́ ní ó dzɛ̃̀ŋù bá ŋa ní bí à bíma titɔ̃-kã̀ ni ká nyawɔ́ nára‐ɛ̀, tsí kó kú. 20Ńǹwèrè nyɛ̀ŋɛ̀ ké ní à bí Mɔ̀ɔ́sè† gbo#ɛ́. Ɔmɔ̀tsɔ́‐ɛ̀ kò wà, tsí ó ɖìirí fú Ɔ̀ɖáyé gbo tó bɛ́ɛ̀. À sɛ̃̀ɛ̃́ fú òtsùkpá mɛ́ɛta ńɖi-boba‐ɛ̀. 21Náànyì-òtsùkpá mɛ́ɛta#á, à nyawɔ́ nára‐ɛ̀, tsí ɔma-Fárɔ̃̀ ɔnɔbɛ̃̀ɛ̃-kã̀ káà tàrèé, tsí gbàá si ńɖɔ̀-ara‐ɛ̀, tsí sɛ̃̀ɛ̃́ kíbí ɔma tòŋu ká‐ɛ̀ bɛ́. 22Tsí Mɔ̀ɔ́sè gba ɛ̀kɔ́ òŋu ìrã̀ã́mà kpó nɔ́wɔ́-ɛnɛ-Èdzíkpítì ŋa. Ńbɛ̀ɛ́, ikpá lákṹ-kã̀ wà náfɔ̀‐ɛ̀ ŋa òŋu ńŋɛ́ tsítse‐ɛ̀ ŋa.

23Kíbí Mɔ̀ɔ́sè nɛ́ ɔɖɔ̃́ ogóòdzì#ɛ́, ó tsèsérè ní òŋu kó lɔ káà rí ìnàbí-òŋu ŋa, ɔma-Ìsàràyɛ́lì ŋa. 24Kíbí ó lɔ#ɛ́, ó rí ɔma-Èdzíkpítì-kã̀, tsí ó wà tsoró bá ɔma-Ìsàràyɛ́lì-kã̀. Ńbɛ̀ɛ́, ó wò ní òŋu kó dzà gbè fú ɔma-Ìsàràyɛ́lì#ɛ́, tsí ó kpa ɔma-Èdzíkpítì#ɛ́ nóòkú. 25Ó ɖédzú bí òŋu tse bɛ́ɛ̀ ná, ni ɔma-Ìsàràyɛ́lì ŋa nákó mà ní Ɔ̀ɖáyé bòkó tse tsí òŋu kó gbà ŋá dzɔ̀ɔ́ ni. Ó ɖi, à kò tì gbɔ́ òkpì‐ɛ̀ fúu. 26Ńlɛ̀ má‐ɛ̀, tsí ɔma-Ìsàràyɛ́lì ŋa méèdzì wà dzà, tsí Mɔ̀ɔ́sè lɔ káà bá ŋa. Ńbɛ̀ɛ́, ó wò ní òŋu kó làdzà fú ŋa, tsí afɔ̀ kó tã́. Tsí ó ní: Ídza-mi ŋa! Ìnàbí ŋa ní è dzɛ́#ɛ́ nɔ̀! Kí tse tsí è wà tsoró bá ara-ŋɛ́ ŋa bɛ́ɛ̀?

27Ńbɛ̀ɛ́, ɛnɛ yèé wà tsoró bá enìkéèdzì‐ɛ̀#ɛ́ téle Mɔ̀ɔ́sè lɔ nákpálà-kã̀, tsí wà bèrèé ní: Yèésí tsɛdzɔ́‐ɛ̀ ńnɛ̀? Nɛ̀ɛ́ múu dzɛ ɔ̀gã́ si nárũ-àŋa ní kó wáa kpɛdzɔ́ fú àŋa? 28Ó ɖi, ó wà wo kó kpa òŋu nóòkú kíbí ó kpa ɔma-Èdzíkpítì nyɛ̀ŋɛ̀ nɔná#á niì?

29Kíbí Mɔ̀ɔ́sè gbɔ́ afɔ̀ nyɛ̀ŋɛ̀ ŋa gé#ɛ́, ó sá lɔ ńlɛ̀-òmírɛ̃̀-kã̀, tsí káà gbé bɛ̀. À náa kpe ilɛ̀#ɛ́ ní Màdìyánì. Ó gbé bɛ̀, tsí bíma ɔnɔkɛ̃̀ɛ̃ méèdzì.

30Ɔɖɔ̃́ ogóòdzì náànyì-bɛ́ɛ̀#ɛ́, Mɔ̀ɔ́sè wà nɔ́ɔ̀ɖã̀ si sɔ́má-òkè-kã̀. À náa kpe òkè#ɛ́ ní òkè-Sìnàyí, tsí adzítsɛ́-ɔ̀rɔ̃†-kã̀ mú ara‐ɛ̀ ŋàá náàŋírĩ-sùyɛ̀-kã̀. Sùyɛ̀#ɛ́ wà gbã̀ bìlàbìlà, tsí adzítsɛ́-ɔ̀rɔ̃#ɛ́ wà náàŋírĩ‐ɛ̀ si. 31Kíbí Mɔ̀ɔ́sè ríi bɛ́ɛ̀#ɛ́, ó mùú. Tsí ó sɔ́má-iŋɛ́#ɛ́, tsí kó rí òtítɔ́‐ɛ̀ rere. Gbòkã́ gé#ɛ́, ó gbɔ́ oŋù-Ɔlɔ́dzɔ́, tsí ó wà wí fúu ní: 32Èmi ní dzɛ́ Ɔ̀ɖáyé yèé gbágbóǹgbàgbò-ɛ̀ɛ ŋa sɛ̃̀ wáa lɔ dzɔ̀ɔ́ dzɔ̀ɔ́#ɛ́. Èmi ní dzɛ́ Ɔ̀ɖáyé yèé gbágbóǹgbàgbò-ɛ̀ɛ Àbàràhámì òŋu Ìsákà má nára-Yàkúbù sɛ̃̀ wáa lɔ#ɛ́.

Gbòkã́#á, ɛ̀ɖɔ̃̀ ɖá Mɔ̀ɔ́sè, tsí ó wà ŋá kpó kpàkpàkpà, tsí kò ɖɔ́ɔ̀rɔ̀‐ɛ̀ sɔ ró ní òŋu kó wo òtítɔ́-iŋɛ́#ɛ́ ró. 33Tsí Ɔlɔ́dzɔ́ wí fúu ní: Kó bɔ́ kpákò‐ɛ̀ ŋa ǹɖe nɛ́sɛ̀. Ó ɖi, ìɖì ńbí ó ɖóro si#ɛ́, ìɖì-Ɔ̀ɖáyé ni. 34Tsí Ɔlɔ́dzɔ́ tɔ́ wí fúu ró ní: Ìɖéǹɖè#ɛ́, òŋu rí kíbí à wà tsoró bá ɔma-òŋu ŋa ńlɛ̀-Èdzíkpítì gbà#á. Tsí òŋu wà gbɔ́ igbe-ŋa ńnɔ́-ìréré yèé à wà si#ɛ́. Ńnɛ̀ ní òŋu wá, tsí bòkó wáa gbà ŋá dzɔ̀ɔ́#ɛ́. Báàyí#ɛ́, kó ǹɖe, tsí kó sɛ̃̀ dzì nɔ́ɔ̀nà-ilɛ̀-Èdzíkpítì. Ó ɖi, òŋu, Ɔlɔ́dzɔ́ ní wà bɛ̀ɛ́#ɛ́.#7:34 È káà kã Ìwé-Fúfùɖá 2:14–3:10 (Exode 2:14–3:10).

35Ńbɛ̀ɛ́, Sètèfánì wà fɔ̀ fú ŋa ró ní: Mɔ̀ɔ́sè yèé ɔma-Ìsàràyɛ́lì ŋa kɔ̀ wáa lɔ, tsí bèrèé ní: Nɛ̀ɛ́ múu dzɛ ɔ̀gã́ ní kó wáa kpɛdzɔ́ fú àŋa#á? Mɔ̀ɔ́sè#ɛ́ ké ní Ɔ̀ɖáyé bɛ̀ wá#á. Gbà ńǹtá-adzítsɛ́-ɔ̀rɔ̃ yèé ó rí ńnɔ́-sùyɛ̀#ɛ́, Ɔ̀ɖáyé tsã̀ã́, tsí múu dzɛ ɔ̀gã́, tsí ní kó gbà ŋá dzɔ̀ɔ́. 36Ìɖéǹɖè#ɛ́, Mɔ̀ɔ́sè tse iŋɛ́-àwùsì lákṹ lákṹ ŋa ńlɛ̀-Èdzíkpítì, tsí gbɛ̃́ ɔma-Ìsàràyɛ́lì ŋa fùɖá. Kíbí à tó nóɖò tsítsédzú tɛ̀ŋgɛ̀lɛ̀ɛ̀ yèé à náa kpè ní Àhũ Kpikpa gbo#ɛ́, ó tse iŋɛ́-àwùsì ŋa. Bɛ́ɛ̀ ké ní ó tse iŋɛ́-àwùsì ŋa kíbí à gbé nɔ́ɔ̀ɖã̀ fú ɔɖɔ̃́ ogóòdzì#ɛ́. 37Mɔ̀ɔ́sè#ɛ́ ké ní wí fú ɔma-Ìsàràyɛ́lì ŋa wáa lɔ ní: Ɔ̀ɖáyé nákó tsã ɔ̀nyà-kã̀ náàŋírĩ-ɔma-ìlú-àŋa ŋa, tsí ɛnɛ nyɛ̀ŋɛ̀ nákó dzɛ́ agbáfɔ̀-Ɔ̀ɖáyé fɔ̀†, tsí nákó wà kíbí òŋu ká-òŋu bɛ́#ɛ́.#7:37 È káà kã Ìwé-Àkóro 18:15 (Deutéronome 18:15).

38Èkéèdzì‐ɛ̀#ɛ́, ńǹwèrè yèé ɔma-Ìsàràyɛ́lì ŋa náa kpérí má nɔ́ɔ̀ɖã̀ wáa lɔ#ɛ́, Mɔ̀ɔ́sè ké ní náa ɖóro náàŋírĩ-gbágbóǹgbàgbò-àŋa òŋu adzítsɛ́-ɔ̀rɔ̃ yèé náa wà wíìnyɛ̀ fúu ńǹtá-òkè-Sìnàyí#ɛ́. Òŋu ní náa wà gba afɔ̀ yèé ŋa náa fúnɛ náàyɛ̀#ɛ́ ti ńɖi-Ɔ̀ɖáyé, tsí wà ń fɔ̀ fú ŋa títí ó wáa tó ńɖi-àŋa gbo nɔ́mbɛ́#ɛ́.

39Tsí Sètèfánì tɔ́ wí fú ŋa ró ní: Gbágbóǹgbàgbò-àŋa ŋa kɔ̀, tsí à kò rɛ̃tígbè‐ɛ̀. Gìɖì#ɛ́, à télèé si nákpálà-kã̀, tsí wà wò ní àŋa kó sɛ̃̀ lɔ néÈdzíkpítì#ɛ́. 40Tsí à wí fú Àrɔ̃́nì† ní: Kó tse iŋɛ kã̀ŋa fú àŋa, tsí iŋɛ ŋa#á ká gbe ńwádzú fú àŋa, tsí wà gbɛ̃́ àŋa làkóò. Ó ɖi, Mɔ̀ɔ́sè, idza nyɛ̀ŋɛ̀ yèé gbɛ̃́ àŋa fùɖá néÈdzíkpítì#ɛ́, àŋa kò ma bí ó ɖà fáà.#7:40 È káà kã Ìwé-Fúfùɖá 32:1, 23 (Exode 32:1, 23).

41Ńǹwèrè nyɛ̀ŋɛ̀#ɛ́, à tse iŋɛ#ɛ́, tsí ó nɛ́ ìwànwà-ɔma-lalá tsígíɖí-kã̀ bɛ́, tsí à tsɛbɔ fúu. À dzɛ ɔɖɔ̃́, tsí táyè fú iŋɛ yèé àŋa ká-ŋa mú ɔwɔ́-ŋa, tsí ń tse#ɛ́. 42Ńbɛ̀ɛ́, Ɔ̀ɖáyé nyí ànyì kã̀ ŋá, tsí dzɔ̀ɔ́ ŋa fú àrã̀wo ŋa sísɛ̃̀. Ó lɔ bɛ́ɛ̀ ti nára-kíbí agbáfɔ̀-Ɔ̀ɖáyé fɔ̀ ŋa kɔɔ́ si ńǹwé-ŋa#á. Ńnɔ́-ìwé#ɛ́, Ɔ̀ɖáyé wí fú ŋa ní:

“Ɔma-Ìsàràyɛ́lì ŋa, è wà nɔ́ɔ̀ɖã̀ si títí fú ɔɖɔ̃́ ogóòdzì,

tsí è náa kɛ́ ɛrã ŋa òŋu iŋɛ́-òmírɛ̃̀ ŋa, tsí ń tsɛbɔ.

Kíbí è wà tse bɛ́ɛ̀#ɛ́, è ɖédzú èmi ní è wà tsɛbɔ fú#ɛ́ɛ̀?

43Òò, kò tsi èmi ni.

Ó ɖi, è wà kɛ́ iŋɛ Mɔ̀lɔ́kì òŋu ilé‐ɛ̀ kpó rù wérí,

tsí è wà ru iŋɛ Rèfánì gbo yèé wà kíbí àrã̀wo bɛ́#ɛ́.

È tse iŋɛ nyɛ̀ŋɛ̀ ŋa, tsí wà sɛ̃̀ ŋá.

Àtsùgbée bɛ́ɛ̀ ní màa tse tsí à nákó wáa mú ŋɛ́ ńkpá lɔ

títí ńwádzú-ìlú-Bàbìlónì†#ɛ́.”#7:43 Ìwé-Àmɔ́sì 5:25-27 (Amos 5:25-27)

44Tsí Sètèfánì tɔ́ wà wí fú ŋa ró ní: Ńǹwèrè yèé gbágbóǹgbàgbò-àŋa ŋa gbé nɔ́ɔ̀ɖã̀ wáa lɔ#ɛ́, à tse ilé-kã̀ fú Ɔ̀ɖáyé, tsí iŋɛ́ kã̀ŋa wà ńnɔlé#ɛ́, tsí à náa wà nyà ɖíre ní Ɔ̀ɖáyé wà náànyì-ŋa si. Ɔ̀ɖáyé ɖíreé fú Mɔ̀ɔ́sè kíbí nákó tseé gbà#á kpó, tsí ó tseé ńǹrɔ́-kíbí Ɔ̀ɖáyé ɖíreé fúu gbà#á. 45Náànyìwà#á, ɔma-gbágbóǹgbàgbò-àŋa ŋa gbo wáa gba ilé#ɛ́. Ilé#ɛ́ gbé náàŋírĩ-àŋa gbo bɛ́ɛ̀ títí fú ìwèrè yèé Yòsúwà† gbɛ̃́ ŋa, tsí à wáa gba ilɛ̀ ńbí Ɔ̀ɖáyé lé ɔ̀nyà ŋa ǹɖe fú ŋa ní ká gbé#ɛ́. Ó gbé títí fú ìwèrè yèé Ɖàfíɖì† gbo wáa dzɛ ólú#ɛ́. 46Ńbɛ̀ɛ́, iŋɛ́-Ɖàfíɖì dzɔdzú-Ɔ̀ɖáyé, tsí Ɖàfíɖì bere ɔ̀nà ní òŋu nákó malé-kã̀ fú Ɔ̀ɖáyé yèé Yàkúbù sɛ̃̀ wáa lɔ#ɛ́. 47Ó ɖi, ɔma‐ɛ̀ Sàlòmɔ́† ní wáa malé#ɛ́ fú Ɔ̀ɖáyé#ɛ́. 48Ó ɖi, Ɔ̀ɖáyé Oléwo kà gbé ńnɔ́-ilé yèé ɔ̀nyà ŋa náa ma#á. Agbáfɔ̀-Ɔ̀ɖáyé fɔ̀†-kã̀ ti fɔ̀ɔ́ si ní:

49“Ɔlɔ́dzɔ́ ní: Ɔ̀rɔ̃ ní dzɛ́ àntã̀-oyè-mi#ɛ́,

tsí ìtalɛ̀ òŋu dzɛ́ àntã̀ ńbí mà mú ɛsɛ̀ lé#ɛ́.

Ilé-ìrɔ́ mɛ̀ɛ́ è nákó nyáa ma fú mi ní n wáa gbé ńnɛ̀?

Ńbisí è nákó nyáa rí títí kó tó ìɖìgbé fú mi?

50Ɔwɔ́ tèmi ká-mi gìɖì ní tse iŋɛ́ ŋa#á kpó si#ɛ́ nɔ̀.”#7:50 Ìwé-Yèsáyà 66:1-2 (Ésaïe 66:1-2)

51Ńbɛ̀ɛ́, Sètèfánì wà wí fú ɔma-ɛgbɛ́-àkpɛ̀dzɔ́-ɔma-Ìyúɖà ŋa ní: Ɛ̀ɖɔ̃̀ kã̀ ŋɛ́ gbegbé. Ɛ̀ɖɔ̃̀ kã̀ ŋɛ́ nára-Ɔ̀ɖáyé góró. Ɔ̀nyà yèé ŋa kà gbɔ̃́ɔ̃̀rã̀ fú Ɔ̀ɖáyé#ɛ́ ní è dzɛ́#ɛ́. Kíbí gbágbóǹgbàgbò-ŋɛ́ ŋa gbo gbé gbà wáa lɔ dzɔ̀ɔ́ dzɔ̀ɔ́#ɛ́, bɛ́ɛ̀ ké ní ɛ̀ŋɛ gbo, è wà kɔ̀ ní ɛ̀ŋɛ kàkó gbɔ́ oŋù-Mímí-Ɔ̀ɖáyé†#ɛ́ ńnɛ̀ɛ́. 52Agbáfɔ̀-Ɔ̀ɖáyé fɔ̀ yèésí ŋa bɔ̀, tsí gbágbóǹgbàgbò-ŋɛ́ ŋa kò tsoró bá? Ɔ̀nyà kã̀ŋa náàŋírĩ-ŋa dzíkɔ̀ ti nára-wíwá-ɛnɛ yèé dzɛ́ atsòtítɔ́ gìɖì#ɛ́, tsí à mú ŋa, tsí kpa ŋá nóòkú. Atsòtítɔ́#ɛ́ ní ɛ̀ŋɛ ká-ŋɛ́ gbo, è mú tà, tsí è kpa nóòkú nɔ́mbɛ́#ɛ́. 53Ɛ̀ŋɛ yèé gba ɛkpa-Ɔ̀ɖáyé† gbà ńǹtá-adzítsɛ́-ɔ̀rɔ̃#ɛ́, è kò rɛ̃̀ si nɛ́kpa#á gìɖì.

À ta Sètèfánì nóòkúta kpa nóòkú

54Kíbí ɔ̀nyà-ɛgbɛ́-àkpɛ̀dzɔ́-ɔma-Ìyúɖà ŋa† gbɔ́ afɔ̀ nyɛ̀ŋɛ̀ ŋa#á, inɔ́ bí ŋa gbòkã́, tsí à gbã́rãdzú, tsí wà rɔ̃́ enyí kàkàrà kàkàrà náàtsùgbé-Sètèfánì. 55Kíbí Mímí-Ɔ̀ɖáyé† wà ńǹtá-Sètèfánì si#ɛ́, ó kɛ́ odzú fú ìgbèrí, tsí odzú‐ɛ̀ ta ɔ̀rɔ̃ si. Gbòkã́#á, ó rí mímá-Ɔlɔ́dzɔ́, tsí rí Yèésù gbo, tsí ó ɖóro si náàwóòtã́-Ɔ̀ɖáyé. 56Tsí Sètèfánì ní: È rí gé! Ǹ rí ɔ̀rɔ̃, tsí ó tsí dzɔ̀ɔ́ si, tsí ǹ rí Yèésù, Ɛnɛ yèé ɔ̀nyà bí#ɛ́†, tsí ó ɖóro si náàwóòtã́-Ɔ̀ɖáyé.

57Ńbɛ̀ɛ́, ɛnɛ yèé wà bɛ̀ kpó ŋa, tsí gbɔ́ afɔ̀‐ɛ̀#ɛ́, à ɖúgbe kũkũ, tsí mú ɔwɔ́ ɖetí ní àŋa kó máa gbɔ́ iŋɛ́ yèé ó wà fɔ̀ fú àŋa#á, tsí àŋa kpó, à kpérí bòó gbòkã́, 58tsí lée fùɖá náàŋírĩ-ìlú#ɛ́, tsí kpée títa nóòkúta, tsí ká kpaá. Ɛnɛ ŋa#á bɔ́ ìwɔ̀ra-otútù-ŋà ŋa kpó si ńɖi-idza-kã̀ ní kó wà ɖèé fú àŋa. À náa kpe idza#á ní Sɔ́lù.

59Ńǹwèrè yèé à wà ta Sètèfánì nóòkúta#á, ó wà wúùre, tsí wà fɔ̀ ní: Yèésù Ɔlá-mi, gba mímí-mi.

60Tsí ó kálɛ̀, tsí ɖúgbe kũkũ ní: Ɔlá-mi, máa wo íbàɖí yèé à wà tse#ɛ́. Ó ɖi, ń tɔrɛ fú ŋa.

Kíbí ó wí bɛ́ɛ̀ tã́ gé#ɛ́, mímí‐ɛ̀ dzilɛ̀.

Currently Selected:

Itsɛ́ 7: ngl

Highlight

Copy

Compare